മുഴുവന്‍ കാര്‍ഡുടമകള്‍ക്കും രണ്ടു രൂപയ്ക്ക് അരി
കുട്ടനാട്: ബിപിഎല്‍, എപിഎല്‍ വ്യത്യാസമില്ലാതെ മുഴുവന്‍ കാര്‍ഡുടമകള്‍ക്കും രണ്ടു രൂപയ്ക്ക് അരി നല്‍കുമെന്നു മന്ത്രി തോമസ് ഐസക്. കേരള കര്‍ഷകത്തൊഴിലാളി ക്ഷേമനിധി ബോര്‍ഡിന്റെ ആഭിമുഖ്യത്തില്‍ കര്‍ഷകത്തൊഴിലാളികള്‍ക്ക് 115 കോടി രൂപയുടെ അതിവര്‍ഷാനുകൂല്യ വിതരണം ഉദ്ഘാടനം ചെയ്യുകയായിരുന്നു മന്ത്രി.
ഹൃദ്രോഗം, കിഡ്നിത്തകരാര്‍ തുടങ്ങിയവയ്ക്കു ചികിത്സ തേടുന്നവരെ സഹായിക്കാന്‍ പുതിയൊരു ഇന്‍ഷുറന്‍സ് പദ്ധതിയാരംഭിക്കും. ചികിത്സാനുകൂല്യങ്ങള്‍ നല്‍കുന്നതിനും മുടങ്ങിക്കിടക്കുന്ന വിവിധ ക്ഷേമനിധികളുടെ ആനുകൂല്യങ്ങള്‍ കൊടുക്കുന്നതിനും 1000 കോടി രൂപ കണ്ടെത്തേണ്ടതുണ്ട്. അതിനായി സ്വര്‍ണ വ്യാപാരികളില്‍നിന്നു നികുതി കര്‍ശനമായി
പിരിച്ചെടുക്കും. മണല്‍ മാഫിയ കൊണ്ടുപോകുന്ന മണല്‍ തടയും. കൂടാതെ ഭൂവുടമകള്‍ സെന്റിന് 20 പൈസ പ്രകാരം ഇപ്പോള്‍ നല്‍കിക്കൊണ്ടിരിക്കുന്ന കരം 40 പൈസയായി വര്‍ധിപ്പിക്കും. ഇതു വലിയ ഭൂകമ്പമൊന്നും സൃഷ്ടിക്കേണ്ട കാര്യമല്ല.
കുട്ടനാട് കാര്‍ഷിക പാക്കേജിനു കേന്ദ്രം പണം നല്‍കിയിട്ടു ചെലവഴിച്ചില്ലെന്ന ആക്ഷേപം ശരിയല്ല. പണം വന്നിട്ടില്ല. വരുമെന്ന പ്രതീക്ഷയില്‍ 200 കോടി രൂപ ചെലവഴിക്കുകയാണ്. പണം നല്‍കാതെ കാലതാമസം വരുത്തുന്നതു ക്ഷമിക്കാനാവില്ലെന്നു മന്ത്രി പറഞ്ഞു. എന്നാല്‍ ബണ്ടുകളുടെ നിര്‍മാണത്തിനും എസി കനാല്‍ തുറക്കുന്നതിനുമുള്ള പ്രവൃത്തികള്‍ ചെയ്തിട്ടു രസീതും വൌച്ചറുകളും സഹിതമുള്ള റിപ്പോര്‍ട്ട് കേന്ദ്രത്തിനു കൊടുക്കുമ്പോള്‍ കേന്ദ്രം പണം നല്‍കുമെന്നും അതിന്റെയടിസ്ഥാനത്തിലാണ് 200 കോടി രൂപയുടെ പദ്ധതി ആരംഭിച്ചിട്ടുള്ളതെന്നും സംസ്ഥാന സര്‍ക്കാര്‍ത്തന്നെ വ്യക്തമാക്കി നല്‍കിയ നോട്ടില്‍ പറഞ്ഞിട്ടുള്ളതായി ചടങ്ങില്‍ പ്രസംഗിച്ച കൊടിക്കുന്നില്‍ സുരേഷ് എംപി പറഞ്ഞു.
കര്‍ഷകത്തൊഴിലാളി പെന്‍ഷന്‍ 250 രൂപയില്‍നിന്ന് അടുത്ത വര്‍ഷം വീണ്ടും വര്‍ധിപ്പിക്കുമെന്നും അന്യവല്‍ക്കരിക്കപ്പെട്ട അസംഘടിത തൊഴിലാളികളെ ഏതെങ്കിലും ക്ഷേമനിധികളുടെ പരിധിയില്‍ കൊണ്ടുവരുമെന്നും ചടങ്ങില്‍ അധ്യക്ഷത വഹിച്ച മന്ത്രി പി.കെ. ഗുരുദാസന്‍ പറഞ്ഞു. മന്ത്രി കെ.പി. രാജേന്ദ്രന്‍ പ്രസംഗിച്ചു.
ലിങ്ക് – മനോരമ
പത്രവാര്ത്തകള് - യൂണികോഡില് 