Category Archives: കൃഷി

കൊയ്യാന്‍ ആളില്ല: കുട്ടനാട്ടില്‍ 5000 ഏക്കറിലെ നെല്ല് നശിച്ചു

നൂറ്റിയന്‍പത് ദിവസം കഴിഞ്ഞിട്ടും കൊയ്യാനാകാതെ മഴയില്‍ കിളിര്‍ത്ത് നശിച്ച നെല്‍ച്ചെടികളുമായി രാമങ്കരി പറക്കുഴി കിളിരുവാക്കപ്പാടത്തെ കര്‍ഷകന്‍.

കുട്ടനാട്: കൊയ്യാന്‍ തൊഴിലാളികളില്ലാത്തതിനാല്‍ കുട്ടനാട്ടില്‍ 5000 ഏക്കര്‍ പാടശേഖരത്തെ നെല്ല് നശിച്ചു. വിളഞ്ഞ നെല്ല് കൊയ്തെടുക്കാന്‍ കര്‍ഷകത്തൊഴിലാളികളെ ലഭ്യമാക്കുമെന്നു ജില്ലാ ഭരണകൂടം ഉറപ്പുനല്‍കിയിരുന്നെങ്കിലും ഒരു തൊഴിലാളിയെപ്പോലും ലഭിച്ചില്ലെന്നു കര്‍ഷകര്‍ പറയുന്നു. ഉദ്യോഗസ്ഥരും രാഷ്ട്രീയ നേതൃത്വവും തിരഞ്ഞെടുപ്പിന്റെ തിരക്കിലായതോടെ കര്‍ഷകരുടെ ദുരിതം ആരും കാണുന്നില്ല.നെല്ല് കൊയ്യാന്‍ പാകമായ ദിവസം മുതല്‍ മഴ തുടങ്ങി. വെള്ളപ്പൊക്കത്തില്‍ പാടശേഖരങ്ങള്‍ മുങ്ങി. നെല്ല് നശിച്ചു. Continue reading

ഒരു അഭിപ്രായം ഇടൂ

Filed under കാര്‍ഷികം, കൃഷി, കേരളം, വാര്‍ത്ത

നെല്‍വയലുകള്‍ നികത്തിയതിന് അംഗീകാരം നല്‍കാന്‍ നീക്കം

തിരുവനന്തപുരം: സംസ്ഥാനത്ത് നികത്തിയ നെല്‍വയലുകള്‍ക്ക് പിഴ ഈടാക്കി അംഗീകാരം നല്‍കാന്‍ നീക്കം ശക്തമായി. നെല്‍വയല്‍ സംരക്ഷണ നിയമത്തിലെ വ്യവസ്ഥകള്‍ പ്രകാരം നികത്തിയ വയലുകള്‍ പൂര്‍വസ്ഥിതിയിലാക്കണം. എന്നാല്‍ ഇതുചെയ്യാതെ നികത്തിയ വയലുകള്‍ക്ക് മുന്‍കാല പ്രാബല്യത്തോടെ അംഗീകാരം നല്‍കാനാണ് വിവിധ തലങ്ങളില്‍ ആലോചന.
Continue reading

ഒരു അഭിപ്രായം ഇടൂ

Filed under കൃഷി, കേരളം, വാര്‍ത്ത

കൃഷിഭൂമി കോര്‍പറേറ്റ് മുതലാളിമാരുടെ കൈകളില്‍: സായ്‌നാഥ്


കോഴിക്കോട്: കൃഷിഭൂമി കോര്‍പറേറ്റ് മുതലാളിമാരില്‍ എത്തിക്കാനുള്ള ശ്രമമാണ് കേന്ദ്രസര്‍ക്കാര്‍ നടത്തുന്നതെന്ന് മാഗ്സസെ അവാര്‍ഡ് ജേതാവും പ്രശസ്ത പത്രപ്രവര്‍ത്തകനുമായ പി.സായ്നാഥ്.

സൌത്ത് സോണ്‍ ഇന്‍ഷ്വറന്‍സ് എംപ്ളോയീസ് ഫെഡറേഷന്‍ കോഴിക്കോട്ട് സംഘടിപ്പിച്ച ‘ കാര്‍ഷിക പ്രതിസന്ധി, വിലക്കയറ്റം, ഭക്ഷ്യസുരക്ഷ’ സെമിനാര്‍ ഉദ്ഘാടനം ചെയ്യുകയായിരുന്നു അദ്ദേഹം. ഭക്ഷ്യസുരക്ഷ സാധ്യമാക്കാനുള്ള നയങ്ങളാണ് സര്‍ക്കാരിന്റേത്. എന്നാല്‍, ഈനയംമൂലം കാര്‍ഷിക വായ്പയുടെ സിംഹഭാഗവും അംബാനിമാരിലേക്കാണ് എത്തുന്നത്. Continue reading

ഒരു അഭിപ്രായം ഇടൂ

Filed under കാര്‍ഷികം, കൃഷി, വായ്പ, വാര്‍ത്ത, സര്‍ക്കാര്‍, സാമ്പത്തികം

ആദായം കിട്ടേണ്ടത് കര്‍ഷകനു തന്നെ

കാര്‍ഷികരംഗത്ത് ഉത്പാദനം വര്‍ധിച്ചാല്‍ എല്ലാമായി എന്നാണ് പൊതുവെ ധാരണ. വിപണിയില്‍ ധാന്യങ്ങള്‍ കുറഞ്ഞ വിലയ്ക്ക് സുലഭമാകുന്ന അവസ്ഥ സാധാരണ ഉപഭോക്താക്കളുടെ വീക്ഷണത്തില്‍ ക്ഷേമകരം എന്ന വിശേഷണം അര്‍ഹിക്കുന്നതാണ്. ആ സമൃദ്ധിക്ക് പിന്നിലെ അധ്വാനത്തിന്റെയും കയ്പുനീരിന്റെയും കഥകള്‍ ചികഞ്ഞ് മനസ്സിലാക്കാന്‍ അധികമാരും മെനക്കെടാറില്ല. ഈ സാഹചര്യത്തില്‍ കര്‍ഷകര്‍ക്ക് കൂടുതല്‍ ആദായം കിട്ടുമെന്ന് ഉറപ്പിക്കാനാവാതെ ഉണ്ടാകുന്ന ഉത്പാദനവര്‍ധന കാര്‍ഷിക മേഖലയുടെ മൊത്തത്തിലുള്ള വളര്‍ച്ചയുടെ സൂചകമായി കണക്കാക്കാനാവില്ലെന്ന ആസൂത്രണ കമ്മീഷനംഗം അഭിജിത് സെന്നിന്റെ പരാമര്‍ശം സവിശേഷശ്രദ്ധ പതിയേണ്ട ഒന്നാണ്. ഹരിതവിപ്ലവ നാളുകളിലേതില്‍ നിന്ന് വ്യത്യസ്തമായ രീതിയില്‍ പദ്ധതികള്‍ ആസൂത്രണം ചെയ്യേണ്ടതുണ്ടെന്നാണ് ന്യൂഡല്‍ഹിയിലെ കാര്‍ഷിക ഗവേഷണ കൗണ്‍സിലില്‍ ബി. പി. പാല്‍ സ്മാരക പ്രഭാഷണത്തില്‍ അദ്ദേഹം പറഞ്ഞത്. അത്യുത്പാദനശേഷിയുള്ള പുതിയ വിത്തിനങ്ങളുടെയും ആധുനിക കൃഷി സമ്പ്രദായങ്ങളുടെയും ബലത്തില്‍ ഉത്പാദനം കൂടുന്നുണ്ടെങ്കിലും കൃഷിയിടങ്ങളുടെ വിസ്തൃതി ഭയാനകമാംവണ്ണം കുറഞ്ഞുവരുന്നതിന്റെ കാര്യകാരണങ്ങളിലേക്ക് അടിയന്തര ശ്രദ്ധപതിയേണ്ടതിന്റെ ആവശ്യകതയിലേക്കാണ് യഥാര്‍ഥത്തില്‍ അദ്ദേഹം വിരല്‍ ചൂണ്ടുന്നത്.

ഉത്പന്നങ്ങള്‍ക്ക്, കൃഷിച്ചെലവ് കഴിഞ്ഞ് മിച്ചംവെക്കാന്‍ പാകത്തിന് വില കിട്ടിയില്ലെങ്കില്‍ കര്‍ഷകര്‍ പിടിച്ചുനില്‍ക്കാനാവാത്ത അവസ്ഥയിലെത്തുക സ്വാഭാവികമാണ്. ആ സാഹചര്യത്തിലാണ് പലരും കൃഷി ഉപേക്ഷിക്കാന്‍ പോലും തയ്യാറാകുന്നത്. ചിലര്‍ നിലം തരിശാക്കി ഇടുമ്പോള്‍ മറ്റു ചിലര്‍ വയലുകള്‍ നികത്തി കൂടുതല്‍ ആദായകരമായ മറ്റെന്തെങ്കിലും കാര്യത്തിന് ഉപയോഗപ്പെടുത്തുന്നു. അതിന് പഴിക്കേണ്ടത് കര്‍ഷകരെയല്ല. അത്തരം സ്ഥിതിവിശേഷം ഒഴിവാക്കാന്‍ ചുമതലപ്പെട്ട സര്‍ക്കാര്‍ ഏജന്‍സികള്‍ക്കും രാഷ്ട്രീയ നേതൃത്വങ്ങള്‍ക്കും ശാസ്ത്രസമൂഹത്തിനും വരെ അതിന്റെ ഉത്തരവാദിത്വത്തില്‍ നിന്ന് ഒഴിഞ്ഞുമാറാനാവില്ല. ഭക്ഷ്യോത്പാദന രംഗത്ത് രാജ്യത്തെ സ്വയം പര്യാപ്തതയിലേക്കും സമൃദ്ധിയിലേക്കും നയിച്ച ഹരിതവിപ്ലവം പോലും കര്‍ഷകരുടെ വരുമാനവര്‍ധനയ്ക്ക് ഒട്ടും ഊന്നല്‍ നല്‍കിയിരുന്നില്ല എന്ന വസ്തുത കാണാതിരുന്നുകൂടാ. വിളവ് വര്‍ധിപ്പിക്കുക എന്ന ഏകമുഖലക്ഷ്യമാണ് പദ്ധതി നടത്തിപ്പുകാര്‍ക്കെല്ലാം അന്നും ഇന്നും ഉള്ളത്. അതിന്റെ ഫലമായി ഉത്പാദകര്‍ ദരിദ്രരായിത്തന്നെ തുടരുന്നു. കാര്‍ഷിക സാക്ഷരതയുടെ കാര്യത്തിലും അവര്‍ ഏറെ പിന്നിലായി. കൃഷി ശാസ്ത്രജ്ഞരുടെയും ആസൂത്രകരുടെയും ഭാഗത്തുനിന്നുണ്ടായ ഈ വീഴ്ച പരിഹരിക്കാനുള്ള നടപടികള്‍ ഇനിയെങ്കിലും കൈക്കൊള്ളാന്‍ അമാന്തിക്കാതിരുന്നാല്‍ മതി. അതേ ലക്ഷ്യം വെച്ച് സാമ്പത്തിക വിദഗ്ധരുടെ മസ്തിഷ്‌കവും ഉണര്‍ന്ന് പ്രവര്‍ത്തിക്കേണ്ടിയിരിക്കുന്നു.

ഏറെ വൈദഗ്ദ്ധ്യമൊന്നും അവകാശപ്പെടാനില്ലാത്തവര്‍ക്കുപോലും കൃഷിഭൂമിയില്‍ വിജയഗാഥകള്‍ രചിക്കാന്‍ കഴിയുമെന്നതിന് കേരളം തന്നെ സാക്ഷിയാണ്. കോഴിക്കോട് നഗരത്തോട് തൊട്ടുരുമ്മിക്കിടക്കുന്ന വേങ്ങേരിയില്‍ തരിശിട്ടിരുന്ന പത്തേക്കറോളം നെല്‍വയലില്‍ വിളവിറക്കിക്കൊണ്ട് തുടക്കം കുറിച്ച കൂട്ടായ്മ ഒരു ഗ്രാമത്തെയൊന്നാകെ കാര്‍ഷിക, ഭക്ഷ്യ, തൊഴില്‍ മേഖലകളില്‍ സ്വയംപര്യാപ്തതയിലേക്കുയര്‍ത്തിക്കൊണ്ടിരിക്കുന്ന അത്ഭുതകഥ ഇക്കഴിഞ്ഞ ആഴ്ച ‘മാതൃഭൂമി’ വാരാന്തപ്പതിപ്പില്‍ പ്രസിദ്ധീകരിച്ചിരുന്നു. പരമ്പരാഗതകര്‍ഷകരുടെ മാത്രം സഹായത്തോടെ ജൈവകൃഷി സമ്പ്രദായത്തിലൂടെ ധാന്യങ്ങളും പച്ചക്കറികളും കൃഷി ചെയ്ത് വിളവുകള്‍ പരസ്​പരം പങ്കിട്ടെടുക്കുന്ന മാതൃകയാണ് വേങ്ങേരിക്കാര്‍ ലോകസമക്ഷം അവതരിപ്പിക്കുന്നത്. സാമ്പത്തിക, കാര്‍ഷിക, ആസൂത്രണ രംഗത്തെ വിദഗ്ധര്‍ മനസ്സിരുത്തിയാല്‍ കൂടുതല്‍ ഫലം കിട്ടുമെന്നതിന്റെ വ്യക്തമായ സൂചനയാണ് ആ സംരംഭം. ഉത്പാദകരുടെ പ്രാഥമിക സഹകരണ സംഘങ്ങള്‍ വഴി ഉത്പന്നം സംഭരിച്ച് സര്‍ക്കാര്‍ നിയന്ത്രണത്തിലുള്ള സംവിധാനത്തിലൂടെ വിലനിര്‍ണയവും വിപണനവും നടത്തുന്ന ‘മില്‍മ’ മറ്റൊരു മാതൃകയാണ്. ധാന്യ വിളകളുടെ കാര്യത്തിലും എന്തുകൊണ്ട് ആ മാര്‍ഗം പരീക്ഷിച്ചുകൂടാ? വിപണന വിലയുടെ ഏറിയ കൂറും ഉത്പാദകന്റെ കൈവശം തന്നെ എത്തിച്ചേരുന്നു എന്നതാണ് ആ സംവിധാനത്തിന്റെ നേട്ടം. കൃഷിയെ സര്‍വനാശത്തില്‍ നിന്ന് കരകയറ്റാന്‍ ഇത്തരം മാര്‍ഗങ്ങള്‍ ഇനിയും പലതും ഉണ്ടാവും. അതുകണ്ടെത്തി നടപ്പാക്കാനുള്ള മനസ്സുവേണമെന്നുമാത്രം.

ലിങ്ക് – മാതൃഭൂമി

ഒരു അഭിപ്രായം ഇടൂ

Filed under കാര്‍ഷികം, കൃഷി, കേരളം, വാര്‍ത്ത

കീടനാശിനിയായി എന്‍ഡോസള്‍ഫാന്‍; തമിഴ്‌വിളകള്‍ ആശങ്കയുയര്‍ത്തുന്നു

നെയ്യാറ്റിന്‍കര : കേരളത്തിലും വികസിതരാഷ്ട്രങ്ങളിലും നിരോധിച്ച എന്‍ഡോസള്‍ഫാന്‍ കീടനാശിനി ഉപയോഗിച്ച് വിളവെടുക്കുന്ന തമിഴ് കാര്‍ഷിക വിഭവങ്ങള്‍ അതിര്‍ത്തി കടന്ന് കേരളത്തില്‍ നിര്‍ലോഭം വിറ്റഴിക്കപ്പെടുന്നു. തമിഴ്നാട്ടില്‍ നിന്നും വരുന്ന അറവുമാടുകള്‍, പാല്‍ എന്നിവ പരിശോധിക്കാന്‍ അതിര്‍ത്തിയിലെ മൃഗസംരക്ഷ വകുപ്പ് വക ചെക്ക് പോസ്റ്റില്‍ സംവിധാനമുണ്ടെങ്കിലും നിരോധിക്കപ്പെട്ട കീടനാശിനികള്‍ ഉപയോഗിച്ചു കൃഷി ചെയ്യുന്ന വിഭവങ്ങള്‍ കണ്ടെത്താന്‍ കഴിയില്ല. എന്‍ഡോസള്‍ഫാന്‍ ക്യാന്‍സര്‍ ഉള്‍പ്പെടെയുള്ള രോഗം പിടിപെടാന്‍ കാരണമാകുന്നതായി കണ്ടെത്തിയിട്ടുണ്ട്. ഭാവിതലമുറയെ വരെ ബാധിക്കുന്നതാണ് ഇതിന്റെ വിഷാംശമെന്നും ഗവേഷണഫലമുണ്ട്.

ഇതേ തുടര്‍ന്ന് കേരളം ഉള്‍പ്പെടെയുള്ള സംസ്ഥാനങ്ങളില്‍ എന്‍ഡോസള്‍ഫാന്‍ നിരോധിച്ചുവെങ്കിലും തമിഴ്നാട്ടില്‍ കര്‍ശനനിരോധനം ഏര്‍പ്പെടുത്തിയിട്ടില്ലെന്ന് തമിഴ്കര്‍ഷകര്‍ പറയുന്നു. വാഴത്തോട്ടങ്ങളിലും പച്ചക്കറിപ്പാടങ്ങളിലും എന്തിന് നെല്‍പ്പാടങ്ങളില്‍ പോലും കീടനാശിനിയായി ഉപയോഗിക്കുന്നത് ഹാറ്റ് കിറ്റ്, സോഫ്ന എന്‍ഡോസള്‍ഫാന്‍ തുടങ്ങിയവയാണ്. . മധുര,തേനി, തിരുനെല്‍വേലി ജില്ലകളിലെ കൃഷിയിടങ്ങളിലാണ് അധികവും എന്‍ഡോസള്‍ഫാന്‍ ഉപയോഗിക്കുന്നതായി കണ്ടെത്തിയിട്ടുള്ളത്. ഈ സ്ഥലങ്ങളില്‍ നിന്നുമാണ് അധികമായും പച്ചക്കറിയും പഴവര്‍ഗങ്ങളും കേരളത്തിലേക്ക് എത്തുന്നതും.

വ്യാപകമായി വിറ്റഴിക്കപ്പെടുന്ന തണ്ണിമത്തനും കൂടുതലായി കൃഷി ചെയ്യുന്നത് മധുര പ്രദേശത്താണ്. തമിഴ്നാട്ടില്‍ നിന്നും വരുന്ന പഴം-പച്ചക്കറി എന്നിവയില്‍ എന്‍ഡോസള്‍ഫാന്റെ അംശം അടങ്ങിയിട്ടുണ്ടോയൊന്ന് പരിശോധിക്കുവാന്‍ അധികൃതര്‍ തയ്യാറാവണമെന്ന് ആവശ്യം ഉയര്‍ന്നിട്ടുണ്ട്.

ലിങ്ക് – കേരളകൌമുദി

ഒരു അഭിപ്രായം ഇടൂ

Filed under ആരോഗ്യം, കാര്‍ഷികം, കൃഷി, വാര്‍ത്ത

അരി ഉല്‍പാദനം കുറയും: ഐഎസ്ആര്‍ഒ പഠനം

ബാംഗൂര്‍: നടപ്പു സാമ്പത്തിക വര്‍ഷത്തിലെ ഖാരിഫ് സീസണില്‍ അരി ഉല്‍പാദനം ലക്ഷ്യമിട്ടതിലും 19 % കുറെയുമെന്ന് ഐഎസ്ആര്‍ഒ പഠനം. മുന്‍വര്‍ഷവുമായി താരതമ്യം ചെയ്യുമ്പോള്‍ നെല്‍കൃഷി ചെയ്യുന്ന സ്ഥലത്തില്‍ 14 % കുറവുണ്ടായതായും പഠനം വ്യക്തമാക്കുന്നു.
ബിഹാര്‍, ജാര്‍ഖണ്ഡ്, മധ്യപ്രദേശ്, യുപി, ബംഗാള്‍ എന്നിവിടങ്ങളില്‍ മഴ കുറഞ്ഞതും പ്രതികൂലമായി. സിന്തറ്റിക് അപെര്‍ചര്‍ റഡാര്‍ ഉപയോഗിച്ചായിരുന്നു പഠനം.

കേന്ദ്ര ജല കമ്മിഷനുമായി സഹകരിച്ചു വെബ് അധിഷ്ഠിത ജലവിഭവ വിവര സംവിധാനത്തിനും ഐഎസ്ആര്‍ഒ തുടക്കമിട്ടു. ഇന്ത്യ-ഡബ്ള്യുആര്‍ഐഎസ് എന്ന സംവിധാനം രാജ്യത്തെ ജല ലഭ്യത, മറ്റു പ്രകൃതി വിഭവങ്ങളുടെ തോത് തുടങ്ങിയ സുപ്രധാന വിവരങ്ങള്‍ ലഭ്യമാക്കും. വിദൂര സംവേദന സാങ്കേതികവിദ്യ ഉപയോഗിച്ചു ജില്ലാതല വിഭവ ഭൂപട നിര്‍മാണ പദ്ധതിയും നടപ്പാക്കും.
ലിങ്ക് – മനോരമ

ഒരു അഭിപ്രായം ഇടൂ

Filed under കൃഷി, വാര്‍ത്ത

റബ്ബര്‍ കൃഷിചെയ്യാന്‍ നേതാക്കള്‍ക്ക് പടി കൊടുത്തിട്ടും 500 എണ്ണം വെട്ടിനശിപ്പിച്ചു

പത്തനംതിട്ട:പാടം നികത്തി വെച്ച റബ്ബര്‍ത്തൈകള്‍ രണ്ടാമതും നശിപ്പിക്കാതിരിക്കാന്‍ സി.പി.എം. പ്രാദേശികനേതാക്കള്‍ ഭൂവുടമകളില്‍നിന്ന് പണം വാങ്ങിയതായി ആരോപണം. നേതാക്കളുടെ വാക്ക് വിശ്വസിച്ച് രൂപ മുടക്കി രണ്ടാമത് നട്ട അഞ്ഞൂറില്‍പ്പരം തൈകള്‍ പാര്‍ട്ടിപ്രവര്‍ത്തകര്‍തന്നെ വെട്ടിക്കളഞ്ഞു.

എട്ടരമാസം മുമ്പ് മൈലപ്രയില്‍ നടന്ന സംഭവം പാര്‍ട്ടിക്കാരുടെ സമ്മര്‍ദ്ദം കാരണം പുറത്താരും അറിഞ്ഞില്ല. റബ്ബര്‍ത്തൈകള്‍ വെട്ടിക്കളഞ്ഞവര്‍ക്കെതിരെ നടപടി ആവശ്യപ്പെട്ട് കര്‍ഷകര്‍ പത്തനംതിട്ട സര്‍ക്കിള്‍ ഇന്‍സ്‌പെക്ടര്‍ക്ക് നല്‍കിയ പരാതിയും സ്വാധീനത്തില്‍ കുടുങ്ങി അന്വേഷണമില്ലാതെ അവസാനിച്ചു. ഇക്കാര്യങ്ങള്‍ കാട്ടി കര്‍ഷകര്‍ അന്നുതന്നെ അഡ്വ. കെ.ശിവദാസന്‍ നായര്‍ എം.എല്‍.എ.യ്ക്കും പരാതിയുടെ പകര്‍പ്പ് കൈമാറി. എം.എല്‍.എ.കൂടി പരാതിപ്പെട്ടിട്ടും പോലീസ്‌നടപടി ഉണ്ടായില്ല. അടുത്തകാലത്ത് നടന്ന വെട്ടിനിരത്തല്‍ നിയമസഭയില്‍ എത്തിയതോടെയാണ് സംഭവം പുറത്തുപറയാന്‍ കര്‍ഷകര്‍ ധൈര്യപ്പെട്ടത്.

മൈലപ്ര ചിറ്റക്കാട്ട് പി.എം.മൈക്കിള്‍, ചേരിശ്ശേരില്‍ ബേബിക്കുട്ടി എന്നിവരുടെ റബ്ബര്‍ത്തൈകളാണ് കഴിഞ്ഞ വര്‍ഷം ജൂണില്‍ പിഴുതും വെട്ടിയും നശിപ്പിച്ചത്. 2007 മെയിലാണ് തൈകള്‍ നട്ടത്. തൈ വച്ചതിന്റെ അടുത്തദിവസംതന്നെ ഇവയെല്ലാം പിഴുതുകളഞ്ഞു. കര്‍ഷകരുടെ അന്വേഷണത്തില്‍ സി.പി.എം. പ്രവര്‍ത്തകരാണ് ഇതിനു പിന്നിലെന്ന് കണ്ടെത്തി. വയല്‍ നെല്‍ക്കൃഷി ചെയ്യാനുള്ളതാണെന്ന കാരണം പറഞ്ഞാണ് പ്രാദേശിക പ്രവര്‍ത്തകര്‍ കൃഷി നശിപ്പിച്ചത്.

സി.പി.എമ്മിന്റെ സമ്മതമില്ലാതെ തൈകള്‍ നടാനാകില്ലെന്നു മനസ്സിലാക്കിയ കര്‍ഷകര്‍ നേതാക്കളെ സമീപിച്ചു. അടുത്ത തൈ നടുന്ന സമയം എത്തുമ്പോള്‍ ആലോചിക്കാമെന്നായിരുന്നു മറുപടി. തുടര്‍ന്ന് നേതാക്കള്‍ പണവും വാങ്ങി. എന്നാല്‍ ഇതിന് തെളിവുകളൊന്നും കര്‍ഷകരുടെ പക്കലില്ല.

2008 മെയില്‍ വീണ്ടും തൈകള്‍ നട്ടു. മണ്ണുമാന്തിയന്ത്രംകൊണ്ട് കുഴികുത്തിയാണ് തൈ നട്ടത്. ഒരുവര്‍ഷം കഴിഞ്ഞപ്പോള്‍ 10 അടി ഉയരത്തില്‍ എത്തിയ തൈകള്‍ വെട്ടിക്കളഞ്ഞു. ഇതിനൊപ്പം നട്ട തൈകളില്‍ നശിപ്പിക്കാത്തവയ്ക്ക് ഇപ്പോള്‍ 15 അടിയിലേറെ പൊക്കമുണ്ട്. മുറിച്ച തൈകള്‍ ഇപ്പോള്‍ കിളിര്‍ത്ത് അഞ്ചടിയിലേറെ ഉയരത്തില്‍ ആയിട്ടുണ്ട്. ഒരു തൈക്ക് 40 രൂപയായിരുന്നു വില.

തൈകള്‍ നശിപ്പിച്ചതിന്റെ അടുത്ത ദിവസംതന്നെ സി.ഐ.ക്ക് പരാതി നല്കി. ഒരു പോലീസുകാരന്‍ സ്ഥലത്തെത്തി അന്വേഷണം നടത്തി. പ്രതികളെന്ന് സംശയിക്കുന്ന രണ്ടുപേരെ പിടിച്ചതായും പറഞ്ഞു. എന്നാല്‍ തുടര്‍നടപടികള്‍ ഒന്നുമുണ്ടായില്ല. പാര്‍ട്ടിപ്രവര്‍ത്തകര്‍ ഇടപെട്ട സംഭവം ആയതിനാല്‍ ഇത് പുറത്തുപറയാന്‍ കര്‍ഷകരും ഭയപ്പെട്ടു. സംഭവം സംബന്ധിച്ച് നേരത്തെ പത്തനംതിട്ട സി.ഐ.ക്ക് കൊടുത്ത പരാതിയുടെ പകര്‍പ്പാണ് അഡ്വ. കെ.ശിവദാസന്‍ നായര്‍ എം.എല്‍.എ.യ്ക്ക് നല്‍കിയത്.

ലിങ്ക് – മാതൃഭൂമി

ഒരു അഭിപ്രായം ഇടൂ

Filed under കൃഷി, കേരളം, വാര്‍ത്ത