Monthly Archives: നവംബര്‍ 2007

നെല്‍കൃഷി – കടപ്പാട് മാതൃഭൂമി

തരിശാകുന്നു പാടങ്ങള്‍; ദുരിതമൊഴിയാതെ കര്‍ഷകര്‍

കേരളത്തില്‍ നെല്‍കൃഷിക്ക് നഷ്ടങ്ങളുടെ കണക്ക് മാത്രമേ പറയാനുള്ളൂ. കടുത്ത പ്രതിസന്ധിയിലായ കര്‍ഷകര്‍ പാടശേഖരങ്ങളെ കൂട്ടത്തോടെ കൈയൊഴിയുകയാണ്. പ്രശ്നത്തിന് പരിഹാരം കാണേണ്ടവരാകട്ടെ ഇരുട്ടില്‍ തപ്പുന്നു. ഇതേക്കുറിച്ച് ഒരന്വേഷണം.

വി. ഹരിഗോവിന്ദന്‍

തോരാമഴയത്ത് ചാഞ്ഞുവീണ് നശിച്ചുതുടങ്ങിയ നെല്‍ക്കതിരുകള്‍ക്ക് മുകളില്‍ ട്രാക്ടര്‍ വന്യമായ മുരള്‍ച്ചയോടെ ഓടിത്തുടങ്ങിയപ്പോള്‍ പാടവരമ്പത്തുനിന്ന ലക്ഷ്മണന്റെ മനസ്സു പിടഞ്ഞു. വിളഞ്ഞു പാകമായ ആറേക്കര്‍ വയലാണ് കൊയ്തെടുക്കാനാവാതെ ഉഴുതുമറിക്കേണ്ടി വന്നത്. പാലക്കാട്ട് എലപ്പുള്ളിക്കടുത്ത പള്ളത്തേരിയില്‍ ലക്ഷ്മണന് അതല്ലാതെ വേറെ നിവൃത്തിയില്ലായിരുന്നു.

പാടത്തെ ‘പൊന്മണി’ വിളഞ്ഞ് സ്വര്‍ണനിറമുള്ള കതിരായപ്പോള്‍ മനസ്സുനിറഞ്ഞ ലക്ഷ്മണന്റെ മോഹങ്ങള്‍ തകര്‍ത്തത് നിനച്ചിരിക്കാതെ ആര്‍ത്തലച്ചുപെയ്ത മഴയാണ്. വെയിലുറച്ച് വെള്ളം വാര്‍ന്നപ്പോഴേക്കും ചാഴിശല്യമായി. കൊയ്യാന്‍ ആളെകിട്ടിയതുമില്ല. അതോടെ പ്രതീക്ഷകളെല്ലാം പതിരായി. കൊയ്തെടുത്താല്‍ കൂലിപോലും കിട്ടില്ലെന്ന് ഉറപ്പായതോടെയാണ് പാടത്തേയ്ക്ക് ട്രാക്ടറിറക്കിയത്; രണ്ടാം വിളയ്ക്ക് നിലമൊരുക്കാന്‍. രണ്ടര വര്‍ഷം മുമ്പ് നല്ലൊരു തുകമുടക്കിയാണ് ലക്ഷ്മണന്‍ കൃഷിയിലേക്കിറങ്ങിയത്. ഇത്തവണ കൃഷിയിറക്കാന്‍ മാത്രം മുപ്പത്തയ്യായിരത്തോളം രൂപയായി. അറുപതുപറ പാടത്തുനിന്നും നാലുമാസത്തെ അധ്വാനത്തിന് ഒരു രൂപപോലും കിട്ടിയില്ലെങ്കിലും ലക്ഷ്മണന് കൃഷി ഇട്ടെറിഞ്ഞ് പോവാനാവുന്നില്ല. ‘ലാഭമില്ലെങ്കിലും വേണ്ട….’ ലക്ഷ്മണന്റെ വാക്കുകളില്‍ നിരാശ.

നെല്‍വയലുകള്‍

പാലക്കാട്ടെ തന്നെ പിരായിരിയിലാണ് അടുത്ത കാഴ്ച. ഇവിടെ സ്വന്തം പേരുപോലും പുറത്തുപറയരുതെന്ന് കര്‍ഷകന് നിര്‍ബന്ധം. നാട്ടുകാരുടെ മുന്നില്‍ വെറുതെ നഷ്ടക്കണക്കുകാരനാവേണ്ടല്ലോ.

ഒരേക്കര്‍ വയലിലെ കൊ’് കഴിഞ്ഞപ്പോള്‍ മൂന്നുപറ നെല്ലും പത്ത് താറാമുട്ടയുമാണ് കിട്ടിയത്. നാല്പതാളുകള്‍ കൊയ്തുകൂട്ടിയത് 83 പറ നെല്ല്. രണ്ടു പറവീതം കൂലി കഴിച്ചപ്പോള്‍ ശേഷിച്ചത് വീടിന്റെ തിണ്ണയിലേക്ക് കൂട്ടി. കൊയ്തുകഴിഞ്ഞ പാടത്ത് താറാവിനെ മേയ്ക്കാന്‍ അനുവദിച്ചപ്പോള്‍ കിട്ടിയതാണ് പത്തുമുട്ട.
പള്ളത്തേരിയും പിരായിരിയും ഒരുതരത്തിലല്ലെങ്കില്‍ മറ്റൊരുതരത്തില്‍ കേരളത്തിലെ നെല്‍വയലുകളില്‍ ആവര്‍ത്തിക്കപ്പെടുകയാണ്.

നേരവും കാലവും നന്നായാല്‍ ഭാഗ്യം. മൂന്നു വിളകളും നന്നായാല്‍ ഒരു ഹെക്ടറില്‍ നിന്ന് സര്‍ക്കാറിന്റെ കണക്കനുസരിച്ച് ചെലവ് കഴിച്ച് കര്‍ഷകന്റെ കൈയില്‍ പ്രതിമാസം കിട്ടുക 591 രൂപ മാത്രം. നെല്ലിന് പകരം തെങ്ങായാല്‍ മാസം 1069 രൂപയും വാഴയായാല്‍ 2336 രൂപയും കിട്ടും. കപ്പ നട്ടാല്‍ പോലും 1165 രൂപ കിട്ടും. പിന്നെങ്ങനെ കര്‍ഷകര്‍ നെല്ല് വിതയ്ക്കും? ഒരു ക്ലാസ് ഫോര്‍ ജീവനക്കാരന് പോലും ഇതിന്റെ എത്രയോ ഇരട്ടി കൈയില്‍ കിട്ടുന്നുവെന്നുകൂടി ഓര്‍ത്താല്‍ ചിത്രം പൂര്‍ണമായി. ദുരിതങ്ങള്‍ ആവര്‍ത്തിക്കപ്പെടുകയും ആശ്വാസം പ്രഖ്യാപനങ്ങളില്‍ മാത്രം ഒതുങ്ങുകയും ചെയ്തതോടെ കര്‍ഷകര്‍ വയലുകള്‍ കൂട്ടത്തോടെ ഉപേക്ഷിക്കുകയാണ്.

ഫാം ഇക്കോളജിയും സാമ്പത്തികശാസ്ത്രവും തെറ്റായിട്ടാണ് പോവുന്നതെങ്കില്‍ കൃഷിയിലും കാര്യങ്ങള്‍ വ്യത്യസ്തമാവില്ലെന്ന ഡോ. എം.എസ്. സ്വാമിനാഥന്റെ വാക്കുകള്‍ക്ക് ഇവിടെയാണ് പ്രസക്തി. ഭൂപരിഷ്കരണം വന്ന് പാട്ടവും കുടിയാനും കുടിയിറങ്ങിയ വയലുകള്‍ക്ക് അവസാന രക്ഷയെങ്കിലുംആവുമോ എന്ന ആശയില്‍ പാട്ടക്കൃഷി പുനര്‍ജനിക്കുകയാണ്.

1961_62ല്‍ 7,53,009 ഹെക്ടറില്‍ നെല്‍കൃഷി ചെയ്തിരുന്നു. 2005_06 ആയപ്പോഴേക്കും ഇത് 2,75,742 ഹെക്ടറായി. പ്രതിവര്‍ഷം 40ലക്ഷം ടണ്‍ വേണ്ട സംസ്ഥാനത്തെ ഉത്പാദനം 6.75 ലക്ഷം ടണ്‍ മാത്രം. കഴിഞ്ഞ നാലു പതിറ്റാണ്ടിനിടെ കൃഷി 67 ശതമാനവും ഉത്പാദനം 36 ശതമാനവും കുറഞ്ഞുവെന്ന് സര്‍ക്കാര്‍ രേഖകള്‍ പറയുന്നു.

1967ല്‍ സംസ്ഥാനത്തെ നെല്ലിന്റെ 37ശതമാനം ഉത്പാദിപ്പിച്ചിരുന്ന കുട്ടനാട്ടില്‍ 2003ല്‍ 18 ശതമാനമായിച്ചുരുങ്ങി. ഈ നിലയ്ക്ക്പോയാല്‍ 2020 ആവുമ്പോഴേക്കും കുട്ടനാട്ടില്‍ കൃഷി ഓര്‍മയാവുമെന്ന് ഡോ. സ്വാമിനാഥന്‍ കമ്മീഷന്റെ ആമുഖം പറയുന്നു. നെല്‍വയലുകള്‍ക്ക് പേരുകേട്ട ഓണാട്ടുകരയില്‍ പോലും തരിശിടങ്ങള്‍ പെരുകി.

അടുത്ത പത്തുവര്‍ഷത്തിനകമെങ്കിലും കൃഷി മൂന്നുവിളകളും കൂടി ആറ് ലക്ഷം ഹെക്ടറിലേക്കും ഉത്പാദനം 21ലക്ഷം ടണ്ണിലേക്കും എത്തിക്കാന്‍ ശരിയായി ശ്രമിച്ചാല്‍ കഴിയുമെന്ന് പട്ടാമ്പി കാര്‍ഷിക ഗവേഷണ കേന്ദ്രം മേധാവി ഡോ. പി.വി. ബാലചന്ദ്രന്‍ പറയുന്നു. എങ്കിലേ നമുക്ക് പിടിച്ചു നില്‍ക്കാനാവൂ എന്ന മുന്നറിയിപ്പുകൂടി ഇതിലുണ്ട്. നെല്‍വയലുകളെ ആധാരമാക്കിയുള്ള സാമ്പത്തിക പ്രവര്‍ത്തനങ്ങള്‍ ഇന്ന് തകര്‍ച്ചയിലാണ്. ഉയര്‍ന്ന ഉത്പാദനച്ചെലവ്, കുറഞ്ഞ ഉത്പന്നവില, ചൂഷണം നിലനില്‍ക്കുന്ന കമ്പോളവ്യവസ്ഥ എന്നൊക്കെ ഈ അവസ്ഥയെ വിശേഷിപ്പിക്കാന്‍ സാങ്കേതിക പദാവലി ഉപയോഗിക്കാമെങ്കിലും മാറ്റങ്ങളുടെ കാറ്റിന് കരുത്ത് ഏറെയാണ്. കാണേണ്ടവര്‍ ഇതൊന്നും കണ്ടിട്ടും കാണാത്ത മട്ടിലാണ്. ഇതിനുമൊക്കെ അപ്പുറത്ത് അന്തകവിത്തുകള്‍ പോലെയുള്ള ഭീഷണികള്‍ നെല്‍കൃഷിയിയെ ചൂഴ്ന്ന് നില്‍ക്കുന്നുമുണ്ട്.

26-11-07

വില്‍ക്കാനുണ്ട് വയലുകള്‍

”സ്ഥലം വില്പനയ്ക്ക്…” കേരളത്തിന്റെ എല്ലാ ഭാഗങ്ങളിലും ഈ പരസ്യപ്പലക കാണാം. ഇങ്ങനെ കൈമറിയുന്നതില്‍ വലിയൊരു പങ്കും വയലേലകളാണ്.

ചുളുവിലയ്ക്ക് ഏക്കര്‍കണക്കിന് ഭൂമി ഒന്നിച്ചുവാങ്ങി തുണ്ടുകളാക്കി മുറിച്ച് വിറ്റാല്‍ കിട്ടുന്ന കൊള്ളലാഭമാണ് ഈ രംഗത്തെ മോഹിപ്പിക്കുന്നതാക്കിമാറ്റിയത്. ഇങ്ങനെ ഹൌസിങ് കോളനികളായി മാറുന്ന സ്ഥലങ്ങളില്‍ നല്ലൊരു പങ്കും വര്‍ഷങ്ങള്‍ മുമ്പുവരെ നല്ല വിളവ് നല്‍കിയ വയലുകളായിരുന്നു. റബ്ബര്‍ ഉള്‍പ്പെടെ ലാഭകരമായ കാര്‍ഷികവിളകള്‍ ഉള്ള സ്ഥലങ്ങളൊന്നും ഇത്തരത്തില്‍ പരിണാമത്തിന് വിധേയമായതുമില്ല.പാലക്കാടൊഴികെ കേരളത്തിലെ നഗരപരിസരങ്ങളിലൊന്നും ഇന്ന് നെല്‍വയലുകള്‍ കണികാണാന്‍പോലും കിട്ടില്ല. വ്യവസായവത്കരണത്തിനുവേണ്ടി സര്‍ക്കാര്‍ പൊന്നുംവിലയ്ക്കെടുത്ത പ്രദേശങ്ങളില്‍ നല്ലൊരു പങ്കും വയലേലകളായിരുന്നു.

പാടങ്ങളില്‍ നിന്ന് നഷ്ടം പതിവായതോടെയാണ് നെല്‍ക്കര്‍ഷകര്‍ മറ്റ് വിളകളിലേക്ക് തിരിഞ്ഞത്. ഇതിനെതിരെ കുപ്രസിദ്ധമായ വിളവെട്ടിനശിപ്പിക്കല്‍ സമരങ്ങളും അവയില്‍ നിന്ന് രാഷ്ട്രീയനേട്ടവുമൊക്കെ ഉണ്ടായി. എന്നാല്‍, നെല്‍ക്കൃഷി നഷ്ടത്തിലാവാനുള്ള സാഹചര്യത്തെക്കുറിച്ച് ചിന്തിക്കാന്‍ ആരും മെനക്കെട്ടില്ല.

അതിവേഗമാണ് പാടശേഖരങ്ങളുടെ രൂപം മാറിയത്. ഈ അവസ്ഥയില്‍ പുതിയ നെല്‍വയല്‍സംരക്ഷണ ബില്ലിലെ വ്യവസ്ഥകള്‍ ഫലത്തില്‍ കര്‍ഷകരെ ദ്രോഹിക്കുന്നവയാവുമെന്ന് ദേശീയ കര്‍ഷകസമാജം ഉള്‍പ്പെടെയുള്ള സംഘടനകള്‍ ആരോപണമുയര്‍ത്തിക്കഴിഞ്ഞു.

കഴിഞ്ഞ പത്തുപതിനഞ്ചു വര്‍ഷമായി കൃഷി നഷ്ടത്തിലാണെന്നും കൃഷിയിടങ്ങള്‍ ഉപയോഗശൂന്യമായെന്നും വരുത്തിത്തീര്‍ക്കാനും സംഘടിതശ്രമം തന്നെയുണ്ടായി. ഇതിന് ഉദ്യോഗസ്ഥരില്‍ നിന്നും രാഷ്ട്രീയ നേതൃത്വത്തില്‍നിന്നും അകമഴിഞ്ഞ സഹകരണവും കിട്ടി.

തൃശ്ശൂര്‍ ജില്ലയിലെ ഏക്കര്‍കണക്കിന് നെല്‍വയലുകള്‍ ഉപയോഗശൂന്യമാണെന്ന മൈനിങ് ആന്‍ഡ് ജിയോളജി വകുപ്പിന്റെ വിവാദ റിപ്പോര്‍ട്ട് മാത്രം മതി ഉദാഹരണത്തിന്. തദ്ദേശസ്ഥാപനങ്ങള്‍ പോലും അറിയാതെ വയലുകള്‍ കുഴിച്ച് മണ്ണെടുപ്പും മണലെടുപ്പും വ്യാപകമായി. തൃശ്ശൂര്‍ ജില്ലയില്‍ ശക്തന്‍ തമ്പുരാന്‍ രൂപകല്പന ചെയ്ത് കൃഷിതുടങ്ങിയ വയലുകള്‍ പോലും ഇങ്ങനെ മണ്ണ് മാഫിയയുടെ കൈയിലായി. മണ്ണെടുപ്പിലൂടെ കേരളത്തിലെ നെല്‍വയലുകള്‍ നശിപ്പിച്ചതിന് പ്രധാനകാരണക്കാര്‍ മൈനിങ് ആന്‍ഡ് ജിയോളജി വകുപ്പാണെന്ന് മൂരിയാട്ടെ നെല്‍വയല്‍ സംരക്ഷണ സമരത്തിന് നേതൃത്വം നല്‍കിയ ‘കര്‍ഷക മുന്നേറ്റ’ത്തിന്റെ ചീഫ് ഓര്‍ഗനൈസര്‍ വര്‍ഗീസ് തൊടുപറമ്പില്‍ ആരോപിക്കുന്നു. വയല്‍ നശിപ്പിക്കലിനെതിരെ കര്‍ഷകര്‍ വിജയംകണ്ട സമരങ്ങളില്‍ ഒന്നായിരുന്നു മൂരിയാട്ടേത്. പക്ഷേ, മറ്റ് മിക്കയിടങ്ങളിലും മറുത്തൊരു വാക്ക് മിണ്ടാന്‍ കര്‍ഷകര്‍ അശക്തരാണ്. വിസ്തൃതമായ വയലില്‍ ഒരറ്റം കുഴിച്ച് മണ്ണെടുത്തുതുടങ്ങുമ്പോഴേക്കും പരിസരത്തെ വയലുകളില്‍ കൃഷി സാധ്യമല്ലാതാകും. അതോടെ തരിശാകുന്ന വയലുകള്‍ കിട്ടിയ വിലയ്ക്ക് കൈമാറാന്‍ കര്‍ഷകര്‍ നിര്‍ബന്ധിതരാകും.

2006ലെ കാര്‍ഷിക സ്ഥിതിവിവരക്കണക്കുകള്‍ പ്രകാരം, സംസ്ഥാനത്ത് നെല്‍വയലുകളുടെ വിസ്തൃതി 2,75,742 ഹെക്ടറിലൊതുങ്ങുന്നു. 1961_62 കാലയളവില്‍ 7,53,009 ഹെക്ടറായിരുന്നു വിസ്തൃതി. 63 ശതമാനമാണ് കുറവുണ്ടായത്. ഉത്പാദനമാകട്ടെ 1961_62 കാലത്ത് 9,88,150 ടണ്‍ ഉണ്ടായിരുന്നത് 2005_06 ആയപ്പോള്‍ 6,29,987 ടണ്ണായി കുറഞ്ഞു. ഉത്പാദന ഇടിവ് 36 ശതമാനം.

യഥാര്‍ത്ഥത്തില്‍ നെല്‍ക്കൃഷി നഷ്ടമാണോ? കേരളം സ്വയം ചോദിക്കേണ്ട ചോദ്യമാണിത്. നെല്‍ക്കൃഷി ഇല്ലാതാവുന്നത് പരാശ്രയത്വത്തിലേക്കുള്ള മറ്റൊരു മാര്‍ഗമാണെന്ന് എം.പി. വീരേന്ദ്രകുമാര്‍ എം.പി. യെപ്പോലുള്ള പ്രമുഖര്‍ മുന്നറിയിപ്പ് നല്‍കുന്നുണ്ട്.

ഉത്പാദനച്ചെലവിന് ആനുപാതികമായ വിലകിട്ടിയാല്‍ ഒരൊറ്റ കര്‍ഷകനും നെല്‍ക്കൃഷി ഉപേക്ഷിക്കില്ലെന്ന് സംസ്ഥാന സര്‍ക്കാറിന്റെ ആദ്യത്തെ കര്‍ഷകോത്തമ പുരസ്കാരം നേടിയ പാലക്കാട് പൊല്‍പ്പുള്ളി ചമ്പ്രോട്ട്കളം വി. വാസുദേവന്‍ സ്വന്തം അനുഭവം സാക്ഷ്യപ്പെടുത്തി പറയുന്നു. പക്ഷേ, നെല്‍ക്കൃഷിയില്‍ നിന്ന് മാന്യമായൊരു വരുമാനം ഇന്ന് കര്‍ഷകന് പ്രതീക്ഷിക്കാനാവില്ല.

നെല്‍വയല്‍_നീര്‍ത്തട സംരക്ഷണബില്ലിന്റെ പരിധിയില്‍ വരുന്ന മേഖലകള്‍

വയനാട് ജില്ലയിലെ മാനന്തവാടി, സുല്‍ത്താന്‍ ബത്തേരി താലൂക്കുകളിലെ ആതി അഥവാ കോരവക്കണ്ടം വയലുകള്‍, കണ്ണൂര്‍ ജില്ലയിലെ കണ്ണൂര്‍, തലശ്ശേരി, തളിപ്പറമ്പ് എന്നീ താലൂക്കുകളിലെ കൈപ്പാട് വയലുകള്‍, ആലപ്പുഴ ജില്ലയിലെ ചേര്‍ത്തല താലൂക്കിലും അമ്പലപ്പുഴ താലൂക്കിലും ഉള്ള കരപ്പുറം പാടങ്ങള്‍, കാസര്‍കോട്, ഹോസ്ദുര്‍ഗ് താലൂക്കുകളിലെ കൊളക്കായി പാടങ്ങള്‍, തൃശ്ശൂര്‍ ജില്ലയിലെ മുകുന്ദപുരം, തൃശ്ശൂര്‍, ചാവക്കാട്, തലപ്പള്ളി താലൂക്കുകളിലും മലപ്പുറത്തെ പൊന്നാനി താലൂക്കിലുമുള്ള കോള്‍ നിലങ്ങള്‍, കുട്ടനാടന്‍ പാടങ്ങള്‍, മലപ്പുറം ഏറനാട് താലൂക്കിലെ പള്ളിയല്‍ പാടങ്ങള്‍, കൊച്ചി, കണയന്നൂര്‍, പറവൂര്‍, കൊടുങ്ങല്ലൂര്‍ മേഖലകളിലെ പൊക്കാളി നിലങ്ങള്‍, പാലക്കാട് ജില്ലയിലെ മുഴുവന്‍ നെല്‍വയലുകള്‍, സംസ്ഥാനത്തെ മധ്യമേഖലയിലെ കുന്നുകളും ഇടയ്ക്കുള്ള കണ്ടങ്ങളും ഇരുപ്പൂനിലങ്ങളും, ഏതെങ്കിലും വന്‍കിട_ചെറുകിട ജലസേചന പദ്ധതിയുടെ ആയക്കെട്ട് പരിധിയിലുള്ള നെല്‍വയലുകള്‍ എന്നിവയെല്ലാം നിര്‍ദിഷ്ട നെല്‍വയല്‍ നീര്‍ത്തട സംരക്ഷണ ബില്ലിന്റെ പരിധിയില്‍ വരുമെന്ന് കരടുബില്ലില്‍ പറയുന്നു. ഈ നിയമം പ്രാബല്യത്തില്‍ വരുന്നതുമുതല്‍ വ്യവസ്ഥകള്‍ക്ക് വിധേയമായല്ലാതെ നെല്‍വയലുകള്‍ക്ക് മാറ്റം വരുത്താന്‍ പാടില്ലെന്നും നിലം തരിശിടാന്‍ പാടില്ലെന്നും വ്യവസ്ഥ ചെയ്യും.

27-11-07
തരിശാകുന്നു പാടങ്ങള്‍; ദുരിതമൊഴിയാതെ കര്‍ഷകര്‍

കേരളത്തില്‍ ഒരു കിലോഗ്രാം നെല്ല് ഉത്പാദിപ്പിക്കാന്‍ ശരാശരി അഞ്ചര മുതല്‍ ആറര വരെ രൂപയാണ് ചെലവ്. അയല്‍പക്കമായ തമിഴ്നാട്ടിലും കര്‍ണാടകത്തിലുമൊക്കെ ഇത് രണ്ടര മുതല്‍ മൂന്നര വരെ രൂപ മാത്രം. കേരളത്തില്‍ ചെലവിന്റെ 60 ശതമാനം വരെ പോകുന്നത് കൂലിയിനത്തിലാണ്. ഉത്പാദനവും ആവശ്യകതയും തമ്മില്‍ വലിയ അന്തരം നിലനില്‍ക്കുമ്പോള്‍ പോലും ചെലവിന് ആനുപാതികമായ വില കര്‍ഷകന് കിട്ടുന്നില്ല. കാര്‍ഷികേതര ഉത്പന്നങ്ങളില്‍ വിലനിര്‍ണയം നടത്തുന്നത് ഉത്പാദകനാണെങ്കിലും കര്‍ഷകന് വിലനിര്‍ണയത്തില്‍ ഒരു പങ്കുമില്ല.

കഴിഞ്ഞ ഒരു ദശകത്തിനകം ഉത്പാദനച്ചെലവ് 600 ശതമാനമാണ് വര്‍ധിച്ചത്. എന്നാല്‍ വിലവര്‍ധന വെറും 90 ശതമാനത്തിലൊതുങ്ങി. ഉത്പാദനക്ഷമത വര്‍ധിപ്പിച്ച് ചെലവ് കുറയ്ക്കാന്‍ നമുക്കായില്ല. ഉത്പാദന ക്ഷമത കൂട്ടാനെന്ന പേരില്‍ നടത്തിയ സാങ്കേതിക അഭ്യാസങ്ങള്‍ വേണ്ടത്ര ഫലപ്രദമായതുമില്ല. ലാഭക്കൊതി മൂത്ത് അമിത രാസവള പ്രയോഗം നടത്തിയത് മണ്ണിന്റെ ജൈവ ഘടന പോലും നശിപ്പിച്ചു.

”ഒരു വണ്ടി നെല്ലിന് 70 രൂപയുണ്ടായിരുന്ന കാലത്ത് 17 രൂപയ്ക്ക് ഒരു പവന്‍ സ്വര്‍ണം കിട്ടിയിരുന്നു. ഇന്ന് രണ്ട് വണ്ടി നെല്ലെങ്കിലും വില്‍ക്കണം ഒരു പവന് കാശൊക്കാന്‍” _ ചിറ്റില്ലഞ്ചേരി കാത്താംപൊറ്റയിലെ എം.കോയു കഴിഞ്ഞ ആറ് ദശകങ്ങളില്‍ വന്ന മാറ്റത്തെ താരതമ്യപ്പെടുത്തുന്നു. അക്കാലത്ത് ആണിന് അഞ്ചിടങ്ങഴി നെല്ലും പെണ്ണിന് നാലിടങ്ങഴിയു മായിരുന്നു കൂലി. ഇന്ന് സര്‍ക്കാര്‍ നിശ്ചയിച്ചതിലും കൂടുതല്‍ കൂലിയും യാത്രാപ്പടിയും ഭക്ഷണവുമൊക്കെ നല്‍കിയിട്ടും നടീലിനും കൊയ്ത്തിനും സമയത്ത് ആളെ കിട്ടാനില്ല. ഒരേക്കര്‍ വയല്‍ കൊയ്യാന്‍ കൊയ്ത്തു യന്ത്രം ഉപയോഗിച്ചാല്‍ 1400 രൂപയോളം ചെലവ് വരും. കൊയ്യുന്നത് തൊഴിലാളികളെ ഉപയോഗിച്ചാണെങ്കില്‍ 4000 രൂപയിലേറെ വരും കൂലി.

കൂലി കൂടുതല്‍ കിട്ടുന്നുണ്ടെങ്കിലും ചേറിലും ചെളിയിലും ഇറങ്ങാന്‍ തയ്യാറാകുന്നവര്‍ കുറഞ്ഞുവരികയാണ്. 18_25 പ്രായക്കാരില്‍ ബഹുഭൂരിപക്ഷവും വേറൊരു തൊഴിലും കിട്ടിയില്ലെങ്കിലും പാടത്തെ പണി വേണ്ടെന്ന മട്ടിലുമാണ്.

വയലില്‍ തൊഴിലാളികള്‍ കുറയുമ്പോഴും കര്‍ഷക തൊഴിലാളി ക്ഷേമനിധി ബോര്‍ഡില്‍ അംഗങ്ങളെ ചേര്‍ക്കാന്‍ അംഗീകൃത തൊഴിലാളി സംഘടനകള്‍ ശരിക്കും പരിശ്രമിക്കുന്നുണ്ട്. 18 _ 55 പ്രായക്കാരായ 16.5 ലക്ഷം ആളുകള്‍ ഇന്ന് കര്‍ഷക തൊഴിലാളി ക്ഷേമനിധിയില്‍ അംഗങ്ങളായുണ്ട്. പാലക്കാട് ജില്ലയിലാണ് ക്ഷേമനിധി അംഗങ്ങള്‍ ഏറ്റവും കൂടുതല്‍; 2.12 ലക്ഷം.

ആവശ്യത്തിന് പണിക്കാരെ കിട്ടാത്തതുമൂലം സംസ്ഥാനത്ത് ഒരിടത്തും സമയത്ത് കൊയ്ത്ത് നടത്താനാവുന്നില്ല. ഇതുമൂലമുള്ള ഉത്പാദന നഷ്ടം തന്നെ 25 ശതമാനത്തോളം വരുമെന്നാണ് കണക്ക്.

തൊഴിലാളിയെ കിട്ടാനില്ലെങ്കിലും ‘ഇല്ലാത്ത’ തൊഴിലാളിയുടെ ക്ഷേമനിധി വിഹിതം അടയ്ക്കേണ്ട ബാധ്യത കൂടി ഇപ്പോള്‍ കര്‍ഷകനുണ്ട്. ഹെക്ടറിന് 30 രൂപ നിരക്കില്‍ 1997 മുതലുള്ള പത്തുവര്‍ഷത്തെ ക്ഷേമനിധി വിഹിതം കര്‍ഷകരില്‍ നിന്ന് കുടിശ്ശിക തീര്‍ത്ത് പിരിച്ചെടുക്കാന്‍ സര്‍ക്കാരിന്റെ നിര്‍ദേശം വന്നുകഴിഞ്ഞു.

തൊഴിലാളി ക്ഷാമം പരിഹരിക്കാന്‍ തൊഴിലാളിയെ കൂടി കര്‍ഷകന്റെ പങ്കാളിയാക്കുന്ന സമീപനം വേണമെന്നാണ് നിര്‍ദേശം. ഇതിന് നിലവിലുള്ള തൊഴില്‍ സംസ്കാരം മാറണം. യന്ത്രവത്കരണം ഏറ്റവും ഫലപ്രദമായി നടപ്പാക്കാനാവുന്ന ഒരു രംഗമാണ് നെല്‍കൃഷി. നടീല്‍ യന്ത്രം മുതല്‍ ചെറുകിട യന്ത്രങ്ങള്‍ ഉപയോഗിച്ച് യന്ത്രവത്കരണം നടപ്പാക്കുകയും മതിയായ പരിശീലനം നല്‍കി തൊഴിലാളികളെ സാങ്കേതിക തൊഴിലാളികളാക്കിയെടുക്കണമെന്നും വിദഗ്ദ്ധര്‍ നിര്‍ദേശിക്കുന്നു.

കൊയ്ത്തു യന്ത്രങ്ങള്‍ വ്യാപകമായിത്തുടങ്ങിയിട്ടുണ്ടെങ്കിലും കേരളത്തില്‍ ഇന്ന് ഇത്തരം യന്ത്രങ്ങള്‍ വേണ്ടത്രയില്ല. വന്‍ മുതല്‍മുടക്ക് വേണ്ട ഇത്തരം യന്ത്രങ്ങള്‍ സര്‍ക്കാര്‍ മുതല്‍മുടക്കി വാങ്ങി അറ്റകുറ്റപ്പണികള്‍ക്കുള്ള സംവിധാനം കൂടി ഉണ്ടാക്കണമെന്ന് കര്‍ഷകര്‍ നിര്‍ദേശിക്കുന്നുണ്ട്.

പട്ടാമ്പിയില്‍ മധ്യമേഖലാ കാര്‍ഷിക ഗവേഷണ കേന്ദ്രം വാങ്ങിയ കൊയ്ത്തു യന്ത്രം മണിക്കൂറിന് വെറും 800 രൂപയ്ക്ക് കര്‍ഷകര്‍ക്ക് വാടകയ്ക്ക് നല്‍കിയിട്ടുപോലും കഴിഞ്ഞ സീസണില്‍ നേടിയത് രണ്ടര ലക്ഷം രൂപയാണ്. തമിഴ്നാട്ടില്‍ നിന്നും ആന്ധ്രയില്‍ നിന്നും എത്തുന്ന കൊയ്ത്തു യന്ത്രങ്ങള്‍ പാതയോരത്ത് ആവശ്യക്കാരെ കാത്ത് നിര്‍ത്തിയിട്ടിരിക്കുന്നത് പതിവ് കാഴ്ചയാണ്. ഇതുവഴി ഓരോ കൊയ്ത്തു സീസണിലും ഈ സംസ്ഥാനങ്ങളിലേക്കൊഴുകുന്നത് കോടികളാണ്.

വിത്തിനും വളത്തിനും കീടനാശിനികള്‍ക്കും ചെലവഴിക്കേണ്ടിവരുന്ന തുകയിലും വന്‍ വര്‍ധനവുണ്ടായി. അതത് പ്രദേശങ്ങളില്‍ നിന്ന് നല്ല വിത്ത് സംഭരിച്ച് കര്‍ഷകര്‍ക്ക് നല്‍കാന്‍ പോലും കൃഷി വകുപ്പിന് ആവുന്നില്ല എന്ന പരാതിയും ഉണ്ട്. ഇവിടത്തെ വിത്തിനങ്ങളൊന്നും പറ്റില്ലെന്നും അത്യുത്പാദനശേഷിയുള്ളവ അന്യ സംസ്ഥാനങ്ങളില്‍ നിന്ന് വരുത്തണമെന്നും പറഞ്ഞു പഠിപ്പിച്ച് അധികൃതര്‍ കര്‍ഷകരെ ചൂഷണം ചെയ്യുകയാണെന്ന് കോയമ്പത്തൂര്‍ കാര്‍ഷിക സര്‍വകലാശാലയിലെ ഡീന്‍ ആയിരുന്ന പാലക്കാട്ടെ ഡോ. പി. ചന്ദ്രശേഖരന്‍ കുറ്റപ്പെടുത്തുന്നു. പുറത്തുനിന്നുവന്ന വിത്തുകള്‍ക്ക് ആറുതവണ വരെ കീടനാശിനി പ്രയോഗം വേണ്ടിവന്നു. രാസവളങ്ങളുടെ വിലക്കയറ്റം താങ്ങാനാവാത്തതായി. ഒപ്പം ആവശ്യത്തിന് കിട്ടാത്ത സ്ഥിതിയും കൂടിവന്നു.

കര്‍ഷകന്റെ ചെലവ് പരമാവധി കുറയ്ക്കുന്ന സാങ്കേതിക വിദ്യയാണ് നമുക്ക് വേണ്ടതെന്നും ഇതിനായി പ്രാദേശിക വിത്തിനങ്ങളുടെ അത്യുത്പാദന ശേഷിയുള്ള സങ്കര ഇനങ്ങള്‍ ഉപയോഗിക്കണമെന്നും ഡോ. ചന്ദ്രശേഖരന്‍ നിര്‍ദേശിക്കുന്നു.

28-11-07
പദ്ധതിപ്രഖ്യാപനങ്ങള്‍ക്ക് നൂറുമേനി

പാലക്കാട്, തൃശ്ശൂര്‍, ആലപ്പുഴ ജില്ലകളിലെ നെല്‍ക്കൃഷിക്കാര്‍ക്ക് പലിശരഹിത വായ്പയും ഭൂവിനിയോഗത്തിന്റെ അടിസ്ഥാനത്തില്‍ നെല്‍ക്കര്‍ഷകര്‍ക്ക് ഗ്രീന്‍കാര്‍ഡുമായിരുന്നു ഇടതുമുന്നണി സര്‍ക്കാര്‍ അധികാരത്തില്‍ വന്നയുടനെയുണ്ടായ പ്രഖ്യാപനങ്ങള്‍. കര്‍ഷകര്‍ക്ക് ഏറെ ആശ്വാസം പകര്‍ന്നു ഈ വാക്കുകള്‍. നെല്‍ക്കൃഷി വികസനത്തിന് കേരളശ്രീ പദ്ധതി നടപ്പാക്കുമെന്നും പ്രഖ്യാപനമുണ്ടായി. ഈ പ്രഖ്യാപനങ്ങളുടെ സ്ഥിതിയെന്തെന്നു മാത്രം ഇന്നും ആര്‍ക്കും അറിയില്ല.
നെല്‍വയലുകളെക്കുറിച്ചുള്ള പദ്ധതിപ്രഖ്യാപനങ്ങള്‍ക്ക് എന്നും നൂറുമേനിയാണ്. പ്രഖ്യാപനങ്ങളൊക്കെ കേട്ടതിനേക്കാള്‍ വേഗത്തില്‍ മറക്കാനുള്ളതാണെന്നും അനുഭവത്തിലൂടെ കര്‍ഷകര്‍ പഠിച്ചുകഴിഞ്ഞു.
കുട്ടനാട്ടിലെ നെല്‍ക്കൃഷിമേഖലയെക്കുറിച്ച് പഠിച്ച് റിപ്പോര്‍ട്ട് സമര്‍പ്പിക്കാന്‍ മാത്രം ഇതുവരെയും വന്നു പോയത് പതിമൂന്നു കമ്മീഷനുകളാണ്. റിപ്പോര്‍ട്ടുകളിലെ നിര്‍ദേശങ്ങള്‍ എത്രമാത്രം പരിഗണിക്കപ്പെട്ടുവെന്ന കാര്യത്തില്‍ കര്‍ഷകര്‍ക്ക് സംശയമുണ്ട്.
കേരളപ്പിറവിക്കുശേഷം ഇത്രയേറെ കാര്‍ഷിക വികസന പദ്ധതികള്‍ നടപ്പാക്കിക്കഴിഞ്ഞിട്ടും മൌലിക പ്രശ്നങ്ങള്‍ ഉത്തരമില്ലാതെ തുടരുകയാണെന്ന് നിയമസഭയുടെ സബ്ജക്ട് കമ്മിറ്റി അംഗം എം.വി. ശ്രേയാംസ്കുമാര്‍ എം.എല്‍.എ. അഭിപ്രായപ്പെടുന്നു.

കാര്‍ഷിക വികസനത്തിന് സുസ്ഥിരമായ പദ്ധതികള്‍ ഒന്നും കൊണ്ടുവരാനായില്ല. പകരം, അപ്പപ്പോഴത്തെ പ്രശ്നം പരിഹരിക്കുക മാത്രമായിരുന്നു ലക്ഷ്യം. വര്‍ഷങ്ങളായി പറഞ്ഞുകേള്‍ക്കുന്ന പദ്ധതികളുടെ തുടര്‍ പദ്ധതികളല്ലാതെ പുതിയതൊന്നും അവകാശപ്പെടാനോ ശാസ്ത്രീയകൃഷിരീതികള്‍ അവലംബിക്കാനോ ശ്രമമുണ്ടായില്ല. അറുപത് ലക്ഷത്തിലേറെപ്പേര്‍ നേരിട്ടാശ്രയിക്കുന്ന കാര്‍ഷിക മേഖലയ്ക്കുള്ള പദ്ധതിവിഹിതം താരതമ്യേന കുറവുമാണ്.
കഴിഞ്ഞ കുറെ വര്‍ഷങ്ങളിലെ കാര്‍ഷിക മേഖലയ്ക്കുള്ള പദ്ധതിവിഹിതം, അതിന്റെ വിനിയോഗം, പദ്ധതി വിഹിതം ചെലവഴിക്കാനുപയോഗിച്ച പദ്ധതിയിതര തുക, മൂലധന നിക്ഷേപം എന്നിവ പരിശോധിച്ചാല്‍ മാത്രം നെല്‍ക്കൃഷിക്ക് നാം നല്‍കിയ ‘മഹത്തായ’ സംഭാവന വ്യക്തമാകുമെന്നും എം.എല്‍.എ. പറഞ്ഞു.
സമയബന്ധിതമായി പദ്ധതികള്‍ ആസൂത്രണം ചെയ്ത് നടപ്പാക്കുന്നതിലെ കുറ്റകരമായ അനാസ്ഥ ശിക്ഷാര്‍ഹം തന്നെയാണ്. പദ്ധതിവിഹിതത്തിന്റെ സിംഹഭാഗവും സാമ്പത്തിക വര്‍ഷം അവസാനിക്കുന്ന മാര്‍ച്ചില്‍ ചെലവഴിച്ച് തീര്‍ക്കുകയാണ് പതിവ്. നബാര്‍ഡ് ഉള്‍പ്പെടെയുള്ളവയുടെ സഹകരണത്തോടെ പദ്ധതികളൊന്നും നടപ്പാക്കിയെടുക്കാനും ശ്രമമുണ്ടാവുന്നില്ല. കേന്ദ്രാവിഷ്കൃത പദ്ധതികള്‍ക്കായി മറ്റ് സംസ്ഥാനങ്ങളെപ്പോലെ ശക്തമായ ഇടപെടലുകള്‍ നടത്താന്‍ കേരളത്തിലെ രാഷ്ട്രീയ, ഭരണ നേതൃത്വങ്ങള്‍ക്ക് കഴിയാതെ പോകുന്നു. ഇതിന് ഏറ്റവും നല്ല ഉദാഹരണം കേന്ദ്രത്തിന്റെ ഭക്ഷ്യസുരക്ഷാമിഷന്‍ പദ്ധതിയില്‍ കേരളം ഉള്‍പ്പെടാതെ പോയതാണ്.
ആദ്യത്തെ ജില്ലാ പഞ്ചായത്തിന്റെ കാലത്ത് പാലക്കാട്ടെ തേങ്കുറുശ്ശിയില്‍ നടപ്പാക്കിയ ഗാലസ (ഗ്രൂപ്പ് അപ്രോച്ച് ഫോര്‍ ലോക്കലി അഡാപ്റ്റഡ് ആന്‍ഡ് സസ്റ്റൈനബിള്‍ അഗ്രിക്കള്‍ച്ചര്‍) വന്‍ വിജയമാണെന്ന് അവകാശപ്പെട്ടിരുന്നുവെങ്കിലും പിന്നീട് ഈ പദ്ധതി ധൈര്യപൂര്‍വം ഏറ്റെടുത്തുനടത്താന്‍ അതിനു പിന്നില്‍ പ്രവര്‍ത്തിച്ചവര്‍ക്ക് കഴിയാതെ പോയി. ഇത്തരം മാതൃകാ പദ്ധതികള്‍ ഏറ്റെടുത്തു നടത്താന്‍ തദ്ദേശ സ്ഥാപനങ്ങളുടെ ഭാഗത്തുനിന്ന് കൂട്ടായ ശ്രമമുണ്ടായില്ലെന്ന് ജില്ലാ പഞ്ചായത്ത് പ്രസിഡന്റായിരുന്ന കെ.വി. വിജയദാസ് പറയുന്നു. സംസ്ഥാനത്തിന്റെ വിവിധ ഭാഗങ്ങളില്‍ പ്രാദേശികമായി വിജയം കണ്ട പദ്ധതികള്‍ മിക്കതിന്റേയും അവസ്ഥ ഇതിനു സമാനമാണ്.
നെല്‍ക്കൃഷി മേഖലയില്‍ വിവിധ വകുപ്പുകളുടെ ഏകോപിച്ചുള്ള പ്രവര്‍ത്തനമില്ലാത്തത് ഗുണഫലം കപ്പിനും ചുണ്ടിനുമിടയില്‍ നഷ്ടപ്പെടുന്നതിനിടയാക്കുന്നുണ്ടെന്ന് സ്വാമിനാഥന്‍ കമ്മീഷന്‍ റിപ്പോര്‍ട്ടില്‍ പറയുന്നു. പദ്ധതികള്‍ സമയബന്ധിതമായി നടപ്പാക്കണമെന്നും റിപ്പോര്‍ട്ട് നിര്‍ദേശിക്കുന്നു. കുട്ടനാട്ടുകാര്‍ക്ക് അവസാന പ്രതീക്ഷയായി വന്ന ഈ റിപ്പോര്‍ട്ട് പോലും യഥാസമയം കേന്ദ്രത്തിന് സമര്‍പ്പിച്ച് അംഗീകാരം നേടിയെടുക്കാനായിട്ടില്ല. 1839.75 കോടിയുടെ പുനരുദ്ധാരണ പദ്ധതികള്‍ നിര്‍ദേശിക്കുന്ന എം.എസ്. സ്വാമിനാഥന്റെ റിപ്പോര്‍ട്ടിന് കേന്ദ്ര സര്‍ക്കാര്‍ അര്‍ഹമായ പരിഗണന നല്‍കുമെന്ന് ഉറപ്പുണ്ടായിരിക്കെയാണ് ഈ മെല്ലെപ്പോക്ക്. ഈ റിപ്പോര്‍ട്ടിനെ സ്വന്തം വഴിക്കു തിരിച്ചുവിടാന്‍ തത്പര കക്ഷികള്‍ നടത്തുന്ന നീക്കങ്ങള്‍ക്ക് എല്ലാ രാഷ്ട്രീയ പാര്‍ട്ടികളുടേയും പിന്തുണ ഉണ്ടെന്നും നിഷ്പക്ഷരായ കര്‍ഷകര്‍ പറയുന്നു.

29-11-07
കെണിയാവുന്ന കടം

നെല്‍ വയലില്‍ കീടങ്ങളെ ഒടുക്കാന്‍ വാങ്ങിവെച്ച കീടനാശിനി സ്വന്തം ജീവനൊടുക്കാനും ഉപയോഗിക്കേണ്ടിവരുന്ന കര്‍ഷകന്റെ മാനസികാവസ്ഥ എന്താണ്? കര്‍ഷക ആത്മഹത്യകള്‍ പതിവു വാര്‍ത്തയായിക്കഴിഞ്ഞ കേരളം ഇനിയും ഇത്തരമൊരു അന്വേഷണത്തിന് തയ്യാറായിട്ടില്ല. അതേസമയം, അഖിലേന്ത്യാതലത്തില്‍ ഏറെ പഠനങ്ങളും ഉണ്ടായിട്ടുണ്ട്.

വിതയ്ക്കുന്നതുമുതല്‍ കൊയ്തെടുക്കുംവരെ ഓരോ ഘട്ടത്തിലും വായ്പയെ ആശ്രയിച്ചാണ് കര്‍ഷകന്‍ മുന്നോട്ടു പോകുന്നത്. സംസ്ഥാനത്ത് ഏറെ കൊട്ടിഗ്ഘോഷിക്കപ്പെട്ട ഭൂപരിഷ്കരണം ദുരിതം വിതച്ചത് പ്രധാനമായും നെല്‍വയലുകളിലാണ്. നിശ്ചിത ഭൂപരിധിക്കകത്ത് മാത്രം കൃഷിയുണ്ടായിരുന്ന കര്‍ഷക കുടുംബങ്ങളില്‍ ഭൂരിപക്ഷത്തിനും ഇന്ന് രണ്ടുതലമുറ പിന്നിടുമ്പോഴേക്കും കൈയിലുള്ളത് ചെറിയ തുണ്ടു ഭൂമി മാത്രം. ഇത്തരം ചെറു ഭൂമികളില്‍ ഫലപ്രദമായി ശാസ്ത്രീയ കൃഷിരീതികള്‍ അവലംബിക്കാനാവുന്നില്ല. ഏറെ കൊട്ടിഗ്ഘോഷിക്കപ്പെട്ട സഹകരണ കൃഷിയുടെ ശബ്ദംപോലും ഇന്ന് കേള്‍ക്കാനില്ല. നെല്‍ക്കൃഷിക്കാര്‍ അങ്ങനെ കടംകയറി മുടിയാന്‍ വിധിക്കപ്പെട്ടവരായി.

ഈ പരിതസ്ഥിതിയില്‍ കാലാവസ്ഥ ചതിച്ചാല്‍ ഒന്നും കൈയിലില്ലാത്ത അവസ്ഥയിലാവും കര്‍ഷകര്‍. ഇത് കടംവാങ്ങി കൊണ്ടേയിരിക്കാന്‍ കര്‍ഷകനെ നിര്‍ബന്ധിതനാക്കും. കൊയ്ത്തുകഴിഞ്ഞാല്‍ കടം വാങ്ങിയത് തിരികെ കൊടുക്കാന്‍പോലും തികയാത്ത ബാധ്യത വര്‍ഷങ്ങള്‍ കഴിഞ്ഞാലും കര്‍ഷകനെ പിന്തുടരും.

കൃഷികൊണ്ടുമാത്രം ജീവിക്കുന്ന ഒരു കുടുംബമാണെങ്കില്‍ വീട്ടിലെ വിവാഹവും ജനനവും മരണവുമൊക്കെ കടങ്ങളില്‍ നിന്ന് കടങ്ങളിലേക്ക് നയിക്കും. കര്‍ഷകനെ സഹായിക്കാന്‍ ബാധ്യതപ്പെട്ട പൊതു ധനകാര്യ സ്ഥാപനങ്ങളും സഹകരണ സ്ഥാപനങ്ങളും സാങ്കേതിക നൂലാമാലകള്‍ നിരത്തുന്നതോടെ ബ്ലേഡ് സംഘങ്ങളുടെ കെണിയിലാകും കര്‍ഷകന്‍ ചെന്നു വീഴുക. കാര്‍ഷിക കടാശ്വാസ കമ്മീഷന്റെ തെളിവെടുപ്പ് നടന്ന ജില്ലകളില്‍ കര്‍ഷകര്‍ നിരത്തിയ ദുരിത കഥകള്‍ ഏറെയായിരുന്നു.

ദേശസാല്‍കൃത ബാങ്കുകളും ഒട്ടേറെ സഹകരണ സ്ഥാപനങ്ങളും സ്വന്തം കാര്യം നോക്കുക മാത്രമാണ് ചെയ്യുന്നതെന്നും നെല്‍ക്കര്‍ഷകരുടെ കാര്യത്തില്‍ കടുത്ത അനാസ്ഥ കാണിക്കുന്നതായും ഉള്ള ആരോപണത്തിന് ഏറെ പഴക്കമുണ്ട്. ‘കാര്‍ഷിക വായ്പ’യെ സംബന്ധിച്ച് പുനര്‍നിര്‍വചനം വേണമെന്ന് കര്‍ഷകര്‍ വാദിക്കുന്നു. കൃഷി പ്രധാന ജീവിതമാര്‍ഗമായ ആളെ കര്‍ഷകനായി കരുതുകയും അയാളുടെ വായ്പ ആവശ്യങ്ങള്‍ കാര്‍ഷിക വായ്പയായി കരുതണമെന്നുമാണ്ആവശ്യം. പക്ഷേ, തറവാട്ടുവകസ്ഥലത്ത് കൃഷി നടത്തുന്നവനും പാട്ടക്കൃഷിക്കാരനുമൊക്കെ വായ്പ ലഭിക്കുവാന്‍ തടസ്സങ്ങള്‍ ഏറെയാണ്. കര്‍ഷകര്‍ക്ക് വിത്തിനും വളത്തിനും അനുവദിക്കുന്ന സബ്സിഡികളുടെ ഗുണഫലം പോലും പൂര്‍ണമായി കര്‍ഷകനു കിട്ടാത്ത അവസ്ഥയാണ്. കൃഷിഭവനുകള്‍ വഴി കെട്ടിയേല്പിക്കപ്പെടുന്ന ജൈവവളം ഏറ്റെടുക്കാനുള്ള ബാധ്യത കര്‍ഷകര്‍ നിറവേറ്റുന്നതുപോലും കടം വാങ്ങിയ പണം കൊണ്ടുതന്നെ.

കാര്‍ഷിക വായ്പ എഴുതിത്തള്ളുമെന്ന പ്രത്യാശ വളര്‍ത്തുന്ന പ്രഖ്യാപനങ്ങള്‍ വായ്പകളുടെ തിരിച്ചടവിനെപ്പോലും ബാധിക്കുന്നതായി സഹകരണ സ്ഥാപനങ്ങള്‍ പറയുന്നുണ്ട്. വിവിധ പദ്ധതികള്‍ വഴിയുള്ള വായ്പ പുനഃക്രമീകരണവും കര്‍ഷകനെ ദീര്‍ഘകാല കടക്കാരനാക്കി മാറ്റാന്‍ മാത്രമേ സഹായിക്കുന്നുള്ളൂ.

സംസ്ഥാനത്തെ 508 സഹകരണ സംഘങ്ങള്‍ കൃഷിവായ്പ നല്‍കുന്നില്ലെന്ന് സഹകരണമന്ത്രി ജി.സുധാകരന്‍ തന്നെ ചൂണ്ടിക്കാട്ടി. ധനകാര്യ സ്ഥാപനങ്ങളുടെ സഹായം കര്‍ഷകന് വേണ്ടത്രയില്ലെന്നതിന്റെ വ്യക്തമായ തെളിവാണത്.

അതേസമയം, കാര്‍ഷികവായ്പയിലും തരിശിടങ്ങള്‍ പാട്ടക്കൃഷിയിലൂടെ പുനരുജ്ജീവിപ്പിക്കുന്നതിലും കുട്ടനാട്ടില്‍ ഫാ. തോമസ് പീലിയാനിക്കലിന്റെ നേതൃത്വത്തില്‍ രണ്ടു വര്‍ഷം മുമ്പ് കുട്ടനാട് വികസന സമതി തുടങ്ങിവെച്ച പരീക്ഷണം വന്‍ വിജയമായി മാറുകയാണ്. മനംമടുത്ത് കൃഷി ഉപേക്ഷിച്ചവര്‍ പോലും വീണ്ടും കൃഷി തുടങ്ങാന്‍ തയ്യാറായി വന്നുതുടങ്ങിയതായി പീലിയാനിക്കല്‍ അച്ചന്‍ പറഞ്ഞു. കുട്ടനാട്ടുകാരന്‍ കൃഷി ഉപേക്ഷിച്ചാല്‍ പകരം ആരും വരാനില്ലെന്ന തിരിച്ചറിവാണ് വികസന സമിതിയെ ഇതിനു പ്രേരിപ്പിച്ചത്.

കുട്ടനാട്ടിലെ പരീക്ഷണം കഴിഞ്ഞ ഒക്ടോബറില്‍ രണ്ടു വര്‍ഷം പിന്നിട്ടപ്പോള്‍ നൂറ്റമ്പതിലേറെ സംഘങ്ങളിലായി ആയിരത്തിഇരുനൂറിലേറെ കര്‍ഷകര്‍ പാട്ടഭൂമിയില്‍ നെല്ല് വിളയിക്കുന്നു. അറുപതും എഴുപതും ശതമാനം പലിശയ്ക്ക് ബ്ലേഡുകാരില്‍ നിന്ന് വായ്പയെടുത്തു തകര്‍ന്ന കുട്ടനാട്ടിലെ വായ്പസംസ്കാരം മാറ്റിമറിച്ചതാണ് ഈ പരീക്ഷണത്തിന്റെ പ്രധാന നേട്ടം. ഒപ്പം താന്‍ ഒറ്റയ്ക്കല്ലെന്ന തോന്നല്‍ കര്‍ഷകരില്‍ ഉണ്ടാക്കിയെടുക്കാനുമായി.

കേരളമെങ്ങും കര്‍ഷകര്‍ കടക്കെണിയില്‍ ഉഴലുമ്പോള്‍ കുട്ടനാട്ടില്‍ കടമെടുത്ത കര്‍ഷകരില്‍ 90 ശതമാനവും കൃത്യമായി വായ്പതുക തിരിച്ചടയ്ക്കുന്നുവെന്ന് എസ്.ബി.ടി. ശാഖാ മാനേജര്‍ എം. പരമേശ്വരന്‍ സാക്ഷ്യപ്പെടുത്തുന്നു. സഹായസംഘങ്ങളുടെ പിന്തുണയോടെ പാട്ടക്കൃഷിക്ക് ബാങ്ക് വായ്പ നല്‍കുന്നത് ഇത് മൂന്നാം വര്‍ഷമാണ്.

പാട്ടക്കൃഷിയില്‍ കുടുംബശ്രീകളും കഴിവ് തെളിയിച്ച് രംഗത്തുണ്ട്. വനിതകള്‍ നെല്‍ക്കര്‍ഷകരാവുന്നില്ലെന്ന പതിവുകൂടിയാണ് ഇതുവഴി തിരുത്തപ്പെടുന്നത്. പാലക്കാട് ജില്ലയില്‍ മാത്രം 2270 കുടുംബശ്രീ യൂണിറ്റുകള്‍ 4500 ഏക്കറില്‍ കൃഷിയിറക്കുന്നുണ്ട്.

അതേസമയം, കടക്കെണിയില്‍ അകപ്പെട്ട് കര്‍ഷകര്‍ കൃഷിഭൂമിയില്‍നിന്ന് കുടിയിറങ്ങുന്നതും കാത്ത് റീട്ടെയില്‍ കമ്പനികള്‍ കളത്തിനു വെളിയില്‍ തയ്യാറെടുപ്പ് തുടങ്ങിക്കഴിഞ്ഞു. സമൂഹത്തോട് സര്‍ക്കാറിന് ബാധ്യതയുണ്ടാവേണ്ട മേഖലകളാകെ സ്വകാര്യമേഖലയ്ക്ക് കൈമാറാനുള്ള തിരക്കില്‍ കാര്‍ഷികമേഖലയുടെ കാര്യം സകലരും മറക്കുന്നതില്‍ തെല്ലും അത്ഭുതപ്പെടാനില്ല.

30-11-07
കൃഷി നിലനിര്‍ത്തേണ്ട ബാധ്യത ആര്‍ക്ക് ?

പ്രതികൂല പരിതസ്ഥിതികള്‍ക്കിടയിലും നെല്‍വയലുകളെയും കൃഷിയേയും സംരക്ഷിക്കേണ്ട ബാധ്യത ആര്‍ക്കാണെന്ന ചോദ്യം ഇന്ന് ഏറെ പ്രസക്തമാണ്. കൃഷി സംരക്ഷിക്കേണ്ട ബാധ്യത കര്‍ഷകന് മാത്രമാണെന്ന അവസ്ഥയാണിന്നുള്ളത്. കൃഷിയും കര്‍ഷകനും സംരക്ഷിക്കപ്പെടേണ്ടത് സമൂഹത്തിന്റെ ആവശ്യമാണെന്ന ധാരണ ഇനിയും രൂപപ്പെടുത്തിയെടുക്കാനായിട്ടില്ല.

യഥാര്‍ഥ കര്‍ഷകന്‍ ആരെന്ന് ഇനിയും നിര്‍വചിക്കാന്‍ ഇരിക്കുന്നതേയുള്ളൂ. ബഹുഭൂരിപക്ഷത്തിന്റെയും ഏക ഉപജീവനമാര്‍ഗമെന്ന സ്ഥാനം നെല്‍കൃഷിക്ക് ഇന്നില്ല. മറ്റെന്തെങ്കിലും മാന്യമായ വരുമാന മാര്‍ഗമുള്ളവനേ നെല്‍കൃഷി കൊണ്ടുനടക്കാനാകുന്നുള്ളൂ. അതല്ലെങ്കില്‍ കൂടിയ വിസ്തൃതിയില്‍ വയലുകളും ഒപ്പം മറ്റെന്തെങ്കിലും വരുമാനവും കൂടി ഉണ്ടെങ്കിലേ നല്ലനിലയില്‍ ജീവിക്കാനാവൂ.

ഒരേക്കര്‍ വയലില്‍ വിളവിറക്കുന്നതിനേക്കാള്‍ ലാഭം അതുപാട്ടത്തിനു കൊടുക്കുന്നതാണെന്നാണ് പുതിയ കണ്ടെത്തല്‍. പരമ്പരാഗത കര്‍ഷകരില്‍ നല്ലൊരു പങ്ക് കൃഷിയൊഴിയാന്‍ ഇതു കാരണമാവുന്നുമുണ്ട്. പക്ഷേ, ഭൂമി പാട്ടത്തിനുകൊടുത്താല്‍ പഴയ തലമുറ വലഞ്ഞതുപോലുള്ള അവസ്ഥ വന്നുചേരുമോ എന്ന് ഭയക്കുന്നവരും കുറവല്ല. ഇത്തരം ഭീതിമൂലം കാസര്‍കോട് ജില്ലയുള്‍പ്പെടെ പലേടത്തും ഭൂമി പാട്ടത്തിനു കൊടുക്കാന്‍ ആളുകള്‍ തയ്യാറാകുന്നില്ല.

എഴുപതുകളില്‍ സംഭവിച്ച കാര്‍ഷിക വിപ്ലവത്തിന്റെ അലകള്‍ നെല്‍വയലുകളിലും എത്തിയെങ്കിലും അതിന്റെ ഗുണഫലം പൂര്‍ണമായി കൈവരിക്കാനായിട്ടില്ല. ജലസേചന സൌകര്യവും അത്യുത്പാദന ശേഷിയുള്ള വിത്തുകളും രാസവളങ്ങളുമൊക്കെയാണ് ഹരിതവിപ്ലവത്തിന്റെ വിജയത്തിനു ശക്തിപകര്‍ന്നതെങ്കില്‍ രാസവള പ്രയോഗം വര്‍ധിപ്പിച്ച് ഉത്പാദനം കൂട്ടിയതു മാത്രമാണ് കേരളത്തിലെ വയലുകളുടെ പ്രധാന നേട്ടം.

സംസ്ഥാനത്ത് ഏറ്റവുമധികം ഡാമുകളുള്ള പാലക്കാട്ടു പോലും ഒരു ജലസേചന കലണ്ടര്‍ രൂപപ്പെടുത്താന്‍ നമുക്കായിട്ടില്ല. പാതിവഴിയിലുള്ള ജലസേചന പദ്ധതികള്‍ പൂര്‍ത്തിയാവുമ്പോഴേക്കും ആയക്കെട്ട് പ്രദേശത്തെ നല്ലൊരു പങ്ക് വയലുകള്‍ നികത്തിക്കഴിഞ്ഞിരിക്കും. കൃഷിക്കാരുമായി ഏകോപിച്ച് വേണ്ട സമയത്ത് വെള്ളമെത്തിക്കാന്‍ പലപ്പോഴും ജലസേചന വകുപ്പിന് ആവുന്നില്ല. കേരളത്തിലെ നെല്‍കൃഷിയുടെ ശക്തിയും ദൌര്‍ബല്യവും വെള്ളമാണ്. ഇത് തിരിച്ചറിയാന്‍ പോലും നമ്മുടെ ഭരണനേതൃത്വത്തിന് ഇനിയും കഴിഞ്ഞിട്ടില്ല. ഇതിന്റെ ഏറ്റവും വലിയ ഉദാഹരണമാണ് അറ്റകുറ്റപ്പണി സമയത്തിന് നടക്കാത്ത കനാലുകളും കുട്ടനാട്ടിലെ തകര്‍ന്ന ബണ്ടുകളും. കേരളത്തില്‍ ജലസേചന പദ്ധതികള്‍ക്കായി വിനിയോഗിച്ച തുകയും ആയക്കെട്ടിന്റെ വിസ്തൃതിയും കണക്കാക്കിയാല്‍ ഒരേക്കറിന് ശരാശരി ഒന്നരലക്ഷത്തോളം ഇതുവരെയും മുടക്കിക്കഴിഞ്ഞതായാണ് കണക്കുകള്‍. എന്നിട്ടും നാം എവിടെയെങ്കിലും ഫലപ്രാപ്തി കൈവരിച്ചോ?

നെല്‍കൃഷി ലാഭകരമാക്കാന്‍ കാലാവസ്ഥയിലേയും ഭൂപ്രകൃതിയിലേയും പ്രത്യേകതകള്‍ ഉള്‍ക്കൊണ്ട് നെല്ല് അടിസ്ഥാന വിളയായ കൃഷിരീതിയാണ് അവലംബിക്കേണ്ടതെന്ന് കുമരകം മേഖലാ നെല്‍കൃഷി ഗവേഷണ കേന്ദ്രത്തിലെ പ്രൊഫസര്‍ ഡോ.കെ.ജി. പത്മകുമാര്‍ പറയുന്നു. ഒരു കുതിച്ചു ചാട്ടം പ്രതീക്ഷിക്കുന്നതിനു പകരം സംയോജിത കൃഷിരീതിയും വിളപരിക്രമവും വഴി കൂടുതല്‍ നേട്ടങ്ങള്‍ക്കായി ശ്രമിക്കുകയാണ് വേണ്ടതെന്നും അദ്ദേഹം പറഞ്ഞു. ഓരോ പ്രദേശത്തിനും അനുയോജ്യമായ വിളകളുടെ ചേരുവ കണ്ടെത്താനുമാവണം.

കേരളത്തില്‍ നെല്‍കൃഷിക്ക് ഉത്പാദന മേഖല എന്നതിലുപരി നീര്‍ത്തടമെന്ന പ്രാധാന്യം കൂടിയുണ്ട്. ഇത് അംഗീകരിച്ചുവേണം വികസന പദ്ധതികള്‍ ആവിഷ്കരിക്കേണ്ടത്. തൊഴിലുറപ്പ് പദ്ധതി നടപ്പാക്കുന്ന ജില്ലകളില്‍ പോലും ഇത്തരം മുന്‍ഗണനകള്‍ വേണ്ടവിധം നടപ്പാവുന്നില്ല.

കര്‍ഷകന്റെ ഉത്പന്നത്തിന് മികച്ച വില ലഭിക്കാത്ത പ്രശ്നം ഇന്നും സജീവമാണ്. ഈ വര്‍ഷം പ്രഖ്യാപിച്ച സംഭരണ വിലയായ ഒമ്പതുരൂപ ഏറെ സഹായകരമാണെങ്കിലും വടക്കന്‍ ജില്ലകള്‍ക്ക് ഈ ആനുകൂല്യമില്ല. സംഭരണ വിലയുടെ മുഴുവന്‍ ആനുകൂല്യങ്ങളും കര്‍ഷകര്‍ക്ക് കിട്ടുന്നില്ല. നെല്ലിന്റെ സംഭരണ വില ക്വിന്റലിന് എഴുന്നൂറ്റമ്പതുരൂപയായി കേന്ദ്രം ഉയര്‍ത്തി നിശ്ചയിച്ചത് കഴിഞ്ഞ ദിവസമാണ്. കേരളം പ്രത്യേകം താങ്ങുവില പ്രഖ്യാപിക്കുന്നതിന് പകരം കേന്ദ്രം പ്രഖ്യാപിക്കുന്ന വിലയുടെ നൂറ്റമ്പതുശതമാനം അധികമായി നിശ്ചയിച്ച് ഇവിടെ നെല്ല് സംഭരിക്കുന്നത് കൂടുതല്‍ ഗുണം ചെയ്യുമെന്ന് ഡോ. പത്മകുമാര്‍ പറയുന്നു.

എന്നാല്‍ നെല്‍കൃഷിയെ എല്ലാകാലവും താങ്ങിനിറുത്തുന്നതിനെക്കാള്‍ അത് ലാഭകരമായി മാറ്റാനുള്ള നടപടികളാണ് വേണ്ടത്. അരിക്കൊപ്പം മൂല്യവര്‍ധിത ഉത്പന്നങ്ങള്‍ കൂടി കമ്പോളത്തില്‍ എത്തിക്കാന്‍ സംവിധാനമുണ്ടാവണം. നെല്ല് സംഭരണത്തിലെന്നപോലെ മൂല്യവര്‍ധിത ഉത്പന്നങ്ങളുടെ കാര്യത്തിലും പ്രാഥമിക സഹകരണസംഘങ്ങളെ കൂടി ഏകോപിപ്പിക്കുന്നത് ഏറെ ഗുണകരമാവും. ബസുമതി അരിക്ക് ഉയര്‍ന്ന വിലയും വിപണിയും കണ്ടെത്താനായതുപോലെ വയനാടിന്റെ സുഗന്ധ ഇനങ്ങളായ ജീരകശ്ശാല, ഗന്ധകശാല എന്നിവയ്ക്കും പാലക്കാടന്‍ മട്ടയ്ക്കും വിദേശ വിപണി കണ്ടെത്താനാവും. നെല്ലിനും അരിക്കും സംസ്ഥാനത്തിനു പുറത്ത് പ്രത്യേക ഇനമെന്ന നിലയില്‍ പുതിയ വിപണി കണ്ടെത്താനാവും. പക്ഷേ, ഇതിനെല്ലാം യോജിച്ച ദീര്‍ഘവീക്ഷണത്തോടെയുള്ള ശ്രമങ്ങള്‍ വേണം.

ആഭ്യന്തരമായ ഇത്തരം പ്രശ്നങ്ങള്‍ക്കപ്പുറം ‘അന്തക വിത്ത്’ ഉള്‍പ്പെടെയുള്ളവയുടെ പരീക്ഷണത്തിന് പാലക്കാട് അടക്കമുള്ള പ്രദേശങ്ങളിലെ നെല്‍വയലുകള്‍ ലഭ്യമാക്കാന്‍ ബഹുരാഷ്ട്ര കുത്തകകളുടെ ശ്രമം തുടരുകയാണ്. അന്തക വിത്തുകള്‍ പരീക്ഷിക്കുന്നതിന് കേരളം വേദിയായാല്‍ ആദ്യം നശിക്കുന്ന ജില്ല പാലക്കാടാവും. സമൂഹത്തിന്റെ പൊതുസ്വത്തായിരുന്ന വിത്തുകള്‍ കുത്തകകളുടേതായി മാറുകയാണെന്ന് എം.പി.വീരേന്ദ്രകുമാര്‍ പറഞ്ഞു. ആസുരമായ ഉത്പന്നങ്ങള്‍ക്കായി കര്‍ഷകനുമേല്‍ സമ്മര്‍ദം ഏറുകയാണ്. നെല്‍വയലുകള്‍ ഇല്ലാതാവുന്നതോടെ ഭക്ഷ്യസുരക്ഷ അപകടത്തിലാവും. വിത്ത് ഉത്പാദനം വന്‍ വ്യവസായമായി മാറിയ ആധുനിക കാലത്ത് പുതിയ വിത്തുകള്‍ക്ക് ഇല്ലാത്തത് മണ്ണിന്റെ സ്വാദും മണവുമാണ്. വയലുകളില്‍ നിന്ന് ഈ സ്വാദും മണവും നഷ്ടമാവുന്നതോടേ കൃഷി ജീവിതമായിരുന്ന കാലവും ഓര്‍മ്മയാവും.

3അഭിപ്രായങ്ങള്‍

Filed under കൃഷി, കേരളം, ഭക്ഷണം, മാധ്യമം

നവംബര്‍ 24 ശനി

നമ്മുടെ കന്നുകാലികള്‍ മികച്ചതുതന്നെ – ദേവീന്ദര്‍ ശര്‍മ

ഹിമാലയന്‍ മേഖലയിലെ ഗുജ്ജാപ്പുര്‍ ബേക്കര്‍വാള്‍ സമുദായങ്ങള്‍ക്ക് അവരുടെ തദ്ദേശീയ ഇനമായ ചെമ്മരിയാടുകള്‍ ഇല്ലാതാകുന്നത് നികത്താനാവാത്ത നഷ്ടമാണ്. കമ്പിളിയുടെയും മാംസത്തിന്റെയും ഉത്പാദനം വര്‍ധിപ്പിക്കുന്നതിനായി കഴിഞ്ഞ കുറേ വര്‍ഷങ്ങളായി ഓസ്ട്രേലിയയില്‍ നിന്നുള്ള മറീനൊ അടക്കമുള്ള ഇനങ്ങളെ വിദേശത്തു നിന്ന് നിരന്തരം ഇറക്കുമതി ചെയ്തത്, തദ്ദേശീയ ഇനങ്ങളുടെ നാശത്തിന് കാരണമായിരിക്കുന്നു. പര്‍വത പ്രദേശത്തെ കഠിനമായ കാലാവസ്ഥയ്ക്ക്ഏറെ യോജിച്ചതായിരുന്നു തദ്ദേശീയ ചെമ്മരിയാടുകള്‍.
വിദേശ കാലിവര്‍ഗങ്ങളെ ഇറക്കുമതി ചെയ്ത് നാല്പതുവര്‍ഷം കഴിയുമ്പോള്‍ നാം മനസ്സിലാക്കുന്ന വസ്തുത, അതൊരു തെറ്റായ നടപടിയായിരുന്നു എന്നാണ്. ശ്രീനഗര്‍ കേന്ദ്രമായി പ്രവര്‍ത്തിക്കുന്ന ‘ട്രൈബല്‍ സെര്‍ച്ച് ആന്‍ഡ് കള്‍ച്ചറല്‍ ഫൌണ്ടേഷന്‍’ എന്ന സ്ഥാപനം പറയുന്നത് ഈ ഇറക്കുമതി ഇനങ്ങള്‍ ഉദ്ദേശിച്ച ഫലം തന്നില്ല എന്നാണ്. ഇറക്കുമതി ചെയ്ത ഇവയ്ക്ക് നമ്മുടെ കഠിനമായ കാലാവസ്ഥയും സാമൂഹിക സാമ്പത്തിക ചുറ്റുപാടും അതിജീവിക്കാനായില്ല.
നിലവിലുള്ള ചില ആടുകള്‍ക്കും ചെമ്മരിയാടുകള്‍ക്കും ഇപ്പോള്‍ത്തന്നെ വംശനാശം സംഭവിച്ചുകഴിഞ്ഞു. ഗിഡോര്‍ഡ്, പാംഫ്രി, പുഞ്ചിബേക്കര്‍ വാപി, ബാനി, കര്‍ണാഹി തുടങ്ങിയ പരമ്പരാഗത ചെമ്മരിയാട് ഇനങ്ങള്‍ നശിച്ചുകഴിഞ്ഞതായി പഠനങ്ങള്‍ പറയുന്നു. ഗുസിയ, ബെലോറി, ലാമ്ദി, ഗൂസറി തുടങ്ങിയ കോലാടിനങ്ങളും വംശനാശത്തിന്റെ വക്കിലാണ്. മൊത്തം 12ഇനം ചെമ്മരിയാട്_കോലാടുകള്‍ ഇപ്പോള്‍ത്തന്നെ അപ്രത്യക്ഷമായിക്കഴിഞ്ഞു.
ലോകത്തിലെ മൂന്നാമത്തെ വലിയ ജൈവവൈവിധ്യമുള്ള നാടെന്ന് അനുമാനിക്കുന്ന നമ്മുടെ രാജ്യം പരമ്പരാഗത ഇനങ്ങളോട് (അതില്‍ എല്ലാ ജീവികളും അടങ്ങുന്നു) ഒട്ടും ബഹുമാനം കാണിക്കാത്തത് വിശദീകരിക്കപ്പെടാതെ അവശേഷിക്കുന്നു. അത് അക്ഷന്തവ്യമാണ്. പലപ്പോഴും നാം വിശ്വസിക്കുന്നത് നമ്മുടെ ജീവികളുടെ ജനിതക സ്രോതസ് ഉത്പാദനക്ഷമതയും കാര്യക്ഷമതയും ഇല്ലാത്തതാണ് എന്നാണ്. സ്വന്തം നാട്ടിലുള്ളവയെ നാം പുച്ഛിക്കുകയും പുറമേ നിന്നുള്ളവയുടെ ഇറക്കുമതിക്കായി നിരന്തര കാത്തിരിപ്പ് തുടരുകയും ചെയ്യുന്നു. ചെമ്മരിയാടായാലും കോലാടായാലും പശുവായാലും മുയല്‍ ആയാലും കുതിരകളായാലും ഒട്ടകമായാലും എന്തിന് കഴുതയായാല്‍ പോലും സ്ഥിതി ഇതുതന്നെ. പുറത്തു നിന്നുള്ളവയ്ക്കായി നാം എപ്പോഴും അന്വേഷിച്ചുകൊണ്ടിരിക്കുന്നു.
നമ്മുടെ സമ്പന്നമായ ജൈവ വൈവിധ്യത്തെപ്പറ്റി നാം സ്വയം പ്രശംസാ ഗീതങ്ങള്‍ ചൊരിയുന്നു. രാജ്യത്തിനകത്ത് 81,000 ഇനങ്ങളില്‍പ്പെട്ട ജീവികളുണ്ടെന്നാണ് നാം അവകാശപ്പെടുന്നത്. ലോകത്തെവിടെയും ഇത്ര ഇനങ്ങള്‍ കാണില്ല. പുണ്യമൃഗമായ പശുക്കളുടെ കാര്യത്തിലാണ് നാം ഏറ്റവും സമ്പന്നര്‍. എന്നാല്‍ ഒരു രാഷ്ട്രമെന്നനിലയില്‍ വിശുദ്ധ പശുവിന്റെ കാര്യത്തില്‍ നാം ലജ്ജിക്കേണ്ടിയിരിക്കുന്നു. ആരാധിക്കുന്ന സമയത്ത് മാത്രമേ നാം വിശുദ്ധ പശുവിനെക്കുറിച്ച് ആലോചിക്കാറുള്ളൂ. മറ്റ് സമയങ്ങളില്‍ നാം അതിനെ ഉപയോഗശൂന്യമായ ഒരു മൃഗമായേ കാണാറുള്ളൂ. നാം കരുതുന്നത് അതിന് 250 ഓ 500ഓ ഗ്രാം പാലുമാത്രമേ നല്‍കാന്‍ കഴിയൂ അതിനാല്‍ ഹോള്‍സ്റ്റീന്‍ ഫ്രീസിയനോ, ജേഴ്സിയേയോ പുറമെ നിന്ന് ഇറക്കുമതി ചെയ്ത് നമ്മുടെ പശുവുമായി അതിനെ സങ്കരം ചെയ്യിക്കണമെന്നാണ്.
നാല്പത് നാല്പത്തഞ്ച്കൊല്ലം നാം വിശ്വസിച്ചുപോന്നത് നമ്മുടെ പശു ഒന്നിനും കൊള്ളില്ലെന്നാണ്. അതുകൊണ്ട് നാം വിപുലമായതോതില്‍ സങ്കരപ്രക്രിയ ആരംഭിച്ചു. നമുക്ക് 27 ഇനം കന്നുകാലി ഇനങ്ങള്‍ ഉണ്ട്. ഇത്ര പെട്ടെന്ന് ഇവയെല്ലാം എങ്ങനെയാണ് ഉത്പാദനം കുറഞ്ഞതും ഉപയോഗമില്ലാത്തതുമായി മാറിയത്? ഡോ. എം.എസ്. രന്താവാസിന്റെ’ഹിസ്റ്ററി ഓഫ് ഇന്ത്യന്‍ അഗ്രിക്കള്‍ച്ചര്‍’ എന്ന നാലു ഭാഗങ്ങളുള്ള പുസ്തകം വായിച്ചാല്‍ നമുക്ക് മനസ്സിലാവുന്നത് ഒരുകാലത്ത് ഈ കന്നുകാലികളെ രാജാക്കന്മാര്‍ പോലും ആരാധിച്ചിരുന്നുവെന്നും അവയുടെ പങ്കിനെ പ്രശംസിച്ചിരുന്നു എന്നുമാണ്. ഉദാഹരണത്തിന് ‘വെച്ചൂര്‍’ എന്ന അതിശയിപ്പിക്കുന്ന ഒരിനം നമുക്കുണ്ട്. ലോകത്ത് തന്നെ ഏറ്റവും ചെറിയ ഇനമായ ഇവ ഇപ്പോള്‍ ഏറെക്കുറെ അപ്രത്യക്ഷമായിക്കഴിഞ്ഞു. ഒരു ദിവസം രണ്ട് കിലോ കാലിത്തീറ്റയാണ് ഇവയ്ക്കാവശ്യം. എന്നാല്‍ ഇംഗ്ലണ്ടിലെ റീഡിങ് യൂണിവേഴ്സിറ്റിയില്‍ ഇവയെ ഇപ്പോഴും കാണാം. നമ്മുടെ സ്വന്തം ഇനങ്ങള്‍ ഈ നാട്ടില്‍ നിന്ന് അപ്രത്യക്ഷമാവുകയും അവയെ മറ്റ് നാടുകളില്‍ സുരക്ഷിതമായി കാണപ്പെടുകയും ചെയ്യുന്നു എന്നത് അസാധാരണമായി തോന്നുന്നില്ലേ?
ജൈവവൈവിധ്യമോ സാമ്പത്തിക മുതല്‍ക്കൂട്ടോ, എന്തുതന്നെയായാലും ശരി, നമുക്ക് സ്വന്തമായുള്ളതിനെക്കുറിച്ച് നാം ലജ്ജിക്കുകയും വളരാനും ജൈവവൈവിധ്യം വര്‍ധിപ്പിക്കാനുമൊക്കെയുള്ള നല്ല വഴി അമേരിക്കയെയും യൂറോപ്യന്‍ യൂണിയനെയും ആശ്രയിക്കുകയും ചെയ്യുന്നു. ലോകത്തെ ഏറ്റവും വലിയ കാലിസമ്പത്തുള്ള രാജ്യമാണ് ഇന്ത്യ. മുപ്പതുകോടിയോളം വരുമിത്. നമുക്കുണ്ടായിരുന്ന 27 ഇനം കന്നുകാലികളില്‍ പകുതിയോളം നഷ്ടപ്പെട്ടുകഴിഞ്ഞു. ഇപ്പോഴുള്ളതില്‍ 80 ശതമാനവും സങ്കര ഇനങ്ങളുമായുള്ള അമിതമായ ഇണചേര്‍ക്കല്‍ കാരണം ഒന്നിനുംകൊള്ളാത്തതായിക്കഴിഞ്ഞു. ഇപ്പോള്‍ അവ ഏത് ഇനത്തില്‍പ്പെട്ടതാണ് എന്നുപോലും നമുക്കറിയാതായി. ലോകത്ത് ഏറ്റവും കൂടുതല്‍ പാലുത്പാദിപ്പിക്കുന്നത് നാമാണ്. വര്‍ഷം 81 ദശലക്ഷം ടണ്‍ പാലാണ് ഇന്ത്യ ഉത്പാദിപ്പിക്കുന്നത്. പാലുത്പാദനത്തിന്റെ കാര്യത്തില്‍ അമേരിക്ക രണ്ടാംസ്ഥാനത്താണ്. ഇതിനുള്ള ഔദ്യോഗിക വിശദീകരണം പുറത്തുനിന്ന് ഇറക്കുമതിചെയ്ത ഉത്പാദനക്ഷമതയുള്ള കന്നുകാലികളെ നമ്മുടെ ഇനങ്ങളുമായി സങ്കരം ചെയ്താണ് പാലുത്പാദനത്തില്‍ നമുക്ക് ഇത്രയേറെ മുന്നേറാന്‍ കഴിഞ്ഞത് എന്നാണ്.
എന്നാല്‍, നമ്മുടെ പശുക്കള്‍ക്ക് കുഴപ്പം വല്ലതുമുണ്ടോ? അവ യഥാര്‍ഥത്തില്‍ ഉത്പാദനക്ഷമത ഇല്ലാത്തതാണോ? പൂര്‍ണമായും പ്രയോജനമില്ലാത്തതാണോ? ‘തര്‍പാര്‍ക്കര്‍’ എന്ന ഇനത്തെ നോക്കൂ. രാജസ്ഥാനില്‍നിന്നുള്ളവയാണിവ. അവയ്ക്ക് രാജസ്ഥാനിലെ താര്‍ മരുഭൂമി മുഴുവന്‍ സഞ്ചരിക്കാന്‍ കഴിയും. ജേഴ്സിയേയോ ഹോള്‍സ്റ്റീന്‍ഫ്രീസിയനെയോ ഒരു കിലോമീറ്റര്‍ മരുഭൂമിയില്‍ക്കൂടി നടത്തിക്കാന്‍ ശ്രമിച്ചുനോക്കൂ. ഞാന്‍ പറയുന്നത് അപ്പോള്‍ മനസ്സിലാവും. എന്നിട്ടും നമ്മെ പറഞ്ഞു വിശ്വസിപ്പിക്കുന്നത് നമ്മുടെ പശുക്കള്‍ ഗുണമില്ലാത്തതാണെന്നാണ്.
കുറച്ചുനാള്‍ മുമ്പ് ഭക്ഷ്യ_കാര്‍ഷിക സംഘടന (എഫ്.എ.ഒ.)യുടെ ഒരു പഠനം കാണാനിടയായി. കൃഷി ശാസ്ത്രത്തിലെ എന്റെ വിശ്വാസത്തെ പിടിച്ചുകുലുക്കുന്നതായി അത്. ഇന്ത്യന്‍ കന്നുകാലിയിനങ്ങളെ ഏറ്റവും കൂടുതല്‍ കയറ്റി അയയ്ക്കുന്ന രാജ്യമാണ് ബ്രസീല്‍ എന്നതായിരുന്നു അത്. ലോകത്തെ മികച്ച കന്നുകാലി ഇനങ്ങള്‍ സ്വന്തമായുള്ള നാം നോക്കിനില്‍ക്കേ ബ്രസീല്‍ ഇന്ത്യന്‍ ഇനങ്ങളെ കയറ്റി അയയ്ക്കുന്നു എന്നത് ദുഃഖകരമായ വസ്തുതയല്ലേ? എവിടെയോ എന്തോ കുഴപ്പമുള്ളതായി തോന്നുന്നില്ലേ?
നമ്മുടെ ഇനങ്ങളെ ബ്രസീല്‍ വികസിപ്പിക്കുകയും നാം പേടിച്ച് കൈയുംകെട്ടിയിരിക്കുകയും ചെയ്യുന്നത് എന്തുകൊണ്ടാണെന്ന് എനിക്ക് സങ്കല്പിക്കാന്‍ പോലും കഴിയുന്നില്ല. ചില ചരിത്ര പുസ്തകത്തില്‍നിന്ന് മനസ്സിലാക്കാന്‍ കഴിഞ്ഞത് 60_കളില്‍ മാംസത്തിനായി ബ്രസീല്‍ ഇന്ത്യയില്‍നിന്ന് ആറിനം കന്നുകാലികളെ ഇറക്കുമതി ചെയ്തിരുന്നു എന്നാണ്. നമ്മുടെ കന്നുകാലികളില്‍ പലതും കാഴ്ചയില്‍ ഭീമാകാര രൂപമുള്ളതായിരുന്നു. അതിനാല്‍ മാംസത്തിന് ലാഭകരവുമായിരുന്നു. ഇറക്കുമതി ചെയ്ത പശുമാംസം മാത്രമല്ല, നല്ല അളവില്‍ പാലും തരുന്നതായി ബ്രസീലുകാര്‍ മനസ്സിലാക്കി. അവര്‍ രണ്ടുകാര്യത്തിലും ശ്രദ്ധവെച്ചു തുടങ്ങി. ആറിനങ്ങളില്‍ മൂന്നിനം ഗുജറാത്തില്‍നിന്നുള്ള ഗിര്‍, ആന്ധ്രയില്‍ നിന്നും തമിഴ്നാട്ടില്‍ നിന്നുമുള്ള കാംഗ്രെങ്, ഓങ്കോള്‍ എന്നിവ ജഴ്സിക്കും ഹോള്‍സ്റ്റീന്‍ ഫ്രീസിയനും തുല്യമായ തോതില്‍ പാലുത്പാദിപ്പിക്കുന്നു. ഇവയിലൊന്ന് നാം ഇറക്കുമതി ചെയ്യുന്ന രണ്ടിനങ്ങളേക്കാള്‍ കൂടുതല്‍ പാല് നല്കുന്നു. ബ്രസീലില്‍നിന്നും നമ്മുടെ സ്വന്തം കാലി ഇനങ്ങളെത്തന്നെ സമീപ ഭാവിയില്‍ നാം ഇറക്കുമതി ചെയ്തുതുടങ്ങിയാല്‍ ഞാനതില്‍ അത്ഭുതപ്പെടില്ല. നമ്മുടെ നഗരവീഥികളിലൂടെ അലഞ്ഞുതിരിയുന്ന ഉത്പാദനക്കുറവുള്ള പരമ്പരാഗത പശുക്കളെ മെച്ചപ്പെട്ട പാല്‍ നല്കുന്ന ഇനങ്ങളായി മാറ്റാനായി നാം പ്രവര്‍ത്തിച്ചിരുന്നെങ്കില്‍ എന്ന് ഒന്നാലോചിച്ചുനോക്കൂ. പ്രാദേശിക വകഭേദങ്ങള്‍ക്ക് പറ്റുന്ന ഇവ രോഗ, കീടാണുക്കളെ കൂടുതലായി പ്രതിരോധിച്ചേനെ. ഹരിതവിപ്ലവ സാങ്കേതിക വിദ്യ സ്വീകരിക്കുന്നതിനു മുമ്പ് നാം പിന്തുടര്‍ന്ന സംയോജിത കാര്‍ഷിക വ്യവസ്ഥയ്ക്ക് ഏറെ യോജിക്കുന്നവയായേനെ ഇവ.
മൃഗസംരക്ഷണ വകുപ്പോ, കാര്‍ഷിക മന്ത്രാലയമോ കാര്‍ഷിക ഗവേഷണ കൌണ്‍സിലോ എന്തെങ്കിലും പാഠം പഠിച്ചതായി തോന്നുന്നില്ല. രാജ്യം കണ്ട ഏറ്റവും വലിയ ശാസ്ത്രീയ വിഡ്ഢിത്തങ്ങളായി അവ തുടരുന്നു എന്നാണ് ഞാന്‍ മനസ്സിലാക്കുന്നത്. സ്വന്തം സ്വത്വത്തിലേക്ക്, ഒരാത്മപരിശോധനയ്ക്ക് രാജ്യം മുതിരേണ്ട കാലം അതിക്രമിച്ചിരിക്കുന്നു. നമ്മുടെ പരമ്പരാഗത കാലിസമ്പത്തിന്റെ പ്രാധാന്യം മനസ്സിലാക്കി, അവയെ പരിരക്ഷിക്കാനും സാമ്പത്തിക പ്രാധാന്യമുള്ള ഒരു മൃഗമായി മാറ്റാനുമുള്ള പദ്ധതി രാജ്യവ്യാപകമായി പുനരാവിഷ്കരിക്കേണ്ടിയിരിക്കുന്നു.
കടപ്പാട്- മാതൃഭൂമി

ദേശീയ പാതയില്‍ 40 കിലോമീറ്ററിനു ഒരു ടോള്‍
കൊച്ചി: കേന്ദ്ര പദ്ധതി പ്രകാരം കേരളത്തിലെ ദേശീയ പാതകള്‍ ബിഒടി അടിസ്ഥാനത്തി ലാകുമ്പോള്‍ കിലോമീറ്ററിന് 2.08 രൂപ നിരക്കില്‍ ട്രക്കുകള്‍, ബസുകള്‍ എന്നിവയും 60 പൈസ നിരക്കില്‍ കാറിനും ജീപ്പിനും ടോള്‍ ഈടാക്കേണ്ടിവരുമെന്ന് മന്ത്രി മോന്‍സ് ജോസഫ് പറഞ്ഞു.

40 കിലോമീറ്ററിന് ഒരു ടോള്‍ പോയിന്റ് വീതമുണ്ടാകും. കേന്ദ്ര പദ്ധതിയനുസരിച്ച് ദേശീയപാത നിര്‍മാണം പൂര്‍ത്തിയാകുമ്പോള്‍ തുടര്‍നടപടികളെല്ലാം കേന്ദ്രം നിശ്ചയിച്ച മാനദണ്ഡങ്ങള്‍ അനുസരിച്ചാകും. നിര്‍മാണച്ചുമതലയുള്ള കമ്പനികള്‍ 20 വര്‍ഷത്തേക്ക് ദേശീയപാതകള്‍ ഏറ്റെടുത്ത് അറ്റകുറ്റപ്പണി നടത്തും. നിര്‍മാണം സംബന്ധിച്ച വിശദാംശങ്ങള്‍ കേന്ദ്ര സര്‍ക്കാരുമായും ദേശീയ പാത അതോറിറ്റിയുമായും ചര്‍ച്ച ചെയ്യും.

കേരളത്തിന്റെ പ്രശ്നങ്ങള്‍ കേന്ദ്രത്തിനു മുന്‍പില്‍ അവതരിപ്പിക്കും. റോഡുകള്‍ നന്നാക്കാന്‍ സഹായം ചോദിക്കും. ദേശീയപാത 47 ല്‍ തൃശൂര്‍-അങ്കമാലി-ഇടപ്പള്ളി ഭാഗങ്ങള്‍ രണ്ടായിത്തിരിച്ചു നിര്‍മിക്കാന്‍ ടെന്‍ഡര്‍ നടപടിയായി. ദേശീയപാത 47 ന്റെ കേരളത്തിലെ മുഴുവന്‍ ഭാഗവും നന്നാക്കിയശേഷം ദേശീയപാത പതിനേഴും നന്നാക്കും. എംസി റോഡ് വികസനം പുനരാരംഭിക്കാന്‍ ചില കാര്യങ്ങള്‍ തീര്‍പ്പാക്കേണ്ടതുണ്ട്.

അതിനായി മലേഷ്യയിലെ പതിബെല്‍ കമ്പനി പ്രതിനിധികളെ ചര്‍ച്ചയ്ക്കു വിളിച്ചിട്ടുണ്ട്. അവര്‍ വൈകാതെ എത്തുന്നതോടെ ചര്‍ച്ച നടത്തി ജോലികള്‍ പുനരാരംഭിക്കും. തിരുവനന്തപുരം നഗര വികസനം സംബന്ധിച്ച ജോലികള്‍ പുഞ്ജ് ലോയ്ഡ് ആണ് ഏറ്റെടുത്തിരുന്നത്. എന്നാല്‍ ജോലികള്‍ തുടങ്ങുംമുന്‍പ് 85% ഭൂമിയും ഏറ്റെടുത്തുകൊടുക്കാമെന്ന വ്യവസ്ഥ മുന്‍ സര്‍ക്കാര്‍ പാലിക്കാഞ്ഞതാണു പ്രശ്നമായത്. ഇപ്പോള്‍ ഇടതു സര്‍ക്കാര്‍ ഭൂമി ഏറ്റെടുക്കാന്‍ തുടങ്ങി. വൈകാതെ ജോലി തുടങ്ങാനാവുമെന്നാണു പ്രതീക്ഷ.
കടപ്പാട് – മനോരമ

ദേശീയ കര്‍ഷക നയത്തിന് അംഗീകാരം
ന്യൂദല്‍ഹി: എം.എസ്. സ്വാമിനാഥന്‍ കമീഷന്‍ ശിപാര്‍ശകളുടെ ചുവടുപിടിച്ച് ദേശീയ കര്‍ഷക നയത്തിന് സര്‍ക്കാര്‍ അംഗീകാരം നല്‍കി. തുടര്‍ നടപടികള്‍ക്ക് അനുയോജ്യമായ പദ്ധതി തയാറാക്കുന്നതിന് കൃഷി വകുപ്പിന്റെ മേല്‍നോട്ടത്തില്‍ വ്യത്യസ്ത മന്ത്രാലയ തല സമിതി രൂപവത്കരിക്കുമെന്നും കൃഷിമന്ത്രി ശരത്പവാര്‍ ലോക്സഭയില്‍ പ്രസ്താവിച്ചു.
കാര്‍ഷിക മേഖലയെ പുനരുജ്ജീവിപ്പിക്കാനും കര്‍ഷകരുടെ സാമ്പത്തിക നില മെച്ചപ്പെടുത്താനും ഇതു മുഖേന സാധ്യമാകുമെന്ന് പ്രതീക്ഷിക്കുന്നതായി അദ്ദേഹം പറഞ്ഞു. ഉല്‍പാദനക്ഷമത വര്‍ധിപ്പിക്കുക, കൂടുതല്‍ ലാഭം ലഭിക്കുന്ന രീതിയില്‍ വില നയം രൂപപ്പെടുത്തുക, വിള സംരക്ഷണത്തിനാവശ്യമായ സംവിധാനം എന്നീ നടപടികള്‍ പുതിയ നയത്തിന്റെ ഭാഗമായുണ്ടാകും. ലഭ്യമായ ഭൂമിയും ജലവും മറ്റു വിഭവങ്ങളും കാര്യക്ഷമമായി ഉപയോഗപ്പെടുത്തി വിവിധ കാലാവസ്ഥകള്‍ക്ക് അനുയോജ്യമായ കൃഷി രീതികളിലൂടെ ഉല്‍പാദന ക്ഷമത വര്‍ധിപ്പിക്കാനാവശ്യമായ നൂതന രീതികളാണ് സ്വാമിനാഥന്‍ കമീഷന്‍ ശിപാര്‍ശ ചെയ്തിരുന്നത്.
വിദ്യാ സമ്പന്നരായ ചെറുപ്പക്കാരെ കാര്‍ഷികവൃത്തിയിലേക്ക് ആകര്‍ഷിക്കാനാവശ്യമായ നടപടികളും നിര്‍ദേശിച്ചു. രാജ്യത്ത് ഭക്ഷ്യപോഷകാഹാര സുരക്ഷ ഉറപ്പുവരുത്താനാവശ്യമായ സമഗ്ര പദ്ധതിയും കമീഷന്‍ സമര്‍പ്പിച്ചിരുന്നു.
കടപ്പാട്- മാധ്യമം

ഇഷ്ടമുള്ള പേ ചാനല്‍ തെരഞ്ഞെടുക്കാന്‍ കേരളത്തിലും സംവിധാനം വരുന്നു
ടെലിവിഷന്‍ പ്രേക്ഷകര്‍ക്ക് ആവശ്യമുള്ള പേ ചാനലുകള്‍ തെരഞ്ഞെടുക്കാനുള്ള സൌകര്യം കേരളത്തിലും ഏര്‍പ്പെടുത്തുന്നു. ടെലികോം റെഗുലേറ്ററി അതോറിറ്റി (ട്രായി)യുടെ കണ്ടീഷണല്‍ എക്സസ് സിസ്റ്റം (കാസ്) എന്ന സംവിധാനം ജനുവരിയോടെ കേരളത്തിലെ പ്രധാന നഗരങ്ങളില്‍ നടപ്പാക്കാനാണ് ഉദ്ദേശിക്കുന്നത്. പുതിയ സംവിധാനം വരുന്നതോടെ ആവശ്യമില്ലാത്ത ചാനലുകള്‍ക്കുള്ള പണം വരിക്കാരന്‍ അടയ്ക്കേണ്ടിവരില്ല. സൌജന്യമായി ലഭിക്കുന്ന ചാനലുകള്‍ക്കു പുറമെ ആവശ്യമുള്ള പേ ചാനലുകള്‍ക്ക് പ്രത്യേകമായി പണം അടച്ചാല്‍ മതിയാകും. 30 ഫ്രീ ചാനലടക്കമുള്ള കണക്ഷന് 77 രൂപയും പേ ചാനല്‍ ഒന്നിന് അഞ്ചുരൂപയും ടാക്സും നല്‍കണമെന്ന് ട്രായി വ്യക്തമാക്കുന്നു.

ഉപയോക്താക്കള്‍ സ്ഥാപിക്കുന്ന സെറ്റ് ടോപ്പ് ബോക്സ്വഴി ഡിജിറ്റല്‍ സിഗ്നല്‍ സ്വീകരിച്ചാണ് ചാനലുകള്‍ തെരഞ്ഞെടുക്കാനാവുക. എടിഎം കാര്‍ഡ് പോലുള്ള സ്മാര്‍ട്ട് കാര്‍ഡ് ഉപയോഗിച്ചാണ് ഈ സംവിധാനം പ്രവര്‍ത്തിപ്പിക്കുക. സെറ്റ് ബോക്സ് സ്ഥാപിക്കുന്നതും കേബിള്‍ കണക്ഷന്‍ നല്‍കുന്നതും സംബന്ധിച്ച് ട്രായി വ്യക്തമായ നിര്‍ദേശം നല്‍കുന്നുണ്ട്. നിലവില്‍ കേബിള്‍ ഓപ്പറേറ്റര്‍മാര്‍ നല്‍കുന്ന പാക്കേജ് അവര്‍ നിര്‍ദേശിക്കുന്ന പ്രതിഫലത്തില്‍ സ്വീകരിക്കേണ്ട സ്ഥിതിയാണുള്ളത്. എഴുപത്തഞ്ചോളം ചാനലുകള്‍ അടങ്ങുന്ന പാക്കേജിന് കേബിള്‍ ഓപ്പറേറ്റര്‍മാര്‍ക്ക് 150 രൂപയാണ് ഉപയോക്താക്കള്‍ നല്‍കുന്നത്്.

ന്യൂഡല്‍ഹി, കൊല്‍ക്കത്ത, ചെന്നൈ നഗരങ്ങളില്‍ പുതിയ സംവിധാനം നടപ്പാക്കിക്കഴിഞ്ഞു. 2010 ഓടെ ടിവി സംപ്രേഷണരംഗം പൂര്‍ണമായും ഡിജിറ്റല്‍ സംവിധാനത്തിലെത്തിക്കാനാണ് ശ്രമം. കാസ് നടപ്പാക്കുന്നതിന്റെ മറവില്‍ കേരളത്തിലേക്ക് കുത്തക കമ്പനികള്‍ കടന്നുവരാനും നീക്കം ആരംഭിച്ചിട്ടുണ്ട്. റിലയന്‍സ്, സണ്‍ ടിവി തുടങ്ങിയ കമ്പനികളാണ് മുന്നില്‍. 75 രൂപക്ക് 75 ചാനല്‍ എന്നാണ് റിലയന്‍സിന്റെ മുദ്രാവാക്യം. കുത്തക കമ്പനികളുടെ കടന്നുവരവ് നിലവില്‍ കേബിള്‍രംഗത്ത് പ്രവര്‍ത്തിക്കുന്നവര്‍ക്ക് കനത്ത ആഘാതമായേക്കും.

‘ബൊക്കെ’ എന്നറിയപ്പെടുന്ന പേ ചാനലുകളുടെ ഒരുമിച്ചുള്ള പാക്കേജും സൌജന്യചാനലുകളുമാണ് ഇപ്പോള്‍ കേബിള്‍വഴി ലഭിക്കുന്നത്. മലയാളത്തിലെ എല്ലാ ചാനലുകളും സൌജന്യമാണ്.ജനപ്രീതിയുള്ള ഒരു പേ ചാനലിനൊപ്പം പ്രിയംകുറഞ്ഞ ചാനലുകളും ചേര്‍ത്ത് പാക്കേജാക്കി വന്‍ തുക ഈടാക്കിയാണ് ടിവി കമ്പനികള്‍ കേബിള്‍ ഓപ്പറേറ്റര്‍മാര്‍ക്കു നല്‍കുന്നത്.

ഓരോ ചാനലിനും പ്രത്യേക വില നല്‍കുന്ന സമ്പ്രദായം വരുന്നതോടെ വരിക്കാര്‍ക്ക് ഏറെ താല്‍പ്പര്യമുള്ള സ്പോര്‍ട്സ്, മറ്റു പ്രത്യേക പരിപാടികള്‍ എന്നിവ സംപ്രേഷണം ചെയ്യുന്ന ചാനലുകള്‍ വന്‍ തുക ഈടാക്കുകയും സാധാരണക്കാര്‍ക്ക് അപ്രാപ്യമാവുകയും ചെയ്യുമെന്ന ആശങ്കയുമുണ്ട്. വിദേശങ്ങളിലെ അനുഭവം ഇതാണ്.
കടപ്പാട്- ദേശാമിമാനി

എയ്ഡഡ് മേഖലയെ തകര്‍ക്കാനുള്ള നീക്കം ചെറുക്കും: മലങ്കര കാത്തലിക് അസോസിയേഷന്‍
തിരുവനന്തപുരം: എയ്ഡഡ് സ്കൂളുകളിലെ നിയമനങ്ങള്‍ പി.എസ്.സിക്കു വിടാനുള്ള നീക്കം സ്കൂള്‍ മാനേജ്മെന്റുകളുടെ അവകാശത്തിലുള്ള കടന്നുകയറ്റമാണെന്ന് മലങ്കര കാത്തലിക് അസോസിയേഷന്‍( എം.സി.എ). സംവരണവ്യവസ്ഥ മൂലം കടുത്ത ദുരിതം അനുഭവിക്കുന്ന മുന്നോക്കക്കാര്‍ക്കും ന്യൂനപക്ഷങ്ങള്‍ക്കും നേരിയ ആശ്വാസമേകുന്ന നിയമനരീതി തകര്‍ക്കാനുള്ള ഗൂഢനീക്കമാണിതിനു പിന്നിലെന്ന് എം.സി.എ ആത്മീയ ഉപദേഷ്ഠാവ് ഫാ. ഹോര്‍മീസ് പുത്തന്‍വീട്ടിലും പ്രസിഡന്റ് മോന്‍സന്‍ കെ.മാത്യുവും ജനറല്‍ സെക്രട്ടറി വൈ.രാജുവും പറഞ്ഞു.

സംസ്ഥാനത്തെ വിദ്യാഭ്യാസ പുരോഗതിക്ക് ഗണ്യമായ സംഭാവനകള്‍ നല്‍കിയ എയ്ഡഡ് മേഖലയെ തകര്‍ക്കാനുള്ള നീക്കത്തെ എന്ത് വിലകൊടുത്തും നേരിടും. സ്കൂള്‍ സമയം ഒമ്പതുമുതല്‍ അഞ്ചു വരെയാക്കാനുള്ള നീക്കം വിദ്യാര്‍ഥികളോടുള്ള വെല്ലുവിളിയാണ്. സ്വാശ്രയ മേഖല താറുമാറാക്കിയ വിദ്യാഭ്യാസമന്ത്രി അടുത്ത അധ്യായന വര്‍ഷത്തെ സ്വാശ്രയ പ്രവേശനം സമാധാനപരമായിരിക്കാന്‍ നടപടി സ്വീകരിക്കണമെന്നും അസോസിയേഷന്‍ പറഞ്ഞു.
കടപ്പാട്-ദീപിക

ഏയ്ഡഡ് സ്കൂളുകള്‍ ഒരു വര്‍ഷം പറ്റുന്നത് 2000 കോടി
തിരുവനന്തപുരം : ജനങ്ങളുടെ നികുതിപ്പണത്തില്‍നിന്ന് 2000 കോടിയോളം രൂപയാണ് ഒരോ വര്‍ഷവും സംസ്ഥാനത്തെ എയ്ഡഡ് സ്കൂളുകള്‍ക്കായി ചെലവഴിക്കുന്നത്.
എയ്ഡഡ് മേഖലയിലെ ഹയര്‍ സെക്കന്‍ഡറി, വൊക്കേഷണല്‍ ഹയര്‍ സെക്കന്‍ഡറി സ്കൂളുകള്‍ക്കും കോളേജുകള്‍ക്കും ചെലവിടുന്ന കോടികള്‍ ഇതിനുപുറമേയാണ്.
പൊതു ഖജനാവില്‍നിന്നുള്ള ശമ്പളം നല്‍കുമ്പോള്‍ നിയമനവും പൊതുലിസ്റ്റില്‍നിന്ന് വേണമെന്ന ലളിതമായ ചിന്താഗതിയാണ് എയ്ഡഡ് മേഖലയിലെ നിയമനങ്ങള്‍ പി.എസ്.സിക്ക് വിടണമെന്ന നിര്‍ദ്ദേശത്തിനു പിന്നില്‍. എല്ലാവരുടെയും പണം ഏതെങ്കിലും ചില വിഭാഗങ്ങള്‍ക്ക് മാത്രമായി ചെലവിടുന്നതില്‍ എന്ത് യുക്തിയെന്നാണ് ചോദ്യം.
കഴിഞ്ഞവര്‍ഷത്തെ കണക്കനുസരിച്ച് സംസ്ഥാനത്തെ സ്കൂള്‍ അദ്ധ്യാപകരില്‍ 107047 പേര്‍ എയ്ഡഡ് സ്കൂളുകളിലാണ്. സര്‍ക്കാര്‍ സ്കൂള്‍ അദ്ധ്യാപകര്‍ ഏതാണ്ട് ഇതിന്റെ പകുതിയേ വരൂ. സംസ്ഥാനത്തെ മൊത്തം സര്‍ക്കാര്‍ ജീവനക്കാരില്‍ നാലിലൊന്നോളം എയ്ഡ ഡ് മേഖലയിലാണ്.
ഓരോ മാനേജ്മെന്റും നിയമനാധികാരത്തിനു വേണ്ടി വാദിക്കുന്നത് സ്വസമുദായങ്ങളുടെ പേരിലാണെങ്കിലും സാധാരണക്കാര്‍ക്ക് അതുകൊണ്ട് ഒരു പ്രയോജനവുമില്ല. മെരിറ്റ് നോക്കിയല്ല നിയമനം. ഏത് മാനേജ്മെന്റായാലും ലക്ഷങ്ങള്‍ നല്‍കിയാലേ നിയമനം ലഭിക്കൂവെന്നതാണ് ഇപ്പോഴത്തെ സ്ഥിതി. സാധാരണക്കാര്‍ക്ക് നോക്കിനില്‍ക്കാനേ കഴിയൂ.
നിയമനം പി.എസ്.സിക്ക് വിടുന്നതിനെ ഒരു വിഭാഗം മാനേജ്മെന്റുകള്‍ എതിര്‍ക്കുന്നത് കോടികള്‍ നഷ്ടമാകുമെന്നതിനാലാണ്.
എയ്ഡഡ് മേഖലയില്‍ പ്രൈമറി വിഭാഗത്തില്‍ 71004 അദ്ധ്യാപകരും ഹൈസ്കൂള്‍ വിഭാഗത്തില്‍ 35943 അദ്ധ്യാപകരുമുണ്ട്. ഓരോ വര്‍ഷവും ആയിരക്കണക്കിന് അദ്ധ്യാപകരാണ് വിരമിക്കുന്നത്. ഒഴിവുകള്‍ മാനേജ്മെന്റുകള്‍ക്ക് യഥേഷ്ടം നികത്താം.
പ്രൈമറി അദ്ധ്യാപക നിയമനത്തിന് മൂന്നു ലക്ഷം മുതല്‍ അഞ്ചുലക്ഷംവരെയും ഹൈസ്കൂള്‍ അദ്ധ്യാപക നിയമനത്തിന് അഞ്ചുലക്ഷം മുതല്‍ എട്ടുലക്ഷം വരെയുമാണ് മിക്ക മാനേജ്മെന്റുകളും കോഴയായി വാങ്ങുന്നത്. എത്ര സാധാരണക്കാര്‍ക്ക് കഴിയും ഇങ്ങനെ ലക്ഷങ്ങള്‍ നല്‍കാന്‍. ലക്ഷങ്ങള്‍ക്ക് പുറമേ പലപ്പോഴും മാനേജ്മെന്റില്‍ സ്വാധീനവും വേണം. എങ്കിലേ നിയമനം ലഭിക്കൂ.
പൊതു ഖജനാവിലെ പണമാണ് പറ്റുന്നതെങ്കിലും ഭരണഘടനയില്‍ വിഭാവന ചെയ്തിട്ടുള്ള സംവരണതത്വങ്ങള്‍ എയ്ഡഡ് മേഖലയ്ക്ക് ബാധകമേയല്ല.
സര്‍ക്കാര്‍ സ്കൂളിലെ 56059 അദ്ധ്യാപകരില്‍ 8.5 ശതമാനം പട്ടികജാതിക്കാരാണ്. പട്ടികവര്‍ഗ്ഗക്കാരുമുണ്ട്, ഒരുശതമാനത്തോളം. എന്നാല്‍, ഒരുലക്ഷത്തിലേറെ അദ്ധ്യാപകരുള്ള എയ്ഡഡ് മേഖലയില്‍ പട്ടികജാതിക്കാരുടെ എണ്ണം 298 മാത്രമാണ്. പട്ടികവര്‍ഗ്ഗക്കാര്‍ 58 പേരേയുള്ളൂ.
ഓരോ സമുദായത്തിനും എത്ര എയ്ഡഡ് സ്കൂളുകള്‍ വീതമുണ്ടെന്ന കണക്ക് ലഭ്യമല്ല. ഇങ്ങനെ ഒരു കണക്കെടുപ്പ് എന്തുകൊണ്ടോ അധികൃതര്‍ ഒഴിവാക്കുകയായിരുന്നു. വിദ്യാഭ്യാസച്ചട്ട പരിഷ്കരണസമിതിക്കുപോലും ഇതുവരെ ഈ കണക്ക് ലഭിച്ചിട്ടില്ലെന്നാണ് അറിയുന്നത്. എന്നാല്‍, ക്രൈസ്തവ വിഭാഗങ്ങള്‍ക്കാണ് ഏറ്റവും കൂടുതല്‍ എയ്ഡഡ് സ്കൂളുകളുള്ളതെന്ന് കരുതപ്പെടുന്നു.
കടപ്പാട്-കേരളകൗമുദി

ഒരു അഭിപ്രായം ഇടൂ

Filed under കേരളം, മാധ്യമം

എയ്ഡഡ് സ്കൂള്‍ നിയമനം

ന്നിച്ചു നീങ്ങാന്‍ ക്രൈസ്തവസഭകളും എന്‍എസ്എസും
ചങ്ങനാശേരി:

കേരള വിദ്യാഭ്യാസ ചട്ടങ്ങളുടെ പരിഷ്കരണ നിര്‍ദേശങ്ങളടക്കം വിദ്യാഭ്യാസ മേഖലയില്‍ സര്‍ക്കാര്‍ കൊണ്ടുവരുന്ന വിവാദ മാറ്റങ്ങള്‍ക്കെതിരെ ഒരുമിച്ചു നീങ്ങാന്‍ ക്രൈസ്തവ സഭയും നായര്‍ സര്‍വീസ് സൊസൈറ്റിയും തീരുമാനിച്ചു. പെരുന്നയിലെ എന്‍എസ്എസ് ആസ്ഥാനത്തുചേര്‍ന്ന എന്‍എസ്എസ് നേതാക്കളുടെയും വിവിധ ക്രൈസ്തവസഭാ മേലധ്യക്ഷന്മാരുടെയും സംയുക്തയോഗത്തിലാണ് ഇതു സംബന്ധിച്ച തീരുമാനം.

വിദ്യാഭ്യാസ നിയമ പരിഷ്കരണത്തിന്റെ പേരില്‍ മാനേജ്മെന്റുകള്‍ക്ക് അവകാശപ്പെട്ട നിയമനാധികാരം ഉള്‍പ്പെടെയുള്ളവ കയ്യടക്കുന്നതിനും സ്കൂളുകളുടെ ഭരണം തദ്ദേശ സ്വയംഭരണ സ്ഥാപനങ്ങളുടെ കൈപ്പിടിയിലൊതുക്കി രാഷ്ട്രീയക്കാരുടെ വേദിയാക്കി മാറ്റുന്നതിനുമുള്ള സര്‍ക്കാര്‍നീക്കം നീതിയല്ലെന്നും അംഗീകരിക്കാന്‍ കഴിയില്ലെന്നും യോഗം വിലയിരുത്തി. എയ്ഡഡ് സ്കൂളുകളിലെ ജീവനക്കാരുടെ നിയമനം അതതു മാനേജ്മെന്റുകള്‍ക്ക് അവകാശപ്പെട്ടതാണ്. നിയമനാധികാരവും അക്കാദമിക ഭരണ – തലങ്ങളിലെ നിയന്ത്രണവും ഇന്നുള്ളപോലെ തന്നെ തുടരണം.

പ്രക്ഷോഭങ്ങളെക്കുറിച്ച് ഇപ്പോള്‍ ആലോചിക്കുന്നില്ലെന്നും സര്‍ക്കാര്‍ അവരുടെ നിലപാടും തീരുമാനവും പ്രഖ്യാപിച്ചശേഷം മാത്രമേ അതേക്കുറിച്ച് ആലോചിക്കൂ എന്നും യോഗശേഷം ബസേലിയോസ് ക്ളിമ്മീസ് കാതോലിക്കാ ബാവാ, എന്‍എസ്എസ് ജനറല്‍ സെക്രട്ടറി പി.കെ നാരായണപ്പണിക്കര്‍ എന്നിവര്‍ പറഞ്ഞു.

ഇൌ കൂട്ടായ്മ തുടര്‍ന്നും പ്രവര്‍ത്തിക്കും. ഭാവി പരിപാടികള്‍ രൂപീകരിക്കാനും മുന്നോട്ടു കൊണ്ടുപോകാനും പി.കെ നാരായണപ്പണിക്കര്‍, മാര്‍ ജോസഫ് പെരുന്തോട്ടം എന്നിവര്‍ ചെയര്‍മാന്മാരും ബിഷപ് തോമസ് സാമുവല്‍, ജി. സുകുമാരന്‍ നായര്‍ എന്നിവര്‍ ജനറല്‍ സെക്രട്ടറിമാരുമായി സമിതിയും രൂപീകരിച്ചു. എംഇഎസ് അടക്കമുള്ള സമാനചിന്താഗതിക്കാരുമായി ആശയ വിനിമയം നടത്തും.എസ്എന്‍ഡിപി നേതാക്കള്‍ സര്‍ക്കാര്‍ നയത്തെ അനുകൂലിക്കുന്നുണ്ടല്ലോ എന്ന ചോദ്യത്തിന് അവരുടെ ലക്ഷ്യം വേറെയാണെന്ന് എന്‍എസ്എസ് അസിസ്റ്റന്റ് സെക്രട്ടറി ജി. സുകുമാരന്‍ നായര്‍ പറഞ്ഞു.

കുറച്ചു സ്കൂളുകളേ അവര്‍ക്കുള്ളൂ. നിയമനം പിഎസ്സിക്കു വിടുമ്പോള്‍ കിട്ടുന്ന 14 ശതമാനം സംവരണത്തിലാണ് അവരുടെ നോട്ടം. സംവരണ സമുദായങ്ങളെ പ്രീണിപ്പിക്കാനുള്ള ശ്രമമാണു സര്‍ക്കാര്‍ നടത്തുന്നത്. ബസേലിയോസ് ക്ളിമ്മീസ് കാതോലിക്കാ ബാവാ, ആര്‍ച്ച് ബിഷപ് മാര്‍ ജോസഫ് പെരുന്തോട്ടം, എന്‍എസ്എസ് നേതാക്കളായ പി. കെ. നാരായണപ്പണിക്കര്‍, പി. എന്‍. നരേന്ദ്രനാഥന്‍ നായര്‍, ജി. സുകുമാരന്‍ നായര്‍, പൌലോസ് മാര്‍ പക്കോമിയോസ്, ബിഷപ് ഡോ. സ്റ്റാന്‍ലി റോമന്‍, തോമസ് മാര്‍ തിമോത്തിയോസ്, ബിഷപ് തോമസ് സാമുവല്‍, ആര്‍ച്ച് ബിഷപ് മാര്‍ മാത്യു മൂലക്കാട്ട്, കുര്യാക്കോസ് മാര്‍ ഗ്രിഗോറിയോസ്, റവ. കെ. എം. മാമ്മന്‍, മോണ്‍. ഫിലിപ്പ് ഞരളക്കാട്ട്, ജോസഫ് എം. പുതുശേരി എംഎല്‍എ, എന്നിവര്‍ ചര്‍ച്ചകളില്‍ പങ്കെടുത്തു.

സര്‍ക്കാര്‍ ലക്ഷ്യം ഭിന്നിപ്പിച്ചു തകര്‍ക്കല്‍: എന്‍എസ്എസ് – ക്രൈസ്തവ സഭായോഗം

കോട്ടയം: വിദ്യാഭ്യാസപ്രവര്‍ത്തനങ്ങളില്‍ ഉറച്ചുനിന്നിട്ടുള്ള മത സംഘടനകളെയും സമുദായ സംഘടനകളെയും ഭിന്നിപ്പിച്ചു തകര്‍ക്കുക എന്ന ലക്ഷ്യമാണു സര്‍ക്കാരിന്റെ ഇപ്പോഴത്തെ നീക്കങ്ങള്‍ക്കു പിന്നിലുള്ളതെന്നു പെരുന്നയില്‍ ചേര്‍ന്ന എന്‍എസ്എസ് – ക്രൈസ്തവ സഭായോഗം വിലയിരുത്തി.

ഈശ്വര വിശ്വാസത്തിലും മതസൌഹാര്‍ദത്തിലും അധിഷ്ഠിതമായ സംസ്കാരത്തെ തകര്‍ക്കുന്നതാണ് ഇപ്പോഴത്തെ തീരുമാനങ്ങള്‍. സമൂഹനന്മ ലക്ഷ്യമാക്കി ഭാരിച്ച ചെലവു വഹിച്ചു ഭൂമി വാങ്ങി കെട്ടിടങ്ങളും മറ്റു സൌകര്യങ്ങളുമൊരുക്കി വിദ്യാലയങ്ങള്‍ ആരംഭിച്ച മാനേജ്മെന്റുകള്‍ക്ക് അതിലൊന്നും യാതൊരു അവകാശവുമില്ല എന്നു വരുത്താനാണു സര്‍ക്കാര്‍ ശ്രമിക്കുന്നത്.

കേരളത്തിന്റെ വിദ്യാഭ്യാസ പുരോഗതിക്ക് ആദ്യകാലം മുതല്‍ മത – സമുദായ സംഘടനകളും മറ്റു പ്രസ്ഥാനങ്ങളും വ്യക്തികളും സ്വകാര്യമേഖലയില്‍ വഹിച്ചിട്ടുള്ള പങ്ക് ആര്‍ക്കും നിഷേധിക്കാവുന്നതല്ലെന്ന് ഇന്നലത്തെ യോഗത്തിന്റെ സംയുക്ത പ്രസ്താവനയില്‍ പറയുന്നു. സര്‍ക്കാരിനു മാത്രമായി കഴിയാതിരുന്ന കാര്യങ്ങള്‍ തങ്ങളുടെ ബാധ്യതയായി സ്വയം ഏറ്റെടുത്തവരാണ് അത്തരം സംഘടനകളും വ്യക്തികളും.

അവര്‍ ആയിരക്കണക്കിനു വിദ്യാലയങ്ങള്‍ ആരംഭിച്ചതു സര്‍ക്കാര്‍ സഹായം പ്രതീക്ഷിച്ചുകൊണ്ടായിരുന്നില്ല. വിദ്യാഭ്യാസരംഗത്തെ സാമൂഹിക പുരോഗതിയായിരുന്നു ലക്ഷ്യം. ഫീസ് പിരിവ് ഒഴിവാക്കാനും അധ്യാപകരുടെ ശമ്പള പരിഷ്കാരംപോലുള്ളവ നടപ്പാക്കാനും വേണ്ടിയാണു സര്‍ക്കാരുമായി കരാറുണ്ടാക്കി ഇൌ സ്ഥാപനങ്ങള്‍ എയ്ഡഡ് സ്ഥാപനങ്ങളായി മാറിയത്. ഇത്തരം വിദ്യാലയങ്ങളിലെ ജീവനക്കാര്‍ക്കു ശമ്പളം കൊടുത്തതുകൊണ്ടോ നാമമാത്രമായ വാര്‍ഷിക മെയിന്റനന്‍സ് ഗ്രാന്റ് അനുവദിച്ചതുകൊണ്ടോ അവയുടെ പ്രവര്‍ത്തനം പൂര്‍ണമാകുന്നില്ല.

കെട്ടിടം ഉള്‍പ്പെടെയുള്ള സ്ഥാവര – ജംഗമ സ്വത്തുക്കളും അവയുടെ ഭാരിച്ച തുടര്‍ ചെലവുകളും മാനേജ്മെന്റുകളുടെ ഭാരിച്ച ചുമതലയാണിപ്പോഴും. സമൂഹ നന്മ ലക്ഷ്യമാക്കി ഭൂമിയുടെ ഭാരിച്ച ചെലവു വഹിച്ചു കെട്ടിടങ്ങളും മറ്റു സൌകര്യങ്ങളും ഒരുക്കി വിദ്യാലയങ്ങള്‍ തുടങ്ങിയ മാനേജ്മെന്റുകള്‍ക്ക് അതിലൊന്നും ഒരവകാശവുമില്ല എന്നു വരുത്തിത്തീര്‍ക്കാനാണു സര്‍ക്കാര്‍ ശ്രമം – പ്രസ്താവനയില്‍ പറയുന്നു.
കടപ്പാട്- മനോരമ

എയ്ഡഡ് സ്കൂള്‍ നിയമനം എന്‍എസ്എസ്സും ക്രൈസ്തവസഭകളും യോജിച്ചുനീങ്ങും

ചങ്ങനാശ്ശേരി: മാനേജ്മെന്റുകള്‍ക്ക് അവകാശപ്പെട്ട നിയമനാധികാരം കൈയടക്കാനും സ്കൂള്‍ഭരണം രാഷ്ട്രീയക്കാരുടെ വരുതിയിലാക്കാനും സര്‍ക്കാര്‍ ശ്രമിക്കുന്നുവെന്നാരോപിച്ച് യോജിച്ചുള്ള ചെറുത്തുനില്പിന് എന്‍എസ്എസ്സും വിവിധ ക്രൈസ്തവസഭകളും കൈകോര്‍ക്കുന്നു. ഇതിന്റെ പ്രാരംഭച്ചര്‍ച്ചകള്‍ക്ക്, പെരുന്ന എന്‍എസ്എസ് ആസ്ഥാനമന്ദിരം വ്യാഴാഴ്ച വേദിയായി.

സര്‍ക്കാരിന്റെ ഇപ്പോഴത്തെ നീക്കം രാഷ്ട്രീയ പ്രേരിതവും ഏകപക്ഷീയവുമാണെന്ന് യോഗം വിലയിരുത്തി. ഇത് ഒരു കാരണവശാലും അനുവദിക്കാനാവില്ല. വിദ്യാഭ്യാസപ്രവര്‍ത്തനങ്ങളില്‍ എന്നും ഉറച്ചുനിന്നിട്ടുള്ള മത_സമുദായ സംഘടനകളെ ഭിന്നിപ്പിച്ച് തകര്‍ക്കുകയെന്നതാണ് സര്‍ക്കാരിന്റെ ലക്ഷ്യം. എയ്ഡഡ് സ്കൂളുകളിലെ നിയമനാധികാരം മാനേജുമെന്റുകള്‍ക്കാണ്. സമൂഹ നന്മയ്ക്കായി ഭൂമിയും കെട്ടിടവും മറ്റുസൌകര്യങ്ങളും ഒരുക്കി, വിദ്യാലയം ആരംഭിച്ച മാനേജ്മെന്റുകള്‍ക്ക് അതിലൊന്നും അവകാശമില്ലെന്നുവരുത്തിത്തീര്‍ക്കാനാണ് സര്‍ക്കാര്‍ ശ്രമമെന്ന് യോഗം കുറ്റപ്പെടുത്തി.

ഇപ്പോഴത്തെ നീക്കത്തിനെതിരെ, സമാനചിന്താഗതിക്കാരായ മാനേജുമെന്റുകളേയും ഉള്‍പ്പെടുത്തി ശക്തമായ നിലപാടു കൈക്കൊള്ളാനും ധാരണയായി. എന്‍എസ്എസ്സിനെ പ്രതിനിധീകരിച്ച്ജനറല്‍ സെക്രട്ടറി പി.കെ.നാരായണപ്പണിക്കര്‍, അസിസ്റ്റന്റ് സെക്രട്ടറി ജി.സുകുമാരന്‍നായര്‍, ട്രഷറര്‍ പി.എന്‍.നരേന്ദ്രനാഥന്‍ നായര്‍ എന്നിവര്‍ പങ്കെടുത്തു. ക്രൈസ്തവസഭകളുടെ പ്രതിനിധികളായി, മലങ്കര കത്തോലിക്കാ സഭാധ്യക്ഷന്‍ ബസേലിയോസ് ക്ലീമിസ് കാതോലിക്കാ ബാവ, ചങ്ങനാശ്ശേരി അതിരൂപതാ ആര്‍ച്ച് ബിഷപ്പ് മാര്‍ ജോസഫ് പെരുന്തോട്ടം, ഓര്‍ത്തഡോക്സ് സഭാ പ്രതിനിധി പൌലോസ് മാര്‍ പക്കോമിയോസ്, ലത്തീന്‍ കത്തോലിക്കാസഭാ പ്രതിനിധി കൊല്ലം ബിഷപ്പ് സ്റ്റാന്‍ലി റോമന്‍, യാക്കോബായ സഭ കോട്ടയം ഭദ്രാസനാധിപന്‍ തോമസ് തിമോത്തിയോസ്, സിഎസ്ഐ മധ്യകേരള മഹായിടവകയിലെ ബിഷപ്പ് തോമസ് സാമുവല്‍, കോട്ടയം രൂപതാധ്യക്ഷന്‍ ആര്‍ച്ച് ബിഷപ്പ് മാര്‍ മാത്യു മൂലക്കാട്ട്, ക്നാനായ യാക്കോബായ സഭ ചിങ്ങവനം സഹായമെത്രാന്‍ കുര്യാക്കോസ് മാര്‍ ഗ്രിഗോറിയോസ്, മാര്‍ത്തോമ്മാ സഭാ സെക്രട്ടറി റവ. കെ.എം.മാമ്മന്‍, പാലാ രൂപതാ വികാരി ജനറല്‍ ഫാ.ഫിലിപ്പ് ഞരളയ്ക്കാട്ട്, ജോസഫ് എം.പുതുശ്ശേരി എംഎല്‍എ എന്നിവരാണ് ചര്‍ച്ചകളില്‍ പങ്കെടുത്തത്.

സര്‍ക്കാരിന്റെ തെറ്റായ നയങ്ങള്‍ക്കെതിരെ ഇതിനുമുമ്പും ഒന്നിച്ചുനീങ്ങിയ ചരിത്രമാണ് എന്‍എസ്എസ്സിനും ക്രൈസ്തവസഭകള്‍ക്കും ഉള്ളതെന്ന് യോഗത്തില്‍ പങ്കെടുത്തവര്‍ മാധ്യമപ്രവര്‍ത്തകരോട് വിശദീകരിച്ചു. എയ്ഡഡ് മേഖലയിലെ നിയമനാധികാരം വിട്ടുകൊടുക്കുന്ന കാര്യത്തില്‍ എസ്എന്‍ഡിപി യോഗം സര്‍ക്കാരിനെ പിന്തുണയ്ക്കുന്നത് കൂടുതല്‍ ലാഭം പ്രതീക്ഷിച്ചാണെന്ന് നേതാക്കള്‍ കുറ്റപ്പെടുത്തി. എണ്ണത്തില്‍ കുറവായ സ്ഥാപനങ്ങള്‍ വിട്ടുകൊടുത്തശേഷം 14 ശതമാനം സംവരണത്തിലൂടെ എല്ലാസ്ഥാപനങ്ങളിലും കയറിപ്പറ്റാനുള്ള ശ്രമമാണവര്‍ നടത്തുന്നത്. ഇക്കാര്യത്തില്‍ മുസ്ലിം മാനേജുമെന്റുകളുമായും ചര്‍ച്ചകള്‍ നടത്തുമെന്ന് യോഗത്തില്‍ പങ്കെടുത്തവര്‍ അറിയിച്ചു.

രാഷ്ട്രീയമില്ലെന്ന് നേതൃത്വം

ചങ്ങനാശ്ശേരി: സര്‍ക്കാരിന്റെ തെറ്റായവിദ്യാഭ്യാസനയങ്ങള്‍ക്കെതിരെ യോജിച്ച് പോരാടുകയെന്ന ലക്ഷ്യമാണ് എന്‍എസ്എസ്_ക്രൈസ്തവസഭാ നേതൃചര്‍ച്ചയില്‍ ഉയര്‍ന്നുവന്നതെന്നും ഇതില്‍ രാഷ്ട്രീയമില്ലെന്നും ഇരുനേതൃത്വവും അറിയിച്ചു. കേരളകോണ്‍ഗ്രസ്സുകാരനായ കല്ലൂപ്പാറ എംഎല്‍എ ജോസഫ് എം.പുതുശ്ശേരി പെരുന്നയില്‍ നടന്ന ചര്‍ച്ചയില്‍ പങ്കെടുത്തതിനെപ്പറ്റി മാധ്യമപ്രവര്‍ത്തകര്‍ ചോദിച്ചപ്പോള്‍, അദ്ദേഹം ഓര്‍ത്തഡോക്സ് സഭാ പ്രതിനിധിയായാണ് വന്നതെന്ന് സഭാ വക്താക്കള്‍ അറിയിച്ചു.

കടപ്പാട്- മാതൃഭൂമി

വീണ്ടും പടയൊരുക്കം
തിരുവനന്തപുരം : വിദ്യാഭ്യാസ പരിഷ്കരണശ്രമങ്ങളുടെ മറപിടിച്ച് ഗവണ്‍മെന്റിനെതിരെ വീണ്ടുമൊരു വിമോചനസമരത്തിന് അണിയറയില്‍ പരിശ്രമം തുടങ്ങി.
ഇന്നലെ ചങ്ങനാശ്ശേരിയില്‍ പത്ത് ക്രൈസ്തവസഭകളും എന്‍. എസ്. എസ്സും സര്‍ക്കാരിനെതിരായ പ്രക്ഷോഭത്തിന് പൊതുവേദി രൂപീകരിച്ചത് ഈ ലക്ഷ്യത്തോടെയാണെന്നാണ് നിഗമനം.

എയ്ഡഡ് സ്കൂളിലെ അദ്ധ്യാപക നിയമനം പി.എസ്.സി ലിസ്റ്റില്‍ നിന്നാകണമെന്ന് കെ.ഇ.ആര്‍ പരിഷ്കരണ സമിതിയുടെ മുന്‍പാകെ വന്ന നിര്‍ദ്ദേശമാണ് പ്രകോപനമുണ്ടാക്കിയിരിക്കുന്നത്. സമിതി സര്‍ക്കാരിന് ഇങ്ങനെയൊരു ശുപാര്‍ശ നല്കിയിട്ടില്ല. സമിതിയുടെ റിപ്പോര്‍ട്ടും അന്തിമമായിട്ടില്ല. എന്നാല്‍, ഇതുസംബന്ധിച്ച് സമിതിയില്‍ സജീവമായ ചര്‍ച്ച നടക്കുകയുണ്ടായി. അപ്പോഴേക്കും ഉയര്‍ന്നിരിക്കുകയാണ്, സംയുക്ത പ്രക്ഷോഭത്തിന്റെ കേളികൊട്ട്.
എയ്ഡഡ് സ്കൂള്‍ അദ്ധ്യാപക നിയമനം പി.എസ്.സിക്ക് വിടണമെന്നത് പുതിയ നിര്‍ദ്ദേശമൊന്നുമല്ല. 1957ല്‍ ആദ്യ ഇ.എം.എസ് ഗവണ്‍മെന്റിന്റെ കാലത്ത് വിദ്യാഭ്യാസമന്ത്രി ജോസഫ് മുണ്ടശ്ശേരി കൊണ്ടുവന്ന വിദ്യാഭ്യാസനിയമത്തിലെ കോളിളക്കമുണ്ടാക്കിയ പതിനൊന്നാം വകുപ്പാണ് ഇത്. ഈ വകുപ്പിന് പുറമെ അന്ന് രണ്ടു വകുപ്പുകള്‍ കൂടി വിവാദം സൃഷ്ടിച്ചിരുന്നു. വിദ്യാലയങ്ങള്‍ സര്‍ക്കാരിന് ഏറ്റെടുക്കാന്‍ അധികാരം നല്കുന്ന 14-ാം വകുപ്പും അദ്ധ്യാപകര്‍ക്ക് നേരിട്ട് ശമ്പളം നല്കാനുള്ള 9-ാം വകുപ്പും. പിന്നീട് സുപ്രീംകോടതി 14-ാം വകുപ്പില്‍ ഭേദഗതി വരുത്തിയെങ്കിലും നിയമനം പി.എസ്.സിക്ക് വിടണമെന്ന പതിനൊന്നാം വകുപ്പിന്മേല്‍ സ്പര്‍ശിച്ചില്ല. എന്നാല്‍, പിന്നീടു വന്ന ഗവണ്‍മെന്റുകള്‍ ഈ വകുപ്പ് മരവിപ്പിച്ചു.

അതേ വകുപ്പ് വീണ്ടും ചര്‍ച്ചയ്ക്കെത്തിയതോടെയാണ് വിമോചനസമരം പുനരുജ്ജീവിപ്പിക്കാനാവുമോ എന്ന് നോക്കുന്നത്.
എല്‍.ഡി.എഫ് സര്‍ക്കാര്‍ അധികാരത്തില്‍ വന്നശേഷം നേരത്തേ രണ്ടുതവണ വിമോചനസമരനീക്കമുണ്ടായെങ്കിലും പാളിപ്പോയിരുന്നു. സ്വാശ്രയ നിയമത്തിന്റെ പേരിലായിരുന്നു ആദ്യം. അങ്കമാലിയിലെ കല്ലറയ്ക്ക് മുന്‍പില്‍ മെഴുകുതിരി കത്തിച്ച് പ്രക്ഷോഭത്തിന്റെ പ്രഖ്യാപനം നടത്തിയെങ്കിലും അതെങ്ങുമെത്തിയില്ല. മത്തായി ചാക്കോയുടെ ശവമടക്ക് വിവാദവുമായി ബന്ധപ്പെട്ടാണ് രണ്ടാം നീക്കമുണ്ടായത്. പുരോഹിതന്മാരെയും വിശ്വാസികളെയും രംഗത്തിറക്കിയെങ്കിലും ക്രിസ്തീയ സമൂഹത്തിനുള്ളില്‍ നിന്നു തന്നെ എതിര്‍പ്പ് ഉണ്ടായതോടെ അതും കെട്ടടങ്ങി.

എന്നാല്‍, ഇത്തവണ എന്‍.എസ്. എസ്സിന്റെ പിന്തുണകൂടി ആര്‍ജിക്കാന്‍ വിമോചനസമര നീക്കക്കാര്‍ക്ക് കഴിഞ്ഞിട്ടുണ്ട്. അതേസമയം എസ്. എന്‍.ഡി.പി യോഗം മറുഭാഗത്താണ്. അദ്ധ്യാപകര്‍ക്ക് ശമ്പളവും വിദ്യാലയങ്ങളുടെ മെയിന്റനന്‍സിനുള്ള പണവും സര്‍ക്കാര്‍ നല്കുമ്പോള്‍ പി. എസ്.സി തയ്യാറാക്കുന്ന ലിസ്റ്റില്‍ നിന്ന് എന്തുകൊണ്ട് നിയമനം നടത്തിക്കൂടാ എന്നാണ് മറുപക്ഷത്തിന്റെ ചോദ്യം.
കെ.ഇ.ആര്‍. പരിഷ്കരണസമിതിയില്‍ നിന്ന് പ്രതിപക്ഷ പ്രതിനിധി കെ. വിക്രമന്‍ നായര്‍ ഇന്നലെ രാജിവച്ചത് പ്രശ്നത്തിന് രാഷ്ട്രീയമാനം നല്കിയിട്ടുണ്ട്. പ്രതിപക്ഷ നേതാവ് ഉമ്മന്‍ചാണ്ടിയുമായി ചര്‍ച്ച നടത്തിയ ശേഷമാണ് വിക്രമന്‍ നായര്‍ രാജിവച്ചത്.
ചങ്ങനാശ്ശേരിയില്‍ ക്രൈസ്തവ സഭകളെയും എന്‍. എസ്. എസ്സിനെയും യോജിപ്പിക്കുന്നതിന്റെ പിന്നില്‍ പ്രവര്‍ത്തിച്ചതാകട്ടെ മാണി ഗ്രൂപ്പ് നേതാവ് ജോസഫ് എം. പുതുശ്ശേരിയാണ്.
ഇടതുസര്‍ക്കാരിനെതിരെ നേരത്തേ നടന്ന സമരനീക്കങ്ങള്‍ക്ക് നേതൃത്വംനല്കിയ ഇന്റര്‍ചര്‍ച്ച് കൌണ്‍സില്‍ ചെയര്‍മാന്‍ മാര്‍ ജോസഫ് പവ്വത്തിലാണ് ഇപ്പോഴത്തെ നീക്കത്തിന്റെയും പ്രേരകശക്തി. പവ്വത്തില്‍ ഇപ്പോള്‍ റോമിലാണ്.

എന്‍.എസ്.എസ്സും ക്രൈസ്തവ സഭകളും സംയുക്ത പ്രക്ഷോഭത്തിന്
ചങ്ങനാശ്ശേരി: സംസ്ഥാന സര്‍ക്കാരിന്റെ വിദ്യാഭ്യാസ നയത്തിനെതിരെ സംയുക്ത പ്രക്ഷോഭം നടത്താന്‍ ക്രൈസ്തവ സഭകളും എന്‍.എസ്.എസ്സും പൊതുവേദി രൂപീകരിച്ചു. വിദ്യാഭ്യാസ നിയമ പരിഷ്കരണത്തിന് പിന്നില്‍ സര്‍ക്കാരിന് ഗൂഢലക്ഷ്യമുണ്ടെന്ന് പൊതുവേദി ആരോപിച്ചിട്ടുണ്ട്.
സംയുക്ത നീക്കത്തിന് പൊതുവേദി രൂപീകരിക്കാന്‍ ക്രൈസ്തവസഭാ മേലദ്ധ്യക്ഷന്മാര്‍ ഇന്നലെ പെരുന്നയിലെ എന്‍.എസ്.എസ് ആസ്ഥാനത്തെത്തി ചര്‍ച്ച നടത്തുകയായിരുന്നു. പൊതുവേദിയുടെ ചെയര്‍മാന്‍മാരായി എന്‍.എസ്.എസ് ജനറല്‍ സെക്രട്ടറി പി.കെ.നാരായണ പ്പണിക്കരെയും ചങ്ങനാശ്ശേരി ആര്‍ച്ച് ബിഷപ്പ് മാര്‍ ജോസഫ് പെരുന്തോട്ടത്തെയും തിരഞ്ഞെടുത്തിട്ടുണ്ട്. എന്‍.എസ്.എസ് അസി. സെക്രട്ടറി ജി. സുകുമാരന്‍ നായരും സി.എസ്.ഐ മദ്ധ്യ കേരള മഹാ ഇടവക ബിഷപ്പ് റവ. തോമസ് സാമുവലുമാണ് സെക്രട്ടറിമാര്‍.

വിദ്യാഭ്യാസരംഗത്തെ രാഷ്ട്രീയവേദിയാക്കാനാണ് സര്‍ക്കാര്‍ ലക്ഷ്യമിടുന്നതെന്ന് പൊതുവേദി ആരോപിച്ചു. വിദ്യാഭ്യാസ പ്രവര്‍ത്തനങ്ങളില്‍ സ്വാര്‍ത്ഥതാത്പര്യങ്ങള്‍ ഇല്ലാതെ ഉറച്ചു നിന്നിട്ടുള്ള മതസംഘടനകളെയും സമുദായ സംഘടനകളെയും ഭിന്നിപ്പിച്ച് തകര്‍ക്കുകയാണ് ലക്ഷ്യം.
വിദ്യാഭ്യാസനയം എന്നൊക്കെ വഴി തെറ്റിയിട്ടുണ്ടോ അന്നൊക്കെ എന്‍.എസ്.എസ് പ്രതികരിച്ചിട്ടുണ്ട്. സംസ്ഥാനത്തെ ഏറ്റവും വലിയ കോര്‍പ്പറേറ്റ് മാനേജ്മെന്റ് ആയതിനാലാണ് ഇത്തരമൊരു പൊതുവേദിക്ക് മുന്‍കൈ എടുത്തതെന്നും നാരായണപ്പണിക്കരും സുകുമാരന്‍ നായരും പറഞ്ഞു.

സര്‍ക്കാരിന്റെ ഇപ്പോഴത്തെ നീക്കങ്ങളെ എസ്.എന്‍.ഡി.പി യോഗം മാത്രമേ സ്വാഗതം ചെയ്തിട്ടുള്ളൂ. സര്‍ക്കാരിന് ഏകപക്ഷീയമായ ലക്ഷ്യമാണുള്ളത്. സംവരണ സംവിധാനത്തിലൂടെ ചില സമുദായങ്ങളെ പ്രീണിപ്പിക്കാനാണ് ശ്രമം. എസ്.എന്‍.ഡി.പിക്ക് കച്ചവട സമീപനമാണ്. കുറച്ച് വിദ്യാഭ്യാസ സ്ഥാപനങ്ങള്‍ മാത്രമേയുള്ളൂ. പുതിയ നിയമം വന്നാല്‍ 14 ശതമാനം സംവരണത്തിലൂടെ കൂടുതല്‍ അവസരങ്ങള്‍ സ്വന്തമാക്കാമെന്ന ലക്ഷ്യവും എസ്. എന്‍.ഡി.പിക്ക് ഉണ്ടെന്ന് സുകുമാരന്‍ നായര്‍ പറഞ്ഞു.
കടപ്പാട്- കേരളകൗമുദി

കെഇആര്‍ പരിഷ്കരണം അട്ടിമറിക്കാന്‍ ഗൂഢ നീക്കം
തിരു: കാലഹരണപ്പെട്ട കേരള വിദ്യാഭ്യാസചട്ടം പരിഷ്കരിക്കുന്നതിനുള്ള സര്‍ക്കാര്‍ ശ്രമം അട്ടിമറിക്കാന്‍ ആസൂത്രിതനീക്കം. ഇല്ലാത്ത പ്രശ്നങ്ങള്‍ ഊതിപ്പെരുപ്പിച്ച് ചില മാധ്യമങ്ങള്‍ കെഇആര്‍ പരിഷ്കരണത്തിനെതിരെ രംഗത്തിറങ്ങി. കരട് റിപ്പോര്‍ട്ട് അംഗീകരിക്കുമ്പോള്‍ സ്കൂള്‍ മാനേജര്‍മാര്‍ക്ക് അധികാരത്തില്‍ കുറവ് വരുമെന്നാണ് മലയാളമനോരമയുടെ കണ്ടെത്തല്‍. എയ്ഡഡ് സ്കൂള്‍ മാനേജ്മെന്റുകളെ സര്‍ക്കാരിനെതിരെ തിരിക്കാനുള്ള നീക്കമാണ് ഈ പ്രചാരണത്തിനു പിന്നില്‍.

വിദ്യാഭ്യാസം വികേന്ദ്രീകരിക്കുകയെന്ന ദേശീയതലത്തിലുള്ള തീരുമാനത്തിന്റെ ഭാഗമാണ് കേരളത്തിലെ പരിഷ്കരണനടപടികള്‍. ഇത് കേരളത്തില്‍മാത്രം നടപ്പാക്കുന്നു എന്ന മട്ടിലാണ് ചില മാധ്യമങ്ങളുടെ പ്രചാരവേല. കര്‍ണാടക മുഖ്യമന്ത്രിയായിരുന്ന വീരപ്പ മൊയ്ലി ചെയര്‍മാനായ കമ്മിറ്റി കേന്ദ്രസര്‍ക്കാര്‍ നിര്‍ദേശപ്രകാരം വികേന്ദ്രീകരണം നടപ്പാക്കുന്നതിനുള്ള സംസ്ഥാനങ്ങളുടെ സാധ്യതകള്‍ പഠിച്ചിരുന്നു. തദ്ദേശ സ്ഥാപനങ്ങള്‍ക്ക് വിദ്യാഭ്യാസമേഖലയില്‍ ഇടപെടുന്നതിന് അവസരമൊരുക്കണമെന്നായിരുന്നു കമ്മിറ്റിയുടെ ശുപാര്‍ശ. വീകേന്ദ്രീകൃതവികസനത്തിന്റെ ഭാഗമായി തദ്ദേശസ്ഥാപനങ്ങള്‍ക്ക് അധികാരം നല്‍കി ഭരണഘടനാ ഭേദഗതിയും നിലവിലുണ്ട്. ഈ സാഹചര്യത്തിലാണ് കേരളത്തിലും മാറ്റം വരുന്നത്.

അധ്യയനദിനങ്ങള്‍ വര്‍ധിക്കുന്നതില്‍ ആശങ്കയാണ് പല മാധ്യമങ്ങളും ഉയര്‍ത്തുന്നത്. അധ്യയനദിനങ്ങള്‍ കുറയുന്നുവെന്നു പറയുകയും ഒപ്പം ഇതിനെ എതിര്‍ക്കുകയുംചെയ്യുന്ന തലതിരിഞ്ഞ നിലപാടിലാണവര്‍. ഏറ്റവും ചുരുങ്ങിയത് 220 പ്രവൃത്തിദിനങ്ങളെങ്കിലും വേണമെന്നാണ് സര്‍ക്കാര്‍ ലക്ഷ്യമിടുന്നത്. ഇതില്‍ വിട്ടുവീഴ്ചയില്ലെന്നും സര്‍ക്കാര്‍ വ്യക്തമാക്കിയിട്ടുണ്ട്.

വിദ്യാഭ്യാസവകുപ്പില്‍ ഡിഇഒ, എഇഒ തസ്തികകള്‍ ഇല്ലാതാവുന്നുവെന്നാണ്് മറ്റൊരു ആശങ്ക. 36 ഡിഇഒമാരും 161 എഇഒമാരുമാണ് സംസ്ഥാനത്തുള്ളത്. വികേന്ദ്രീകൃതമായി വരുമ്പോള്‍ ഉദ്യോഗസ്ഥരുടെ എണ്ണത്തില്‍ നേരിയ വര്‍ധനയല്ലാതെ കുറവ് വരുന്നില്ല. മാത്രമല്ല ഒന്നുമുതല്‍ ഏഴുവരെ ക്ളാസുകള്‍ക്കായും എട്ടു മുതല്‍ പന്ത്രണ്ടു വരെ ക്ളാസുകള്‍ക്കായും ഓരോ അഡീഷണല്‍ ഡിപിഐമാര്‍ക്ക് ഭേദഗതിയുടെ കരടില്‍ നിര്‍ദേശമുള്ളതായി അറിയുന്നു. ബ്ളോക്ക്തല വിദ്യാഭ്യാസ ഓഫീസര്‍ എന്ന തസ്തികയും ഇതിലുണ്ട്. ഫലത്തില്‍ ഉദ്യോഗസ്ഥതലത്തില്‍ കുറവ് വരുന്നില്ല.

കെഇആര്‍ പരിഷ്കരണം
റിപ്പോര്‍ട്ടിനുമുമ്പ് പ്രതിഷേധമെന്തിന്: മന്ത്രി
തിരു: കെഇആര്‍ പരിഷ്കരണസമിതിയുടെ അന്തിമ റിപ്പോര്‍ട്ട് വരുന്നതിനുമുമ്പ് കമ്മിറ്റിയിലെ ചര്‍ച്ചയെക്കുറിച്ച് കേട്ടുകേഴ്വിയുടെ അടിസ്ഥാനത്തിലുള്ള പ്രതികരണം അകാലത്തിലുള്ളതാണെന്ന് മന്ത്രി എം എ ബേബി പറഞ്ഞു. കമ്മിറ്റിയുടെ പ്രവര്‍ത്തനം അന്തിമഘട്ടത്തിലാണ്. റിപ്പോര്‍ട്ട് ഇനിയും സര്‍ക്കാരിന് നല്‍കിയിട്ടില്ല. റിപ്പോര്‍ട്ട് ലഭിച്ചാല്‍ എല്‍ഡിഎഫ് ചര്‍ച്ചചെയ്യും. അതിനുശേഷം എയ്ഡഡ് സ്കൂള്‍ മാനേജര്‍മാരടക്കം ബന്ധപ്പെട്ട എല്ലാവരുമായും ചര്‍ച്ചചെയ്ത് സമവായമുണ്ടാക്കിയേ നടപ്പാക്കൂ. എന്നാല്‍ കമ്മിറ്റിയില്‍ നടക്കുന്ന ചര്‍ച്ച മാധ്യമങ്ങള്‍വഴി അറിഞ്ഞ് അതിനോട് ചില മാനേജ്മെന്റ് പ്രതിനിധികള്‍ പ്രതികരിച്ചുകണ്ടു. ഇത്തരം പ്രതികരണങ്ങളും പ്രതിഷേധങ്ങളും അനവസരത്തിലുള്ളതാണ്.

കെഇആര്‍ പരിഷ്കരണസമിതിയില്‍നിന്ന് രാജിവയ്ക്കുന്നതിനുപകരം വിയോജിപ്പുകള്‍ കമ്മിറ്റിയില്‍ ഉന്നയിക്കുകയും കമ്മിറ്റിയുടെ പ്രവര്‍ത്തനത്തെപ്പറ്റി പരാതിയുണ്ടെങ്കില്‍ അത് സര്‍ക്കാരിന്റെ ശ്രദ്ധയില്‍പ്പെടുത്തുകയുമായിരുന്നു ജിഎസ്ടിയു പ്രതിനിധിക്ക് അഭികാമ്യം. രാജിവാര്‍ത്ത മാധ്യമപ്രവര്‍ത്തകരില്‍നിന്നാണ് അറിഞ്ഞത്. കമ്മിറ്റിയുടെ പ്രവര്‍ത്തനത്തെക്കുറിച്ച് അദ്ദേഹം ഇതുവരെ സര്‍ക്കാരിനോട് എന്തെങ്കിലും പരാതി ഉന്നയിച്ചിട്ടില്ലെന്നും മന്ത്രി പറഞ്ഞു.

നിയമനാധികാരം കൈയടക്കുന്നെന്ന്
എന്‍എസ്എസും ബിഷപ്പുമാരും
ചങ്ങനാശേരി: വിദ്യാഭ്യാസ നിയമ പരിഷ്ക്കാരത്തിന്റെ (കെഇആര്‍) പേരില്‍ മാനേജ്മെന്റുകള്‍ക്ക് അവകാശപ്പെട്ട നിയമനാധികാരം കൈയടക്കാന്‍ സര്‍ക്കാര്‍ ഏകപക്ഷീയമായ നീക്കം നടത്തുകയാണെന്ന് ക്രൈസ്തവ മേലധ്യക്ഷന്‍മാരുടെയും എന്‍എസ്എസ് ഭാരവാഹികളുടെയും സംയുക്തയോഗം കുറ്റപ്പെടുത്തി.

ഇതിനെ എസ്എന്‍ഡിപി എതിര്‍ക്കാത്തത് അവര്‍ക്കിത് ലാഭ കച്ചവടമാകുന്നതുകൊണ്ടാണെന്നും ചങ്ങനാശേരി എന്‍എസ്എസ് ആസ്ഥാനത്തു ചേര്‍ന്ന യോഗത്തിനുശേഷം നേതാക്കള്‍ പറഞ്ഞു.

എയ്ഡഡ് മേഖലയില്‍ നാമമാത്ര വിദ്യാഭ്യാസ സ്ഥാപനങ്ങള്‍ മാത്രമുള്ള എസ്എന്‍ഡിപിക്ക് പരിഷ്കരണം നടപ്പിലാക്കുന്നതോടെ മറ്റ് സമുദായങ്ങളുടെ ബഹുഭൂരിപക്ഷം വരുന്ന സ്കൂള്‍, കോളേജുകളില്‍ ലഭ്യമായ 14 ശതമാനം സംവരണ മാനദണ്ഡമുപയോഗിച്ച് നിയമനങ്ങള്‍ ലഭിക്കും.

സര്‍ക്കാരിന്റെ നീക്കത്തിനെതിരെ തുടര്‍നടപടി കൈക്കൊള്ളാനും യോഗം തീരുമാനിച്ചു. എയ്ഡഡ് സ്കൂളുകളിലെ ജീവനക്കാരുടെ നിയമനം, അക്കാദമിക് ഭരണതലങ്ങളിലുള്ള നിയന്ത്രണം എന്നിവ ഇപ്പോഴത്തേതുപോലെ തുടരണമെന്നും സംയുക്ത പ്രസ്താവനയില്‍ അവര്‍ ആവശ്യപ്പെട്ടു.

എന്‍എസ്എസ് ജനറല്‍ സെക്രട്ടറി പി കെ നാരായണപണിക്കര്‍, ട്രഷറര്‍ പി എന്‍ നരേന്ദ്രനാഥന്‍നായര്‍, അസിസ്റ്റന്റ് സെക്രട്ടറി ജി സുകുമാരന്‍ നായര്‍ വിവിധ ക്രൈസ്തവസഭ മേലധ്യക്ഷന്‍മാരായ ബസേലിയോസ് ക്ളീമീസ് കാതോലിക്കാബാവാ, ആര്‍ച്ച്ബിഷപ്പ് മാര്‍ ജോസഫ് പെരുന്തോട്ടം, പൌലോസ് മാര്‍ പക്കോമിയോസ്, ബിഷപ്പ് സ്റ്റാന്‍ലിറോമന്‍, തോമസ് മാര്‍ തീമോത്തിയോസ്, ബിഷപ്പ് തോമസ് ശാമുവല്‍, ആര്‍ച്ച്ബിഷപ്പ് മാത്യു മൂലക്കാട്ടില്‍, കുര്യാക്കോസ് മാര്‍ ഗ്രീഗോറിയോസ്, റവ. കെ എം മാമ്മന്‍, മോണ്‍. ഫിലിപ്പ് ഞെരളക്കാട്ട്, ജോസഫ് പുതുശേരി എംഎല്‍എ എന്നിവര്‍ പങ്കെടുത്തു.

പടപ്പുറപ്പാടിനു പിന്നില്‍ യുഡിഎഫ്
ചങ്ങനാശേരി: വിദ്യാഭ്യാസ പരിഷ്കരണത്തിന്റെ പേരില്‍ സര്‍ക്കാരിനെതിരെയുള്ള ക്രൈസ്തവ മതമേലധ്യക്ഷന്മാരുടെയും എന്‍എസ്എസ് നേതാക്കളുടെയും ‘പടപ്പുറപ്പാടി’ന് യുഡിഎഫ് സ്പോണ്‍സര്‍ഷിപ്പ്

കേരളാ കോണ്‍ഗ്രസ് എം സംസ്ഥാന ജനറല്‍ സെക്രട്ടറിയും എംഎല്‍എയുമായ ജോസഫ് എം പുതുശേരിയാണ് ഇതിനായി രംഗത്തുണ്ടായിരുന്നത്. സംയുക്തയോഗം നടന്ന വ്യാഴാഴ്ച രാവിലെ 10ന് തന്നെ എംഎല്‍എ എന്‍എസ്എസ് ആസ്ഥാനത്തെത്തി. എന്‍എസ്എസ് നേതാക്കളുമായി അല്‍പനേരത്തെ കുശലാന്വേഷണത്തിനൊടുവില്‍ പുറത്തിറങ്ങി. വിവിധ ക്രൈസ്തവ മേലധ്യക്ഷന്മാരെ ഫോണില്‍ വിളിച്ചു. ഇതിനിടയില്‍ യോഗ തീരുമാനം സംബന്ധിച്ച പത്രക്കുറിപ്പ് തയ്യാറാക്കുന്ന ചുമതലയും പുതുശേരി ഏറ്റെടുത്തു. ബിഷപ്പുമാരെ സ്വീകരിച്ച് എന്‍എസ്എസ് ഓഫീസില്‍ കൊണ്ടിരുത്തുന്ന ഉത്തരവാദിത്വവും അദ്ദേഹം നിര്‍വഹിച്ചു.
കടപ്പാട്- ദേശാഭിമാനി

കെ.ഇ.ആര്‍ ഭേദഗതി: ക്രൈസ്തവ സഭയും എന്‍.എസ്.എസും സംയുക്ത നീക്കത്തിന്
ചങ്ങനാശേരി: സര്‍ക്കാറിന്റെ വിദ്യാഭ്യാസ പരിഷ്കരണത്തിനെതിരെ യോജിച്ച്നീങ്ങാന്‍ എന്‍.എസ്.എസ് ആസ്ഥാനത്ത് നടന്ന കൂടിക്കാഴ്ചയില്‍ ക്രിസ്ത്യന്‍ മതമേലധ്യക്ഷന്മാരും എന്‍.എസ്.എസ് നേതൃത്വവും തീരുമാനിച്ചു.
ബസേലിയോസ് ക്ലീമിസ് കാതോലിക്കാബാവ, ആര്‍ച്ച് ബിഷപ്പ് മാര്‍ ജോസഫ് പെരുന്തോട്ടം, പൌലോസ് മാര്‍ പക്കോമിയോസ്, ബിഷപ്പ് ഡോ.സ്റ്റാന്റി റോമന്‍, തോമസ് മാര്‍ തിമോത്തിയോസ്, തോമസ് സാമുവല്‍, ആര്‍ച്ച്ബിഷപ്പ് മാര്‍ മാത്യു മൂലക്കാട്ട്, കുര്യാക്കോസ് മാര്‍ ഗ്രിഗോറിയോസ്, കെ.എം. മാമ്മന്‍, മോണ്‍. ഫിലിപ് ഞരളക്കാട്ട് എന്നിവര്‍ ഇന്നലെ എന്‍.എസ്.എസ് ആസ്ഥാനത്ത് എത്തിയാണ് നേതാക്കളുമായി ചര്‍ച്ച നടത്തിയത്.

എന്‍.എസ്.എസ് ജനറല്‍ സെക്രട്ടറി പി.കെ.നാരായണപ്പണിക്കര്‍, അസി.സെക്രട്ടറി ജി.സുകുമാരന്‍ നായര്‍, ട്രഷറര്‍ രവീന്ദ്രനാഥന്‍ നായര്‍ എന്നിവര്‍ ചര്‍ച്ചയില്‍ പങ്കെടുത്തു.
മാനേജ്മെന്റുകള്‍ക്ക് അവകാശപ്പെട്ട നിയമന അധികാരം കൈയടക്കാനുള്ള സര്‍ക്കാര്‍ നീക്കം അനുവദിക്കാനാവില്ലെന്ന് യോഗം അഭിപ്രായപ്പെട്ടു.
വിദ്യാഭ്യാസ സ്ഥാപനങ്ങളുടെ ഭരണം തദ്ദേശസ്വയംഭരണ സ്ഥാപനങ്ങളുടെ കൈപ്പിടിയിലാക്കാനും മത സമുദായ സംഘടനകളെ ഭിന്നിപ്പിച്ച് തകര്‍ക്കാനുമുള്ള ശ്രമ മാണ് ഇതിന് പിന്നിലുള്ളത്. സര്‍ക്കാറിനെക്കൊണ്ട് മാത്രം സാധ്യമാകാതിരുന്ന വിദ്യാഭ്യാസ പ്രവര്‍ത്തനം സ്വയം ഏറ്റെടുത്തവരാണ് മത ^സാമുദായ സംഘടനകളും മറ്റ് പ്രസ്ഥാനങ്ങളും വ്യക്തികളും. ഇവ ആരംഭിച്ചത് സര്‍ക്കാര്‍ സഹായം പ്രതീക്ഷിച്ചല്ല. സാമൂഹിക പുരോഗതിയായിരുന്നു ലക്ഷ്യം. ഇത്തരം വിദ്യാലയങ്ങളില്‍ ജീവനക്കാര്‍ക്ക് ശമ്പളം നല്‍കിയതുകൊണ്ടോ, നാമമാത്ര ഗ്രാന്റ് അനുവദിച്ചതുകൊണ്ടോ മാത്രം പ്രവര്‍ത്തനം പൂര്‍ണമാകില്ല. സ്വത്തുക്കളും അതിന്റെ ഭാരിച്ച ചെലവുകളും കണ്ടെത്തിയാണ് സ്ഥാപന ഭരണം മാനേജ്മെന്റ് നിര്‍വഹിക്കുന്നത്. ഇങ്ങനെ സ്ഥാപിച്ച സ്ഥാപനങ്ങളില്‍ മാനേജ്മെന്റുകള്‍ക്ക് അവകാശമില്ലെന്ന് വരുത്താനുള്ള നീക്കത്തിനെതിരെ ശക്തമായ തുടര്‍ നടപടി സ്വീകരിക്കാന്‍ തീരുമാനിച്ചതായും സമുദായ നേതാക്കള്‍ സംയുക്ത പ്രസ്താവനയില്‍ പറഞ്ഞു.
എസ്.എന്‍.ഡി.പി പ്രതിനിധികളെ ചര്‍ച്ചക്ക് ക്ഷണിച്ചിരുന്നില്ല. എസ്.എന്‍.ഡി.പിക്ക് സര്‍ക്കാര്‍ നീക്കം ലാഭക്കച്ചവടമാണെന്നും പത്തോ നാല്‍പതോ സ്കൂളുകളുള്ള അവര്‍ക്ക് ഇതുകൊണ്ട് ഒന്നും വരാനില്ലെന്നും എന്‍.എസ്.എസ് അസി.ജനറല്‍ സെക്രട്ടറി ജി.സുകുമാരന്‍ നായര്‍ പറഞ്ഞു.
സര്‍ക്കാറിനെ വിദ്യാഭ്യാസ പരിഷ്കരണത്തില്‍നിന്ന് പിന്തിരിപ്പിക്കാന്‍ സംയുക്ത നീക്കത്തിനാവുമെന്ന പ്രതീക്ഷയാണ് സമുദായ നേതാക്കള്‍ പ്രകടിപ്പിച്ചത്.
ഇത് സംബന്ധിച്ച് പ്രക്ഷോഭത്തിന് തയാറാണോ എന്ന മാധ്യമ പ്രതിനിധികളുടെ ചോദ്യത്തിന് ‘ചര്‍ച്ച തുടക്കം മാത്രമാണ്’ എന്നായിരുന്നു കാതോലിക്കാബാവയുടെ പ്രതികരണം.
കടപ്പാട്-മാധ്യമം

  എന്‍.എസ്.എസും ക്രൈസ്തവസഭയും കൈകോര്‍ക്കുന്നു
ചങ്ങനാശേരി: വിദ്യാഭ്യാസാവകാശങ്ങള്‍ കവര്‍ന്നെടുക്കാനുള്ള സംസ്ഥാന സര്‍ക്കാരിന്റെ ഏതു നീക്കത്തെയും ചെറുത്തുതോല്‍പ്പിക്കുമെന്ന പ്രഖ്യാപനത്തോടെ ക്രൈസ്തവ സഭാ മേലധ്യക്ഷന്‍മാരും എന്‍.എസ്.എസ് നേതാക്കളും ചങ്ങനാശേരിയില്‍ ചര്‍ച്ച നടത്തി.

വിദ്യാഭ്യാസ നിയമ പരിഷ്കരണത്തിന്റെ പേരില്‍ എയ്ഡഡ് സ്കൂള്‍ മാനേജ്മെന്റുകള്‍ക്ക് അവകാശപ്പെട്ട നിയമനാധികാരം കൈയടക്കുന്നതിനും ഭരണം തദ്ദേശസ്വയംഭരണ സ്ഥാപനങ്ങളുടെ കൈപ്പിടിയില്‍ ഒതുക്കി രാഷ്ട്രീയക്കാരുടെ വേദിയാക്കി മാറ്റാനുമുള്ള നീക്കം അനുവദിക്കില്ല. വിദ്യാഭ്യാസമുള്‍പ്പെടെ സമാനമായ എല്ലാ വിഷയങ്ങളിലും ഇരു സമുദായങ്ങളും കൈകോര്‍ത്തു നീങ്ങാനും യോഗം തീരുമാനിച്ചു.

ഒരാഴ്ച നീണ്ട ആലോചനകള്‍ക്കൊടുവില്‍ ചങ്ങനാശേരി പെരുന്ന എന്‍.എസ്.എസ് ആസ്ഥാനത്ത് ഇന്നലെ രാവിലെ രണ്ടു മണിക്കൂര്‍ രഹസ്യ ചര്‍ച്ചയ്ക്കുശേഷമാണ് വിദ്യാഭ്യാസ- സാമുദായികതലങ്ങളില്‍ സഹകരണം ഉറപ്പാക്കുന്ന തീരുമാനം പ്രഖ്യാപിച്ചത്.

ബസേലിയോസ് മാര്‍ ക്ളീമീസ് കാതോലിക്കാ ബാവ, മാര്‍ ജോസഫ് പെരുന്തോട്ടം, മാര്‍ മാത്യു മൂലക്കാട്ട്, ഡോ. സ്റ്റാന്‍ലി റോമന്‍, പൌലോസ് മാര്‍ പക്കോമിയോസ്, തോമസ് മാര്‍ തിമോത്തിയോസ്, റവ. തോമസ് ശാമുവല്‍, ഇന്റര്‍ ചര്‍ച്ച് കൌണ്‍സില്‍ സെക്രട്ടറി ഫാ. ഫിലിപ്പ് ഞരളക്കാട്ട്, റവ.കെ.എം മാമന്‍, ജോസഫ് എം പുതുശേരി എംഎല്‍എ എന്നിവര്‍ ക്രൈസ്തവസഭകളെ പ്രതിനിധീകരിച്ചും പി.കെ നാരായണപ്പണിക്കര്‍, പി.എന്‍ നരേന്ദ്രനാഥന്‍ നായര്‍, ജി. സുകുമാരന്‍ നായര്‍ എന്നിവര്‍ എന്‍.എസ്.എസിനെ പ്രതിനിധീകരിച്ചും ചര്‍ച്ചയില്‍ പങ്കെടുത്തു.

സമാനതലങ്ങളില്‍ ഒരുമിച്ചു നീങ്ങാന്‍ തയാറുള്ള മറ്റ് സമുദായാംഗങ്ങളും വൈകാതെ ക്രൈസ്തവ – നായര്‍ ഐക്യ ഫോറത്തോടു കൂട്ടുചേരും. മാര്‍ ജോസഫ് പെരുന്തോട്ടം, പി.കെ നാരായണപ്പണിക്കര്‍ എന്നിവര്‍ പ്രസിഡന്റുമാരും റവ. തോമസ് ശാമുവല്‍, ജി.സുകുമാരന്‍നായര്‍ എന്നിവര്‍ സെക്രട്ടറിമാരുമായുമാണ് ഐക്യ ഫോറം രൂപീകരിച്ചിരിക്കുന്നത്.

സമുദായ സഖ്യ തീരുമാനങ്ങള്‍ വ്യക്തമാക്കുന്ന പ്രസ്താവനയുടെ പൂര്‍ണരൂപം : സംസ്ഥാ നത്തിന്റെ വിദ്യാഭ്യാസ പുരോഗതിക്ക് ആദ്യകാലഘട്ടം മുതല്‍ മത- സാമുദായിക സംഘടനകളും പ്രസ്ഥാനങ്ങളും വ്യക്തികളും സ്വകാര്യമേഖലയില്‍ വഹിച്ചുവരുന്ന പങ്ക് വിസ്മരിക്കാവുന്നതല്ല. സര്‍ക്കാരിനെക്കൊണ്ടുമാത്രം സാധ്യമല്ലാതിരുന്ന വിദ്യാഭ്യാസപ്രവര്‍ത്തനം കടമയായി ഏറ്റെടുത്തവരാണ് മത-സാമുദായിക സംഘടനകള്‍. സര്‍ക്കാര്‍ സഹായം പ്രതീക്ഷിച്ചല്ല, മറിച്ചു വിദ്യാഭ്യാസ- സമൂഹപുരോഗതി മാത്രം ലക്ഷ്യമിട്ടാണ് ഞങ്ങള്‍ ആയിരക്കണക്കിനു വിദ്യാലയങ്ങള്‍ തുറന്നത്.

ഇവിടത്തെ ജീവനക്കാര്‍ക്ക് ശമ്പളം കൊടുത്തതുകൊണ്േടാ നാമമാത്രമായ വാര്‍ഷിക മെയിന്റനന്‍സ് ഗ്രാന്റ് അനുവദിച്ചതുകൊണ്േടാ മാത്രം ഇവയുടെ പ്രവര്‍ത്തനം പൂര്‍ണമായി എന്നു കരുതേണ്ടതില്ല. സ്ഥാവര-ജംഗമ സ്വത്തുക്കളും അതിന്റെ ഭാരിച്ച തുടര്‍ചെലവുകളും ഏറ്റെടുത്തുകൊണ്ടാണ് ഇന്നും ഈ സ്ഥാപനങ്ങളുടെ ഭരണം മാനേജുമെന്റുകള്‍ നിര്‍വഹിച്ചുപോരുന്നത്. വിദ്യാഭ്യാസനിയമ പരിഷ്ക്കരണത്തിന്റെ പേരില്‍ മാനേജുമെന്റുകള്‍ക്ക് അവകാശപ്പെട്ട നിയമനാധികാരം കൈയടക്കുന്നതിനും ഭരണം തദ്ദേശസ്വയംഭരണ സ്ഥാപനങ്ങളുടെ കൈപ്പിടിയില്‍ ഒതുക്കി രാഷ്ട്രീയക്കാരുടെ വേദിയാക്കി മാറ്റുന്നതിനുമുള്ള സര്‍ക്കാരിന്റെ നീക്കം നീതിയല്ല; അംഗീകരിക്ക ത്തക്കതുമല്ല.

ഈ നീക്കം രാഷ്ട്രീയപ്രേരിതവും ഏകപക്ഷീയവുമാണ്. വിദ്യാഭ്യാസപ്രവര്‍ത്തനങ്ങളില്‍ എന്നും ഉറച്ചുനിന്നിട്ടുള്ള മതസംഘടനകളേയും സാമുദായിക സംഘടനകളേയും ഭിന്നിപ്പിച്ച് തകര്‍ക്കുക എന്നുള്ള ലക്ഷ്യവും ഇതിനു പിന്നിലുണ്ട് എന്ന് വിശ്വസിക്കേണ്ടിയിരിക്കുന്നു.

എയ്ഡഡ് സ്കൂളുകളിലെ ജീവനക്കാരുടെ നിയമനം അതതു മാനേജുമെന്റുകള്‍ക്ക് അവകാശപ്പെട്ടതാണ്. അത് ഇന്നുള്ളതുപോലെ തുടരുകയും വേണം.അക്കാദമിക്- ഭരണ തലങ്ങളിലുളള നിയന്ത്രണവും ഇന്നുള്ളതുപോലെ തുടരണം.ഈ ചര്‍ച്ചായോഗം ആവശ്യമായതുടര്‍ നടപടികള്‍ കൈ ക്കൊള്ളുവാന്‍ തീരുമാനിച്ചി രിക്കയാണ്. ഈ കൂട്ടായ്മ സ്ഥിരമായി തുടര്‍ന്നുകൊണ്ടുപോകാനും തീരുമാനിച്ചിരിക്കുന്നു.

നായര്‍- ക്രൈസ്തവ ചര്‍ച്ചയ്ക്കു വിവിധ സാമൂഹിക മാനങ്ങള്‍
ചങ്ങനാശേരി: ക്രൈസ്തവ സഭാ പിതാക്കന്‍മാരും എന്‍.എസ്.എസ് നേതൃത്വവും ഇന്നലെ ചങ്ങനാശേരിയില്‍ നടത്തിയ വിദ്യാഭ്യാസ അവകാശ സംരക്ഷണ ചര്‍ ച്ച പ്രബലമായ രണ്ടു ന്യൂനപക്ഷ വിഭാഗങ്ങളുടെ ഐക്യദാര്‍ഢ്യ യോഗമായിരുന്നു. പെരുന്നയിലെ നായര്‍ സര്‍വീസ് സൊസൈറ്റി ആസ്ഥാനത്ത് ക്രൈസ്തവ സഭാ പിതാക്കന്‍മാര്‍ ചര്‍ച്ചയ്ക്കെത്തുന്നത് ഇത് ആദ്യമായാണ്.

മുന്‍കാലങ്ങളില്‍ സമാനമായ സമുദായ ചര്‍ച്ചകളെല്ലാം നടന്നിട്ടുള്ളത് ചങ്ങനാശേരി മെത്രാപ്പോലീത്തന്‍ അരമനയിലാണ്. ക ത്തോലിക്ക, ഓര്‍ത്തഡോക്സ്, യാക്കോബായ, സി.എസ്.ഐ, മാര്‍ത്തോമ, ക്നാനായ സഭകളുടെ പ്രധാനികള്‍ രണ്ടു മണിക്കൂര്‍ നീണ്ട രഹസ്യചര്‍ച്ചയിലുണ്ടായി. എസ്.എന്‍.ഡി.പിയുമായുള്ള രണ്ടു വര്‍ഷത്തെ സഖ്യം മുറിച്ചശേഷം എന്‍.എസ്.എസ് പുതിയൊരു സാമുദായിക സഹകരണ സഖ്യ ത്തിനു ക്രൈസ്തവവിഭാഗങ്ങളെ കൂട്ടി അടിത്തറയിടുകയായിരുന്നു.

സംവരണത്തിന്റെ ഒരു ആനുകൂല്യവുമില്ലാത്ത നായര്‍ സമുദായത്തിന്റെ വിദ്യാഭ്യസ അവകാ ശങ്ങള്‍ക്കൂടി കവര്‍ന്നെടുത്താല്‍ പ്രക്ഷോഭത്തില്‍ ഏതു തലംവരെയും പോകാന്‍ മടിക്കില്ലെന്ന് നേതൃത്വം വ്യക്തമാക്കി.

കേരളത്തിലെ 45 ശതമാനം വിദ്യാഭ്യാസ സ്ഥാപനങ്ങളും നടത്തുന്ന ക്രൈസ്തവ സഭകളുടെ അസ്ഥിത്വം തകര്‍ക്കുന്ന നീക്കമാണ് അധ്യാപക നിയമനം പി.എസ്.സിക്കുവിടാനും സ്ഥാപന നടത്തിപ്പില്‍ രാഷ്ട്രീയ താത്പര്യങ്ങളുള്ള ജനപ്രതിനിധികളെ ഉള്‍പ്പെടുത്തുകയും വഴി സര്‍ക്കാര്‍ ലക്ഷ്യ മിടുന്നതെന്ന് അഭിപ്രായമുയര്‍ന്നു. ക്രൈസ്തവ സ്കൂളുകളെ രാഷ്ടീയവല്‍കരിക്കുകവഴി വിശ്വാ സസംരക്ഷണം തന്നെ അപകടത്തിലാകുമെന്നും ഇന്റര്‍ ചര്‍ച്ച് കൌ ണ്‍സില്‍ വ്യക്തമാക്കി.

പള്ളി വക സ്കൂളുകള്‍ പള്ളിപ്പറമ്പുകളിലാണ് സ്ഥാപിച്ചിരിക്കുന്നത്. സന്യസ്തരുടെയും സമര്‍പ്പിതരുടെയും സമര്‍പ്പിത സേവനമാണ് ഇതിന്റെ അടിത്തറ. ഈ സമാധാന അന്തരീക്ഷമാണ് കേരളത്തിന്റെ വിദ്യാഭ്യാസരംഗത്തെ ഇത്രത്തോളം സമ്പന്നമാക്കിയത്. എന്നാല്‍ പള്ളിക്കൂടങ്ങളുടെ പ്ര വര്‍ത്തന അവകാശം നഷ്ടപ്പെടാ ന്‍ സമുദായിക നിലനില്‍പിനു ത ന്നെ ഭീഷണിയാകുമെന്നാണ് സഭാ നേതൃത്വം കഴിഞ്ഞ ദിവസങ്ങളില്‍ വിലയിരുത്തിയത്.

നായര്‍ സമുദായം മുന്നോക്കമെങ്കിലും സംവരണത്തിന്റെ ആനുകൂല്യം ഒന്നും തന്നെ കിട്ടുന്നവര ല്ലെന്നും എന്‍.എസ്.എസ് അസിസ്റ്റന്റ് സെക്രട്ടറി ജി.സുകുമാരന്‍നായര്‍ പറഞ്ഞു. ഞങ്ങള്‍ സഹോദരങ്ങളാണെന്നും എല്ലാ കാര്യങ്ങളിലും സൌദാര്‍ദത സൂക്ഷിക്കുന്നു ണ്െടന്നും സുകുമാരന്‍നായര്‍ കൂട്ടി ച്ചേര്‍ത്തു. ആശയപരമായി യോജിക്കുമെങ്ങില്‍ മുസ്ളീം എഡ്യുക്കേഷണല്‍ സൊസൈറ്റിയെയും ഐക്യ ഫോറത്തില്‍ ചേര്‍ക്കാന്‍ തയാ റാണ്.

വിദ്യാഭ്യാസ സ്വാതന്ത്യ്രത്തിനെതിരേയുള്ള സര്‍ക്കാര്‍ നീക്കങ്ങളെ ചെറുക്കാന്‍ പൊതുവേദിയില്‍ ഒരുമിച്ച് അണിനിരക്കുന്നതുള്‍ പ്പെടെ എല്ലാ രംഗങ്ങളിലും സഹകരിക്കും-മേജര്‍ ആര്‍ച്ച് ബിഷപ് ബസേലിയോസ് ക്ളീമീസ് കാതോലിക്കാ ബാവ പത്രസമ്മേളനത്തില്‍ വിശദീകരിച്ചു.

ഇത്തരമുള്ള സമുദായ ഐക്യം മുന്‍കാല ചരിത്രത്തിന്റെ തനിയാവര്‍ത്തനമാണെന്ന് അല്‍പം കൂടി മാനങ്ങള്‍ നല്‍കി പി.കെ നാരായണപ്പണിക്കര്‍ പറഞ്ഞു. എന്നാ ല്‍ ഇത് രണ്ടാം വിമോചന സമരത്തിന്റെ തുടക്കമല്ലെന്നും കൂട്ടി ച്ചേര്‍ത്തു.ഒന്നരയാഴ്ച മുന്‍പു തുടങ്ങിയ ആശയവിനിമയമാണ് ഇന്നലെ പതിനഞ്ചു പ്രതിനിധികളുടെ രഹസ്യചര്‍ച്ചയ്ക്ക് വഴിയിട്ടത്. പി.കെ നാരായണപണിക്കരുടെ സഹപാഠിയും ഇന്റര്‍ ചര്‍ച്ച് കൌണ്‍സിലിന്റെ ചെയര്‍മാനുമായ മാര്‍ ജോസഫ് പവ്വത്തില്‍ വിദേശപര്യടനത്തിലായതിനാല്‍ ചര്‍ച്ചയില്‍ സംബന്ധിച്ചിരുന്നില്ല.
കടപ്പാട്- ദീപിക

3അഭിപ്രായങ്ങള്‍

Filed under പലവക

കുപ്പിവെള്ളക്കച്ചവടം – മാതൃഭൂമിയോട് കടപ്പാട്

പുതുതായി ചേര്‍ക്കുന്നത് താഴേയ്ക്കാണ് ലഭ്യമാക്കുന്നത്.

28 Oct, 2007
കുപ്പിവെള്ളക്കച്ചവടം: ചില വസ്തുതകള്‍

എം.പി.വീരേന്ദ്രകുമാര്‍ എം.പി.

ആഗോളാടിസ്ഥാനത്തില്‍ കുടിവെള്ളക്കച്ചവടം നിയന്ത്രിക്കുന്ന വിവെന്‍ഡി എന്ന കോര്‍പ്പറേറ്റ് കുത്തകയുടെ ഒരുപസ്ഥാപനത്തിന്റെ മേധാവി ജലസംബന്ധിയായ വസ്തുതകളെ ഇങ്ങനെ ക്രോഡീകരിച്ചു: ”ഓരോ മനുഷ്യജീവിയുടെയും നിത്യജീവിതത്തില്‍ നിര്‍ണായകവും അത്യന്താപേക്ഷിതവുമായ ഘടകമാണ് വെള്ളം. അതോടൊപ്പം തന്നെ കമ്പനികള്‍ക്ക് ലാഭമുണ്ടാക്കാവുന്ന ശക്തമായ ഘടകം കൂടിയാണത്.”

ഏറ്റവും കൂടുതല്‍ കുപ്പിവെള്ളമുപയോഗിക്കുന്ന ലോകരാജ്യങ്ങളില്‍ ഇന്ത്യയിപ്പോള്‍ പത്താം സ്ഥാനത്താണ്. പ്രതിവര്‍ഷം ചുരുങ്ങിയത് 1800 കോടി രൂപ വിറ്റുവരവുള്ള ഒരു ബിഗ് ബിസിനസ്സായി കുപ്പിവെള്ളക്കച്ചവടം നമ്മുടെനാട്ടില്‍ വളര്‍ന്നിരിക്കുന്നു. വളര്‍ച്ചനിരക്ക് നാല്പതു മുതല്‍ 50 ശതമാനം വരെ. 1990_ല്‍ രണ്ടു ദശലക്ഷം കെയ്സ് കുപ്പിവെള്ളം വിറ്റഴിഞ്ഞപ്പോള്‍, 2006_ല്‍ വിപണിയില്‍ വിറ്റുതീര്‍ന്നത് 68 ദശലക്ഷം കെയ്സുകള്‍.

ഇരുപതാം ശതകത്തില്‍ എണ്ണയ്ക്കുണ്ടായിരുന്ന നിര്‍ണായക പദവിയാണ് 21_ാം നൂറ്റാണ്ടില്‍ വെള്ളത്തിനുണ്ടാവുക_അതായിരിക്കും രാജ്യങ്ങളുടെ സമ്പത്ത് നിശ്ചയിക്കുന്ന അമൂല്യവസ്തു.” 2000_ത്തില്‍ ഫോര്‍ച്യൂണ്‍ മാസികയാണ് ശ്രദ്ധേയമായ ഈ നിരീക്ഷണം നടത്തിയത്. പ്രകൃതിവിഭവങ്ങളുടെ മേലുള്ള ആധിപത്യത്തിനായി ഭാവിയില്‍ നടക്കുന്ന യുദ്ധങ്ങള്‍ എണ്ണയ്ക്കുവേണ്ടിയായിരിക്കില്ല, വെള്ളത്തിനുവേണ്ടിയായിരിക്കും; രാജ്യങ്ങളുടെ സമ്പത്ത്, കോര്‍പ്പറേഷനുകളുടെ സമ്പത്തിനു വഴിമാറുകയും ചെയ്യും. ആഗോളാടിസ്ഥാനത്തില്‍ കുടിവെള്ളക്കച്ചവടം നിയന്ത്രിക്കുന്ന വിവെന്‍ഡി എന്ന കോര്‍പ്പറേറ്റ് കുത്തകയുടെ ഒരുപസ്ഥാപനത്തിന്റെ മേധാവി ജലസംബന്ധിയായ വസ്തുതകളെ ഇങ്ങനെ ക്രോഡീകരിച്ചു: ”ഓരോ മനുഷ്യജീവിയുടെയും നിത്യജീവിതത്തില്‍ നിര്‍ണായകവും അത്യന്താപേക്ഷിതവുമായ ഘടകമാണ് വെള്ളം. അതോടൊപ്പം തന്നെ കമ്പനികള്‍ക്ക് ലാഭമുണ്ടാക്കാവുന്ന ശക്തമായ ഘടകം കൂടിയാണത്.”

കുപ്പിവെള്ളക്കച്ചവടത്തില്‍ അന്തര്‍ലീനമായ സാമ്പത്തിക താത്പര്യങ്ങള്‍ അനാവരണം ചെയ്യുകയായിരുന്നു, വിവെന്‍ഡിയുമായി ബന്ധപ്പെട്ട ആ ബിസിനസ് മേധാവി.

ഏറ്റവും കൂടുതല്‍ കുപ്പിവെള്ളമുപയോഗിക്കുന്ന ലോകരാജ്യങ്ങളില്‍ ഇന്ത്യയിപ്പോള്‍ പത്താം സ്ഥാനത്താണ്. പ്രതിവര്‍ഷം ചുരുങ്ങിയത് 1800 കോടി രൂപ വിറ്റുവരവുള്ള ഒരു ബിഗ് ബിസിനസ്സായി കുപ്പിവെള്ളക്കച്ചവടം നമ്മുടെനാട്ടില്‍ വളര്‍ന്നിരിക്കുന്നു. വളര്‍ച്ചനിരക്ക് നാല്പതു മുതല്‍ 50 ശതമാനം വരെ. 1990_ല്‍ രണ്ടു ദശലക്ഷം കെയ്സ് കുപ്പിവെള്ളം വിറ്റഴിഞ്ഞപ്പോള്‍, 2006_ല്‍ വിപണിയില്‍ വിറ്റുതീര്‍ന്നത് 68 ദശലക്ഷം കെയ്സുകള്‍.

ഇന്ത്യന്‍ സ്റ്റാന്‍ഡേര്‍ഡ് ബ്യൂറോയുടെ കണക്കനുസരിച്ച് രാജ്യത്തിന്റെ വിവിധ ഭാഗങ്ങളിലായി 1,200 കുപ്പിവെള്ള ഫാക്ടറികളുണ്ട്. 15 രൂപ കൊടുത്ത് ഒരു ലിറ്റര്‍ കുപ്പിവെള്ളം വാങ്ങുമ്പോള്‍, പൈപ്പ്വെള്ളത്തേക്കാള്‍ 4,200 ഇരട്ടിവില നല്‍കിക്കൊണ്ടാണ് അത് വാങ്ങുന്നതെന്ന കാര്യം ആരുമോര്‍ക്കാറില്ല. കാര്യമായ മുതല്‍മുടക്കൊന്നുമില്ലാതെയാണ് കുപ്പിവെള്ളക്കച്ചവടത്തിലേര്‍പ്പെട്ട കോര്‍പറേറ്റ് കുത്തകകള്‍ കോടിക്കണക്കിന് രൂപ ലാഭമുണ്ടാക്കുന്നത്. ഭൂഗര്‍ഭജലമൂറ്റുന്നതിന് വളരെ തുച്ഛമായ തുക മാത്രമാണവ സര്‍ക്കാറിന് സെസ്സ് ഇനത്തില്‍ നല്‍കിക്കൊണ്ടിരിക്കുന്നത്. ഒരുദാഹരണം: രാജസ്ഥാനിലെ വരള്‍ച്ചബാധിത പ്രദേശമായ കാലദേരയില്‍ പ്രവര്‍ത്തിക്കുന്ന കൊക്കകോള ഫാക്ടറി പ്രതിവര്‍ഷം വെറും 5000 രൂപ നല്‍കിയായിരുന്നു അടുത്തകാലംവരെ കുഴല്‍ക്കിണറുകളുപയോഗിച്ച് ദിനംപ്രതി അഞ്ചുലക്ഷം ലിറ്റര്‍ ഭൂഗര്‍ഭജലമൂറ്റിക്കൊണ്ടിരുന്നത്. അതായത് ആയിരം ലിറ്റര്‍ വെള്ളത്തിന് കമ്പനി സര്‍ക്കാറിലൊടുക്കിയത് വെറും പതിന്നാലു പൈസ! പന്ത്രണ്ടു രൂപ വിലയുള്ള ഒരു ലിറ്റര്‍ കിന്‍ലെ കുപ്പിവെള്ളത്തിനാവശ്യമായ ‘അസംസ്കൃത പദാര്‍ഥ’ത്തിന്റെ വില 0.02_0.03 പൈസ മാത്രം. ശുദ്ധീകരണത്തിന് _ അങ്ങനെ വല്ലതും നടക്കുന്നുണ്ടെങ്കില്‍ _ ലിറ്റര്‍ ഒന്നിനു ചെലവാകുന്ന പരമാവധി തുക വെറും കാല്‍ പൈസ. പ്ലാസ്റ്റിക്കുപ്പി, ലോറിചാര്‍ജ്, പരസ്യച്ചെലവ് എന്നിവയൊക്കെ കൂട്ടിയാലും ഒരു ലിറ്റര്‍ കുപ്പിവെള്ളം വിറ്റാല്‍ കമ്പനിക്ക് കിട്ടുന്നത് വന്‍ ലാഭംതന്നെയാണ്. ചുരുക്കത്തില്‍, കുപ്പിയിലാക്കുന്ന വെള്ളം ഏറെക്കുറെ സൌജന്യമായി ലഭിക്കുമ്പോള്‍ കോര്‍പ്പറേറ്റ് കുത്തകകളുടെ ലാഭത്തെക്കുറിച്ച് ഊഹിച്ചാല്‍ മതി.

ആഗോളീകരണം സ്വകാര്യമേഖലയെ പ്രോത്സാഹിപ്പിച്ചുകൊണ്ടിരിക്കുന്ന ഈ കാലഘട്ടത്തില്‍ ജലദൌര്‍ലഭ്യത്തെ ചൂഷണം ചെയ്ത് കുപ്പിവെള്ളം വിപണിയിലിറക്കി ലാഭം കൊയ്തുകൂട്ടാന്‍ കുത്തകസ്ഥാപനങ്ങള്‍ മത്സരിക്കുകയാണ്. നൂറിലേറെ കമ്പനികള്‍, അവയുടെ ബ്രാന്‍ഡുകളുമായി വിപണിയില്‍ സജീവം. ‘ധാതുലവണങ്ങള്‍ സമൃദ്ധമായ, മഞ്ഞുമലകളില്‍ നിന്നൊഴുകിയെത്തുന്ന വിശുദ്ധജലം’ ‘ഓരോ തുള്ളിയിലും വിശ്വാസ്യത’ തുടങ്ങിയ പരസ്യവാചകങ്ങള്‍. ഡീലര്‍മാര്‍ക്ക് ആകര്‍ഷണീയമായ കമ്മീഷന്‍. കിണറുകളില്‍ നിന്നും മുനിസിപ്പല്‍ ടാപ്പുകളില്‍ നിന്നും ലഭിക്കുന്ന വെള്ളം മലിനീകൃതമാണെന്ന സംഘടിതവും ആസൂത്രിതവുമായ പ്രചാരണം. കുപ്പിവെള്ള വില്പന കൊഴുക്കാന്‍ ഇത്രയൊക്കെ ധാരാളം മതി. എന്നാല്‍, മുനിസിപ്പാലിറ്റി ടാപ്പില്‍ നിന്നും ലഭ്യമാകുന്ന വെള്ളത്തിന്റെ പല മടങ്ങ് വിലവരുന്ന കുപ്പിവെള്ളം എന്തിനു വാങ്ങണമെന്ന് ആരും ചിന്തിക്കുന്നില്ല. സൂപ്പര്‍ മാര്‍ക്കറ്റുകളിലും ഷോപ്പിങ് മാളുകളിലും ക്ലബ്ബുകളിലും ഐസ്ക്രീം പാര്‍ലറുകളിലും റെയില്‍വേ/ബസ് സ്റ്റേഷനുകളിലും സിനിമാ ശാലകളിലുമെന്നുവേണ്ട, പത്താളുകള്‍ കൂടുന്നിടങ്ങളിലൊക്കെ കോര്‍പ്പറേറ്റ് കുത്തകകളുടെ വിവിധ ബ്രാന്‍ഡ് കുപ്പിവെള്ളം ആഡംബര ജീവിതത്തിന്റെ അടയാളമെന്നവണ്ണം വിലസുന്നു. യാത്രാവേളകളില്‍, സമ്പന്നരും ഇടത്തരക്കാരും കുപ്പിവെള്ളം ഒരു സ്റ്റാറ്റസ് സിംബലെന്നപോലെ കൊണ്ടുനടക്കുന്നു. നന്നായി തിളപ്പിച്ച, കിണറ്റിലെയോ മുനിസിപ്പല്‍ പൈപ്പിലെയോ വെള്ളത്തിന്റെയത്രയും ശുദ്ധമല്ല കുപ്പിവെള്ളം എന്ന് ആരും തിരിച്ചറിയുന്നില്ല. ഉപഭോഗസംസ്കാരത്തിന്റെ മറ്റൊരു മുഖമായി ഇന്ത്യയില്‍ കുപ്പിവെള്ളം മാറിയിരിക്കുന്നു.

1980 കളുടെ ആരംഭത്തില്‍, പ്ലാസ്റ്റിക് കുപ്പി ഏറെ ജനസമ്മതി നേടിയതിനെത്തുടര്‍ന്നാണ് കുപ്പിവെള്ളക്കച്ചവടത്തില്‍ വന്‍കുതിപ്പുണ്ടായത്. കൊക്കകോളയുടെ കിന്‍ലെ, പെപ്സിയുടെ അക്വാഫിന, നെസ്ലെയുടെ പ്യുര്‍ ലൈഫ് തുടങ്ങിയ ഇനങ്ങളാണ് ആദ്യം വിപണിയിലെത്തിയത്. തുടര്‍ന്ന് ചെറുകിട കമ്പനികളും രംഗത്തെത്തി. അരലിറ്ററിലും ഒരു ലിറ്ററിലും തുടങ്ങി 20 ലിറ്ററിന്റെ വരെ പ്ലാസ്റ്റിക് കാനുകളില്‍ കുപ്പിവെള്ളം ലഭ്യമാണ്. ആസ്പത്രികളിലും ഓഫീസുകളിലുമൊക്കെ ഇത്തരം ജംബോകാനുകള്‍ പതിവുകാഴ്ചയാണിപ്പോള്‍.

ഐ.എം.എഫ്, ലോകബാങ്ക്, എ.ഡി.ബി. തുടങ്ങിയ അന്തര്‍ദേശീയ ഏജന്‍സികള്‍ സാമ്പത്തിക പ്രാധാന്യമുള്ള, വിലനിര്‍ണയിച്ച് വിപണനം ചെയ്യേണ്ടതായ ഒരു ചരക്കാണ് വെള്ളമെന്ന് പ്രഖ്യാപിച്ചിട്ടുണ്ട്. ജലവിപണിയിലെ കോര്‍പ്പറേറ്റ് കുത്തകകള്‍ക്ക് അവ വലിയ പ്രോത്സാഹനവും നല്‍കിവരുന്നു. വെള്ളം ദൈവത്തിന്റെ വരദാനമല്ലെന്നും ജലസംസ്കരണം, വിതരണം എന്നിവയ്ക്ക് ഉപഭോക്താക്കള്‍ വില നല്‍കേണ്ടിവരുമെന്നും സ്ത്രീകളെയും യുവാക്കളെയും കര്‍ഷകരെയും പഠിപ്പിക്കാനുള്ള ഒരു സാമൂഹിക വിദ്യാഭ്യാസ പദ്ധതി എ.ഡി.ബി. അവതരിപ്പിച്ചതായി ‘രോഷത്തിന്റെ വിത്തുകള്‍’ എന്ന എന്റെ രചനയില്‍ വര്‍ഷങ്ങള്‍ക്കുമുമ്പ് ചൂണ്ടിക്കാണിച്ചിരുന്ന കാര്യം സാന്ദര്‍ഭികമായി ഇവിടെ അനുസ്മരിക്കട്ടെ.

ജലചൂഷണത്തിനെതിരെ ഇന്ത്യയിലോ മറ്റു വികസ്വരനാടുകളിലോ സംഘടിതവും വ്യാപകവുമായ ജനമുന്നേറ്റങ്ങളൊന്നും നടക്കുന്നില്ലെങ്കിലും (ബൊളീവിയയിലെ കൊച്ചബാംബയിലും പ്ലാച്ചിമടയിലും നടന്ന പ്രതിരോധത്തെയിവിടെ വിസ്മരിക്കുന്നില്ല) എത്ര വിലകൊടുത്തും കുപ്പിവെള്ളം വാങ്ങിക്കുടിക്കാന്‍ സാമ്പത്തിക ശേഷിയുള്ള അമേരിക്കയിലെ, ഏതാനും തദ്ദേശ സ്വയംഭരണ സ്ഥാപനങ്ങള്‍ കുടിവെള്ളക്കച്ചവടത്തിനെതിരെ കര്‍ശന നടപടികള്‍ സ്വീകരിച്ചുവരുന്നുണ്ടെന്നത് ശ്രദ്ധിക്കപ്പെടേണ്ടതാണ്. അമേരിക്കന്‍ നഗരമായ സാന്‍ഫ്രാന്‍സിസ്കോവിലെ മേയര്‍ ഗാവിന്‍ ന്യൂസോം സര്‍ക്കാര്‍ ഓഫീസുകളിലും പൊതുസ്ഥലങ്ങളിലും കുപ്പിവെള്ളത്തിനു നിരോധനമേര്‍പ്പെടുത്തിയത് ഈയിടെയാണ്. ആ നഗരത്തില്‍ വിതരണം ചെയ്യുന്ന പൈപ്പ്വെള്ളം കുപ്പിവെള്ളത്തേക്കാള്‍ ഗുണമേന്മയുള്ളതാണെന്നും ഒരു ലിറ്റര്‍കുപ്പിവെള്ളത്തിനുകൊടുക്കുന്ന പണം കൊണ്ട് 1000 ലിറ്റര്‍ പൈപ്പ്വെള്ളം വാങ്ങാനാകുമെന്നും അദ്ദേഹം പ്രസ്താവിക്കുകയുണ്ടായി.

സാള്‍ട്ട് ലെയ്ക്ക് സിറ്റിയിലെ മേയര്‍ ഔദ്യോഗിക പരിപാടികളില്‍ കുപ്പിവെള്ളം നിരോധിച്ചതും അടുത്ത കാലത്താണ്. ന്യൂയോര്‍ക്ക് നഗരത്തില്‍, മുനിസിപ്പാലിറ്റി വിതരണം ചെയ്യുന്ന വെള്ളം മാത്രമുപയോഗിക്കാനായി നഗരവാസികളെ ബോധവത്കരിക്കുന്നതിന് ഒരു ദശലക്ഷം ഡോളര്‍ ചെലവു വരുന്നൊരു പദ്ധതി ആവിഷ്കരിച്ചിട്ടുണ്ട്. കൂടാതെ ചില വന്‍കിട ഹോട്ടലുകളിലും റസ്റ്റോറന്റുകളിലും കുപ്പിവെള്ളം നിരോധിച്ചിട്ടുണ്ട്. ഇതെല്ലാം നടക്കുന്നത് കോര്‍പ്പറേറ്റ് കുത്തകകളുടെ ആസ്ഥാനമായ അമേരിക്കയിലാണെന്ന കാര്യം ഓര്‍ക്കേണ്ടതുണ്ട്. അടുത്തയിടെ അമേരിക്കയില്‍ത്തന്നെ രസകരമായ മറ്റൊരു സംഭവമുണ്ടായി. തങ്ങള്‍ വിപണിയിലിറക്കുന്ന അക്വഫിന വെറും പൈപ്പ്വെള്ളമാണെന്ന് പെപ്സി കമ്പനിക്ക് കുറ്റസമ്മതം നടത്തേണ്ടിവന്നു. ‘പൊതുജലസംഭരണിയില്‍ നിന്നുള്ള പൈപ്പ് വെള്ളമാണിത്’ ഏവര്‍ക്കും കാണത്തക്കവിധം അക്വഫിനയുടെ പ്ലാസ്റ്റിക് കുപ്പിയുടെ മേലെ ആലേഖനം ചെയ്യാന്‍ പെപ്സി നിര്‍ബന്ധിതവുമായി.

മറ്റു ചില പ്രസക്ത വസ്തുതകള്‍ കൂടി ചൂണ്ടിക്കാണിക്കട്ടെ. 2005_ല്‍ ട്രിബ്യൂണ്‍ പത്രത്തിന്റെ നേതൃത്വത്തില്‍, പഞ്ചാബ് കാര്‍ഷിക സര്‍വകലാശാലയിലെ മൈക്രോബയോളജി വിഭാഗത്തില്‍ ഒരു പ്രശസ്ത ബ്രാന്‍ഡ് കുപ്പിവെള്ളത്തില്‍ നടത്തിയ പരീക്ഷണത്തിലൂടെ മനുഷ്യരിലും മൃഗങ്ങളിലും കാണപ്പെടുന്ന ഒരിനം ബാക്ടീരിയ അതില്‍ സമൃദ്ധമായുള്ളതായി തെളിഞ്ഞു. മനുഷ്യോപയോഗത്തിന് പറ്റാത്ത മലിനീകൃത ജലമായിരുന്നു പ്രശസ്ത കമ്പനി കുപ്പിയിലാക്കി വിപണിയിലെത്തിച്ചിരുന്നത്. കിന്‍ലെ, അക്വഫിന, ബ്ലൂലേബല്‍, ബിസ്ലേരി, സ്പ്രിങ്വെല്‍ തുടങ്ങിയ കമ്പനികള്‍ ചണ്ഡീഗഢ് നഗരത്തില്‍ വിപണനം ചെയ്ത കുപ്പിവെള്ള സാമ്പിളുകള്‍ പരീക്ഷണവിധേയമാക്കിയപ്പോള്‍, ഇ_കോളി, കോളിഫോം തുടങ്ങിയ വിഷാംശങ്ങള്‍ അവയില്‍ കണ്ടെത്തി.

കുപ്പിവെള്ളവും പൈപ്പ്വെള്ളവും തമ്മില്‍ കാതലായ വ്യത്യസങ്ങളൊന്നുമില്ലെന്ന സെന്റര്‍ ഫോര്‍ സയന്‍സ് ആന്‍ഡ് എന്‍വയോണ്‍മെന്റ് (സി.എസ്.ഇ) ഡയറക്ടറും 2005_ലെ സ്റ്റോക്ക് വാട്ടര്‍ പ്രൈസ്ജേതാവുമായ സുനിതാ നാരായണിന്റെ നിരീക്ഷണവും ഇവിടെ പ്രസക്തമാണ്. ”അത് പ്ലാസ്റ്റിക് കുപ്പിയിലാണ്, പൈപ്പിലല്ല എന്നതാണ് ഏക വ്യത്യാസം. ഇന്ത്യയിലെ ധനികര്‍ക്ക് കുപ്പിവെള്ളം വാങ്ങാന്‍ കഴിയും. ദരിദ്രര്‍ക്ക് പറ്റില്ല.”

ധനികര്‍ക്കു വേണമെങ്കില്‍, ലിറ്ററൊന്നിന് 280 രൂപവരെ വിലയുള്ള, ഇറക്കുമതി ചെയ്ത, കുപ്പിവെള്ളത്തില്‍ കുളിക്കുകയുമാവാം!

പ്ലാസ്റ്റിക് കുപ്പികള്‍ സൃഷ്ടിക്കുന്ന പ്രശ്നങ്ങള്‍
29 Oct, 2007
അമേരിക്കയില്‍ 1960ല്‍ മുനിസിപ്പാലിറ്റി ശേഖരിച്ച ഖരമാലിന്യങ്ങളില്‍ പ്ലാസ്റ്റിക് ഉത്പന്നങ്ങള്‍ ഒരു ശതമാനം മാത്രമായിരുന്നുവെങ്കില്‍, 2001 ആയപ്പോഴേക്ക് അതിന്റെ അനുപാതം 15 ശതമാനമായി കുത്തനെ ഉയര്‍ന്നു. ആ വര്‍ഷം രണ്ടു കോടി നാല്പതുലക്ഷം ടണ്‍ പ്ലാസ്റ്റിക് മാലിന്യമാണ് അവിടെ പ്രകൃതിയില്‍ ഉപേക്ഷിക്കപ്പെട്ടത്. (ആഗോളതാപനത്തിന് ഏറ്റവുമധികം സംഭാവന നല്‍കുന്നത് അമേരിക്കയാണ് എന്ന വസ്തുത കൂടി ഇവിടെ ഓര്‍ക്കേണ്ടതുണ്ട്). ആ രാജ്യമിപ്പോള്‍, അവിടെ കുന്നുകൂടുന്ന പ്ലാസ്റ്റിക് അടക്കമുള്ള മാലിന്യങ്ങള്‍ ഇന്ത്യയിലേക്കും മറ്റു മൂന്നാം ലോകരാജ്യങ്ങളിലേക്കും സമര്‍ഥമായി ‘കയറ്റി അയയ്ക്കുക’യാണ്. അടുത്തയിടെയാണല്ലോ അമേരിക്കയില്‍നിന്ന് ‘മാലിന്യ കണ്ടെയ്നര്‍’ കൊച്ചി തുറമുഖത്തെത്തിയത്

കുപ്പിവെള്ളത്തില്‍ വിഷാംശം കലര്‍ന്നിട്ടുണ്ടെന്ന് ശാസ്ത്രീയപരീക്ഷണങ്ങള്‍ തെളിയിച്ചിട്ടുണ്ടെങ്കിലും കോര്‍പ്പറേറ്റ് കുത്തകകള്‍ അതംഗീകരിക്കാന്‍ തയ്യാറല്ല. ‘ഹരിതതലമുറയില്‍പ്പെട്ട ശുദ്ധജലം’ എന്നാണ് അവര്‍ തങ്ങളുടെ ബ്രാന്‍ഡ് കുപ്പിവെള്ളത്തെ വിശേഷിപ്പിക്കുന്നത്. എന്നാല്‍ അവയുള്‍ക്കൊള്ളുന്ന പ്ലാസ്റ്റിക് കുപ്പികളോ? അവ വിഷലിപ്തമായ രാസപദാര്‍ഥങ്ങള്‍ അന്തരീക്ഷത്തിലേക്കും വെള്ളത്തിലേക്കും പ്രസരിപ്പിക്കുന്നു എന്നതാണ് വസ്തുത. കുതിച്ചുയരുന്ന കുപ്പിവെള്ള വില്പനയുടെ ഫലമായി പ്രതിദിനം പൊതുസ്ഥലങ്ങളില്‍ ഉപേക്ഷിക്കപ്പെടുന്നത് ലക്ഷക്കണക്കിന് പ്ലാസ്റ്റിക് കുപ്പികളാണ്. ആഗോളതാപനത്തിനും അമഴയ്ക്കും അവ കാരണമായിത്തീരുന്നു എന്നതാണ് ശാസ്ത്രീയ നിഗമനം.

കഴിഞ്ഞ ദശകത്തിലാണ് ഗ്ലാസ്, കടലാസ് തുടങ്ങിയവയ്ക്കു പകരം പ്ലാസ്റ്റിക് ഉത്പന്നങ്ങള്‍ വ്യാപകമായി പ്രചാരത്തില്‍ വന്നത്. 1995നും 2001നും ഇടയ്ക്ക് അമേരിക്കയില്‍ മാത്രം പ്ലാസ്റ്റിക് കുപ്പികള്‍, ഗ്ലാസുകള്‍ തുടങ്ങിയവയുടെ ഉത്പാദനത്തില്‍ 56 ശതമാനം വര്‍ധനയുണ്ടായി. 32 ദശലക്ഷം ടണ്ണില്‍നിന്ന് 50 ദശലക്ഷം ടണ്‍ ആയി അത് കുതിച്ചുയര്‍ന്നു. യു.എസ്. പരിസ്ഥിതി സംരക്ഷണ ഏജന്‍സി (ഠ.ഞ. നഷല്‍യഴസഷശഫഷര്‍ദവ ഛഴസര്‍ഫഋര്‍യസഷ അഭഫഷഋസ്ര) പറയുന്നത് മുനിസിപ്പല്‍ ഖരമാലിന്യങ്ങളില്‍ ഏറ്റവും മുന്‍പന്തിയില്‍ നില്‍ക്കുന്നത് പ്ലാസ്റ്റിക് ഉത്പന്നങ്ങളാണെന്നാണ്. നേരത്തേ ലഘുപാനീയങ്ങളാണ് പ്ലാസ്റ്റിക് മാലിന്യം കുമിഞ്ഞുകൂടുന്നതിന്റെ കാരണമായിരുന്നതെങ്കില്‍, ഇന്ന് കുപ്പിവെള്ളം കുടിക്കുന്നവര്‍ ഉപേക്ഷിക്കുന്ന പ്ലാസ്റ്റിക് കുപ്പികളും കാനുകളുമാണ് ഈ ദുരവസ്ഥ കൂടുതല്‍ ഗുരുതരമാക്കുന്നത്.

പുനര്‍നിര്‍മി (ഴഫഋസ്രഋവയഷഭ)ക്കാനാവാത്ത അസംസ്കൃത എണ്ണ, പ്രകൃതിവാതകം തുടങ്ങിയ ഫോസില്‍ ഇന്ധനങ്ങള്‍, രാസപദാര്‍ഥങ്ങള്‍ എന്നിവ ഉപയോഗിച്ചാണ് പ്ലാസ്റ്റിക് ഉത്പന്നങ്ങള്‍ നിര്‍മിക്കുന്നതെന്ന വസ്തുത ഏറെപ്പേര്‍ക്കുമറിയില്ല. പ്ലാസ്റ്റിക് വ്യവസായികളാവട്ടെ, അക്കാര്യം സമര്‍ഥമായി മറച്ചുവെക്കുകയും ചെയ്യുന്നു. എത്ലിന്‍ ഓക്സൈഡ്, ബെന്‍സീന്‍, ക്സൈലീന്‍ തുടങ്ങിയ വിഷലിപ്തമായ രാസവസ്തുക്കള്‍ പ്ലാസ്റ്റിക് കുപ്പികളുടെയും മറ്റും നിര്‍മാണപ്രക്രിയക്കിടയ്ക്ക് ജലത്തിലേക്കും അന്തരീക്ഷത്തിലേക്കും പുറന്തള്ളപ്പെടുന്നു. ഈ വിഷപദാര്‍ഥങ്ങള്‍ കാന്‍സറിനും ജന്മനായുള്ള പലതരം വൈകല്യങ്ങള്‍ക്കും കാരണമാകുന്നു. കൂടാതെ നാഡീവ്യവസ്ഥ, രക്തം, വൃക്കകള്‍, പ്രതിരോധക്ഷമത തുടങ്ങിയവയെ തകര്‍ക്കാനും അവ കാരണമാകുന്നു. അതിനും പുറമെ പരിസ്ഥിതിക്ക് ഗുരുതരമായ കോട്ടംവരുത്താനും ഈ വിഷമയമായ രാസവസ്തുക്കള്‍ക്ക് കഴിയും.

അതുകൊണ്ടാണ് പ്ലാസ്റ്റിക് കുപ്പിനിര്‍മാണത്തെ ‘വൃത്തികെട്ട ബിസിനസ്’ എന്ന് പ്രകൃതിയോടും മാനവരാശിയോടും പ്രതിബദ്ധതയുള്ള ശാസ്ത്രജ്ഞര്‍ വിശേഷിപ്പിക്കുന്നത്. പ്ലാസ്റ്റിക് ഉത്പന്നങ്ങളുടെ ഉത്പാദനത്തിനിടെ ബഹിര്‍ഗമിക്കപ്പെടുന്ന അങ്ങളും മറ്റൊരു രാസപദാര്‍ഥമായ എത്ലിന്‍ ഗ്ലൈകോളും കേന്ദ്രനാഡീവ്യൂഹത്തെ പ്രതികൂലമായി ബാധിച്ച് മനുഷ്യരുടെ പ്രത്യുത്പാദന_ശ്വസന_രക്തചംക്രമണ വ്യവസ്ഥകളെ അപായപ്പെടുത്തുന്നതായി പഠനങ്ങള്‍ വ്യക്തമാക്കിയിട്ടുണ്ട്. കൂടാതെ ഹൃദയസംബന്ധമായ രോഗങ്ങള്‍ക്കും മാരകമായ ഈ അങ്ങളും രാസപദാര്‍ഥങ്ങളും കാരണമാകുന്നു.

പ്ലാസ്റ്റിക് കുപ്പികളിലും പാത്രങ്ങളിലും അടങ്ങിയിട്ടുള്ള രാസപദാര്‍ഥങ്ങള്‍, അവ ഉള്‍ക്കൊള്ളുന്ന വെള്ളം, ലഘുപാനീയങ്ങള്‍, ഭക്ഷ്യവസ്തുക്കള്‍ തുടങ്ങിയവയില്‍ കലരാന്‍ ഇടയാകുന്നുവെന്നതാണ് ഭീതിജനകമായ മറ്റൊരു വസ്തുത. പ്ലാസ്റ്റിക് കുപ്പികള്‍, പാത്രങ്ങള്‍ തുടങ്ങിയവ നിര്‍മിക്കാനുപയോഗിക്കുന്നത് പോളിതൈലീന്‍, അസിറ്റാല്‍ഡിഹൈഡ് തുടങ്ങിയ മാരകമായ രാസവസ്തുക്കളാണ്. അവ വെള്ളത്തിലും ഭക്ഷ്യവസ്തുക്കളിലും കലര്‍ന്നാലുള്ള അപകടത്തെക്കുറിച്ച് പ്രത്യേകം പറയേണ്ടതില്ലല്ലോ. അതുപോലെതന്നെ കടുപ്പമുള്ള പ്ലാസ്റ്റിക്കിനെ മൃദുവാക്കാനുപയോഗിക്കുന്ന ഫ്താലേറ്റ്സ് എന്ന രാസവസ്തുവും മനുഷ്യരില്‍ ഗുരുതര പ്രത്യാഘാതങ്ങള്‍ സൃഷ്ടിക്കും. പ്ലാസ്റ്റിക് കുപ്പികളില്‍ എത്രകാലം ജലം സൂക്ഷിക്കുന്നുവോ അത്രയും കൂടുതല്‍ അത് വിഷമയമായിത്തീരുന്നു.

അമേരിക്കയില്‍ പ്ലാസ്റ്റിക് നിര്‍മാണത്തിനാവശ്യമായ അസംസ്കൃതവസ്തുക്കള്‍ ഉത്പാദിപ്പിക്കുന്ന ബ്രിട്ടീഷ് പെട്രോളിയം (ബിയോണ്ട് പെട്രോളിയം എന്നാണതിപ്പോള്‍ അറിയപ്പെടുന്നത്), ഡൌ കെമിക്കല്‍സ് എന്നീ കോര്‍പ്പറേറ്റ് സ്ഥാപനങ്ങള്‍ ‘വൃത്തികെട്ട വ്യവസായങ്ങള്‍’ എന്ന് മുദ്രകുത്തപ്പെട്ടിരിക്കുന്നു. പ്ലാസ്റ്റിക് കുപ്പികള്‍ നിര്‍മിക്കുന്നതിനിടെ ബഹിര്‍ഗമിക്കുന്ന കാര്‍ബണ്‍ഡയോക്സൈഡ് ആണ് ആഗോളതാപനത്തിന്റെ മുഖ്യഘടകം. അതേസമയം, സള്‍ഫര്‍ ഡയോക്സൈഡ്, നൈട്രജന്‍ ഓക്സൈഡ് എന്നിവ അമഴ(അഋയപ ഝദയഷ) യ്ക്കും കാരണമാകുന്നു.

വഴിയോരങ്ങളിലും മുനിസിപ്പല്‍ മാലിന്യങ്ങളിലും പ്ലാസ്റ്റിക് കുപ്പികള്‍ കുന്നുകൂടിക്കിടക്കുന്നത് കാണുമ്പോള്‍, അവ സൃഷ്ടിക്കുന്ന പാരിസ്ഥിതിക വിനാശത്തെയോര്‍ത്ത് നാം അസ്വസ്ഥരാകേണ്ടതുണ്ട്. അമേരിക്കയില്‍ 1960ല്‍ മുനിസിപ്പാലിറ്റി ശേഖരിച്ച ഖരമാലിന്യങ്ങളില്‍ പ്ലാസ്റ്റിക് ഉത്പന്നങ്ങള്‍ ഒരു ശതമാനം മാത്രമായിരുന്നുവെങ്കില്‍, 2001 ആയപ്പോഴേക്ക് അതിന്റെ അനുപാതം 15 ശതമാനമായി കുത്തനെ ഉയര്‍ന്നു. ആ വര്‍ഷം രണ്ടു കോടി നാല്പതുലക്ഷം ടണ്‍ പ്ലാസ്റ്റിക് മാലിന്യമാണ് അവിടെ പ്രകൃതിയില്‍ ഉപേക്ഷിക്കപ്പെട്ടത്. (ആഗോളതാപനത്തിന് ഏറ്റവുമധികം സംഭാവന നല്‍കുന്നത് അമേരിക്കയാണ് എന്ന വസ്തുത കൂടി ഇവിടെ ഓര്‍ക്കേണ്ടതുണ്ട്). ആ രാജ്യമിപ്പോള്‍, അവിടെ കുന്നുകൂടുന്ന പ്ലാസ്റ്റിക് അടക്കമുള്ള മാലിന്യങ്ങള്‍ ഇന്ത്യയിലേക്കും മറ്റു മൂന്നാം ലോകരാജ്യങ്ങളിലേക്കും സമര്‍ഥമായി ‘കയറ്റി അയയ്ക്കുക’യാണ്. അടുത്തയിടെയാണല്ലോ അമേരിക്കയില്‍നിന്ന് ‘മാലിന്യ കണ്ടെയ്നര്‍’ കൊച്ചി തുറമുഖത്തെത്തിയത്.

പ്ലാസ്റ്റിക് കുപ്പികളുടെയും ഗ്ലാസുകളുടെയും മറ്റും വളരെ ചെറിയൊരു ഭാഗം മാത്രമേ റീ സൈക്കിള്‍ ചെയ്യപ്പെടുന്നുള്ളൂ. അമേരിക്കയിലിത് 5.5 ശതമാനം മാത്രമാണ്. അതിലും ദയനീയമാണ് നമ്മുടെ നാട്ടിലെ സ്ഥിതി. 2003 സപ്തംബറില്‍ പ്രശസ്ത പത്രപ്രവര്‍ത്തകനായ ബ്രിയാന്‍ ഹോവാര്‍ഡ് ഇ_മാഗസിനില്‍ ഇപ്രകാരം റിപ്പോര്‍ട്ട് ചെയ്തു:

”പ്ലാസ്റ്റിക് കുപ്പികളുടെ റീ സൈക്ലിങ്, അവ നിസ്സാരമായി കുപ്പത്തൊട്ടികളിലെറിയുന്ന (കുപ്പിവെള്ള) ഉപഭോക്താക്കള്‍ ചിന്തിക്കാനിഷ്ടപ്പെടുന്ന നിരക്കിലല്ല”. 1995 മുതല്‍ പ്ലാസ്റ്റിക് മാലിന്യങ്ങളുടെ അളവ് മൂന്നിരട്ടി വര്‍ധിച്ചിട്ടുണ്ടെന്ന് പ്ലാസ്റ്റിക് കുപ്പികളുടെ വില്പന_റീ സൈക്ലിങ് നിരക്കിനെക്കുറിച്ച് പഠനം നടത്തുന്ന സന്നദ്ധസംഘടനയായ കണ്ടെയ്നര്‍ റീ സൈക്ലിങ് ഇന്‍സ്റ്റിറ്റ്യൂട്ട് കണ്ടെത്തി.

ഭൂരിഭാഗം പ്ലാസ്റ്റിക് മാലിന്യങ്ങളും കുഴിച്ചിടുകയോ കത്തിക്കുകയോ ആണ് പതിവ്. കുഴിച്ചിടുന്ന പ്ലാസ്റ്റിക് കുപ്പികളും മറ്റും വര്‍ഷങ്ങളോളം അതേ അവസ്ഥയില്‍ കിടക്കുന്നു. ഇവയിലടങ്ങിയിട്ടുള്ള ഫ്താലേറ്റ്സ് തുടങ്ങിയ രാസപദാര്‍ഥങ്ങള്‍ ഭൂഗര്‍ഭജലത്തെ മലിനീകൃതമാക്കാനുള്ള സാധ്യത വളരെ കൂടുതലാണ്. ”ടാപ്പുവെള്ളത്തെ ഭയന്ന് കുപ്പിവെള്ളം കുടിക്കുന്നവര്‍ അവരുപേക്ഷിക്കുന്ന പ്ലാസ്റ്റിക് കുപ്പികള്‍ സൃഷ്ടിക്കുന്ന ജലമലിനീകരണ ഭീകരതയെക്കുറിച്ച് ഓര്‍ക്കാത്തത് വിരോധാഭാസം തന്നെ” എന്ന് കണ്‍ടെയിനര്‍ റീസൈക്ലിങ് ഇന്‍സ്റ്റിറ്റ്യൂട്ടിന്റെ എക്സിക്യുട്ടീവ് ഡയറക്ടര്‍ അഭിപ്രായപ്പെട്ടത് ഇവിടെ തികച്ചും പ്രസക്തമാണ്.

ഇനി പ്ലാസ്റ്റിക് മാലിന്യങ്ങള്‍ കത്തിക്കുന്നത് സംബന്ധിച്ച്. പ്ലാസ്റ്റിക് കത്തിക്കുമ്പോള്‍ നൈട്രജന്‍, സള്‍ഫര്‍, കാര്‍ബണ്‍ ഡയോക്സൈഡ് തുടങ്ങിയ വിഷമാലിന്യങ്ങള്‍ അന്തരീക്ഷത്തില്‍ കലരുന്നു. ചാരത്തിന്റെ രൂപത്തില്‍ ലോഹപദാര്‍ഥങ്ങള്‍ മണ്ണിലും കലരുന്നു. കാര്‍ബണ്‍ഡയോക്സൈഡ് ആഗോളതാപനത്തിന്റെ മുഖ്യകാരണമാണെങ്കില്‍ സള്‍ഫര്‍ ഡയോക്സൈഡ്, നൈട്രജന്‍ ഡയോക്സൈഡ് എന്നിവ അമഴയ്ക്ക് കാരണമാകുന്നു.

ഈ പശ്ചാത്തലത്തില്‍ വേണം കുതിച്ചുയരുന്ന കുപ്പിവെള്ളക്കച്ചവടം സൃഷ്ടിക്കുന്ന ആരോഗ്യപരവും പാരിസ്ഥിതികവുമായ പ്രത്യാഘാതങ്ങളെ വിലയിരുത്താന്‍. അമേരിക്കയില്‍ മാത്രം പ്രതിവര്‍ഷം 1200 കോടി പ്ലാസ്റ്റിക് കുപ്പികള്‍ ഉത്പാദിപ്പിക്കപ്പെടുന്നുണ്ട്. ഇതില്‍ ബഹുഭൂരിഭാഗവും പുനര്‍നിര്‍മിക്കപ്പെടുകയല്ല, ഉപേക്ഷിക്കപ്പെടുകയാണ് ചെയ്യുന്നത്. കുപ്പിവെള്ള വ്യവസായവും പ്ലാസ്റ്റിക് കുപ്പി വ്യവസായവും പരസ്പരം കൈകോര്‍ത്തു വളരുന്നു. അവയാകട്ടെ, അവയുടെ ഉത്പന്നങ്ങള്‍ക്ക് ഒരു ഹരിതപ്രതിച്ഛായ നല്കുകയും ചെയ്യുന്നു. സത്യം അതിനെതിരാണെന്നിരിക്കിലും പ്ലാസ്റ്റിക് വ്യവസായികള്‍ പറയുന്നത് അവരുടെ ഉത്പന്നങ്ങള്‍ പരിസ്ഥിതികസൌഹൃദം കാത്തുസൂക്ഷിക്കുന്നതും നിരുപദ്രവുമാണെന്നാണ്. പൊതുജനവിമര്‍ശനത്തില്‍നിന്ന് രക്ഷപ്പെടാന്‍ അവര്‍, പ്ലാസ്റ്റിക്_കുപ്പി_കടലാസ് ഉത്പന്നങ്ങളെക്കുറിച്ച് താരതമ്യപഠനം നടത്തി അവര്‍ക്കനുകൂലമായ റിപ്പോര്‍ട്ട് നല്കാന്‍ സന്നദ്ധതയുള്ള ‘വിദഗ്ദ്ധരെ’ നിയമിക്കുന്നു. തുടര്‍ന്ന് പ്ലാസ്റ്റിക് ഉത്പന്നങ്ങള്‍ കൂടുതല്‍ ഹരിതവും പാരിസ്ഥിതികസൌഹൃദം നിലനിര്‍ത്തുന്നതുമാണെന്ന് പ്രചണ്ഡമായി പ്രചരിപ്പിക്കുകയും ചെയ്യുന്നു. ലഘുപാനീയങ്ങളും കുപ്പിവെള്ളവും വിപണിയിലെത്തിക്കുന്ന കോര്‍പ്പറേറ്റ് കുത്തകകള്‍ പറയുന്നത് അവയുടെ പ്ലാസ്റ്റിക് കുപ്പികള്‍ എളുപ്പത്തില്‍ പുനര്‍നിര്‍മിക്കാനാകുമെന്നാണ്. ഈ കുതന്ത്രങ്ങളുടെയൊക്കെ ലക്ഷ്യം അവയുടെ വിപണി വിപുലീകരണത്തിനെതിരെയുള്ള എതിര്‍പ്പുകളെ നീക്കലും കുപ്പിവെള്ളസംസ്കാരത്തെ വ്യാപകമായി പ്രചരിപ്പിക്കലുമാണ്.

കുപ്പിവെള്ളത്തിനും പ്ലാസ്റ്റിക് കുപ്പികള്‍ക്കുമെതിരെയുള്ള പൊതുജനാഭിപ്രായത്തെയും നിയമനടപടികളെയും ചെറുക്കാന്‍ ഈ മേഖലയിലെ കുത്തകകള്‍ ഏകോപിതമായി പ്രവര്‍ത്തിക്കുകയാണ്. സൊസൈറ്റി ഓഫ് ദ പ്ലാസ്റ്റിക് ഇന്‍ഡസ്ട്രി (ഞസഋയഫര്‍സ്ര സബ ര്‍മഫ ഛവദറര്‍യഋ സൃഷപന്റര്‍ഴസ്ര) യും ഇന്റര്‍നാഷണല്‍ ബോട്ടില്‍ഡ് വാട്ടര്‍ അസോസിയേഷ (സൃഷര്‍ഫഴഷദര്‍യസഷദവ ആസര്‍ര്‍വഫപ ഢദര്‍ഫഴ അററസഋയദര്‍യസഷ) നും ചേര്‍ന്ന് നാഷണല്‍ അസോസിയേഷന്‍ ഫോര്‍ പെറ്റ് കണ്ടെയ്നര്‍ റിസോഴ്സ് _ നാപ്കോര്‍ (ങഅഛഇചഝ) എന്ന പേരില്‍ പുതിയൊരു സംഘടനയ്ക്ക് രൂപം നല്‍കിയിട്ടുണ്ട്. പ്ലാസ്റ്റിക്_കുപ്പിവെള്ള കുത്തകകള്‍ അവരുടെ താത്പര്യസംരക്ഷണത്തിന് പ്രതിവര്‍ഷം കോടിക്കണക്കിനു ഡോളറാണ് ചെലവഴിച്ചുവരുന്നത്.

പ്ലാസ്റ്റിക് കുപ്പികളുടെ റീ സൈക്ലിങ് വളരെ ചെലവുകൂടിയതാണ്. അതിനുള്ള പൊതുജനങ്ങളുടെയും സന്നദ്ധസംഘടനകളുടെയും സമ്മര്‍ദം വലിയൊരു പരിധിവരെ ചെറുക്കുന്നതിന് നാപ്കോറിനു കഴിഞ്ഞിട്ടുണ്ട്. ഇതു സാക്ഷ്യപ്പെടുത്തുന്നതാണ് യു.എസ്. എനര്‍ജി ഇന്‍ഫര്‍മേഷന്‍ അഡ്മിനിസ്ട്രേഷ (ഠ.ഞ. നഷഫഴഭസ്ര സൃഷബസഴശദര്‍യസഷ അപശയഷയറര്‍ഴദര്‍യസഷ) ന്റെ നിരീക്ഷണം: ”അടുത്ത വര്‍ഷങ്ങളില്‍ പല പ്ലാസ്റ്റിക് റീ സൈക്ലിങ് കമ്പനികളും അവയുടെ ഫാക്ടറികള്‍ പൂട്ടുകയുണ്ടായി. ഉത്പാദനം തുടരാന്‍ പ്രാപ്തമാക്കുന്ന വിലയ്ക്ക് ഉത്പന്നങ്ങള്‍ വിപണിയിലെത്തിക്കാന്‍ അവയ്ക്കു കഴിയുന്നില്ല. പെട്രോളിയം ഉത്പന്നങ്ങള്‍ക്ക് ഏറെ വിലയില്ലാത്തതിനാല്‍, പുതിയ പ്ലാസ്റ്റിക് ഉത്പന്നങ്ങളുമായി മത്സരിക്കാന്‍ റീ സൈക്കിള്‍ ചെയ്യപ്പെട്ട ഉത്പന്നങ്ങള്‍ക്കു കഴിയുന്നില്ല. പുതിയ പ്ലാസ്റ്റിക് ഉത്പന്നങ്ങളുടെ വില, പുനര്‍നിര്‍മിക്കപ്പെട്ടവയെ അപേക്ഷിച്ച് 40 ശതമാനം കുറവാണ്”. പ്ലാസ്റ്റിക് ഉത്പന്നങ്ങളുടെ പുനര്‍നിര്‍മാണത്തിന് ഗവണ്‍മെന്റ് ഫണ്ട് ലഭ്യമാക്കണമെന്നാണ് നാപ്കോറും അതുപോലുള്ള സംഘടനകളും സംഘടിതമായി ആവശ്യപ്പെടുന്നത്. അമേരിക്കയില്‍, പ്ലാസ്റ്റിക്കിനും കുപ്പിവെള്ളത്തിനുമെതിരെ പൊതുജനാഭിപ്രായമുയരുന്നുണ്ട്. നമ്മുടെ നാട്ടില്‍ അതുപോലുമുണ്ടാകുന്നില്ല എന്നതാണ് ദുഃഖകരമായ സത്യം. ഇക്കണക്കിനുപോയാല്‍ ഇന്ത്യന്‍ നഗരങ്ങളിലും ഗ്രാമങ്ങളിലും പ്ലാസ്റ്റിക് കുന്നുകളുയരാന്‍ ഏറെക്കാലം കാത്തിരിക്കേണ്ടിവരില്ല.

30 Oct, 2007
ജലവിപണി സ്വകാര്യമേഖല കൈയടക്കുമ്പോള്‍

കുപ്പിവെള്ളക്കച്ചവടം: ചില വസ്തുതകള്‍ _ 3

എം.പി. വീരേന്ദ്രകുമാര്‍ എം.പി.

മനുഷ്യരുടെ വീണ്ടുവിചാരമില്ലാത്ത ദുഷ്ചെയ്തികള്‍ കാലാവസ്ഥാ മാറ്റങ്ങളിലേക്കും ഹിമാനികളുടെ തകര്‍ച്ചയിലേക്കും സമുദ്രവിതാനത്തിന്റെ ആപത്കരമായ ഉയര്‍ച്ചയിലേക്കും സ്ഥിതിഗതികളെ കൊണ്ടുചെന്നെത്തിച്ചിരിക്കുന്നു. അനിയന്ത്രിതവും ഭ്രാന്തവുമായ വ്യാവസായികവളര്‍ച്ചയും അപ്രതിഹതമായ ജലചൂഷണവും ആഗോളാടിസ്ഥാനത്തില്‍ കടുത്ത കുടിവെള്ളപ്രതിസന്ധി സൃഷ്ടിച്ചിട്ടുണ്ട്. ഇതിനൊക്കെപ്പുറമെയാണ് ജീവജലത്തിന്റെ സ്വകാര്യവത്കരണമുയര്‍ത്തുന്ന ഗുരുതരപ്രശ്നങ്ങള്‍

വെള്ളത്തിന്റെ മേലുള്ള സ്വകാര്യമേഖലയുടെ എതിര്‍പ്പിന്റെ അടിസ്ഥാനം, ഈ അമൂല്യവിഭവം ജനങ്ങള്‍ക്കവകാശപ്പെട്ടതാണ് എന്ന വസ്തുതയാണ്. വരുമാനമടക്കമുള്ള യാതൊരു പരിഗണനയും അവര്‍ക്ക് ജലലഭ്യത ഉറപ്പുവരുത്തുന്നതിനു വിഘാതമായിക്കൂടാ. ഇത്തരമൊരു അവസ്ഥ സംജാതമാകാന്‍, ദേശീയ_അന്തര്‍ദേശീയ തലങ്ങളില്‍ ഒരു പുതിയ ജലനയം രൂപപ്പെടേണ്ടതുണ്ടെന്ന് പ്രശസ്ത ചിന്തകരും എഴുത്തുകാരുമായ ടോണി ക്ലാര്‍ക്കും മോഡ് ബാര്‍ലൊയും അവരുടെ ‘ബ്ലൂ ഗോള്‍ഡ്’ എന്ന ആധികാരിക രചനയില്‍ നിര്‍ദേശിച്ചിട്ടുണ്ട്

”ജലമാണ് ജീവിതത്തിന്റെ ഉത്പത്തി; ജലമാണ് അമ്മ; ഈ അപൂര്‍വ വിഭവമില്ലാതെ ജീവിതമില്ല”_ഹംഗറിക്കാരനായ ലോകപ്രശസ്ത ജൈവരസതന്ത്രജ്ഞനും നോബല്‍പ്രൈസ് ജേതാവുമായ ആല്‍ബര്‍ട്ട് സെന്റ് ജോര്‍ജിയുടെതാണ് ഈ വാക്കുകള്‍. ജീവജാലങ്ങളുടെ നിലനില്പിന് അത്യന്താപേക്ഷിതമായ വെള്ളം മനുഷ്യശരീരത്തിലൂടെയും മണ്ണിലൂടെയും ചംക്രമണം ചെയ്തുകൊണ്ടിരിക്കുന്നു. മഞ്ഞുമലകളില്‍നിന്ന് നദികളിലേക്കും സമുദ്രങ്ങളിലേക്കും ആവാഹിക്കപ്പെടുന്ന വെള്ളം ജൈവസമൂഹത്തിന്റെ സുഷുമ്നാനാഡിയാണ്. ജീവനോപാധിയെന്നതിനു പുറമെ, മനുഷ്യന്റെ ആചാരാനുഷ്ഠാനങ്ങളുടെ കേന്ദ്രബിന്ദുവായിരുന്നു ജലം. എന്നാല്‍ കാലം മാറിയിരിക്കുന്നു. പ്രശസ്ത സൈദ്ധാന്തികയും ‘സൈലന്റ് സ്പ്രിങ്’ (silent spring) എന്ന പ്രശസ്ത കൃതിയുടെ രചയിതാവുമായ റെയ്ച്ചല്‍ കാഴ്സന്‍ ജീവജലത്തിനേര്‍പ്പെട്ട അപചയത്തെ ഇപ്രകാരം സമാഹരിക്കുന്നു: ”മനുഷ്യന്‍ ഉത്പത്തിയെയും അതിജീവനത്തിന് അനിവാര്യമായ അമൂല്യവിഭവത്തെയും വിസ്മരിച്ചുകഴിഞ്ഞ ഈ അഭിശപ്തയുഗത്തില്‍, അവന്റെനിസ്സംഗതയുടെ ഇരയായി കുടിവെള്ളം മാറിയിരിക്കുന്നു.

മനുഷ്യരുടെ വീണ്ടുവിചാരമില്ലാത്ത ദുഷ്ചെയ്തികള്‍ കാലാവസ്ഥാ മാറ്റങ്ങളിലേക്കും ഹിമാനികളുടെ തകര്‍ച്ചയിലേക്കും സമുദ്രവിതാനത്തിന്റെ ആപത്കരമായ ഉയര്‍ച്ചയിലേക്കും സ്ഥിതിഗതികളെ കൊണ്ടുചെന്നെത്തിച്ചിരിക്കുന്നു. അനിയന്ത്രിതവും ഭ്രാന്തവുമായ വ്യാവസായികവളര്‍ച്ചയും അപ്രതിഹതമായ ജലചൂഷണവും ആഗോളാടിസ്ഥാനത്തില്‍ കടുത്ത കുടിവെള്ളപ്രതിസന്ധി സൃഷ്ടിച്ചിട്ടുണ്ട്. ഇതിനൊക്കെപ്പുറമെയാണ് ജീവജലത്തിന്റെ സ്വകാര്യവത്കരണമുയര്‍ത്തുന്ന ഗുരുതരപ്രശ്നങ്ങള്‍.

ആഗോളതാപനം, ജലമലിനീകരണം, ജനസംഖ്യാ വര്‍ധന തുടങ്ങിയവയൊക്കെ ജലലഭ്യതയെ നേരിട്ടു ബാധിക്കുന്ന പ്രതിഭാസങ്ങളാണ്. ഓരോ ഇരുപതുവര്‍ഷത്തിലും വെള്ളത്തിന്റെ ആവശ്യം ഇരട്ടിക്കുന്നു. നൂറു കോടിയിലേറെ ജനങ്ങള്‍ക്കിന്ന് ശുദ്ധമായ കുടിവെള്ളം ലഭ്യമല്ല. രണ്ടു ദശകങ്ങള്‍ക്കും ലോകത്തിലെ ജലലഭ്യതയെ അപേക്ഷിച്ച് വെള്ളത്തിനുള്ള ആവശ്യം 50 ശതമാനംകണ്ട് വര്‍ധിക്കുമെന്നാണ് ശാസ്ത്രീയനിഗമനം. ഞെട്ടലുണ്ടാക്കുന്ന ഈ വസ്തുതതന്നെയാണ് കോര്‍പ്പറേറ്റ് കുത്തകകളെ കുടിവെള്ളക്കച്ചവടത്തിലേക്ക് ആകര്‍ഷിക്കുന്നതും. ലോകബാങ്ക്, എ.ഡി.ബി., ഐ.എം.എഫ്. തുടങ്ങിയ അന്തര്‍ദേശീയ ഏജന്‍സികളുടെ പിന്തുണയോടും പ്രോത്സാഹനത്തോടുംകൂടി ജലമേഖലയില്‍ കോര്‍പ്പറേറ്റ് കുത്തകകള്‍ പിടിമുറുക്കിക്കഴിഞ്ഞു. ഈ ഏജന്‍സികളോട് ദേശീയ സര്‍ക്കാറുകള്‍ക്കുള്ള വിധേയത്വവും പ്രതിബദ്ധതയും സ്ഥിതിഗതികളെ കൂടുതല്‍ ഗുരുതരമാക്കിയിട്ടുണ്ട്. ഇതിനുദാഹരണമായിരുന്നു, എട്ടാം പഞ്ചവത്സരപദ്ധതി (1992_’97) ജല സ്വകാര്യവത്കരണത്തിനു നല്‍കിയ ഊന്നല്‍. ലോകബാങ്കിന്റെയും എ.ഡി.ബി.യുടെയും ചുവടൊപ്പിച്ച് പ്രസ്തുതപദ്ധതിയില്‍ കേന്ദ്രഗവണ്‍മെന്റ് വ്യക്തമാക്കിയത് വെള്ളം സൌജന്യമല്ല, അതൊരു വില്പനച്ചരക്കാണ് എന്നത്രെ. 2002_ല്‍ പ്രഖ്യാപിക്കപ്പെട്ട ദേശീയ ജലനയം, ജലമേഖലയില്‍ വ്യാപകമായ സ്വകാര്യപങ്കാളിത്തം ഉറപ്പുവരുത്തുന്നതായിരുന്നു. 2002_ല്‍ നടന്ന അഞ്ചാമത് ദേശീയ ജലവിഭവകൌണ്‍സില്‍ സമ്മേളനത്തില്‍ പ്രസ്തുത നയത്തിന് പ്രധാനമന്ത്രി തന്ത്രപരമായ പിന്തുണ പ്രഖ്യാപിച്ചു. ജലവിഭവ മാനേജ്മെന്റ് ഗവണ്‍മെന്റിന്റെമാത്രം ഉത്തരവാദിത്വമായിരിക്കണമെന്ന നിലപാട് യുക്തിസഹമല്ലെന്നും ഇക്കാര്യത്തില്‍ പൊതു_സ്വകാര്യ പങ്കാളിത്ത (private public partnership) മാണ് ഏറ്റവും അനുയോജ്യമെന്നും അദ്ദേഹം അടിവരയിട്ടുതന്നെ പറഞ്ഞു. ഈ പങ്കാളിത്തത്തെ പ്രോത്സാഹിപ്പിച്ചാല്‍, നിര്‍ണായകപ്രാധാന്യമുള്ള ജലമേഖലയിലേക്ക് സ്വകാര്യനിക്ഷേപം ഒഴുകിയെത്തുമെന്നും അതുവഴി ജലവിഭവവികസനവും മാനേജ്മെന്റും ഫലപ്രദമായി നടപ്പിലാക്കാനാകുമെന്നും അദ്ദേഹം പറയുകയുണ്ടായി. ജലം മനുഷ്യരുടെ അവകാശമല്ലെന്നും അത് വില നിശ്ചയിച്ച് വില്‍ക്കേണ്ടൊരു ചരക്കാണെന്നുമുള്ള അന്തര്‍ദേശീയ ഏജന്‍സികളുടെ നിലപാടിന് പൂര്‍ണപിന്തുണ പ്രഖ്യാപിക്കുകയായിരുന്നു നമ്മുടെ പ്രധാനമന്ത്രി.

ആഗോള ജലപ്രതിസന്ധിയുടെ വെളിച്ചത്തില്‍, സ്വകാര്യ കമ്പനികള്‍ ഒരു വില നിശ്ചയിച്ച് വെള്ളം വിപണനം ചെയ്യുകയാണെങ്കില്‍, ജലത്തിന്റെ അധികഉപഭോഗം നിയന്ത്രിക്കാനാകുമെന്ന ആശയമാണ് പ്രധാനമന്ത്രിയുടെ പ്രഖ്യാപനത്തിലടങ്ങിയിട്ടുള്ളത്. എന്നാല്‍, പ്രശ്നത്തില്‍ അന്തര്‍ഭവിച്ചിട്ടുള്ള കാതലായ പ്രശ്നം, ഏതാനും കോര്‍പ്പറേറ്റ് കുത്തകകളുടെ സാമ്പത്തിക താത്പര്യങ്ങള്‍ സംരക്ഷിക്കാന്‍ ജനങ്ങളുടെ മൌലികാവകാശങ്ങള്‍ ഹനിക്കേണ്ടതുണ്ടോ എന്നതാണ്. ജലവിതരണത്തിനും നിയന്ത്രണത്തിനും ഈ കുത്തകകള്‍ക്ക് അവകാശം സിദ്ധിക്കുന്നതുവഴി, അവ ലാഭം കുന്നുകൂട്ടാന്‍ അധിക ജലചൂഷണം നടത്തുകമാത്രമല്ല, പരിസ്ഥിതി തകര്‍ക്കുകകൂടി ചെയ്യും.

വ്യാവസായിക_ഉപഭോക്തൃ ഉത്പന്നങ്ങളായ ലോഹോപകരണങ്ങള്‍, വളങ്ങള്‍, ടെലിവിഷന്‍ തുടങ്ങിയവ സ്വകാര്യമേഖലയ്ക്ക് വിട്ടുകൊടുക്കുന്നതുപോലെയല്ല, ജലം സ്വകാര്യകുത്തകകളുടെ നിയന്ത്രണത്തിലാക്കുന്നത്. അത്തരം ഉത്പന്നങ്ങളുടെ വില കൂടിയാലോ കുറഞ്ഞാലോ, അത് ജനജീവിതത്തെ ഒരു പരിധിയില്‍ കവിഞ്ഞ് ബാധിക്കുകയില്ല. എന്നാല്‍ വെള്ളത്തിന്റെ കാര്യം അങ്ങനെയല്ല. കുടിക്കാനും ഭക്ഷണം പാകംചെയ്യാനും കുളിക്കാനും അലക്കാനും ആവശ്യമായ വെള്ളത്തിന്റെ അളവ് ഒരുപരിധിക്കപ്പുറം കുറയ്ക്കാനാവില്ല. ജലം മനുഷ്യരുടെ അടിസ്ഥാന ആവശ്യമായതുകൊണ്ട് അതവരുടെ അടിസ്ഥാന അവകാശംകൂടിയാണ്. വളത്തിന്റെയും സ്റ്റീലിന്റെയും ടെലിവിഷന്റെയും എയര്‍കണ്ടീഷണറിന്റെയും ലഭ്യത ഉറപ്പുവരുത്താന്‍ സര്‍ക്കാര്‍ ബാധ്യസ്ഥമല്ല; എന്നാല്‍, കുടിവെള്ളലഭ്യത ഉറപ്പുവരുത്താന്‍ അതിന് ഉത്തരവാദിത്വമുണ്ട്. അതുകൊണ്ടുതന്നെ ലാഭംമാത്രം മുന്‍നിര്‍ത്തി പ്രവര്‍ത്തിക്കുന്ന സ്വകാര്യഏജന്‍സികള്‍ക്ക് അനുദിനം ക്ഷയിച്ചുകൊണ്ടിരിക്കുന്ന ജലത്തിന്റെ നിയന്ത്രണവും വിതരണവും വിട്ടുകൊടുത്തുകൂടാ. അപൂര്‍വ വിഭവമായ ജീവജലം മലിനീകരിക്കാനോ ഊറ്റിയെടുക്കാനോ ആരെയും അനുവദിക്കാവുന്നതുമല്ല. ഒരു ലിറ്റര്‍ കുടിവെള്ളം തയ്യാറാക്കുന്നതിനിടെ ഏറ്റവും ചുരുങ്ങിയത് അഞ്ചുലിറ്റര്‍ വെള്ളമെങ്കിലും നഷ്ടമാകുന്നുണ്ട് എന്ന വസ്തുതകൂടി ഇതോടനുബന്ധിച്ച് ഓര്‍ക്കേണ്ടതുണ്ട്.

സ്റ്റേറ്റില്‍നിന്നോ പഞ്ചായത്ത്, മുനിസിപ്പാലിറ്റി, കോര്‍പ്പറേഷന്‍ തുടങ്ങിയ തദ്ദേശസ്വയംഭരണ സ്ഥാപനങ്ങളില്‍നിന്നോ കുടിവെള്ളത്തിന്റെമേലുള്ള നിയന്ത്രണം സ്വകാര്യഏജന്‍സികള്‍ക്ക് കൈമാറിയാല്‍, അത് നിര്‍ണായകപ്രാധാന്യമുള്ള പ്രകൃതിവിഭവങ്ങളുടെ നിയന്ത്രണം, അവയുടെ നിലനില്പ്, സാമൂഹികനീതി തുടങ്ങിയവയുടെ നിരാസംതന്നെയാകും. അതുവഴി ജലവിഭവ വികസനം സ്വകാര്യസ്ഥാപനങ്ങളില്‍ നിക്ഷിപ്തമാവുകയും ചെയ്യും. അവയ്ക്ക് നദിയുടെ കുറുകെ ഇഷ്ടാനുസരണം അണക്കെട്ടുകള്‍ കെട്ടാനും നദികളില്‍നിന്നോ കിണറുകളില്‍നിന്നോ നിര്‍ബാധം ജലമൂറ്റാനും അത് വഴിതെളിയിക്കും. ഇത്തരം ജലവിഭവ മാനേജ്മെന്റും വികസനവും സൃഷ്ടിച്ചേക്കാവുന്ന പ്രത്യാഘാതങ്ങള്‍ ആപത്കരമായിരിക്കും.

സമൂഹത്തോട് ഉത്തരവാദിത്വമില്ലാത്തതും ഓഹരിയുടമകളോടുമാത്രം പ്രതിബദ്ധതയുള്ളതുമായ സ്വകാര്യ കമ്പനികള്‍ക്ക് ജലവിഭവ മാനേജ്മെന്റിന്റെയും വിതരണത്തിന്റെയും ഉത്തരവാദിത്വം ഏല്പിച്ചുകൊടുത്താലുണ്ടാകുന്ന പ്രത്യാഘാതങ്ങള്‍ ഗൌരവമായി വിലയിരുത്തപ്പെട്ടിട്ടില്ല. ലാഭംമാത്രം മുന്‍നിര്‍ത്തി പ്രവര്‍ത്തിക്കുന്ന അവയ്ക്ക് ജലവിഭവങ്ങള്‍ സംരക്ഷിക്കാനോ ജനങ്ങള്‍ക്ക് കുടിവെള്ളലഭ്യത ഉറപ്പുവരുത്താനോ സാമൂഹികനീതിയും സമത്വവും പുലര്‍ന്നുകാണാനോ പരിസ്ഥിതിസംരക്ഷണത്തിനോ താത്പര്യങ്ങളുണ്ടാവില്ല എന്നതാണ് തെളിയിക്കപ്പെട്ട ലളിതമായ സത്യം. ഇതിന്റെ അടിസ്ഥാനത്തില്‍ ജീവരാശിയുടെ നിലനില്പിന് അനിവാര്യമായ വെള്ളത്തെ എങ്ങനെയാണ് ഒരു കച്ചവടച്ചരക്കാക്കാന്‍ അനുവദിക്കുക? ഏതാനും സ്വകാര്യകമ്പനികളുടെ സാമ്പത്തിക താത്പര്യങ്ങള്‍ ഉറപ്പുവരുത്താന്‍ ജനങ്ങളുടെ മൌലികാവകാശത്തെ ബലിയര്‍പ്പിക്കേണ്ടതുണ്ടോ? ജീവന്റെ ആധാരമായ കുടിവെള്ളത്തിന്റെ വിലയും ലഭ്യതയും നിശ്ചയിക്കാന്‍ സ്വകാര്യമേഖലയെ അനുവദിക്കാമോ? അടിസ്ഥാനപരമായ ഈ ചോദ്യങ്ങള്‍ക്കൊന്നും ബന്ധപ്പെട്ടവരില്‍നിന്ന് ഉത്തരമില്ല.

ജലവിപണിയിലേക്കുള്ള സ്വകാര്യമേഖലയുടെ അധിനിവേശം ഭയാനകമാണ്. ചെന്നൈ നഗരത്തില്‍മാത്രം 220_ലേറെ സ്വകാര്യ ജലവിപണനസ്ഥാപനങ്ങള്‍ പ്രവര്‍ത്തിക്കുന്നുണ്ട്. കുടിവെള്ളക്കച്ചവടത്തിലൂടെ അവ പ്രതിദിനം കോടിക്കണക്കിന് രൂപ ലാഭമുണ്ടാക്കുന്നു. ചെന്നൈയില്‍ മാത്രമല്ല മറ്റ് ഇന്ത്യന്‍ നഗരങ്ങളിലും പട്ടണങ്ങളിലും സ്ഥിതി ഇതുതന്നെ. ബഹുരാഷ്ട്ര_കോര്‍പ്പറേറ്റ് കുത്തകകള്‍ തദ്ദേശീയര്‍ക്ക് അവകാശപ്പെട്ട വെള്ളം വെറും തുച്ഛമായ തുക നല്‍കി, കുപ്പിയിലാക്കിയശേഷം അവര്‍ക്കുതന്നെ വില്‍ക്കുകയാണ്. സര്‍ക്കാറിന്റെ അനുവാദത്തോടെ അവര്‍ ജൈവസമൂഹത്തിന് അവകാശപ്പെട്ട മൂലധനം അവരുടേതാക്കി മാറ്റുന്നു.

റെയില്‍വേ, എയര്‍ലൈന്‍സ് തുടങ്ങിയവ അടക്കമുള്ള നമ്മുടെ പല പൊതുമേഖലാ സ്ഥാപനങ്ങളും സ്വകാര്യമേഖല വിപണിയിലിറക്കുന്ന കുപ്പിവെള്ളത്തിന്റെ പ്രചാരകരാണ്. ദക്ഷിണറെയില്‍വെ മാത്രം ചെന്നൈയിലെ ചെറിയോഎന്ന കുപ്പിവെള്ളക്കമ്പനിയില്‍ നിന്ന് പ്രതിദിനം 10,000കെയ്സ് (ഒരുകെയ്സില്‍ 12 കുപ്പി) കുപ്പിവെള്ളം വാങ്ങുന്നുണ്ട്. ഇത് അവരുടെ മൊത്തം വില്പനയുടെ അഞ്ചുശതമാനം മാത്രമാണ്. ലിറ്ററൊന്നിന് മൂന്നു രൂപ നിരക്കില്‍ കുടിവെള്ളം ലഭ്യമാക്കാനുള്ള റെയില്‍വേ മന്ത്രാലയത്തിന്റെ നീക്കം ഈയിടെ ഉപേക്ഷിച്ചത് ഇതോടു ചേര്‍ത്തു വായിക്കേണ്ടതാണ്. സ്വകാര്യ കമ്പനികളുടെ കുടിവെള്ളക്കച്ചവടത്തിന്റെ നട്ടെല്ലൊടിയുമെന്നതിനാല്‍, അവരുടെ സമ്മര്‍ദത്തിനു വഴങ്ങിയായിരുന്നു മന്ത്രാലയത്തിന്റെ തീരുമാനമെന്ന് റിപ്പോര്‍ട്ടുണ്ടായിരുന്നു.

കുടിവെള്ളവില്പന മേഖലയില്‍ സ്വകാര്യമേഖലയുടെ വളര്‍ച്ച ഭീതിജനകമാണ്. 1990_ല്‍ 51 ദശലക്ഷം ജനങ്ങള്‍ സ്വകാര്യ കമ്പനികള്‍ വിപണിയിലിറക്കുന്ന കുപ്പിവെള്ളത്തെ ആശ്രയിച്ചുകൊണ്ടിരുന്നപ്പോള്‍, അവരുടെ സംഖ്യയിപ്പോള്‍ 300 ദശലക്ഷമായി ഉയര്‍ന്നിട്ടുണ്ട്. ഫ്രഞ്ച് കോര്‍പ്പറേറ്റ് കുത്തകകളായ വിവെന്‍ഡി, സ്യൂയസ് എന്നിവ ലോകകുടിവെള്ള വിപണിയുടെ 70 ശതമാനം നിയന്ത്രിക്കുന്നു. സ്യൂയസും വിവെന്‍ഡിയും യഥാക്രമം 130ഉം 90ഉം രാജ്യങ്ങളിലെ കുടിവെള്ള വിപണി കൈയടക്കിയിട്ടുണ്ട്. സ്യൂയസിന്റെ പ്രതിവര്‍ഷ വിറ്റുവരവ് 4,190 കോടി ഡോളര്‍. ഈ കമ്പനികള്‍ പരസ്പരം മത്സരിക്കുന്നവയാണെങ്കിലും മൂന്നാം ലോകരാജ്യങ്ങളെ ചൂഷണം ചെയ്യുന്നതില്‍ ഏകാഭിപ്രായക്കാരാണ്.

കേരളത്തിലെ കിണറുകളും നദികളുമൊക്കെയടങ്ങുന്ന ജലസ്രോതസ്സുകള്‍ മലിനീകൃതമാണെന്നാണ് ഔദ്യോഗിക_അനൌദ്യോഗിക പഠനങ്ങള്‍ പറയുന്നത്. ഇതിന്റെ പരിഹാരം കുടിവെള്ളസ്വകാര്യവത്കരണമാണോ? സ്വകാര്യ കമ്പനികള്‍, വെള്ളം ഇറക്കുമതി ചെയ്താണോ കേരളീയര്‍ക്ക് വിതരണം ചെയ്യുക? യഥാര്‍ഥത്തില്‍ സംഭവിക്കുന്നത് നമ്മുടെ ‘മലിനീകൃതമായ’ വെള്ളം കുപ്പിയിലാക്കി അവര്‍ നമുക്കുതന്നെ വില്ക്കുന്നു എന്നതാണ്.

വെള്ളത്തിന്റെ മേലുള്ള സ്വകാര്യമേഖലയുടെ എതിര്‍പ്പിന്റെ അടിസ്ഥാനം, ഈ അമൂല്യവിഭവം ജനങ്ങള്‍ക്കവകാശപ്പെട്ടതാണ് എന്ന വസ്തുതയാണ്. വരുമാനമടക്കമുള്ള യാതൊരു പരിഗണനയും അവര്‍ക്ക് ജലലഭ്യത ഉറപ്പുവരുത്തുന്നതിനു വിഘാതമായിക്കൂടാ. ഇത്തരമൊരു അവസ്ഥ സംജാതമാകാന്‍, ദേശീയ_അന്തര്‍ദേശീയ തലങ്ങളില്‍ ഒരു പുതിയ ജലനയം രൂപപ്പെടേണ്ടതുണ്ടെന്ന് പ്രശസ്ത ചിന്തകരും എഴുത്തുകാരുമായ ടോണി ക്ലാര്‍ക്കും മോഡ് ബാര്‍ലൊയും അവരുടെ ‘ബ്ലൂ ഗോള്‍ഡ്’ (blue gold)എന്ന ആധികാരിക രചനയില്‍ നിര്‍ദേശിച്ചിട്ടുണ്ട്.

ശുദ്ധവെള്ളം ലഭ്യമാക്കാന്‍ സ്വന്തം ജനങ്ങളിലും ജലസംരക്ഷണനയങ്ങളിലും ഘടനാപരമായ സംവിധാനങ്ങളിലുമാണ് സര്‍ക്കാര്‍ നിക്ഷേപം നടത്തേണ്ടത്. ആത്യന്തികമായി അത് ജനാധിപത്യമൂല്യങ്ങളെ ഊട്ടിയുറപ്പിക്കുന്നു.
”ജലത്തിന്റെ പേരിലുള്ള അഭിപ്രായഭിന്നതയും സംഘര്‍ഷവും ജനാധിപത്യത്തിന്റെ അടിസ്ഥാനപ്രമാണങ്ങളിലൂന്നിക്കൊണ്ടുള്ളതാണെന്നു നാം കണ്ടുകഴിഞ്ഞു. നമ്മുടെ ഭാവിയെ സംബന്ധിക്കുന്ന തീരുമാനങ്ങള്‍ ആരാണെടുക്കുക? ആരെയാണ് ആ പ്രക്രിയയില്‍നിന്നു മാറ്റിനിര്‍ത്തുക?” നിര്‍ണായക പ്രാധാന്യമുള്ള ഈ ചോദ്യങ്ങള്‍ ഉന്നയിക്കപ്പെട്ടത് പ്രശസ്ത ചിന്തകരും ഗ്രന്ഥകാരന്മാരുമായ അലന്‍ സ്നിറ്റൌ, ഡെബോറ കോഫ്മാന്‍, മൈക്കേല്‍ ഫോക്സ് എന്നിവര്‍ ചേര്‍ന്നു രചിച്ച ‘തേഴ്സ്റ്റ്’ (thirst)എന്ന പുസ്തകത്തിലാണ്. ”ജനങ്ങള്‍ക്ക് അവരുടെ അടിസ്ഥാന വിഭവത്തിന്റെ_ജലത്തിന്റെ_മേല്‍ നിയന്ത്രണമില്ലെങ്കില്‍ മറ്റെന്തിന്റെ മേലാണതുണ്ടാവുക?”
ഈ പ്രതിഭകളുടെ നിര്‍ണായകമായ ചോദ്യം മാനവരാശിയുടെ ഭാവിയുമായി ബന്ധപ്പെട്ടിരിക്കുന്നു.

**************************************************************
8 Nov, 2007
എം.പി. വീരേന്ദ്രകുമാറിന്റെ ലേഖനപരമ്പരയ്ക്കു ലഭിച്ച പ്രതികരണങ്ങള്‍ ഇന്നു മുതല്‍ പ്രസിദ്ധീകരിക്കുന്നു
കുപ്പിവെള്ളമോ കുപ്പവെള്ളമോ?

Bottled Water

1971 മുതല്‍ 1980 വരെ നടന്ന ജലപഠനദശകത്തിന്റെ ഭാഗമായി ലഭിച്ച വസ്തുതകളെ, തങ്ങള്‍ക്കനുസൃതമായി ക്രോഡീകരിച്ചാണ് ലോകബാങ്കും അനുബന്ധസ്ഥാപനങ്ങളും വെള്ളം ദുര്‍ലഭമാണെന്നും ഉള്ളതുതന്നെ മുഴുവന്‍ മലിനമാണെന്നും അതിനാല്‍ അത് വന്‍തോതില്‍ സംഭരിച്ച്, ശുദ്ധീകരിച്ച്, വിതരണം ചെയ്യേണ്ടതാണെന്നും പ്രചരിപ്പിച്ചത്

ഡോ. എ. അച്യുതന്‍

പ്രകൃതിയില്‍ സ്വാഭാവികമായി കിട്ടുന്ന വെള്ളമെല്ലാം ‘കുപ്പ’വെള്ളമാണെന്നും പൈപ്പുവെള്ളംപോലും അശുദ്ധമാണെന്നും കുപ്പിയില്‍ സീല്‍ ചെയ്ത വെള്ളമേ വിശ്വസിച്ചു കുടിക്കാന്‍ പറ്റിയതായിട്ടുള്ളൂ എന്ന കപടസന്േദശം പ്രചരിപ്പിച്ചുകൊണ്ടാണ് ലോകകുപ്പിവെള്ള വ്യവസായം വെച്ചടിച്ച് മുന്നേറിക്കൊണ്ടിരിക്കുന്നത്. നാമെല്ലാം അറിയാതെ ആ സന്േദശം പരത്തുകയും ചെയ്യുന്നു. ഉദാഹരണത്തിന് സമ്മേളനങ്ങളിലെല്ലാം വേദിയിലെ ഓരോ പ്രാസംഗികന്റെ മുമ്പിലും ഓരോ വെള്ളക്കുപ്പി വെക്കുന്നത് പതിവായിരിക്കുന്നു. ഇതുവഴി സംഘാടകര്‍, ഒരു പ്രതിഫലവും കിട്ടാതെ, കുപ്പിവെള്ളം പരസ്യം ചെയ്യുകയാണെന്ന് അറിയുന്നില്ല. യോഗം തീരുന്നതുവരെ സദസ്യരെല്ലാം ബ്രാന്‍ഡ് ചെയ്ത കുപ്പികളാണ് കാണുന്നത്. യോഗത്തിന് ടെലിവിഷന്‍ കവറേജുണ്ടെങ്കില്‍ അതുവഴി മാളോരെ മുഴുവന്‍ കാണിക്കുന്നതും കുപ്പിവെള്ളത്തിന്റെ മാഹാത്മ്യംതന്നെ. വേദിയിലുള്ള വി.ഐ.പി.കള്‍ക്ക് ആകെ ടെലിവിഷന്‍ സമയത്തിന്റെ നാലിലൊന്നോ അഞ്ചിലൊന്നോ വീതമേ ലഭിക്കൂ. പക്ഷേ, മുഴുവന്‍ സമയവും വിരാജിക്കുന്നത് കുപ്പിവെള്ളം തന്നെ! ഒരു ചെലവുമില്ലാത്ത ഒന്നാംതരം പരസ്യം.

കുപ്പിവെള്ളത്തിന്റെ വ്യവസായം 1970 കളില്‍ ആരംഭിച്ചത് അത് ഒരു സുഖോപഭോഗവസ്തു (വന്‍ണ്‍ന്‍ഴസ്ര യര്‍ഫശ)എന്ന നിലയ്ക്കാണ്. അന്നത് ഒരു പൊങ്ങച്ച ചിഹ്നമായി. ക്രമേണ വിശിഷ്ട നീരുറവകളില്‍നിന്ന് ശേഖരിച്ച പ്രത്യേക ആരോഗ്യഗുണങ്ങളുള്ള ധാതുജലം (ശയഷഫഴദവ ള്‍ദര്‍ഫഴ)ആണെന്ന നിലയ്ക്ക് മാര്‍ക്കറ്റില്‍ പ്രചാരം വര്‍ധിച്ചു. വളരെ വേഗത്തില്‍ അതിന്റെ കച്ചവടസാധ്യത സ്പഷ്ടമായി. ജീവന്‍ നിലനില്‍ക്കാന്‍ അനുപേക്ഷണീയ വെള്ളത്തിന്റെ പ്രാധാന്യം മുതലെടുത്ത് വന്‍ കുത്തകകള്‍ കച്ചവടരംഗത്തിറങ്ങി. 1970_ല്‍ 100 കോടി ലിറ്റര്‍ ആയിരുന്ന കുപ്പിവെള്ള മാര്‍ക്കറ്റ്, 1980_ല്‍ 250 കോടി ലിറ്ററായും 2000_ല്‍ 8400 കോടി ലിറ്ററായും വര്‍ധിച്ചു. വിറ്റുവരവ് 2000_ല്‍ 88,000 കോടി രൂപ ആയിരുന്നത് 2020 ആകുമ്പോഴേക്കും 220 ലക്ഷം കോടി രൂപ ആകുമെന്നാണ് ലാഭക്കൊതിയന്മാരുടെ കണക്കുകൂട്ടല്‍. കൃത്രിമമായി സൃഷ്ടിച്ച ആവശ്യത്തിന്റെ ഫലമായി മാര്‍ക്കറ്റില്‍ ഉണ്ടായ ഈ കുതിച്ചുചാട്ടത്തിന്റെ ഭാഗമായി ഗുണനിലവാരം പാടെ അവഗണിച്ച് വന്‍ പരസ്യങ്ങളുടെയും പ്രലോഭനങ്ങളുടെയും ഫലമായി ഏതു ‘കുപ്പ’വെള്ളവും കുപ്പിയിലാക്കിയാല്‍ കണ്ണുമടച്ച് തൊണ്ട തൊടാതെ വിഴുങ്ങാമെന്ന നിലയിലായി ജനങ്ങള്‍.

കുത്തകകളുടെ കച്ചവട തന്ത്രങ്ങളുടെ ഫലമായി കുടിവെള്ളത്തിന്റെ കാര്യത്തില്‍ പല മലക്കംമറിച്ചിലുകളും കഴിഞ്ഞ 35 കൊല്ലങ്ങള്‍ക്കുള്ളില്‍ നടന്നു. 1972_ലെ സ്റ്റോക്ക്ഹോം പരിസ്ഥിതി കണ്‍വെന്‍ഷനിലും 1979 ല്‍ മാര്‍ ദെല്‍പ്ലാറ്റയില്‍ നടന്ന ഐക്യരാഷ്ട്രസഭയുടെ ജലകോണ്‍ഗ്രസ്സിലും ”അടിസ്ഥാന ആവശ്യങ്ങള്‍ നിറവേറ്റാന്‍ വേണ്ടത്ര അളവിലും ഗുണത്തിലും വെള്ളം ലഭിക്കാന്‍ വികസനത്തിന്റെ ഏതു ദിശയിലുള്ള ജനങ്ങള്‍ക്കും അവകാശമുണ്ട്” എന്ന് പ്രഖ്യാപിച്ചു. പിന്നീട് നടന്ന അന്താരാഷ്ട്ര ജല_ശുചീകരണപഠനദശകത്തിലെ പഠനങ്ങളുടെ അടിസ്ഥാനത്തില്‍ ജലം മനുഷ്യാവകാശമാണെന്ന് ഉറപ്പിച്ചുപറഞ്ഞു. എന്നാല്‍ 1990 ആയപ്പോഴേക്കും വെള്ളക്കച്ചവടത്തിലെ കൊള്ളലാഭ സാധ്യത മനസ്സിലാക്കിയ ആഗോള കുത്തകകള്‍ മുന്‍ തീരുമാനങ്ങളെ മാറ്റിമറിക്കുന്നതില്‍ വിജയിച്ചു. മനുഷ്യരക്തത്തിന്റെ രുചി അറിഞ്ഞ കടുവ നരഭോജിയാകുന്നത് സ്വാഭാവികമാണല്ലോ.

1992_ല്‍ ഡബ്ലിനില്‍ നടന്ന സമ്മേളനം ജലത്തിന് സാമ്പത്തികമൂല്യമുണ്ടെന്നും അതിനാല്‍ അത് ഒരു സാമ്പത്തിക ‘ചരക്കാ’യി കണക്കാക്കപ്പെടണമെന്നും ജലത്തിനുള്ള അവകാശം എന്നത് സൌജന്യമായി കിട്ടുവാനുള്ള അവകാശമല്ല എന്നും പ്രഖ്യാപിച്ചു. ലോകജല കൌണ്‍സിലിന്റെയും ആഗോള ജലപങ്കാളിത്തത്തിന്റെയും ഏവസധദവ ള്‍ദര്‍ഫഴ ഹദഴര്‍ഷഫഴറമയഹ)ആഭിമുഖ്യത്തില്‍ 1977 ല്‍ മാരക്കേഷിലും 2000 ല്‍ ദ്ഹേഗിലും 2003_ല്‍ ക്യോട്ടോവിലും 2006 മെക്സിക്കോവിലും ചേര്‍ന്ന ലോകജലസമ്മേളനങ്ങളില്‍ വെള്ളം വ്യാപാരച്ചരക്കാണെന്നും അതിന് വില നല്‍കണമെന്നും അസന്ദിഗ്ദ്ധമായി പ്രഖ്യാപിച്ചു. ഈ നാലു ലോകജല സമ്മേളനങ്ങളും വിവേന്‍ഡി, ഡൂയെസ് തുടങ്ങിയ കുത്തകകളുടെയും ലോകബാങ്കിന്റെയും പിന്തുണയോടും പങ്കാളിത്തത്തോടും കൂടിയാണ് നടന്നത്.

ഇതിനിടയില്‍ 1999 ലും 2000 ലും ഐക്യരാഷ്ട്ര ജനറല്‍ അസംബ്ലിയും 2002 ല്‍ സാമ്പത്തിക_സാമൂഹിക_സാംസ്കാരിക അവകാശങ്ങള്‍ക്കുള്ള ഐക്യരാഷ്ട്രസഭാകമ്മിറ്റിയും 2005_ല്‍ സാന്‍ഫ്രാന്‍സിസ്കോവില്‍ നടന്ന യു.എന്‍. പരിസരസമ്മേളനവും ”ജീവനും ആരോഗ്യത്തിനും അടിസ്ഥാനമായ പൊതുവസ്തു ആണ് വെള്ളം” എന്നും ‘അതി’ന്റെ ഭൌതികവും വിവേചനരഹിതവും സാമ്പത്തികമായി താങ്ങാവുന്നതുമായ ലഭ്യത ജനങ്ങളുടെ അവകാശമാണെന്നും പ്രഖ്യാപിച്ചു. ഐക്യരാഷ്ട്രസഭയും പൌരാവകാശ സംഘടനകളും പ്രമേയങ്ങള്‍ പാസ്സാക്കി അലംഭാവത്തോടെ ഇരിക്കുകയും ലോകബാങ്കും വെള്ളക്കുത്തകകളും അവരുടെ അജന്‍ഡ നിര്‍ബാധം നടപ്പാക്കിക്കൊണ്ടിരിക്കുകയും ആണ് ചെയ്തുവരുന്നത്.

1971 മുതല്‍ 1980 വരെ നടന്ന ജലപഠനദശക(ഒസ്രപഴസവസഭയഋദവ ഉഫഋദപഫ)ത്തിന്റെ ഭാഗമായി ലഭിച്ച വസ്തുതകളെ, തങ്ങള്‍ക്കനുസൃതമായി ക്രോഡീകരിച്ചാണ് ലോകബാങ്കും അനുബന്ധസ്ഥാപനങ്ങളും വെള്ളം ദുര്‍ലഭമാണെന്നും ഉള്ളതുതന്നെ മുഴുവന്‍ മലിനമാണെന്നും അതിനാല്‍ അത് വന്‍തോതില്‍ സംഭരിച്ച്, ശുദ്ധീകരിച്ച്, വിതരണം ചെയ്യേണ്ടതാണെന്നും പ്രചരിപ്പിച്ചത്. വാസ്തവത്തില്‍ വെള്ളത്തിന്റെ ദൌര്‍ലഭ്യവും മലിനീകരണം പെരുപ്പിച്ചുകാട്ടുകയാണ് അവര്‍ ചെയ്തത്. ദുര്‍ലഭമായ ചരക്കുകളിലാണല്ലോ കരിഞ്ചന്തയും കൊള്ളലാഭവും നടത്താന്‍ സൌകര്യം.

ഭൂമിയില്‍ ആകെയുള്ള വെള്ളം 141.3 കോടി ഘന കിലോമീറ്റര്‍ ആണെന്നാണ് കണക്ക്. ഇതിന്റെ അതിഭൂരിഭാഗവും കടലിലും ധ്രുവപ്രദേശങ്ങളിലെ ഹിമമലകളിലുമാണ്. മനുഷ്യോപയോഗത്തിന്നെടുക്കാവുന്നത് (ഹസര്‍ദധവഫ), 5000 ല്‍ ഒരംശമേ ഉള്ളൂ. കേട്ടാല്‍ പേടി തോന്നും ഇല്ലേ? എന്നാല്‍ ഈ 5000 ല്‍ ഒരംശമെന്നത് 2,81,026 ഘന കിലോമീ (ഘ.കി.മീ.) ആണ്. (ഒരു ഘന കിലോമീറ്റര്‍ വെള്ളം പ്രതിദിനം ഒരാള്‍ക്ക് 500 ലിറ്റര്‍ എന്ന തോതില്‍ ഒരു ലക്ഷം പേര്‍ക്ക് 55 കൊല്ലത്തെ ഉപയോഗത്തിനു മതിയാകും). മനുഷ്യന്റെ ഉപഭോഗാവശ്യങ്ങള്‍ക്ക് (ഋസഷറന്‍ശഹര്‍യല്‍ഫ ന്റഫ) എത്ര വെള്ളം വേണമെന്ന് നോക്കൂ (പട്ടിക 01). 18,700 ഘ.കി.മീ. വെള്ളമാണ്

ഒരാള്‍ക്ക് ഒരു ദിവസം 500 ലി. കണക്കിന്

600 കോടി ജനങ്ങള്‍ക്ക് _ 1100 ഘ.കി.മീ.
കാര്‍ഷികാവശ്യങ്ങള്‍ക്ക് _ 4400 ,, ,,
വ്യാവസായികാവശ്യങ്ങള്‍ക്ക് _ 3300 ,, ,,
താപവൈദ്യുതിനിലയങ്ങളില്‍ _ 3300 ,, ,,
മനുഷ്യമലവും മറ്റും സംസ്കരിക്കുന്നതിന് _ 6600 ,, ,,
വര്‍ഷത്തില്‍ ആകെ _ 18,700 ഘ.കി.മീ.
പട്ടിക 01. ആഗോള ജലാവശ്യങ്ങള്‍

വര്‍ഷത്തില്‍ എടുത്തുപയോഗിക്കാന്‍ വേണ്ടത്. (ചെടികളുടെയും മറ്റു ജന്തുക്കളുടെയും ആവശ്യത്തിനുള്ളതും ജലഗതാഗതത്തിനുള്ളതും ഇതില്‍ പെടുത്തിയിട്ടില്ല). ഇത് ലഭ്യമായ ഉപയോഗയോഗ്യമായ വെള്ളത്തിന്റെ 6.5 ശതമാനം മാത്രമാണ്. എല്ലാ വര്‍ഷവും തുടര്‍ച്ചയായി എടുക്കുന്നതുകൊണ്ട് ഇത് തീര്‍ന്നുപോകില്ലേ എന്ന് സംശയിക്കാം. തീര്‍ന്നു പോകില്ല. കാരണം, വെള്ളം ശുദ്ധീകരിച്ച് മഴയായും മഞ്ഞായും പ്രകൃതി വീണ്ടും വീണ്ടും നല്‍കുന്നു. ഇങ്ങനെ ഓരോ വര്‍ഷവും പുതുക്കുന്നത് 5,02,000 ഘ.കി.മീ. ആണ്. ഒരു വര്‍ഷം നമുക്കാവശ്യമുള്ള 18,700 ഘനകിലോമീറ്ററിന്റെ 27 ഇരട്ടിയോളം വെള്ളം മഴയായും മഞ്ഞായും വര്‍ഷംതോറും ലഭിച്ചുകൊണ്ടിരിക്കുന്നു. സൌരോര്‍ജംമൂലം ആവിയാക്കി ശുദ്ധീകരിച്ച്, അന്തരീക്ഷ പ്രവര്‍ത്തനങ്ങള്‍ വഴി ഘനീഭവിപ്പിച്ച്, ഭൂഗുരുത്വാകര്‍ഷണം വഴി ലഭിക്കുന്ന ഇതിനുവേണ്ടി ആരും ഒരു ചെലവും ചെയ്യേണ്ടതില്ല. അതുകൊണ്ടുതന്നെ വെള്ളം ആരുടെയും സ്വകാര്യസ്വത്തല്ല, എല്ലാവരുടെയും പൊതുസ്വത്താണ്.

കിണറുകളിലെയും നീരുറവകളിലെയും തടാകങ്ങളിലെയും വെള്ളം മുഴുവന്‍ ഉപയോഗിക്കാന്‍ കൊള്ളില്ലെന്നാണ് ലോകകുത്തകകള്‍ പ്രചരിപ്പിക്കുന്നത്. എന്തുപയോഗത്തിന് കൊള്ളില്ല എന്ന ചോദ്യം ഇവിടെ പ്രസക്തമാണ്. ഗാര്‍ഹിക ഉപയോഗത്തിനായുപയോഗിക്കുന്ന വെള്ളത്തിന്റെ വളരെ ചെറിയൊരംശം മാത്രമേ ശുദ്ധജലമായി ആവശ്യമുള്ളൂ. കുടിക്കുവാനും ഭക്ഷണം പാകം ചെയ്യുവാനും ഭക്ഷണാവശ്യത്തിനുള്ള പാത്രങ്ങള്‍ കഴുകി വൃത്തിയാക്കാനും ഇതിനെല്ലാം കൂടി ഒരാള്‍ക്ക് ശരാശരി 15_20 ലി. വെള്ളം മതി. ഇത്രയും വെള്ളമേ ലോകാരോഗ്യസംഘടന നിര്‍ദേശിക്കുന്ന ഗുണനിലവാരമുള്ളതാകേണ്ടൂ. വസ്ത്രം കഴുകല്‍, തറ വൃത്തിയാക്കല്‍, കക്കൂസില്‍ ഫ്ലഷ് ചെയ്യാന്‍, കാര്‍ കഴുകല്‍, തോട്ടം നനയ്ക്കല്‍ എന്നീ മറ്റാവശ്യങ്ങള്‍ക്ക് അത്രതന്നെ ഗുണനിലവാരമുള്ള വെള്ളം ആവശ്യമില്ല. കേരളത്തില്‍ മിക്ക സ്ഥലത്തും കിട്ടുന്ന കിണര്‍ വെള്ളം ഇതിനായി നേരിട്ടുപയോഗിക്കാം. എല്ലാവര്‍ക്കും എല്ലാ ആവശ്യങ്ങള്‍ക്കും വേണ്ടത്ര വെള്ളം മുഴുവനും ലോകാരോഗ്യസംഘടന നിര്‍ദേശിക്കുന്ന നിലവാരത്തില്‍ തന്നെ നല്‍കണമെന്ന് ശഠിക്കുന്നത് സംഭരണ_ശുദ്ധീകരണ_വിതരണ മേഖലകളെല്ലാംതന്നെ കുത്തകവത്കരിക്കാന്‍ വേണ്ടിയാണ്.

മേല്‍ കാണിച്ചതില്‍ കുടിക്കുവാന്‍ വേണ്ടത് ഒരാള്‍ക്ക് ഒരു ദിവസം 1.5_2.0 ലിറ്ററാണ്. പരമ്പരാഗതമായി ഇവിടെ ചെയ്തിരുന്നത് കുടിക്കുന്ന വെള്ളം തിളപ്പിച്ചുപയോഗിക്കുക എന്നതാണ്. ഏറ്റവും സുരക്ഷയുള്ള മാര്‍ഗവും അതാണ്. പല കുപ്പിവെള്ളക്കമ്പനികളും സാധാരണ ടാപ്പുകളില്‍ നിന്നുള്ള വെള്ളം ഒരു ശുദ്ധീകരണവും നടത്താതെ കുപ്പിയില്‍ നിറച്ചുവില്‍ക്കുകയാണ്. നാച്വറല്‍ റിസോഴ്സ് ഡിഫന്‍സ് കൌണ്‍സില്‍ 1999 ല്‍ 103 തരം ബ്രാന്‍ഡ് വെള്ളത്തെക്കുറിച്ച് നടത്തിയ പഠനത്തില്‍ അവയൊന്നും സാധാരണ ടാപ്പുവെള്ളത്തേക്കാള്‍ ശുദ്ധമല്ലെന്ന് കണ്ടിട്ടുണ്ട്. അമേരിക്കയില്‍ പെപ്സിക്കമ്പനി വില്‍ക്കുന്ന ‘അക്വാഫൈന’ എന്ന ബ്രാന്‍ഡ് വെള്ളം ടാപ്പുവെള്ളമാണെന്ന് കുപ്പിയിലെ ലേബലില്‍ പ്രഖ്യാപിക്കാന്‍ നിര്‍ബന്ധിതരായിരിക്കയാണ്.

ഇന്ത്യയില്‍ കുപ്പിവെള്ളത്തിന്റെ നിലവാരം നിയന്ത്രിക്കാന്‍ കൃത്യമായ സ്റ്റാന്‍ഡേര്‍ഡുകളില്ല. ബ്യൂറോ ഓഫ് ഇന്ത്യന്‍ സ്റ്റാന്‍ഡേര്‍ഡ് ചില സ്റ്റാന്‍ഡേര്‍ഡുകള്‍ പ്രഖ്യാപിച്ചിട്ടുണ്ടെങ്കിലും (സൃഞ 1453:1998, 13428:1998), അവ നിര്‍ബന്ധമില്ല. ഇവയില്‍ തന്നെ കീടനാശിനികളുടെ അളവ് ‘കണ്ടുപിടിക്കാന്‍ കഴിയുന്ന അളവിലും കുറവ്’ (ധഫവസള്‍ പദര്‍ഫഋര്‍ദധവഫ വഫല്‍ഫവറ) ആയിരിക്കണമെന്നേ പറയുന്നുള്ളൂ. ഈ അളവാകട്ടെ ഉപയോഗിക്കുന്ന ഉപകരണങ്ങളെ ആശ്രയിച്ചിരിക്കും. അതുകൊണ്ട് കമ്പനികള്‍ക്ക് ഇവ യഥേഷ്ടം വളച്ചൊടിക്കാനും കഴിയുന്നു. അതുകൊണ്ടാണല്ലൊ, ഇന്ത്യയിലെ പാക്കിങ് നിയമമനുസരിച്ച് പാനീയത്തിലെ ഘടകവസ്തുക്കളുടെ വിശദവിവരം കുപ്പിയുടെ ലേബലില്‍ കാണിക്കണമെന്ന രാജസ്ഥാന്‍ ഹൈക്കോടതിയുടെ ഉത്തരവ് കൊക്കകോള കമ്പനി ധിക്കാരപൂര്‍വം അവഗണിച്ചത്.

വെള്ളത്തിന്റെ മാത്രമല്ല, വിതരണത്തിനുപയോഗിക്കുന്ന കുപ്പികളുടെ പരിശുദ്ധിയും ചോദ്യം ചെയ്യപ്പെടേണ്ടതാണ്. വെള്ളക്കുപ്പി നിര്‍മാണത്തില്‍ ഉപയോഗിക്കുന്ന താലെയ്റ്റ് (ഹര്‍മദവദര്‍ഫ) എന്ന രാസവസ്തു അന്തഃസ്രാവിഗ്രന്ഥികളുടെ പ്രവര്‍ത്തനത്തെ ദോഷകരമായി ബാധിക്കും. വെള്ളം കുപ്പിയില്‍ കുറെക്കാലം സൂക്ഷിച്ചാല്‍ രാസവസ്തുക്കള്‍ വെള്ളത്തില്‍ ലയിച്ചുചേരും. ഇതുകൂടാതെ പ്ലാസ്റ്റിക് കുപ്പികള്‍ തന്നെ വലിയ പാരിസ്ഥിതിക പ്രശ്നങ്ങളാണ് സൃഷ്ടിക്കുന്നത്. പ്രതിവര്‍ഷം 10,000 കോടിയിലധികം കുപ്പികളാണ് വലിച്ചെറിയപ്പെടുന്നത്. ഇവയുണ്ടാക്കുമ്പോള്‍ പുറത്തുവിടുന്ന കാര്‍ബണ്‍ ഡൈഓക്സൈഡും ആഗോളതാപനത്തിന് കാരണമാകുന്നു.

ഇതിനുപുറമെയാണ് ഭൂഗര്‍ഭജല ചൂഷണവും ജലമലിനീകരണവും. വന്‍തോതില്‍ ഭൂഗര്‍ഭജലം ചൂഷണം ചെയ്യുക വഴി പൊതു സമൂഹത്തിന്റെ അവകാശമായ വെള്ളത്തിന് ക്ഷാമം സംഭവിക്കുന്നു. പ്ലാച്ചിമട ഇതിന് പ്രത്യക്ഷമായ ഉദാഹരണമാണ്. ഭൂഗര്‍ഭജല നിരപ്പ് ഭയാനകമായി താഴുന്നത്, ജലമലിനീകരണത്തിനും കാരണമാകുന്നു. കൂടാതെ കുപ്പി കഴുകാനും മറ്റു പ്രവര്‍ത്തനങ്ങള്‍ക്കും ഉപയോഗിക്കുന്ന രാസവസ്തുക്കള്‍ പരസരമലിനീകരണം ഉണ്ടാക്കുന്നു. പ്ലാച്ചിമടയിലെ കൊക്കകോള കമ്പനി പുറത്തുവിട്ട ഘരമാലിന്യങ്ങളില്‍ ഘനലോഹ മാലിന്യങ്ങള്‍ അടങ്ങിയതായി കണ്ടിട്ടുണ്ട്.

ഭൂഗര്‍ഭജലം മാത്രമല്ല, ഉപരിതല ജലസ്രോതസ്സും വെള്ളക്കുത്തകകള്‍ കൈയടക്കി വെച്ചിരിക്കയാണ്. അമേരിക്കയില്‍ പെറിയേ എന്ന കമ്പനി 122 അരുവികളാണ് സ്വന്തമാക്കിയിരിക്കുന്നത്. വെള്ളത്തിന്റെ പ്രാഥമിക സ്രോതസ്സ് മഴയാണ്. ഇതിനുവേണ്ടി ആരും ഒന്നും ചെലവാക്കുന്നില്ല. അതുകൊണ്ട് അത് ആരുടേയും സ്വകാര്യ സ്വത്തല്ല. എല്ലാവരുടേയുമാണ്. എല്ലാവരുടേതുമായ ഒരു സ്വത്ത് കൈയൂക്കുള്ള ഏതാനും പേര്‍ കുതന്ത്രങ്ങളിലൂടെ കൊള്ളലാഭം ഉണ്ടാക്കാന്‍ കൈയടക്കി വെച്ചിരിക്കുന്നത് അനീതിയാണ്. കുപ്പിവെള്ളം ബഹിഷ്കരിച്ചുകൊണ്ട് ഇവര്‍ക്കെതിരായ പ്രതിരോധസമരം തുടങ്ങേണ്ടതായ സമയം അതിക്രമിച്ചിരിക്കുന്നു.

9-11-07
നമുക്ക് വേണോ ഈ കുപ്പിവെള്ളം

ഡോ: സി.ആര്‍. സോമന്‍

ഈ അടുത്തകാലത്ത് എനിക്കുണ്ടായ ഒരനുഭവത്തില്‍നിന്ന് തുടങ്ങട്ടെ. ആഗോളീകരണത്തിന്റെ ഭാഗമായി റീട്ടെയില്‍ വ്യാപാര മേഖലയില്‍ ബഹുരാഷ്ട്ര കുത്തകകളുടെ കടന്നുകയറ്റത്തെ എങ്ങനെ ചെറുക്കാം എന്നു ചര്‍ച്ച ചെയ്യാന്‍ വിളിച്ചുകൂട്ടിയ ഒരു യോഗത്തില്‍ ഞാനും പങ്കെടുത്തു. സാമാന്യം വിസ്തൃതമായ വേദിയില്‍ ഏതാണ്ട് പത്ത് വിശിഷ്ടാതിഥികള്‍ ഉപവിഷ്ടരായിരുന്നു. പരവതാനി വിരിച്ച മേശപ്പുറത്ത് ഒരാള്‍ക്ക് ഒന്നെന്ന തോതില്‍ കിന്‍ലെ,
അക്വാഫിന എന്നീ ശുദ്ധജലകുപ്പികള്‍ നിരത്തി വെച്ചിരുന്ന കാഴ്ച എന്നെ അസ്വസ്ഥനാക്കി.

കൊക്കകോള, പെപ്സി കമ്പനികള്‍ ഉത്പാദിപ്പിക്കുന്ന കുടിവെള്ളം പാലിനൊപ്പം വിലകൊടുത്തു വാങ്ങി ഉപയോഗിക്കുന്നതിന് നമ്മുടെ ദേശീയവാദികള്‍ക്ക് യാതൊരു വൈകാരികബുദ്ധിമുട്ടും ഉണ്ടായില്ലെന്നുള്ളത് എന്നെ അദ്ഭുതപ്പെടുത്തി. കുടിവെള്ളത്തിന്റെ കാര്യത്തിലും മറ്റെല്ലാ മേഖലകളെപ്പോലെ മലയാളി സ്വീകരിക്കുന്ന ഇരട്ടത്താപ്പുനയമാണ് ഇവിടെ പ്രകടമായത്.

നാം ദാഹശമനത്തിനും പാചക ആവശ്യത്തിനും ഉപയോഗിക്കുന്ന ജലം ശുദ്ധമാവണമെന്ന കാര്യത്തില്‍ തര്‍ക്കമില്ല. കുടിവെള്ളത്തിനുണ്ടാകേണ്ട ഗുണനിലവാരം എന്താവണമെന്ന് ലോകാരോഗ്യ സംഘടന തുടങ്ങിയ അന്താരാഷ്ട്ര സംഘടനകളുടെ ചുവടുപിടിച്ച് ഇന്ത്യയിലും വ്യക്തമായ നിര്‍ദേശങ്ങളുണ്ട്. കാഴ്ചയിലും രാസപരിശോധനയിലും മൈക്രോ ബയോളജി പരിശോധനയിലും കൂടി ഏറ്റവും കുറഞ്ഞ ഗുണനിലവാര സൂചികകള്‍ ദേശീയതലത്തില്‍ നിര്‍വചിച്ചിരിക്കുന്നു. നഗരങ്ങളിലും ഗ്രാമങ്ങളിലും പൊതു ജലവിതരണ സമ്പ്രദായങ്ങള്‍ ഏര്‍പ്പെടുത്തുമ്പോള്‍ വിതരണം ചെയ്യുന്ന ജലത്തിന്റെ ഗുണനിലവാരം ശുപാര്‍ശയുടെ പരിധിക്കുള്ളില്‍ ഉണ്ടാകണമെന്നുള്ളത് നിയമപരമായ ബാധ്യതയാണ്. പൊതുവിതരണ സമ്പ്രദായത്തിലൂടെ ജനങ്ങള്‍ക്ക് ലഭ്യമാകുന്ന കുടിവെള്ളം എല്ലായ്പ്പോഴും മണല്‍ ഉപയോഗിച്ച് അരിച്ച് പ്ലവ പദാര്‍ഥങ്ങള്‍ രാസപ്രയോഗത്തിലൂടെ നിര്‍മാര്‍ജനം ചെയ്ത് ക്ലോറിന്റെ സഹായത്തോടെ (ബ്ലീച്ചിങ് പൌഡര്‍ പ്രയോഗത്തിലൂടെ) അണുവിമുക്തമാക്കിയ ശേഷമാകും വിതരണം ചെയ്യുക. കേരളത്തിലെ നഗരങ്ങളില്‍ വാട്ടര്‍ അതോറിറ്റി വിതരണം ചെയ്യുന്ന ജലം ഇപ്പറയുന്ന എല്ലാ പ്രക്രിയകള്‍ക്കും ശേഷമാണ് കുഴലിലൂടെ ജനങ്ങള്‍ക്ക് എത്തിച്ചുകൊടുക്കുന്നതെന്ന് എനിക്ക് ബോധ്യമുണ്ട്. പക്ഷേ, ഇങ്ങനെ വിതരണം ചെയ്യുന്ന ജലം സ്ഥിരമായി യാതൊരു മുന്നറിയിപ്പുമില്ലാതെ പൊട്ടുന്ന പൈപ്പുകളിലൂടെ ഉപഭോക്താക്കള്‍ക്ക് എത്തിക്കുമ്പോള്‍ ശുദ്ധജലത്തിനുണ്ടാകാവുന്ന അപകടകരമായ മാറ്റങ്ങള്‍ നമ്മുടെ ജലവിതരണ അതോറിറ്റിയില്‍ കാര്യമായ ആകാംക്ഷയൊന്നും ജനിപ്പിച്ചതായി തോന്നുന്നില്ല. ഈ ദുരവസ്ഥയ്ക്ക് പരിഹാരമുണ്ടാക്കുവാന്‍ ജലവിതരണ അതോറിട്ടി കൂടുതല്‍ ഫലപ്രദമായ ഇടപെടലുകള്‍ നടത്തണം.

പൊതുവിതരണ സമ്പ്രദായത്തിലൂടെ വീട്ടിലും പ്രവൃത്തിസ്ഥലങ്ങളിലും ലഭിക്കുന്ന ജലം സുരക്ഷിതമല്ല എന്നൊരു വ്യാപകമായ ധാരണ നാട്ടിലെങ്ങും പരന്നിട്ടുണ്ട്. ജലവിതരണ കമ്പനികളെ പ്രതിക്കൂട്ടിലാക്കിയുള്ള ലേഖനങ്ങളും പൊതുവിമര്‍ശങ്ങളും പത്രങ്ങള്‍ സ്പോണ്‍സര്‍ചെയ്ത ഗവേഷണങ്ങളുമെല്ലാം ഈ അവിശ്വാസത്തിന് ആക്കം കൂട്ടിയിട്ടുണ്ട്. ഫലമോ വലിയ സാമ്പത്തികച്ചെലവു വരുന്ന രാസപദാര്‍ഥങ്ങളും സാങ്കേതികവിദ്യയും ഉപയോഗിച്ച് ശുദ്ധമാക്കി വീട്ടിലെ പൈപ്പിലൂടെ
ലഭിക്കുന്ന കുടിവെള്ളത്തെ നാം അവിശ്വസിക്കുന്നു.
ഫലമോ വീട്ടില്‍ കിട്ടുന്ന ശുദ്ധമായ ജലം വീണ്ടും ശുദ്ധീകരിക്കാനായി നാം പലതരത്തിലുള്ള യന്ത്രങ്ങള്‍ വാങ്ങി ഉപയോഗിക്കുന്നു.

ഓസോണ്‍ ശുദ്ധീകരണം, അയോണ്‍ എക്സ്ചേഞ്ച് ശുദ്ധീകരണം, റിവേഴ്സ് ഓസ്മോസിസ് ശുദ്ധീകരണം എന്നിങ്ങനെ ഓരോ നൂതന ടെക്നോളജിയും കുടിവെള്ള ശുദ്ധീകരണത്തിന് വേണ്ടി നാം ഭീമമായ വില കൊടുത്ത് വീട്ടില്‍ സ്ഥാപിച്ചിരിക്കുന്നു. ഈ വഴിപിഴച്ച പോക്കിന് കടിഞ്ഞാണിടാന്‍ സമയമായി എന്നെനിക്ക് തോന്നുന്നു.

കുപ്പിവെള്ളത്തിന്റെ കഥ പറഞ്ഞാണ് ഈ ലേഖനം തുടങ്ങിയത്. എവിടെ, ഏതു സമ്മേളനം ഉണ്ടെങ്കിലും അവിടെയെല്ലാം ഡസന്‍ കണക്കിനു കുപ്പിവെള്ളം ഇന്ന് അവിഭാജ്യഘടകമാണ്. ഗുണനിലവാരം ഉറപ്പുവരുത്തുമെന്ന് നാം വിശ്വസിക്കുന്ന ബഹുരാഷ്ട്ര, ദേശീയ കുത്തകകളോടൊപ്പം വര്‍ണലേബലുകള്‍ ഒട്ടിച്ച് നല്ലൊരു പേരും നല്‍കി അധികമാരും അറിയാത്ത ചെറിയ കമ്പനികളുടെവരെ കുടിവെള്ളക്കുപ്പികള്‍ ഇന്നു കമ്പോളത്തില്‍ സുലഭമാണ്. ഒരു ലിറ്ററിന് 12 രൂപയാണ് ശരാശരി വില. ഇന്ത്യയിലെ ജലവിതരണക്കമ്പനികള്‍ ജലസുരക്ഷിതത്വത്തിനാവശ്യമായ എല്ലാ പ്രക്രിയകളും നിര്‍വഹിച്ചു വീട്ടിലെത്തിക്കുന്ന വെള്ളത്തിനു കൊടുക്കേണ്ടിവരുന്ന വില ആയിരം ലിറ്ററിന് 10 രൂപയില്‍ താഴെയാണ് എന്നറിയുമ്പോള്‍ കുടിവെള്ള മേഖലയിലെ ഈ ഭീമന്‍സാമ്പത്തികചൂഷണത്തെപ്പറ്റി നമുക്കൊരു രൂപം കിട്ടും. അതായത്, കൈയിലൊരു കുപ്പി വെള്ളവുമായി നാം യാത്ര ചെയ്യുമ്പോള്‍ അര്‍ഹിക്കുന്നതിന്റെ ആയിരമിരട്ടി വിലയാണ് നാം നല്‍കുന്നത്. ആ വെള്ളത്തിന്റെ സുരക്ഷിതത്വം ടെലിവിഷന്‍ ജ്യോത്സ്യന്മാര്‍ നല്‍കുന്ന പ്രവചനങ്ങളെപ്പോലെത്തന്നെ അസ്ഥിരമാണെന്നുമറിയുക.

പ്രമുഖ കമ്പനികള്‍ ഉത്പാദിപ്പിക്കുന്ന വെള്ളം മൈക്രോബയോളജി, രാസഘടന എന്നിവയില്‍ ഗുണനിലവാരം പുലര്‍ത്തുന്നതു ശ്രദ്ധിക്കുമ്പോള്‍ അവയിലടങ്ങിയ കീടനാശിനികളുടെ കാര്യത്തില്‍ യാതൊരു നിഷ്കര്‍ഷയും പാലിക്കുന്നില്ലെന്നത് നാമറിയണം. നമുക്ക് വീട്ടില്‍ ജീരകമോ കൊത്തമല്ലിയോ അതുമല്ലെങ്കില്‍ പതിമുഖമോ ചേര്‍ത്ത് തിളപ്പിച്ചാറ്റി ഉപയോഗിക്കുന്ന വെള്ളത്തിന്റെ അഞ്ചയലത്തെങ്ങും സുരക്ഷിതത്വം നല്‍കുന്ന വെള്ളമല്ല ഭീമമായ വില കൊടുത്ത് ഫാഷനായി നാം കൊണ്ടുനടക്കുന്ന കുപ്പിവെള്ളം എന്നറിയുക. ഈ കുപ്പിവെള്ളത്തിന്റെയെല്ലാം ഗുണനിലവാരം നിരന്തരമായി നിരീക്ഷിച്ച് ആവശ്യമായ മുന്നറിയിപ്പ് നല്‍കുവാന്‍ പര്യാപ്തമായ ഒരു സംവിധാനവും രാജ്യത്ത് ഒരു സര്‍ക്കാറിന്റെയും കീഴിലില്ല എന്നതും നാമറിയണം. വിശ്വാസം മാത്രമാണ് നമ്മുടെ കൈമുതല്‍. പെറ്റ്ബോട്ടിലില്‍ അടക്കം ചെയ്ത കുപ്പിവെള്ളം ഇടതുകൈയിലൊരു മൊബൈല്‍ഫോണ്‍ എന്നതുപോലെ അനുപേക്ഷണീയമാണെന്നു നാമെല്ലാം കരുതുന്നുണ്ടെങ്കില്‍ എനിക്കു നിര്‍ദേശിക്കാനുള്ളത് ഇതാണ്: വീട്ടില്‍ത്തന്നെ തയ്യാര്‍ ചെയ്ത ജീരകവെള്ളമോ, വര്‍ണഭംഗിയുള്ള പതിമുഖവെള്ളമോ വൃത്തിയായ ഒരു പെറ്റ്ബോട്ടിലില്‍ അടക്കം ചെയ്ത് നമ്മുടെ സഞ്ചാരസഹായിയായി കൊണ്ടുപോവുക. എല്ലാ സമ്മേളനങ്ങളിലും തിളപ്പിച്ചാറ്റിയ ജീരകവെള്ളമോ പതിമുഖവെള്ളമോ ആകട്ടെ നാം കുടിക്കാന്‍ നല്‍കുക. ഇതുകൊണ്ടുണ്ടാകുന്ന സാമ്പത്തികലാഭവും അധികസുരക്ഷിതത്വവും എത്രയെന്നത് വായനക്കാര്‍ക്ക് ഊഹിക്കാവുന്നതേയുള്ളൂ. ഈയവസരത്തിലാണ് കേരള ജല അതോറിറ്റി കുപ്പിവെള്ളവ്യവസായം ആരംഭിക്കുവാന്‍പോകുന്നുവെന്ന പ്രസ്താവം ദുഃഖകരമായി മാറുന്നത്. തങ്ങള്‍ വിതരണം ചെയ്യുന്ന വെള്ളത്തില്‍ തങ്ങള്‍ക്കുതന്നെ വിശ്വാസമില്ല എന്ന ഒരു പ്രതീതിയാവും ഈ സംരംഭം ജനിപ്പിക്കുക. അങ്ങനെയൊരു സമീപനം ആത്മഹത്യാപരമാകും.

(തിരുവനന്തപുരം മെഡിക്കല്‍ കോളേജില്‍നിന്ന് ന്യൂട്രീഷന്‍ പ്രൊഫസറായി റിട്ടയര്‍ ചെയ്ത ഡോ. സി.ആര്‍. സോമന്‍ സാമൂഹ്യാരോഗ്യ പ്രവര്‍ത്തകനാണ്)

10-11-07
വെള്ളം ജീവന്റെ അടിസ്ഥാനം

എസ്. ഉഷ

കുപ്പിവെള്ളക്കച്ചവടത്തിന്റെ സാമ്പത്തികവശങ്ങളും രാഷ്ട്രീയവും വിശദമായി ചര്‍ച്ചചെയ്യുന്ന ലേഖനം വായിച്ചു. ഇന്നത്തെ ചര്‍ച്ചകളില്‍ വിട്ടുപോകുന്ന അല്ലെങ്കില്‍ മറന്നുപോകുന്ന ചില വശങ്ങള്‍ കൂടി ചൂണ്ടിക്കാണിക്കണമെന്നു തോന്നുന്നു.
ജീവന്‍ ഉത്ഭവിച്ചത് വെള്ളത്തിലാണെന്നും ഈ ഭൂമി തന്നെ ഒരു ജലഗ്രഹമാണെന്നും ഇതില്‍ 97 ശതമാനത്തോളം ഉപ്പുവെള്ളവും ബാക്കിയുള്ളത് ശുദ്ധജലവും. ഈ മൂന്നു ശതമാനത്തില്‍തന്നെ ഒരു ശതമാനത്തില്‍ താഴെ മാത്രമേ മനുഷ്യനും മറ്റു ജീവജാലങ്ങള്‍ക്കും എടുത്തുപയോഗിക്കാന്‍പറ്റുന്ന രൂപത്തിലുള്ളൂ എന്നതുമായ ശാസ്ത്രസത്യത്തെ ഇതുവരെയും മറ്റൊരു ശാസ്ത്രം ചോദ്യം ചെയ്തിട്ടില്ല. അതായത് ഭൂമിയിലുള്ള മൊത്തം ജലത്തിന്റെ ഒരു ശതമാനത്തില്‍ താഴെയുള്ള ശുദ്ധജലത്തെ ആശ്രയിച്ചാണ് ഇവിടത്തെ മനുഷ്യവംശത്തിന്റെയും മറ്റു ജീവജാലങ്ങളുടെയും നിലനില്‍പ് എന്നതുതന്നെ. ഈ ഒരു ശതമാനത്തെ ആധാരമാക്കിത്തന്നെയാണ് ഈ നൂറ്റാണ്ടിലെ വെള്ളക്കച്ചവടവും ഭയാനകമായി വളര്‍ന്നു കൊണ്ടിരിക്കുന്നത്.
കിണറുകളും കുളങ്ങളും അരുവികളും പുഴകളും ചേര്‍ന്ന് വലിയൊരു ജലശൃംഖലതന്നെയുള്ള നാടാണ് കേരളം. വളരെ നേര്‍ത്ത, ലോലമായ ഈ ജലസ്രോതസ്സുകളെ സംരക്ഷിക്കുന്നതിന് മുന്‍പുള്ളവര്‍ കൊടുത്ത ശുഷ്കാന്തിയാണ് കേരളം ജലസമ്പന്നമാകാനുള്ള കാരണം. ഏറ്റവും വരള്‍ച്ചയുള്ള മറ്റു സംസ്ഥാനങ്ങളില്‍പോലും നൂറ്റാണ്ടുകളായി ജനങ്ങള്‍ ജീവിച്ചുപോരുന്നതിനു കാരണം ജലസ്രോതസ്സുകളെ സംരക്ഷിക്കുന്നതില്‍ ഭരണാധികാരികളും ജനങ്ങളും കാണിച്ചിരുന്ന ശ്രദ്ധയാണ്. വെള്ളത്തെ ജീവന്റെ അടിസ്ഥാനമായാണ് അവര്‍ കണക്കാക്കിയിരുന്നത്. വിഭവമായിട്ടല്ല.
ജലസ്രോതസ്സുകളുടെ വൈവിധ്യത്തെയോ സംസ്കാരങ്ങളുടെ വൈവിധ്യത്തെയോ കണക്കിലെടുക്കാതെയാണ് കഴിഞ്ഞ അരനൂറ്റാണ്ടിലെ ജലവിഭവവികസനം നമ്മുടെ നാട്ടില്‍ വന്നത്. പുഴകളെ ആശ്രയിച്ച് കഴിയുന്നവര്‍ക്ക് കിണര്‍ കുത്തിക്കൊടുക്കല്‍, കിണറുകളെ ആശ്രയിച്ചിരുന്നവര്‍ക്ക് പൈപ്പിലൂടെ വെള്ളമെത്തിക്കല്‍ ഇങ്ങനെ പലതും.പലപ്പോഴും ആവശ്യമുള്ളിടത്തുപോലുമല്ല ഇവ നടപ്പാക്കിയത്. കിണറ്റിലെ വെള്ളവും പൈപ്പുവെള്ളവും എടുക്കാന്‍ മടിച്ചുനിന്ന സമൂഹങ്ങളെ വിദ്യാഭ്യാസത്തിലൂടെ ‘നല്ലവെള്ളം’ കുടിക്കാന്‍ പഠിപ്പിക്കുകയായിരുന്നു കഴിഞ്ഞ നാലോ അഞ്ചോ ദശകങ്ങളായി ഇവിടെ ചെയ്തുകൊണ്ടിരിക്കുന്നത്. ഫലമോ? പാരമ്പര്യ ജലസ്രോതസ്സുകളെ സംരക്ഷിക്കുന്നതില്‍നിന്ന് സര്‍ക്കാരും ജനങ്ങളും ഒരുപോലെ പുറകോട്ടുപോയി.
ഇതോടൊപ്പംതന്നെയുണ്ടായ വ്യാവസായിക_കാര്‍ഷിക_സാമ്പത്തിക വികസനപദ്ധതികള്‍ പരമ്പരാഗത ജലസ്രോതസ്സുകളെ കുറേക്കൂടി നാശത്തിലേക്കെത്തിക്കുകയും ‘നല്ലവെള്ളം’ എന്നത് പല സമൂഹങ്ങള്‍ക്കും പൈപ്പിലൂടെ എപ്പോഴെങ്കിലും എത്തുന്ന ഒരു അപൂര്‍വ വസ്തുവായി മാറുകയും ചെയ്തു. ഇതിനിടെ ഇവിടെ വളര്‍ന്നുവന്ന ഉപഭോഗസംസ്കാരവും ആരോഗ്യത്തകരാറുകളും കുപ്പിവെള്ളക്കച്ചവടത്തിനുള്ള അടിത്തറ ഉറപ്പിച്ചു.
ലോകത്ത് മറ്റൊരിടത്തുമില്ലാത്ത ഒരു പ്രത്യേകത കേരളത്തിലുണ്ട്. വെള്ളം തിളപ്പിച്ചു കുടിക്കുക എന്നതാണത്. വയറ്റിളക്കം, കോളറപോലുള്ള രോഗങ്ങള്‍ മഴക്കാലത്തുപോലും ഇവിടെ പടര്‍ന്നു പിടിക്കാത്തതിനു കാരണം ഈ ശീലംകൊണ്ടാണെന്ന് പല ആരോഗ്യവിദദ്ധരും പറയാറുണ്ട്. ഇതിനും പുറമെ കുടിവെള്ളം നല്‍കാനുള്ള സാമൂഹികക്രമീകരണങ്ങള്‍ ചെയ്യുന്നതില്‍ ഇവിടത്തെ മുന്‍ ഭരണാധികാരികളും കുടുംബങ്ങള്‍തന്നെയും ജാഗരൂകരായിരുന്നു. അവര്‍ വെള്ളം മാത്രമല്ല നല്‍കിയിരുന്നത്, സംഭാരവും കഞ്ഞിവെള്ളവുംകൂടിയായിരുന്നു. തളര്‍ന്നുവരുന്ന സഞ്ചാരികള്‍ക്ക് ഇതായിരുന്നു കുളിരേകിയിരുന്നത്. വികസനത്തിന്റെ പാച്ചിലില്‍ ഇത്തരം സാമൂഹികക്രമീകരണങ്ങളാണ് അന്യംനിന്നുപോയത്.
ഇന്ന് കുപ്പിവെള്ളം വാങ്ങിച്ചുകുടിക്കുന്ന യാത്രക്കാരും മറ്റു ജനങ്ങളും കരുതുന്നത് പൈപ്പിലൂടെ കിട്ടുന്ന ജലത്തെക്കാള്‍ ഇതു നല്ലതാണെന്നാണ്. എന്നാല്‍ വാസ്തവം മറിച്ചാണെന്ന് ലേഖനത്തില്‍ പറയുന്നു. പല സ്ഥലത്തും ടാപ്പില്‍നിന്നുതന്നെയുള്ള വെള്ളമാണ് കുപ്പികളിലാക്കി കൊടുക്കുന്നതെന്നും പറയുന്നു. അങ്ങനെയെങ്കില്‍ പൊതുടാപ്പുകളുടെ എണ്ണം കൂട്ടി നല്ലവെള്ളം കിട്ടാനുള്ള സംവിധാനങ്ങള്‍ നടപ്പിലാക്കുകയല്ലേ സര്‍ക്കാര്‍ ചെയ്യേണ്ടത്? റെയില്‍വേസ്റ്റേഷനുകളിലും പൊതുനിരത്തിലുമെല്ലാം അടുത്തൊരു കാലംവരെയും എല്ലാ ജനങ്ങളും പൊതുടാപ്പില്‍ നിന്നാണല്ലോ വെള്ളമെടുത്തിരുന്നത്. ഇപ്പോഴും ഭൂരിപക്ഷം ആളുകളും പൊതുജലസ്രോതസ്സുകളെയും ടാപ്പുകളെയും ആശ്രയിച്ചുതന്നെയാണ് കഴിയുന്നത്. അല്ലാതെ കുപ്പിവെള്ളത്തെയല്ല. അവരാരും അണുബാധകൊണ്ടോ മറ്റു കാരണങ്ങള്‍കൊണ്ടോ മരിച്ചുപോകുന്നുമില്ല.
എന്നാല്‍ കമ്പനികള്‍ നടത്തുന്ന പ്രചാരണങ്ങളില്‍ കുടുങ്ങി സാമാന്യജനങ്ങള്‍ വലിയ പണംമുടക്കി കുപ്പിവെള്ളത്തിന് അടിമകളായിക്കൊണ്ടിരിക്കുകയാണ്. 70_കളിലും 80_കളിലും തമിഴ്നാട്ടില്‍ ഒരു കുടം വെള്ളം ഒരു രൂപ കൊടുത്തു വാങ്ങുന്നുവെന്നു കേള്‍ക്കുമ്പോള്‍ മലയാളിക്ക് തമിഴനോട് പുച്ഛമായിരുന്നു. എന്നാലിന്ന് ഒരു ലിറ്റര്‍ വെള്ളം പത്തും പന്ത്രണ്ടും രൂപ കൊടുത്ത് വാങ്ങുമ്പോള്‍ ഒരു പരിഭവവുമില്ല. കുപ്പിവെള്ളം വേണ്ട എന്ന് ആത്മാഭിമാനമുള്ള ഒരാളും സര്‍ക്കാറിനോട് പറയുന്നില്ല. ജനങ്ങള്‍ക്ക് ശുദ്ധജലമെത്തിക്കലാണ് പ്രഥമ കര്‍ത്തവ്യമെന്ന് സര്‍ക്കാറുകളും മറന്നുപോകുന്നു.
ഇതിനിടയില്‍ പൂരിപ്പിക്കേണ്ട മറ്റൊരു സംഗതി കൂടിയുണ്ട്. വെള്ളം മനുഷ്യന്റെ അവകാശമാണെന്നു പറയുന്നതുപോലെ മറ്റ് പല മിണ്ടാപ്രാണികളുടെയും കൂടി അവകാശമാണ് എന്നതാണത്.
ഇതിനും പുറമെയാണ് പെറ്റ്ബോട്ടിലുകള്‍ സൃഷ്ടിക്കുന്ന മലിനീകരണം. കോര്‍പ്പറേറ്റുകളെ ചട്ടം പഠിപ്പിക്കാന്‍ ഇതുവരെയും ഒരു സര്‍ക്കാറിനും ഇവിടെ കഴിഞ്ഞിട്ടില്ല. നമ്മുടെ അമൂല്യമായ ജലസ്രോതസ്സുകളെ മലിനീകരിച്ചുകൊണ്ട് അവര്‍ കീശ വീര്‍പ്പിച്ചു കൊണ്ടിരിക്കുന്നത് അതുകൊണ്ടാണ്.
കുറച്ചുനാള്‍ മുമ്പുവരെ ശുദ്ധജലമെന്നാല്‍ ക്ലോറിനേറ്റ് ചെയ്ത വെള്ളം എന്നായിരുന്നെങ്കില്‍ ഇന്നത് കുപ്പിവെള്ളമെന്നായിരിക്കുന്നു. തുടര്‍ച്ചയായി പറഞ്ഞു പറഞ്ഞ് കള്ളത്തെ സത്യമാക്കാനുള്ള വിദ്യയില്‍ വിദദ്ധരാണ് കമ്പനികള്‍. കേരളീയര്‍ക്ക് ഹൃദ്രോഗമുണ്ടാകുന്നത് വെളിച്ചെണ്ണ കഴിക്കുന്നതു കൊണ്ടാണെന്ന് നമ്മെ പറഞ്ഞു വിശ്വസിപ്പിക്കാന്‍ അവര്‍ക്ക് കഴിഞ്ഞുവല്ലോ. അതുപോലെയാണ് കുപ്പിവെള്ളത്തെ കുറിച്ചുള്ള മിഥ്യാധാരണ ഇവിടെ പടര്‍ന്നു കൊണ്ടിരിക്കുന്നത്. അങ്ങേയറ്റം ഖേദകരമാണിത്. സര്‍ക്കാറിന്റെയും പൊതുതാത്പര്യ സംഘടനകളുടെയും വിദ്യാഭ്യാസസ്ഥാപനങ്ങളുടെയും വിദദ്ധരുടെയും ഭാഗത്തുനിന്ന് ഇതിനൊരു മറുപടി ഉയര്‍ന്നുവരേണ്ടതുണ്ട്. പുതിയൊരു ജലസംസ്കാരം വളര്‍ത്തിക്കൊണ്ടുവരേണ്ടത് ഇവിടെ അത്യാവശ്യമായിരിക്കുന്നു. പൊതുപൈതൃകമായ ജലത്തെ കച്ചവടവസ്തുവാക്കുന്നതിനെതിരെ നിയമനടപടികളും ഉണ്ടാകേണ്ടതുണ്ട്.

(തിരുവനന്തപുരത്തുള്ള ‘തണല്‍’ എന്ന
പരിസ്ഥിതി സംഘടനയുടെ പ്രോഗ്രാം
ഡയറക്ടറാണ് ഉഷ.)

12-11-07
കേരളവും കുപ്പിവെള്ളത്തിലേക്ക് കൂപ്പുകുത്തുകയാണോ?

എം. സുചിത്ര

ശുദ്ധമായ കുടിവെള്ളം മനുഷ്യാവകാശമായി പ്രഖ്യാപിക്കണമെന്ന അതിപ്രധാനമായ ആവശ്യത്തില്‍പ്പോലും അഭിപ്രായ സമന്വയം ഉണ്ടാക്കാനാവാതെയാണ് കഴിഞ്ഞ വര്‍ഷം മാര്‍ച്ചില്‍ മെക്സിക്കോസിറ്റിയില്‍ ചേര്‍ന്ന വേള്‍ഡ് വാട്ടര്‍ ഫോറം പിരിഞ്ഞത്. കുപ്പിവെള്ള വിപണിയിലെ കുത്തകക്കമ്പനികളിലൊന്നായ കൊക്കകോള സ്പോണ്‍സര്‍ ചെയ്ത ഈ സമ്മേളനത്തില്‍ 120 രാഷ്ട്രങ്ങളിലെ പ്രതിനിധികളും ഐക്യരാഷ്ട്രസഭ, ലോകബാങ്ക്, ഐ.എം.എഫ്. തുടങ്ങിയവയുടെ പ്രതിനിധികളും പങ്കെടുത്തിരുന്നു. കുടിവെള്ള വിതരണ മേഖല കൂടുതല്‍ സ്വകാര്യവത്കരിക്കാനാവശ്യമായ നയങ്ങള്‍ ആവിഷ്കരിക്കേണ്ടതിന്റെ ആവശ്യകതയിലാണ് പ്രസ്തുത സമ്മേളനം ഊന്നല്‍ നല്കിയത്.

കുടിവെള്ളവിതരണരംഗത്ത് കാലുറപ്പിക്കാന്‍ കൊക്കകോളയെപ്പോലുള്ള വന്‍കിട കമ്പനികളെ സഹായിക്കുന്ന വിധത്തിലുള്ള നയങ്ങളാണ് കഴിഞ്ഞ ഒന്നര ദശകമായി നമ്മുടെ രാജ്യം കൈക്കൊണ്ടുവരുന്നത്. കേന്ദ്രസര്‍ക്കാറിന്റെ സാമ്പത്തിക ഉദാരവത്കരണ നയങ്ങളും സ്വകാര്യവത്കരണനയങ്ങളും സംസ്ഥാന സര്‍ക്കാറുകളുടെ വ്യാവസായികവളര്‍ച്ചയിലും സ്വകാര്യ നിക്ഷേപങ്ങളിലും അധിഷ്ഠിതമായ വികസന നയങ്ങളുമാണ് കുപ്പിവെള്ളവ്യവസായത്തെ ഇത്രയധികം വളര്‍ത്തിയത്. 1991 വരെ ഇന്ത്യയിലെ കുപ്പിവെള്ളവിപണി ഏറെക്കുറെ നിശ്ചലമായിരുന്നു. സാമ്പത്തിക ഉദാരവത്കരണം ആരംഭിച്ചതോടെയാണ് വിപണി സജീവമായത്. 1991ല്‍ 20 ലക്ഷം കുപ്പിവെള്ള കെയ്സുകളാണ് ഇന്ത്യന്‍ വിപണിയില്‍ വിറ്റുപോയതെങ്കില്‍ കഴിഞ്ഞവര്‍ഷം 680 ലക്ഷം കെയ്സുകളാണ് വിറ്റഴിഞ്ഞത്. ആയിരത്തിലധികം കുപ്പിവെള്ള നിര്‍മാതാക്കളും ഇരുനൂറിലധികം ബ്രാന്‍ഡുകളുമായി ഇന്ത്യയില്‍ കുപ്പിവെള്ള ബിസിനസ്സ് പൊടിപൊടിക്കുകയാണ്. നിര്‍മാതാക്കളില്‍ 80 ശതമാനവും പ്രാദേശികനിര്‍മാതാക്കളാണെങ്കിലും ബിസ്ലേരിയും കിന്‍ലെയും അക്വാഫിനയും തന്നെയാണ് രംഗം അടക്കിവാഴുന്നത്. 1999 മുതല്‍ 2004 വരെയുള്ള അഞ്ചുവര്‍ഷത്തിനിടയില്‍ കുപ്പിവെള്ളവ്യവസായത്തില്‍ ആഗോളതലത്തില്‍ത്തന്നെ ഏറ്റവുമധികം വളര്‍ച്ച നേടിയത് ഇന്ത്യയാണ് _ 25 ശതമാനം. അമേരിക്കന്‍ കുപ്പിവെള്ളവിപണി പോലും വെറും 8.2 ശതമാനം വളര്‍ച്ചയാണ് രേഖപ്പെടുത്തിയത്.

പ്രാദേശികജനതയുടെ കുടിവെള്ളം മുട്ടിക്കുകയും ഗുരുതരമായ പരിസ്ഥിതി പ്രശ്നങ്ങള്‍ക്ക് ഇടവരുത്തുകയും ചെയ്യുന്ന കുപ്പിവെള്ളവ്യവസായം കേരളത്തിലും വളരുകയാണ്. എറണാകുളം ജില്ലയില്‍ കഴിഞ്ഞ വര്‍ഷത്തെയപേക്ഷിച്ച് ഈ വര്‍ഷം പാക്കേജ്ഡ് വാട്ടര്‍ വില്പന 30 ശതമാനം വര്‍ധിച്ചിട്ടുണ്ട്. ലൈസന്‍സുള്ള മുപ്പതോളം കമ്പനികളും ലൈസന്‍സില്ലാത്ത നിരവധി കമ്പനികളും ഈ രംഗത്തു പ്രവര്‍ത്തിക്കുന്നുണ്ട്. ഫ്ലാറ്റുകളിലും വീടുകളിലും ഓഫീസുകളിലും ആസ്പത്രികളിലും ഐ.ടി. കമ്പനികളിലുമൊക്കെ കുപ്പിവെള്ളം വന്‍തോതില്‍ വിതരണം ചെയ്യപ്പെടുന്നുണ്ട്.

കേരള വാട്ടര്‍ അതോറിറ്റിപോലും ഈ ദിശയില്‍ ചിന്തിച്ചുതുടങ്ങിയിരിക്കുന്നു. ലാഭമെടുക്കാതെയുള്ള കുപ്പിവെള്ള വിതരണം ഗൌരവമായി പരിഗണിക്കുന്നുവെന്ന് ആറുമാസം മുമ്പ് അതോറിറ്റി ഒരു പ്രഖ്യാപനം നടത്തുകയുണ്ടായി. സ്വാഭാവികമായും എതിര്‍പ്പുകള്‍ ഉയര്‍ന്നു. പിന്നീട് അതേപ്പറ്റി കേട്ടിട്ടില്ല. ഒരുപക്ഷേ, വാട്ടര്‍ അതോറിറ്റി ഇങ്ങനെയൊരു സാഹസത്തിന് രഹസ്യമായി തയ്യാറെടുക്കുന്നുണ്ടാകാം.

ഏതായാലും ഒരു കാര്യം വ്യക്തമാണ്: മിനറല്‍ വാട്ടര്‍ എന്ന പേരില്‍ കുപ്പികളിലും ക്യാനുകളിലും ലഭിക്കുന്ന വെള്ളം ശുദ്ധമാണെന്ന മിഥ്യാധാരണ നമുക്കിടയിലും പടര്‍ന്നു തുടങ്ങിയിരിക്കുന്നു. സ്റ്റാറ്റസ് സിംബലായി കുപ്പിവെള്ളം മാറിക്കൊണ്ടിരിക്കുകയാണ്. റെയില്‍വേ സ്റ്റേഷനുകളില്‍ ‘കുടിവെള്ളം’ എന്നെഴുതിയ ടാപ്പിനു സമീപം അധികമാരെയും കാണാറില്ല. പത്തു രൂപ കൊടുത്ത് കുപ്പിവെള്ളം വാങ്ങിയാല്‍ മതിയല്ലോ എന്നതാണ് ചിന്ത.

കുടിവെള്ളത്തോടുള്ള ജനങ്ങളുടെ മനോഭാവം മാറ്റാനുള്ള സംഘടിത ശ്രമങ്ങളാണ് ഇവിടെ എക്കാലത്തും നടന്നുകൊണ്ടിരിക്കുന്നത്. കിണര്‍ വെള്ളം കുടിയോഗ്യമല്ല, പൈപ്പുവെള്ളമാണ് ശുദ്ധജലം എന്ന ധാരണ സൃഷ്ടിച്ച് ജനങ്ങളുടെ സമീപനത്തില്‍ ആദ്യം മാറ്റം വരുത്തിയത് പൈപ്പുവെള്ള ലോബിയാണ്. കിണറുകളും കുളങ്ങളും മണ്ണിട്ടുമൂടി. കോര്‍പ്പറേഷനുകളും മുനിസിപ്പാലിറ്റികളും പഞ്ചായത്തുകളും പൈപ്പുവെള്ള പദ്ധതികള്‍ ആവിഷ്കരിച്ചുതുടങ്ങി. പിന്നീട് വാട്ടര്‍ അതോറിറ്റി രൂപവത്കരിക്കപ്പെട്ടപ്പോഴും ഇതേ രീതികള്‍തന്നെ തുടര്‍ന്നു. കേന്ദ്രീകൃത ജലസംഭരണത്തിലൂടെയും ശുദ്ധീകരണത്തിലൂടെയും പൈപ്പുവഴിയുള്ള വിതരണത്തിലൂടെയും മാത്രമേ ജനങ്ങള്‍ക്ക് ശുദ്ധജലമെത്തിക്കാന്‍ കഴിയൂ എന്നതായിരുന്നു അതോറിറ്റിയുടെ നിലപാട്. പരമ്പരാഗത ജലസ്രോതസ്സുകള്‍ തീര്‍ത്തും അവഗണിക്കപ്പെട്ടു. ടാങ്കറുകളില്‍ എപ്പോഴെങ്കിലും വന്നെത്തുന്ന കുടിവെള്ളത്തിനു കാത്തുനില്‍ക്കേണ്ട ഗതികേടിലായി ഒടുവില്‍ ജനങ്ങള്‍.

അങ്ങേയറ്റം അപകടകരമായ സ്ഥിതിവിശേഷത്തിലാണ് കുപ്പിവെള്ളത്തോട് വളര്‍ന്നുവരുന്ന ആഭിമുഖ്യം ജനങ്ങളെ കൊണ്ടുചെന്നെത്തിക്കുക. നൂറുകോടി ജനങ്ങളും അതിരൂക്ഷമായ ജലക്ഷാമവും നേരിടുന്ന ഒരു രാജ്യത്ത് കുപ്പിവെള്ള ബിസിനസ്സിന്റെ അടിത്തറ വളരെ ഭദ്രമാണെന്ന് അതിന്റെ നിര്‍മാതാക്കള്‍ക്കറിയാം. സമ്പന്നര്‍ കുപ്പിയിലായിക്കഴിഞ്ഞ സ്ഥിതിക്ക് ഇനി ഇടത്തരക്കാരിലേക്കു വിപണി വളര്‍ത്തുക എന്നതാണ് വന്‍കമ്പനികളുടെ അടുത്ത ലക്ഷ്യം. ഇതുകൊണ്ടുണ്ടാകുന്ന സാമ്പത്തിക ബാധ്യത താങ്ങാന്‍ ഇടത്തരക്കാര്‍ക്കു കഴിയുമോ? അഞ്ചുപേരുള്ള ഒരു വീട്ടില്‍ കുടിക്കാന്‍ മാത്രം 10 ലിറ്റര്‍ വെള്ളമെങ്കിലും വേണ്ടിവരില്ലേ ഒരു ദിവസം? ലിറ്ററൊന്നിന് പത്തുരൂപ വെച്ചു കണക്കാക്കിയാല്‍ ദിവസം 100 രൂപ ചെലവ്. അതായത് ഓരോ മാസവും ഏറ്റവും കുറഞ്ഞത് 3000 രൂപയെങ്കിലും കുടിവെള്ളത്തിന്റെ പേരില്‍ ചെലവാക്കണം. ഇന്നത്തെ സ്ഥിതിയില്‍ ഒരു സാധാരണ കുടുംബത്തിന് ഇതു കഴിയുമോ?

യഥാര്‍ഥത്തില്‍, കുപ്പിവെള്ളത്തിനു നാം നല്കേണ്ടിവരുന്ന വില കനത്തതാണ്. കുപ്പിവെള്ളവ്യവസായമായാലും സോഫ്റ്റ്ഡ്രിങ്ക് വ്യവസായമായാലും ഭൂഗര്‍ഭജലം ഊറ്റിക്കൊണ്ടാണ് നിര്‍മാണം നടക്കുന്നത്. നിര്‍മാതാക്കളെ സംബന്ധിച്ചിടത്തോളം ഏറെക്കുറെ സൌജന്യമായി ലഭിക്കുന്ന അസംസ്കൃതവസ്തു മാത്രമാണ് ഗ്രൌണ്ട് വാട്ടര്‍. അത് പരമാവധി ഊറ്റാനും കൂടുതല്‍ ലാഭമുണ്ടാക്കാനും നിര്‍മാതാക്കള്‍ ശ്രമിക്കുകതന്നെ ചെയ്യും. പക്ഷേ, അതിവേഗം താഴ്ന്നുകൊണ്ടിരിക്കുന്ന ഭൂഗര്‍ഭജലവിതാനത്തിന്റെ യഥാര്‍ഥ വിലയെന്താണ്? അതുപോലെ, പ്ലാസ്റ്റിക് ബോട്ടിലുകളും ബാഗുകളുമുണ്ടാക്കുന്ന പരിസ്ഥിതിപ്രശ്നങ്ങള്‍. ഇവ സംസ്കരിക്കാന്‍ വേണ്ട കാര്യക്ഷമമായ എന്തു സംവിധാനമാണ് നമുക്കുള്ളത്?

യഥാര്‍ഥത്തില്‍ വാട്ടര്‍ അതോറിറ്റിയുടെ കെടുകാര്യസ്ഥതതന്നെയാണ് സംസ്ഥാനത്ത് കുപ്പിവെള്ളബിസിനസ് തഴച്ചുവളരുന്നതിന്റെ പ്രധാനകാരണങ്ങളിലൊന്ന്. അന്‍പതു ലക്ഷത്തിലേറെ കിണറുകളും (ലോകത്തില്‍ കിണറുകളുടെ സാന്ദ്രത ഏറ്റവും കൂടുതലുള്ള പ്രദേശമാണ് കേരളം) ഒരു ലക്ഷത്തിലധികം കുളങ്ങളും മൂവായിരത്തോളം അരുവികളും ചെറുതെങ്കിലും 44 നദികളുമുള്ള, ആറുമാസം മഴയുമുള്ള ഒരു സംസ്ഥാനത്ത് കുടിവെള്ളക്ഷാമം എങ്ങനെയുണ്ടാകുന്നു? എന്തുകൊണ്ടാണ് നമ്മുടെ ജലസ്രോതസ്സുകള്‍ മലിനമാകുന്നത്? മലിനമാകുന്ന ജലസ്രോതസ്സുകളെ എങ്ങനെയാണ് രക്ഷിക്കേണ്ടത്? മുനിസിപ്പല്‍മാലിന്യവും ആസ്പത്രിമാലിന്യവും വ്യാവസായികമാലിന്യവുമൊക്കെ കാര്യക്ഷമമായി കൈകാര്യം ചെയ്യേണ്ടതെങ്ങനെയാണ്? നമ്മുടെ ജൈവവൈവിധ്യവും പ്രകൃതിവിഭവങ്ങളും നശിച്ചുപോകുന്നത് എന്തുകൊണ്ടാണ്? അടിസ്ഥാനപരമായ ഇത്തരം ചോദ്യങ്ങള്‍ക്ക് ഉത്തരം കണ്ടെത്താന്‍ കഴിയുകയും പരിഹാരമാര്‍ഗങ്ങള്‍ ഫലപ്രദമായി നടപ്പിലാക്കുകയും ചെയ്താല്‍ നമുക്ക് കുപ്പിവെള്ളം കുടിക്കേണ്ട ഗതിവരില്ല.

(2005ല്‍ അപ്പന്‍മേനോന്‍ പുരസ്കാരം നേടിയ എം. സുചിത്ര കൊച്ചി കേന്ദ്രമായി പ്രവര്‍ത്തിക്കുന്ന ഒരു സ്വതന്ത്ര പത്രപ്രവര്‍ത്തകയാണ്.)

14-11-07
ഇതൊരു കോര്‍പ്പറേറ്റ് കുറ്റകൃത്യം

കെ.പി. സേതുനാഥ്

വെള്ളം വില്ക്കാന്‍ പറ്റിയ ചരക്കാണെന്ന് പതിറ്റാണ്ടുകള്‍ക്കു മുന്‍പുതന്നെ തിരിച്ചറിഞ്ഞിരുന്ന ചില ഭരണാധികാരികളെങ്കിലും കേരളത്തിലുണ്ടായിരുന്നു; കുറഞ്ഞപക്ഷം കോഴിക്കോട്ടെങ്കിലും. ഇത്തരം വികസനദാഹികള്‍ ജീവിച്ചിരുന്നുവെന്നതിന് സഞ്ജയന്‍ സാക്ഷി. മാനാഞ്ചിറയിലെ വെള്ളം മൊത്തമായി ഒരുകമ്പനിക്ക് വില്ക്കാനുള്ള മുനിസിപ്പാലിറ്റിയുടെ തീരുമാനത്തെപ്പറ്റി 1930_കളില്‍ത്തന്നെ അദ്ദേഹം എഴുതിയിട്ടുണ്ട്.
”എനിയും നമ്മുടെ ധനസ്ഥിതി നന്നാക്കുവാന്‍ കൌണ്‍സില്‍ എന്തൊക്കെ ചെയ്യാന്‍ വിചാരിച്ചിട്ടുണ്ടെന്ന് ആരു കണ്ടു! ഒരുപക്ഷേ, മാനാഞ്ചിറത്തോട്ടത്തിലെ മരങ്ങള്‍ ഒരു വിറകുകാരന് അവര്‍ കോണ്‍ട്രാക്ട് കൊടുക്കുവാന്‍ ആലോചിക്കുമായിരിക്കും. നിഴലിനാണ് മരങ്ങള്‍. വൈകുന്നേരമാണ് ആളുകള്‍ തോട്ടത്തില്‍ പോയിരിക്കുക. വൈകുന്നേരത്തെ വെയിലിന് ചൂടില്ല. അതുകൊണ്ട് മരങ്ങള്‍ ആവശ്യമില്ല എന്ന് അവര്‍ കണ്ടുപിടിക്കുമായിരിക്കും. മാനാഞ്ചിറ വെള്ളത്തിനെപ്പറ്റി ഇത്ര കൃത്യമായി കണക്കുകൂട്ടി, പെരുക്കിഹരിച്ച് മാസത്തില്‍ 65 ക.യും രണ്ടുലക്ഷത്തി പതിനായിരം ഗാലന്‍ വെള്ളവും മുനിസിപ്പാലിറ്റിക്ക് ആദായമുണ്ടാകുമെന്ന് കാണിച്ചുകൊടുത്ത അഗാധബുദ്ധികള്‍ക്ക് ഇതൊന്നും സാധിക്കാത്ത കാര്യമല്ല. ഒരുസമയം, വേണ്ടിവന്നാല്‍ അവര്‍ കോഴിക്കോട്ട് ബീച്ചിലെ കടല്‍ക്കാറ്റുകൂടി വിറ്റുമാറുകയില്ലെന്ന് ആര്‍ക്ക് പറയുവാന്‍ കഴിയും?”
സഞ്ജയന്റെ സ്വതഃസിദ്ധമായ കറുത്ത പരിഹാസത്തിന് പുറമേ, വെള്ളം വില്ക്കാന്‍ പറ്റിയ ചരക്കാണെന്ന് കണ്ടെത്തിയതിലുള്ള ആശ്ചര്യവും ഈ വരികളില്‍ അടങ്ങിയിട്ടുണ്ട്. സഞ്ജയന്‍ ഇതെഴുതിയിട്ട് 73 കൊല്ലം കഴിഞ്ഞു. പക്ഷേ, ഈ വെള്ളം വില്ക്കുകയെന്ന് കേള്‍ക്കുമ്പോള്‍ നമുക്ക് ആശ്ചര്യം ഒട്ടും തോന്നുന്നില്ല. കാരണം വെള്ളം വില്ക്കലും വാങ്ങലും നമ്മുടെ നിത്യ ജീവിതത്തില്‍ അത്ര സാധാരണമായിരിക്കുന്നു.
ഭൂമിയിലെ മുഴുവന്‍ വിഭവസ്രോതസ്സുകളുടെയും മേല്‍ ആധിപത്യം പുലര്‍ത്തുകയെന്നത് മൂലധനവ്യവസ്ഥയുടെ സഹജഭാവമാണ്. നിരന്തരമായ നിക്ഷേപങ്ങളും പുനര്‍ നിക്ഷേപങ്ങളും വഴി പരമാവധി ലാഭം ആര്‍ജിക്കുകയെന്നതാണ് അതിന്റെ ധര്‍മരീതി. ജീവന്റെ നിലനില്പിന് ആധാരമായ വെള്ളം എല്ലാ ജീവജാലങ്ങളുടെയും അവകാശമെന്നതിനു നേര്‍ വിപരീതമാണ് ഈ ധര്‍മനീതി. കഴിഞ്ഞ നൂറ്റാണ്ടിന്റെ അവസാന ദശകത്തിലാണ് ഇത്രയും പരുഷവും സുതാര്യവുമായ നിലയില്‍ മൂലധനവ്യവസ്ഥയുടെ നീതിശാസ്ത്രം മറനീക്കിവന്നത്. വികസനത്തിന്റെയും കാര്യക്ഷമതയുടെയും സമൃദ്ധിയുടെയും ജനാധിപത്യത്തിന്റെയുമൊക്കെ ഭാഷയിലാണ് ഈ ധര്‍മനീതി പ്രത്യക്ഷപ്പെടുന്നത്. വെള്ളത്തിന്റെ കാര്യത്തിലും ഇതുതന്നെയാണ് സംഭവിക്കുന്നത്. ജീവന്റെ നിലനില്പിന് അത്യന്താപേക്ഷിതമായ ഒരുവസ്തുവിന്റെ ദുര്‍വ്യയത്തെക്കുറിച്ചുള്ള ഉത്കണ്ഠകള്‍ നിറഞ്ഞ പണ്ഡിതോചിതമായ വാദങ്ങള്‍ രൂപമെടുത്ത കാലത്തുതന്നെയാണ് സ്വകാര്യവത്കരണത്തിന്റെ ഗതിവേഗം വര്‍ധിച്ചതെന്ന കാര്യം തികച്ചും യാദൃച്ഛികമാകാനിടയില്ല. ഇതേകാലത്തുതന്നെയാണ് ജലസ്രോതസ്സുകള്‍ നേരിടുന്ന ഭയാനകമായ മലിനീകരണത്തെക്കുറിച്ചുള്ള പഠനങ്ങളും പുറത്തുവരുന്നത്. വെള്ളത്തിന്റെ ദൌര്‍ലഭ്യവും മലിനീകരണവും ഗൌരവമായ വിഷയങ്ങള്‍ എന്നല്ല, തീര്‍ച്ചയായും അവ ഗൌരവമായ പരിഗണന അര്‍ഹിക്കുന്നു. എന്നാല്‍ ഏതു ദുരന്തത്തെയും ലാഭമാക്കി മാറ്റുന്നതിനുള്ള മൂലധന വ്യവസ്ഥയുടെ അനിതരസാധാരണമായ കഴിവിനെ അവഗണിക്കാനാവില്ല. വെള്ളത്തിന്റെ സ്രോതസ്സുകള്‍ സ്വകാര്യവത്കരിക്കുന്നതിന്റെ ആശയം പലപ്പോഴും പുറത്തുവരുന്നത് ജലമലിനീകരണത്തെയും ജലക്ഷാമത്തെയും കുറിച്ചുള്ള അതിഭാവുകത്വം നിറഞ്ഞ കഥനങ്ങളിലൂടെയാണ്.
സമാധാനത്തിനും സ്വാതന്ത്ര്യത്തിനും വേണ്ടി പ്രവര്‍ത്തിക്കുന്ന ണ്ൌവൃ’ീ കൃറവിൃമറഹ്ൃമാ ഘവമഷുവ എന്ന കൂട്ടരുടെ 2004_ല്‍ ലഭ്യമാക്കിയ കണക്കനുസരിച്ച് വെള്ളം കിട്ടാതെ പ്രതിദിനം 630 പേര്‍ ലോകത്ത് മരണമടയുന്നുണ്ട്. കാര്യക്ഷമതയുടെ പേരില്‍ സ്വകാര്യവത്കരണം വന്നതോടെ സ്ഥിതി കൂടുതല്‍ വഷളായിട്ടുണ്ട്. വെള്ളത്തിനുമേലുള്ള അവകാശം, മനുഷ്യര്‍ക്ക് മാത്രമല്ല മറ്റു ജീവജാലങ്ങള്‍ക്കുമുണ്ടെന്ന വസ്തുത ഊട്ടിയുറപ്പിക്കുന്ന രാഷ്ട്രീയബോധത്തിലൂടെ മാത്രമേ ഇന്നത്തെ സ്ഥിതി മറികടക്കാന്‍ കഴിയുകയുള്ളൂ. കേരളത്തിലെ ജലസ്രോതസ്സുകള്‍ മുഴുവന്‍ മലിനമാണെന്ന് കൊട്ടിഗ്ഘോഷിക്കുന്നവര്‍ അതിലേക്ക് നയിച്ച അധികാര സംവിധാനത്തെപ്പറ്റി പുലര്‍ത്തുന്ന മൌനം ശ്രദ്ധേയമാണ്. ആഗോളതലത്തില്‍ത്തന്നെ പിന്തുടരുന്ന ഒരു ആശയ പ്രചാരണരീതിയുടെ ഭാഗമായിത്തന്നെ ഇതിനെ കാണേണ്ടതുണ്ട്.
വെള്ളത്തിന്റെ സ്വകാര്യവത്കരണത്തെ പ്രോത്സാഹിപ്പിക്കുന്നതിനുവേണ്ടി ആഫ്രിക്കന്‍ രാജ്യങ്ങളില്‍ മാത്രം 450 ദശലക്ഷം ഡോളര്‍ വരുന്ന പ്രചാരണ പരിപാടികളാണിപ്പോള്‍ അരങ്ങേറുന്നത്. താന്‍സാനിയയില്‍ കിഷ്വാലി ഭാഷയില്‍ ഒരു പോപ്പുഗാനംതന്നെ ഇതിന്റെ ഭാഗമായി പ്രചരിക്കപ്പെടുന്നു. സ്വകാര്യവത്കരണം മഴ പെയ്യിക്കുന്നുവെന്നാണ് ഈ പാട്ടിലെ പ്രമേയം. ”ചെറു ചെടികള്‍ക്ക് മഴവേണം, വ്യവസായങ്ങള്‍ക്ക് നിക്ഷേപം വേണം, പരമ്പരാഗത വ്യവസായങ്ങള്‍ വരണ്ടുപോയ വിളകള്‍പോലെയാണ്. സ്വകാര്യവത്കരണം മഴ പെയ്യിക്കുന്നു”_ഇങ്ങനെ പോകുന്നു പാട്ടിലെ ഈരടികള്‍. ലണ്ടന്‍ ആസ്ഥാനമായുള്ള ആദംസ്മിത്ത് ഇന്‍സ്റ്റിറ്റ്യൂട്ടാണ് ഈ പ്രചാരണങ്ങള്‍ക്ക് ചുക്കാന്‍ പിടിക്കുന്നത്. ബ്രിട്ടന്റെ അന്താരാഷ്ട്ര സാമ്പത്തികസഹായ ഏജന്‍സിയായ ഡിപ്പാര്‍ട്ട്മെന്റ് ഫോര്‍ ഇന്റര്‍നാഷണല്‍ ഡെവലപ്മെന്റിന്റെ (ഡി.എഫ്.ഐ.ഡി.) സഹായത്തോടെയാണ് സ്വകാര്യവത്കരണത്തിന് അനുകൂലമായ പ്രചാരണങ്ങള്‍ അരങ്ങേറുന്നത്. സ്വകാര്യവത്കരണത്തെ എതിര്‍ക്കുന്നതാണ് എല്ലാവര്‍ക്കും ശുദ്ധജലം ലഭ്യമാക്കുന്നതിനുള്ള പ്രയത്നനത്തിന്റെ ആദ്യപടിയെന്നാണ് ആഫ്രിക്കയില്‍ ഈ രംഗത്ത് പ്രവര്‍ത്തിക്കുന്ന വിര്‍ജീനിയ സെറ്റ്ഷെഡിയുടെ വീക്ഷണം. ”എല്ലാ മഹാഭാഗ്യങ്ങളുടെയും പുറകിലൊരു വലിയ കുറ്റകൃത്യമുണ്ടായിരിക്കുമെന്ന” പ്രശസ്ത ഫ്രഞ്ച് സാഹിത്യകാരനായ ബാല്‍സാക്കിന്റെ നിരീക്ഷണത്തെ ഇങ്ങനെ തിരുത്തി വായിക്കുന്ന കാലമാണ്. എല്ലാ രാഷ്ട്രീയ പ്രശ്നങ്ങളുടെയും പുറകിലൊരു കോര്‍പ്പറേറ്റ് കുറ്റകൃത്യമുണ്ടായിരിക്കും. കുടിവെള്ളം കുപ്പിവെള്ളം മാത്രമായി മാറുന്നത് അത്തരമൊരു കോര്‍പ്പറേറ്റ് കുറ്റകൃത്യത്തിന്റെ ഉത്തമ ഉദാഹരണമാണ്.

(ന്യൂസ്വയര്‍ 18ന്റെ കൊച്ചിയിലെ ലേഖകനാണ് കെ.പി. സേതുനാഥ്)

15-11-07
ജലം ജീവരക്തമാണ്; അത് വില്‍ക്കരുത്

സി.ആര്‍. നീലകണ്ഠന്‍

അല്പം പഴകിയതാണെങ്കിലും ഒരു ഉപമ പ്രസക്തമാണെന്നു തോന്നുന്നു. മനുഷ്യശരീരത്തില്‍ രക്തത്തിനുള്ള സ്ഥാനമാണ് ഭൂമിയെന്ന ജൈവശരീരത്തില്‍ വെള്ളത്തിനുമുള്ളത് എന്നതാണത്. ഭൂമിയില്‍ വളരെ ചെറിയ ജീവരൂപത്തിനും നിലനില്‍ക്കാന്‍ ജലം വേണം, ശരീരത്തിലെ ഏതു ചെറിയ ഭാഗത്തിനുമെന്നപോലെ രക്തവും വെള്ളവും അളവില്‍ പരിമിതമാണ്. ഒരു പരിധിക്കപ്പുറം നഷ്ടമായാല്‍ മരണം ഉറപ്പ്. രണ്ടും ചലിച്ചുകൊണ്ടിരുന്നാല്‍ മാത്രമേ ശുദ്ധമായിരിക്കൂ. ശരീരത്തിലെ ഒരവയവത്തിനും രക്തത്തിനുമേല്‍ പ്രത്യേകാവകാശമില്ലെന്നതുപോലെ പ്രകൃതിയിലെ ഒരു ജീവിക്കും വെള്ളത്തിനുമേല്‍ കുത്തകാവകാശമുണ്ടാകരുത്.

ജലത്തെ ഒരു വ്യാപാരച്ചരക്കാക്കുന്നതുതന്നെ പ്രകൃതിവിരുദ്ധവും ഹിംസാത്മകവുമാണ്. എല്ലാ ജീവരൂപങ്ങള്‍ക്കും അനിവാര്യമായ ഒന്ന് പണം നല്‍കിയാല്‍ മാത്രമേ കിട്ടൂവെന്നാകുന്നതിലൂടെ ‘ജീവിക്കാനുള്ള അവകാശം’ നഷ്ടമാകുന്നു. ശുദ്ധജലത്തിന്റെ സ്രോതസ്സ് മഴയാണ്. മഴ ഏതെങ്കിലും കുറച്ച് ജീവരൂപങ്ങള്‍ക്കുവേണ്ടി പെയ്യുന്നതല്ല. എല്ലാവര്‍ക്കുമായാണ്. എന്നാല്‍ ഈ സത്യം ഇന്ന് സമൂഹവും ഭരണകൂടങ്ങളും അംഗീകരിക്കുന്നില്ല. ഈ സമൂഹത്തെയും ഭരണകൂടങ്ങളെയും നിയന്ത്രിക്കുന്നത് മൂലധന കമ്പോളശക്തികളാണെന്നതാണിതിനു കാരണം.

ജലം പോലൊരു വിഭവത്തെ മുതലാളിത്തം ചരക്കുവത്കരിച്ചതിന്റെ ചരിത്രം സൂക്ഷ്മമായി പഠിക്കേണ്ടതുണ്ട്. ഇത് കേവലം കുപ്പിവെള്ളത്തില്‍ ആരംഭിച്ചതല്ല. പ്രകൃതിദത്ത ജലസ്രോതസ്സുകള്‍ക്കുമേല്‍ സാങ്കേതിക വിദ്യപ്രയോഗിച്ച് വന്‍ തോതില്‍ നിയന്ത്രിക്കാന്‍ തുടങ്ങിയതുമുതല്‍ വെള്ളം ‘പൊതുവിഭവം’ അല്ലാതാകുന്നു. അണക്കെട്ടുകളും മറ്റും ഇതിനുദാഹരണമാണ്. ‘ഉതുപ്പാന്റെ കിണര്‍’ എന്ന കാരൂരിന്റെ കഥ നമുക്ക് വീണ്ടും ഓര്‍ക്കാം. പൊതുകിണര്‍ നിര്‍മിക്കാന്‍വേണ്ടി സ്വന്തം ജീവിതം മുഴുവന്‍ ചെലവഴിച്ച തൊഴിലാളിയായ ഉതുപ്പാന്‍ നിയമത്തിന്റെ ശിക്ഷയില്‍ നിന്നു രക്ഷപ്പെടാന്‍ സ്വന്തം ജീവിതമവസാനിപ്പിക്കുന്നു. കിണര്‍ വെള്ളം ശുദ്ധമല്ലെന്നും എല്ലാവരും സ്വന്തം കിണര്‍ മൂടി പൈപ്പ് വെള്ളം ഉപയോഗിക്കണമെന്നുമുള്ള ‘നിയമം’ ഉതുപ്പാനെ തകര്‍ത്തു. കിണറും പുഴയും അരുവിയും ആര്‍ക്കും വെള്ളമെടുക്കാവുന്ന സ്രോതസ്സാണ്. എന്നാല്‍ പൈപ്പിലൂടെ വരുന്ന ജലം കിട്ടാന്‍ നാം പൈപ്പ് കണക്ഷന്‍ എടുക്കണം. അതില്ലാത്തവര്‍ക്ക് വെള്ളമില്ല. പിന്നെയുള്ളത് പൊതു ടാപ്പുകളാണ്. അവയും ഇല്ലാതാകുന്നു. തന്നെയുമല്ല പൈപ്പിലൂടെ ജലം പോകുമ്പോള്‍ അതിനടുത്തുള്ള ഒരു ജീവജാലത്തിനും അതു പ്രാപ്യമാകുന്നില്ല. ഇതിനുമപ്പുറം പ്രകൃതിയുടെ ജലത്തില്‍ മനുഷ്യന്‍ ‘സാങ്കേതിക വിദ്യ’ പ്രയോഗിക്കുന്നതോടെ ജലം ‘വിലയുള്ള’ താകുന്നു. ഇവിടെ ജലം ‘ചരക്ക്’ ആകുന്നു. വില നല്‍കാന്‍ കഴിയാത്ത ചില മനുഷ്യര്‍ക്ക് മാത്രമല്ല, ഒരിക്കലും കഴിയാത്ത എല്ലാ സസ്യജീവരൂപങ്ങള്‍ക്കും വെള്ളം കിട്ടാതാകുന്നു.

കമ്പോളവ്യവസ്ഥയിലെ വിജയത്തിനടിസ്ഥാനം ഉത്പാദനത്തിലും ഉപഭോഗത്തിലുമുള്ള വര്‍ധനയാണ്. ഇതിനുവേണ്ടി സ്രോതസ്സിന്റെയോ പ്രകൃതിയുടെ തന്നെയോ നിലനില്പ് പരിഗണിക്കാതെ കൊള്ള നടത്തുന്നു. ഇന്നത്തെയോ നാളത്തെയോ തലമുറയുടെ നിലനില്പൊന്നും മൂലധനത്തിനു പ്രസക്തമല്ല. അതിവേഗം ചലിക്കാന്‍ കഴിയുന്ന മൂലധനത്തിന്, ഒരിടത്തെ വെള്ളം തീര്‍ന്നാല്‍ മറ്റൊരിടത്തുപോകാം. എന്നാല്‍ ആ നാട്ടില്‍ ജീവിക്കുന്ന മനുഷ്യര്‍ക്കും ജീവജാലങ്ങള്‍ക്കും പിന്നൊരു വഴിയുമില്ല.

കുപ്പിവെള്ളമെന്നത് ജലവ്യാപാര ശൃംഖലയിലെ ഒടുവിലത്തെ കണ്ണിയാണ്. പാരിസ്ഥിതിക പ്രശ്നങ്ങളോടൊപ്പം ഇത് നിരവധി സാമ്പത്തിക സാമൂഹിക സാംസ്കാരിക പ്രശ്നങ്ങളും ഉയര്‍ത്തുന്നുണ്ട്. മത്സരിച്ച് ജലചൂഷണം നടത്തുമ്പോള്‍ സ്രോതസ്സുകള്‍ക്കുണ്ടാകുന്ന നാശങ്ങള്‍ കൂടാതെ വെള്ളം നിറച്ചു വില്‍ക്കുന്ന കുപ്പികള്‍ നിര്‍മിക്കുന്നതിന്റെയും ആ പ്ലാസ്റ്റിക് തിരിച്ച് മണ്ണിലും വെള്ളത്തിലും വ്യാപിക്കുന്നതിന്റെയും പ്രശ്നങ്ങള്‍ ഗുരുതരമാണ്. അമേരിക്കയില്‍ ഒരുവര്‍ഷം ജലം കുപ്പികളില്‍ നിറയ്ക്കുന്നതിനുപയോഗിക്കുന്ന ഇന്ധനം കൊണ്ട് ഒരുവര്‍ഷം ഒരു ലക്ഷം വാഹനങ്ങള്‍ ഓടിക്കാം. ഇത് (ഗാന്ധിജിയുടെ ഭാഷയില്‍ പറഞ്ഞാല്‍) അനാവശ്യ ഉപഭോഗമാണ്, ഹിംസയാണ്. കഴിഞ്ഞവര്‍ഷം അമേരിക്കക്കാര്‍ കുപ്പിവെള്ളത്തിനായി മുടക്കിയത് 1500 കോടി ഡോളറാണ്. സിനിമാടിക്കറ്റിനും സംഗീതം കേള്‍ക്കാനുള്ള ഐപോഡിനുമെല്ലാം മുടക്കിയതിനേക്കാള്‍ വളരെയധികമാണിത്. കുടിവെള്ളത്തിന്റെയും മറ്റു പാനീയങ്ങളുടേയുമായി പ്രതിവര്‍ഷം 3800 കോടി കുപ്പികള്‍ അമേരിക്കയുടെ മണ്ണിലെത്തുന്നു. ഇതിലെ പ്ലാസ്റ്റിക്കിന്റെ വിലമാത്രം 100 കോടി ഡോളറാണ്. ഇതിന്റെ ആറിലൊന്നോളം മാത്രമേ പുനഃചംക്രമണത്തിനുപോകുന്നുള്ളൂവെന്ന് സര്‍ക്കാര്‍ പരിസ്ഥിതി വിഭാഗം തന്നെ പറയുന്നു.

ഇതാണ് വികസിത, പരിഷ്കൃത രാജ്യത്തിന്റെ അവസ്ഥയെങ്കില്‍ ഇന്ത്യപോലൊരു രാജ്യത്തിന്റെ അവസ്ഥയെന്താകും. പൈപ്പ്_ കിണര്‍വെള്ളം ഗുണനിലവാരം കുറഞ്ഞതാണെന്ന് ഒരു പത്രം നടത്തിയ ‘അന്വേഷണവിവരം’ പുറത്തുവന്നതോടെ കുപ്പിവെള്ള വില്പന ഏതാണ്ടിരട്ടിയായ കേരളത്തിന്റെ സ്ഥിതിയെന്താണ്? പെരുംമഴയത്ത് കുപ്പിവെള്ളം വാങ്ങിക്കുടിക്കുന്നവരായി നാം മാറിയിരിക്കുന്നു. പ്രതിവര്‍ഷം ഒരുകോടി കിലോ പ്ലാസ്റ്റിക് കുപ്പികളാണ് ഇന്ത്യയില്‍ വില്‍ക്കുന്നത്. ഇതിന്റെ അമ്പതുശതമാനം മാത്രമേ തിരിച്ചെടുക്കപ്പെടുന്നുള്ളൂ. ബാക്കി (ഏതാണ്ട് 110 കോടി കുപ്പികള്‍) മണ്ണില്‍ വന്നുവീഴുന്നു. ഒരര്‍ഥത്തില്‍ പറഞ്ഞാല്‍ ‘പ്ലാസ്റ്റിക് പുനഃചംക്രമണം’ എന്നു പറയുന്നതുതന്നെ ശരിയല്ല. ഒരു ഗുണനിലവാരത്തിലുള്ള പ്ലാസ്റ്റിക് ചംക്രമണം നടത്തിയാല്‍ കുറഞ്ഞ ഗുണനിലവാരത്തിലുള്ള പ്ലാസ്റ്റിക്കാണുണ്ടാകുന്നത്. (ഡൌണ്‍ സൈക്ലിങ്) ഏതെങ്കിലുമൊരു ഘട്ടത്തില്‍ യാതൊരു ചംക്രമണവും സാധ്യമാകാത്ത അവസ്ഥയുണ്ടാകുമെന്നര്‍ഥം.

കുപ്പിവെള്ളം സാമ്പത്തികമായും സമൂഹത്തിന് നഷ്ടമാണ്. ടാപ്പ് വെള്ളത്തിന്റെ 4000 മടങ്ങ് വരെ വില കുപ്പിവെള്ളത്തിനു നല്‍കേണ്ടി വരുന്നു. പുതിയ ജീവിതശൈലി, യാത്രാരീതികള്‍, പൊങ്ങച്ച സംസ്കാരം, ആരോഗ്യത്തെ കുറിച്ചുള്ള ആശങ്കകള്‍ മുതലായവ പ്രചരിപ്പിച്ചു കൊണ്ടാണല്ലോ കുപ്പിവെള്ളം പ്രചരിപ്പിക്കപ്പെടുന്നത്. കുടിവെള്ളം ശുദ്ധമല്ലെന്നു പ്രചരിപ്പിക്കാന്‍ വന്‍തുക മുടക്കുന്നത് വെള്ളക്കമ്പനികള്‍ മാത്രമല്ല, റിലയന്‍സടക്കമുള്ള പ്ലാസ്റ്റിക് കമ്പനികള്‍ കൂടിയാണ്.

‘ഉതുപ്പാന്റെ കിണറി’ലെന്നപോലെ ജലത്തിന്റെ ‘ശുദ്ധി’ യെന്നതുതന്നെയാണ് വെള്ളക്കമ്പോളം വളര്‍ത്തുന്നത്; ചരക്കാക്കുന്നത്. കിണറില്‍ നിന്ന് ടാപ്പും ടാങ്കറും കുപ്പിയും കടന്ന് നാം ‘മുന്നോട്ടു’ പോകുന്നു. നാളെ ജലക്ഷാമം അതിരൂക്ഷമാകുമ്പോള്‍, വെള്ളം കുടിക്കാനുണ്ടാകില്ല. പകരം വളരെ കുറഞ്ഞ അളവില്‍ രക്തത്തില്‍ നേരിട്ട് കുത്തിവെക്കുന്ന ശുദ്ധജല ആംപ്യൂളുകള്‍ (ഡിസ്റ്റില്‍ഡ് വാട്ടര്‍) രംഗത്തു വരും. ഇന്ന് ഒരു ലിറ്റര്‍ കുപ്പിവെള്ളം കിട്ടുന്ന വിലയ്ക്ക് ഒരു ആംപ്യൂള്‍ ഡിസ്റ്റില്‍ഡ് വാട്ടര്‍ കിട്ടും. അപ്പോള്‍ ജലവില ഇന്നത്തേതിന്റെ പതിനായിരം മടങ്ങാകും. പക്ഷേ, ഒരു വിഭാഗം ഈ രീതി തുടരും. അതിനിടയില്‍ ബഹുഭൂരിപക്ഷത്തിനും ശുദ്ധജലം കിട്ടാതാകും. ഇതു തടയണമെങ്കില്‍ ജലത്തിന്റെ ”ജൈവനീതി’ ഉയര്‍ത്തിപ്പിടിച്ച് പോരാടേണ്ടിവരും.

16-11-07
വെള്ളത്തെ പൊതുസ്വത്തായി തിരിച്ചുപിടിക്കാം

കുടിവെള്ളക്കച്ചവടം_ ചില വസ്തുതകള്‍ എന്ന ലേഖന പരമ്പര വായിച്ചപ്പോള്‍ ഓര്‍മ വന്നത് കുറച്ചുവര്‍ഷം മുന്‍പ് തൃശ്ശൂര്‍ ജില്ലയിലെ ഒരു കൊച്ചു പ്രൈമറി സ്കൂളിലെ കൊച്ചുകുട്ടികളുടെ പ്രതികരണമാണ്. അവരുടെ വിദ്യാലയത്തിന് തൊട്ടടുത്തുകൂടി ഒഴുകുന്ന പുഴയേതാണെന്ന് ചോദിച്ചപ്പോള്‍, ആര്‍ക്കും ഒന്നും പറയാനില്ല. എന്നാല്‍ ഈ പുഴയില്‍ പണിതിട്ടുള്ള അണക്കെട്ടിന്റെ പേര് ചോദിച്ചപ്പോള്‍ ഉടന്‍വന്നു മറുപടി ‘പീച്ചി അണക്കെട്ട്’. സ്ഥിരമായി പ്രകൃതിപഠന ക്യാമ്പുകള്‍ക്ക് കുട്ടികളെ കാട്ടില്‍ കൊണ്ടുപോകുമ്പോള്‍ നീര്‍ച്ചോലയില്‍ക്കൂടി ഒഴുകിവരുന്ന തെളിഞ്ഞവെള്ളം ‘കുടിക്കാന്‍ യോഗ്യമാണോ’ എന്ന ചോദ്യം ഉയരാറുണ്ട്! കുപ്പിവെള്ളക്കച്ചവടം കേരളത്തില്‍ തഴച്ചുവളരാനുള്ള എല്ലാ സാധ്യതകളും ഉണ്ടെന്ന യാഥാര്‍ഥ്യം മേല്‍സൂചിപ്പിച്ച സംഭവങ്ങളില്‍ നിന്നും നമുക്ക് മനസ്സിലാക്കാന്‍ സാധിക്കും. സ്വന്തം നാട്ടിലെ ശുദ്ധജല സ്രോതസ്സുകളേയും ശുദ്ധമായ തെളിനീരുറവകളേയും അറിയാതാകുന്ന ഒരു തലമുറയെ വാര്‍ത്തെടുക്കുന്ന നമുക്ക് കുപ്പിയില്‍ വില്ക്കുന്ന വെള്ളമാണ് ശുദ്ധജലം എന്ന ‘തിരിച്ചറിവ്’ ഉണ്ടായതില്‍ അത്ഭുതപ്പെടാനില്ല. അതുകൊണ്ടുതന്നെ കുപ്പിവെള്ള കച്ചവടം കേരളത്തില്‍ വേരൂന്നാതിരിക്കണമെങ്കില്‍ ഈ അവസ്ഥയില്‍ നമ്മള്‍ എങ്ങനെ എത്തിച്ചേര്‍ന്നു എന്ന വിലയിരുത്തലിന് ഏറെ പ്രസക്തിയുണ്ട്.
3000 മില്ലി മീറ്ററില്‍പ്പരം പഴ ലഭിക്കുന്ന, കൊച്ചുപുഴകളുടെയും കൈത്തോടുകളുടെയും കുളങ്ങളുടെയും കിണറുകളുടെയും നാടായ, കേരളമെന്ന 44 പുഴകള്‍ അടങ്ങുന്ന വലിയ നീര്‍ത്തടത്തില്‍ ജീവിച്ചിരുന്ന ജനസമൂഹങ്ങള്‍ക്ക് വെള്ളം, ദിനചര്യയുടെ, ജീവിതസംസ്കാരത്തിന്റെ ഒരു അവിഭാജ്യഘടകമായിരുന്നു. വെള്ളം ജന്മാവകാശമാണെന്നും പൊതുസ്വത്താണെന്നും മറ്റുമുള്ള രാഷ്ട്രീയ_സാമൂഹിക അവബോധം ഉടലെടുക്കുന്നതിന് മുന്‍പുതന്നെ കേരളത്തിലെ ജനങ്ങള്‍ കിണര്‍വെള്ളം കോരിയുപയോഗിച്ചും ഒഴുകുന്ന പുഴയില്‍ കുളിച്ചും നീന്തിയും അലക്കിയും ആത്മശുദ്ധി വരുത്തിയും കുളക്കരയില്‍ അലക്കാനും കുളിക്കാനും ഉപയോഗിക്കുന്ന അവസരങ്ങള്‍ സമൂഹബന്ധങ്ങള്‍ ഊട്ടിയുറപ്പിക്കാന്‍ ഉപയോഗിച്ചും മറ്റും വെള്ളത്തിനെയും ജലസ്രോതസ്സുകളെയും തൊട്ടറിഞ്ഞിരുന്നു; ആത്മബന്ധം പുലര്‍ത്തിയിരുന്നു. തൊട്ടറിയുമ്പോള്‍ മാത്രമേ സൂക്ഷിക്കാനും സംരക്ഷിക്കാനുമുള്ള ഉത്തരവാദിത്വം സ്വയം ഏറ്റെടുക്കാനും ആ ഉത്തരവാദിത്വം ഒരു സംസ്കാരമായി കൈമാറാനും സാധിക്കുകയുള്ളൂ. ജലമെന്ന ജീവസ്രോതസ്സിന്റെ നിലനില്പും നമ്മുടെ നിലനില്പും ഇഴപിരിക്കാനാകാത്തതാണെന്നുള്ള അവബോധത്തില്‍ കാലാകാലങ്ങളായി വന്നിട്ടുള്ള മാറ്റത്തിന്റെ, മൂല്യച്യുതിയുടെ ഒരു പ്രതിഫലനം കൂടിയാണ് കുപ്പിവെള്ളക്കച്ചവടവും ജലവിതരണത്തിന്റെ സ്വകാര്യവത്കരണവും മറ്റും.

കുടിവെള്ള വിതരണം പൊതുമേഖലാ സര്‍വീസ് ആയി മാറിയപ്പോള്‍, ഓരോ പൌരനും അവകാശപ്പെട്ട ശുദ്ധജലം തുല്യമായും കൃത്യമായും ലഭ്യമാക്കുക എന്നതായിരുന്നു ഉദ്ദേശ്യം. എന്നാല്‍ പൈസ കൊടുത്താല്‍ ലഭിക്കുന്ന ഒരു ‘വസ്തുവായി’ കുടിവെള്ളം മാറിത്തുടങ്ങിയപ്പോള്‍, നമ്മള്‍ വെള്ളത്തിനെ അതിന്റെ സ്രോതസ്സില്‍ നിന്നും വേറിട്ടു കാണാന്‍ തുടങ്ങി. ടാപ്പില്‍ നിന്നും പുറത്തുവരുന്ന വെള്ളം ഏതു പുഴയിലേതാണെന്നോ ആ പുഴയിലെ വെള്ളത്തിന്റെ ഗുണമേന്മ എന്താണെന്നോ ഒന്നും അറിയേണ്ടതില്ല. കൊച്ചി കോര്‍പ്പറേഷനിലെ ജനങ്ങള്‍ക്ക് പെരിയാറില്‍ നിന്നും ശുദ്ധീകരിച്ച്, കുഴലില്‍ക്കൂടി ടാപ്പുകളില്‍ എത്തിക്കുന്ന കുടിവെള്ളമാണ് ലഭിക്കുന്നതെന്നിരിക്കെ, ഈ പുഴയുടെ ശോചനീയാവസ്ഥയെ കുറിച്ച് അവര്‍ വേവലാതിപ്പെടുന്നില്ല. ഈ ബന്ധമറ്റുപോകല്‍ കൃഷിരീതികളില്‍ വന്ന മാറ്റത്തിലും നെല്‍വയല്‍ നികത്തലിലും കുന്നിടിക്കലിലും നമുക്കു കാണാന്‍ സാധിക്കും. കുടിവെള്ള വിതരണം പൊതുമേഖലാ ‘സര്‍വീസ്’ ആയി മാറിയപ്പോള്‍ പൊതുപങ്കാളിത്ത_ ഉത്തരവാദിത്വ സ്വഭാവവുംസുതാര്യതയും കാര്യക്ഷമതയും എല്ലാം ചോര്‍ന്നു തുടങ്ങി. കേരള വാട്ടര്‍ അതോറിറ്റിക്ക് ശുദ്ധമായ കുടിവെള്ളം ടാപ്പില്‍ കൂടി നല്‍കാന്‍ പ്രാപ്തിയില്ലാത്തതുകൊണ്ട് കുപ്പിവെള്ളം തന്നെ ശരണം എന്ന തീരുമാനത്തിലേക്കെത്തിക്കാന്‍ കമ്പനികള്‍ക്കും എളുപ്പമായി. എന്നാല്‍ പ്രശ്നത്തില്‍ തന്നെ ഉത്തരവുമുണ്ട് എന്നതാണ് വാസ്തവം.

കുപ്പിവെള്ളക്കച്ചവടം നിയന്ത്രിക്കണമെങ്കില്‍, അതിന്റെ അടുത്ത ഘട്ടമായ വെള്ളത്തിന്റെ സ്വകാര്യവത്കരണം ഒഴിവാക്കണമെങ്കില്‍, നമ്മള്‍ വെള്ളത്തിനെ, അതിന്റെ സ്രോതസ്സുകളില്‍ നിന്നും വേറിട്ടു കാണാതെ ‘പബ്ലിക്ക്’ ആയി തന്നെ തിരിച്ചു പിടിച്ചേ പറ്റൂ (Retaining Public Water). നിലവിലുള്ള വികേന്ദ്രീകൃത ആസൂത്രണ ഭരണ സംവിധാനവും പൊതു വിതരണശൃംഖലയും ഒരുമിച്ചു പരസ്പര പൂരകമായി പ്രവര്‍ത്തിച്ചേ മതിയാകൂ.
സ്വന്തം അധികാര പരിധിയില്‍ വരുന്ന ജലസ്രോതസ്സുകളുടെ പരിപാലനവും സംരക്ഷണവും (ഇന്ന് സംരക്ഷണത്തിന് ഊന്നല്‍ കുറവാണ്) തദ്ദേശ സ്വയംഭരണ സ്ഥാപനങ്ങള്‍ ഏറ്റെടുക്കേണ്ടിവരും. കുടിവെള്ള സ്രോതസ്സുകളായ പുഴകളും കിണറുകളും മറ്റും പ്രാദേശിക ജലജാഗ്രതാ സമിതികള്‍ വഴി അവയെ ആശ്രയിക്കുന്ന ജനസമൂഹങ്ങളെക്കൊണ്ടുതന്നെ സംരക്ഷിക്കാനും സാമൂഹിക നിയന്ത്രണം (Social control over misuse) കൊണ്ടുവരാനുമുള്ള നിയമ നടപടികള്‍ കൈക്കൊള്ളേണ്ടിവരും. കുപ്പിവെള്ളക്കച്ചവടത്തിനു വേണ്ടിയുള്ള ജലമൂറ്റല്‍ ഒരു പരിധിവരെ ഇത്തരത്തില്‍ നിയന്ത്രിക്കാന്‍ സാധിക്കും.
ഫ്രാന്‍സിലെ ഗ്രെനോബിള്‍ എന്ന പട്ടണം, പത്തുകൊല്ലത്തെ നീണ്ട പരിശ്രമങ്ങള്‍ക്കൊടുവില്‍ സമൂഹത്തിലെ എല്ലാ തട്ടിലെ ജനങ്ങളെയും ഒരുമിച്ചു കൊണ്ടുവന്ന് ശുദ്ധജല വിതരണത്തിനെ സ്വകാര്യവത്കരണത്തില്‍ നിന്നും മോചിപ്പിച്ച് വീണ്ടും പൊതു സ്വത്താക്കി തിരിച്ചെടുത്തത് 2000 ത്തില്‍ ആണ് (Remunicipalise water). ഈയിടെ ഫ്രാന്‍സിലെ സര്‍ക്കാര്‍ തന്നെ രണ്ട് സ്വകാര്യ കമ്പനികള്‍ക്ക് കോണ്‍ട്രാക്ട് പുതുക്കി നല്‍കേണ്ടതില്ലെന്നും വെള്ളത്തിന്റെ സ്വകാര്യവത്കരണം തീര്‍ത്തും ഒഴിവാക്കാനുള്ള വളരെ ശ്രദ്ധേയമായ തീരുമാനം എടുക്കുകയും ചെയ്തു.
നമ്മുടെ പൊതുമേഖലാ കുടിവെള്ള ശൃംഖലയെ മെച്ചപ്പെടുത്തിക്കൊണ്ടും കൂടുതല്‍ സുതാര്യമാക്കിക്കൊണ്ടും ഉപഭോക്താക്കളുടെ പങ്കാളിത്തം ശുദ്ധീകരണ,വിതരണ, വ്യവസ്ഥയില്‍ ഉറപ്പുവരുത്തിക്കൊണ്ടും ശുദ്ധമായ കുടിവെള്ളം പൊതുജനങ്ങള്‍ക്ക് ഉറപ്പു വരുത്താവുന്നതാണ്.

തൃശ്ശൂരില്‍, ഒല്ലൂര്‍ കേന്ദ്രമായി പ്രവര്‍ത്തിക്കുന്ന റിവര്‍ റിസര്‍ച്ച് സെന്ററിന്റെ ഡയറക്ടറാണ് ഡോ.ലത

2അഭിപ്രായങ്ങള്‍

Filed under ജലം, മാധ്യമം

നവംബര്‍ 13 ചെവ്വ

രാസവള ക്ഷാമം രൂക്ഷം; കൃഷി പ്രതിസന്ധിയില്‍
കൊച്ചി: കേരളത്തില്‍ രാസവളത്തിന്റെ ക്ഷാമം അതിരൂക്ഷമാകുന്നു. ഒക്ടോബര്‍, നവംബര്‍ മാസങ്ങളിലേക്ക് ആവശ്യമായ വളത്തിന്റെ പകുതി പോലും വിതരണം ചെയ്യാന്‍ കമ്പനികള്‍ക്കായിട്ടില്ല. റബര്‍, തെങ്ങ്, നെല്ല് തുടങ്ങിയവയുടെ അടുത്ത സീസണിലെ ഉല്‍പാദനത്തെ ഇത് ഗുരുതരമായി ബാധിക്കുമെന്ന ആശങ്കയിലാണ് കൃഷിക്കാര്‍.

കേന്ദ്ര സര്‍ക്കാര്‍, രാസവളം ഇറക്കുമതി ചെയ്യുന്നതിനു നടപടി സ്വീകരിക്കുന്നു വെങ്കിലും, ആവശ്യത്തിനു വളം ഇനിയും ലഭ്യമായിട്ടില്ല. എംഎംടിസി വഴി, കൊച്ചി തുറമുഖത്തേക്ക് 25000 ടണ്‍ യൂറിയ ഇറക്കുമതി ചെയ്യാന്‍ ഫാക്ട് കേന്ദ്രത്തോട് ആവശ്യപ്പെട്ടിട്ടുണ്ട്. കേരളത്തില്‍ ഒക്ടോബര്‍, നവംബര്‍ മാസങ്ങളിലേക്ക് 25000 ടണ്‍ യൂറിയ വേണം. റഷ്യയില്‍ നിന്നാണ് ഇറക്കുമതി നടത്തേണ്ടത്. ഫാക്ട് ഇറക്കുമതിക്കു വേണ്ട തയാറെടുപ്പുകളെല്ലാം ചെയ്ത് കാത്തിരിക്കുന്നുവെങ്കിലും, ഇതു സംബന്ധിച്ച് അനുമതിയൊന്നുമായിട്ടില്ല.

ഫാക്ടം ഫോസ്, ഇൌ മാസത്തെ വിതരണത്തിനുള്ളതേ ശേഷിക്കുന്നുള്ളൂ. സള്‍ഫറില്ലാത്തതിനാല്‍ ഉല്‍പാദനം ഗണ്യമായി കുറഞ്ഞു. വില കൂടുതല്‍ മൂലം വാങ്ങാനും കഴിയുന്നില്ല. കൊച്ചി ഡിവിഷനില്‍ 2000 ടണ്ണും ഉദ്യോഗമണ്ഡലില്‍ 450 ടണ്ണുമാണു പ്രതിദിന ഉല്‍പാദനം. എന്നാലിത് യഥാക്രമം 800 ടണ്ണും 200 ടണ്ണുമായി കുറച്ചു. രണ്ടാഴ്ചയ്ക്കു ശേഷം ഫാക്ടം ഫോസിന്റെ ഉല്‍പാദനം പാടേ നിര്‍ത്തേണ്ട സ്ഥിതിയാണ്. നവംബറില്‍ കേരളത്തിലേക്കു മാത്രം 15000 ടണ്‍ വേണം.

മദ്രാസ് ഫെര്‍ട്ടിലൈസേഴ്സില്‍ 17 : 17 : 17 കൂട്ടുവളത്തിന്റെ ഉല്‍പാദനവും അസംസ്കൃത വസ്തുക്കളുടെ വിലക്കയറ്റം മൂലം നിര്‍ത്തിവച്ചു. സ്പിക്കിലും ഉല്‍പാദനമില്ല. ക്രിബ്കൊയില്‍ നിന്നുള്ള വളം, തമിഴ്നാട്ടിലേക്കുള്ളതേയുള്ളൂ. മാംഗ്ലൂര്‍ കെമിക്കല്‍സ് ആന്‍ഡ് ഫെര്‍ട്ടിലൈസേഴ്സില്‍ നിന്നും വളത്തിന്റെ ലഭ്യത കുറവാണ്.
മറ്റു തെക്കന്‍ സംസ്ഥാനങ്ങളിലും ഫാക്ടിന്റെ വളം പ്രിയങ്കരമാണെങ്കിലും വിതരണം നടത്താനാകുന്നില്ല.

ദക്ഷിണേന്ത്യയില്‍ മൊത്തത്തില്‍ വളത്തിന്റെ ലഭ്യതക്കുറവുണ്ട്. കേരളത്തിന്റെ മാത്രം വളം വിപണി അഞ്ചു ലക്ഷം ടണ്ണിന്റേതാണ്. പ്രതിവര്‍ഷം ഒന്നര ലക്ഷം ടണ്‍ കോംപ്ലക്സ് വളങ്ങള്‍ ഇവിടെ വിറ്റഴിക്കുന്നു. യൂറിയയും ഏറെക്കുറെ ഇത്രയും ആവശ്യമാണ്. പൊട്ടാഷ് ഒരു ലക്ഷം ടണ്ണും റോക്ക് ഫോസ്ഫേറ്റ്, മിശ്രിത വളങ്ങള്‍ തുടങ്ങിയവ വേറെ ഒരു ലക്ഷം ടണ്ണും ആവശ്യമുണ്ട്.
കൃഷി കുറഞ്ഞതിനാല്‍, നെല്ലിന് ആവശ്യമായ വളത്തിന്റെ ഉപയോഗത്തില്‍ വര്‍ച്ചയില്ല.

നല്ല ഉല്‍പന്നവിലയുള്ളപ്പോള്‍ റബര്‍, തെങ്ങ്, കുരുമുളക് തുടങ്ങിയവയ്ക്ക് വളത്തിന്റെ ആവശ്യം കൂടും. രാസവളത്തിന്റെ ലഭ്യത കുറഞ്ഞതോടെ, ഗുണനിലവാരം കുറഞ്ഞ കൂട്ടുവളങ്ങളുടെ വില്‍പന കൂടി. വിപണിയില്‍ അവ ആധിപത്യം ഉറപ്പിക്കുന്നു. കാര്‍ഷികോല്‍പാദനത്തെ ഇതു പ്രതികൂലമായി ബാധിക്കും.
കടപ്പാട്- മനോരമ

17,000 കോടിയുടെ കാര്‍ഷിക പാക്കേജുണ്ടെന്ന് ആന്റണി; അറിയില്ലെന്ന് മന്ത്രി മുല്ലക്കര

കോഴിക്കോട്: കടുത്ത പ്രതിസന്ധി നേരിടുന്ന കര്‍ഷകരെ സഹായിക്കാന്‍ കേന്ദ്രസര്‍ക്കാര്‍ വിവിധ സംസ്ഥാനങ്ങള്‍ക്കായി 17,000 കോടി രൂപയുടെ കാര്‍ഷിക പാക്കേജ് അനുവദിച്ചിട്ടുണ്ടെന്ന് പ്രതിരോധമന്ത്രി എ.കെ. ആന്റണി പറഞ്ഞു. കേരളം ഇതിന്റെ ആദ്യഗഡു ഇതുവരെ കൈപ്പറ്റാന്‍ തയ്യാറായിട്ടില്ലെന്നും അദ്ദേഹം ചൂണ്ടിക്കാട്ടി.

എന്നാല്‍ ഇത്തരമൊരു പാക്കേജിനെക്കുറിച്ച് സംസ്ഥാനത്തിന് അറിവൊന്നുമില്ലെന്ന് കൃഷിമന്ത്രി മുല്ലക്കര രത്നാകരന്‍ ഡല്‍ഹിയില്‍ പറഞ്ഞു.

കോഴിക്കോട്ട് പത്രലേഖകരുമായി സംസാരിക്കവെയാണ് ആന്റണി കാര്‍ഷികപാക്കേജിന്റെ കാര്യം പറഞ്ഞത്. പശ്ചിമബംഗാള്‍ ഉള്‍പ്പെടെ ഭൂരിഭാഗം സംസ്ഥാനങ്ങളും അതിന്റെ ആദ്യഗഡു കൈപ്പറ്റിക്കഴിഞ്ഞു. അത് സ്വീകരിക്കാന്‍ കേരളസര്‍ക്കാറും നടപടി എടുക്കണം ആന്റണി പറഞ്ഞു.

രാജ്യം സാമ്പത്തിക പുരോഗതിയിലേക്കു കുതിക്കുകയാണെങ്കിലും അതിന്റെ ഗുണഫലം എല്ലാവരിലുമെത്തുന്നില്ല. കര്‍ഷകര്‍, കൈത്തൊഴിലുകാര്‍, പരമ്പരാഗത തൊഴിലാളികള്‍ എന്നിവര്‍ ക്ലേശം അനുഭവിക്കുകയാണ്. കേരളത്തിലെ നാളികേരകര്‍ഷകര്‍ക്ക് തിരിച്ചടിയാവുന്ന പാമോയില്‍ ഇറക്കുമതി ഗൌരവത്തോടെ കാണണം. ഇക്കാര്യം കേന്ദ്രസര്‍ക്കാറിന്റെ ശ്രദ്ധയില്‍പ്പെടുത്തും ആന്റണി പറഞ്ഞു.

എന്നാല്‍ ആന്റണി പറഞ്ഞ 17,000 കോടിയുടെ പാക്കേജിനെപ്പറ്റി അറിയില്ലെന്ന് മന്ത്രി മുല്ലക്കര രത്നാകരന്‍ പറഞ്ഞു. പാക്കേജ് നിലവിലുണ്ടോയെന്ന് അന്വേഷിക്കും. ഉണ്ടെങ്കില്‍ തുക കൈപ്പറ്റാന്‍ തയ്യാറാണ് അദ്ദേഹം പറഞ്ഞു.
കടപ്പാട്- മാതൃഭൂമി

നന്ദിഗ്രാമില്‍ കൊള്ളയും കൊള്ളിവയ്പും തുടരുന്നു
കൊല്‍ക്കത്ത : നന്ദിഗ്രാമില്‍ ഭൂമി ഉച്ഛദ് പ്രതിരോധ സമിതിക്കാരില്‍ നിന്ന് വീണ്ടെടുത്ത പ്രദേശങ്ങളില്‍ ഇന്നലെയും സി.പി.എം പ്രവര്‍ത്തകര്‍ വെടിവയ്പും കൊള്ളിവയ്പും കൊള്ളയും നടത്തി. നന്ദിഗ്രാമില്‍ സി.പി.എമ്മുകാര്‍ നടത്തുന്ന അക്രമങ്ങളില്‍ പ്രതിഷേധിച്ച് പ്രതിപക്ഷം ആഹ്വാനം ചെയ്ത ബംഗാള്‍ ബന്ത് സംസ്ഥാനത്തിന്റെ പല ഭാഗങ്ങളിലും ജനജീവിതം നിശ്ചലമാക്കി.
കടകമ്പോളങ്ങള്‍ പൊതുവേ അടഞ്ഞുകിടന്നു. സര്‍ക്കാര്‍ ഓഫീസുകള്‍ പ്രവര്‍ത്തിച്ചില്ല. വ്യവസായമേഖലയെ ബന്ത് കാര്യമായി ബാധിച്ചില്ലെന്നാണ് റിപ്പോര്‍ട്ട്. ഇതാദ്യമായി ഐ.ടി. മേഖലയും ബന്ദില്‍ നിശ്ചലമായി. ബന്തിനോടനുബന്ധിച്ച് പല സ്ഥലത്തും അക്രമങ്ങള്‍ അരങ്ങേറി.

നന്ദിഗ്രാമിലെ സോനാച്ചുര, ഗോകുല്‍നഗര്‍, ഗര്‍ചക്രബെരിയ എന്നീ സ്ഥലങ്ങളില്‍ ഭൂമി പ്രതിരോധ സമിതിക്കാരെ തുരത്തിയ സി.പി.എം പ്രവര്‍ത്തകര്‍ വന്‍തോതില്‍ കൊള്ളയും കൊള്ളിവയ്പും നടത്തിയതായാണ് ആരോപണം. നിരവധി വീടുകളും കടകളും അഗ്നിക്കിരയായിട്ടുണ്ട്. തങ്ങളുടെ ഭാഗത്തുള്ള ഇരുനൂറുപേരെയെങ്കിലും കാണാതായിട്ടുണ്ടെന്ന് സമിതി നേതാക്കള്‍ പറഞ്ഞു. ഞായറാഴ്ച രാത്രി ഈ പ്രദേശങ്ങളുടെ നിയന്ത്രണം പിടിച്ചെടുത്തശേഷമായിരുന്നു കൊള്ളയും കൊള്ളിവയ്പും.

നന്ദിഗ്രാമിലേക്ക് ഞായറാഴ്ച തിരിച്ച തൃണമൂല്‍ നേതാവ് മമതാ ബാനര്‍ജിക്ക് ഇതുവരെ അവിടെ എത്താന്‍ കഴിഞ്ഞിട്ടില്ല. മോട്ടോര്‍ സൈക്കിളിന്റെ പിന്നിലിരുന്ന് യാത്ര തുടര്‍ന്ന മമതയ്ക്ക് കിഴക്കന്‍ മിഡ്നാപ്പൂരില്‍ വച്ച് യാത്ര അവസാനിപ്പിക്കേണ്ടിവന്നു. ഇതിനിടെ കേന്ദ്രം അയച്ച സി. ആര്‍.പിക്കാരില്‍ ഒരു ബറ്റാലിയന്‍ ഇന്നലെ നന്ദിഗ്രാമില്‍ പ്രവേശിച്ചു. സി.പി.എം പ്രവര്‍ത്തകര്‍ തടഞ്ഞതുകാരണം മൂന്ന് ബറ്റാലിയനുകള്‍ ഞായറാഴ്ച വഴിയില്‍ കുടുങ്ങിക്കിടക്കുകയായിരുന്നു. അഞ്ച് കമ്പനികളെയാണ് നന്ദിഗ്രാമിലേക്ക് കേന്ദ്രം അയച്ചത്. അതില്‍ രണ്ട് ബറ്റാലിയന്‍ ഇന്നേ കൊല്‍ക്കത്തയില്‍ എത്തുകയുള്ളൂ.
സി.ആര്‍.പി ഡയറക്ടര്‍ ജനറല്‍ എസ്.ഐ.എസ് അഹമ്മദ് ഇന്നലെ മുഖ്യമന്ത്രി ബുദ്ധദേവ് ഭട്ടാചാര്യയെ സന്ദര്‍ശിച്ചു സംഭാഷണം നടത്തി.
നന്ദിഗ്രാം പ്രശ്നത്തില്‍ രണ്ടുദിവസം ഉപവസിച്ച സാമൂഹ്യ പ്രവര്‍ത്തക മേധാപട്കര്‍ ഇന്നലെ നന്ദിഗ്രാമിലേക്ക് പുറപ്പെട്ടു. സംഘര്‍ഷസ്ഥിതി കണക്കിലെടുത്ത് അങ്ങോട്ട് പോകരുതെന്ന സര്‍ക്കാരിന്റെ വിലക്കു ലംഘിച്ചുകൊണ്ടാണ് അവര്‍ യാത്ര തിരിച്ചത്.

പശുവിന് പേവിഷബാധയെന്ന് സംശയം: പാല്‍ കുടിച്ച 120 പേര്‍ ആശുപത്രിയില്‍
നെടുമങ്ങാട്: ആനപ്പാറയില്‍ പേ വിഷബാധയേറ്റെന്ന് സംശയിക്കുന്ന പശുവിന്റെ പാല്‍കുടിച്ച 120 പേരെ വാക്സിന്‍ കുത്തി വയ്ക്കാന്‍ തിരുവനന്തപുരം മെഡിക്കല്‍ കോളേജ് ആശുപത്രിയില്‍ പ്രവേശിപ്പിച്ചു. മൂന്ന് ഡോസ് വാക്സിന്‍ വീതം ഇവര്‍ക്ക് സൌജന്യമായി കുത്തിവയ്ക്കും. ഇന്നലെ ഒരു ഡോസ് നല്കി. വ്യാഴാഴ്ച കൊച്ചാനപ്പാറ സ്വദേശി ശാന്തമ്മയുടെ പശുക്കുട്ടിക്കാണ് പേപ്പട്ടിയുടെ കടിയേറ്റത്. വിഷബാധയുടെ ലക്ഷണം പ്രകടിപ്പിച്ച കന്നുകുട്ടിയെ നാട്ടുകാര്‍ തല്ലിക്കൊന്നെങ്കിലും കുട്ടി പാല്‍ കുടിച്ചതു വഴി തള്ളപ്പശുവിനും പേ വിഷബാധ ഏറ്റിരിക്കാമെന്നാണ് നിഗമനം. എന്നാല്‍ ഇതറിയാതെ പാല്‍ സമീപത്തുള്ള ഒരു ചായക്കടയില്‍ വില്‍പ്പന നടത്തിയിരുന്നു. വിതുര ഗ്രാമപഞ്ചായത്ത് പ്രസിഡന്റ് ബിന്ദുകുമാരി ആരോഗ്യ മന്ത്രിക്ക് നിവേദനം നല്‍കിയതിന്റെ അടിസ്ഥാനത്തിലാണ് പാലുപയോഗിച്ചവര്‍ക്ക് സൌജന്യ വാക്സിന്‍ അടിയന്തരമായി കുത്തിവയ്ക്കാന്‍ നടപടിയുണ്ടായത് .കെ.എസ്.ആര്‍.ടി.സിയുടെ പ്രത്യേക ബസിലാണ് വാക്സിന്‍ കുത്തിവയ്ക്കാന്‍ ഇന്നലെ നാട്ടുകാരെ മെഡിക്കല്‍ കോളേജ് ആശുപത്രിയിലെത്തിച്ചത്. അടുത്ത രണ്ടു വാക്സിനുകള്‍ വരുന്ന വ്യാഴം, തിങ്കള്‍ ദിവസങ്ങളില്‍ വിതുരയില്‍ വച്ച് നല്‍കുന്നതിനെക്കുറിച്ച് മെഡിക്കല്‍ കോളേജ് അധികൃതരുമായി ആലോചിച്ചു വരികയാണെന്ന് ഗ്രാമപഞ്ചായത്ത് പ്രസിഡന്റ് അറിയിച്ചു.
പശുവിന്റെ പാല്‍ തിളപ്പിച്ചാല്‍ കുഴപ്പമില്ല
തിരുവനന്തപുരം : പേ വിഷബാധയ്ക്കുകാരണമാകുന്ന വൈറസ് 50 ഡിഗ്രി ചൂടില്‍ നശിച്ചുപോകുമെന്ന് തിരുവനന്തപുരം മെഡിക്കല്‍ കോളേജിലെ കമ്മ്യൂണിറ്റി മെഡിസിന്‍ വിഭാഗം മേധാവി ഡോ. ലീല ഇട്ടിഅമ്മ പറഞ്ഞു. അതിനാല്‍ തന്നെ, പേവിഷബാധയേറ്റ പശുവിന്റെ പാല്‍ തിളപ്പിച്ച് ഉപയോഗിക്കുന്നവര്‍ക്ക് പേ വിഷബാധയ്ക്ക് സാദ്ധ്യതയില്ലെന്നും അവര്‍ പറഞ്ഞു.
ആനപ്പാറയില്‍ പേവിഷബാധ ഏറ്റതായി പറയുന്ന പശുവിന്റെ പാല്‍ ഭൂരിഭാഗംപേരും തിളപ്പിച്ചാണ് ഉപയോഗിച്ചത്. തിളപ്പിക്കാതെ ഉപയോഗിച്ചവര്‍ക്ക് പേ വിഷബാധയ്ക്ക് ചെറിയ സാദ്ധ്യതയുള്ളതുകൊണ്ടാണ് വാക്സിന്‍ കുത്തിവച്ചത്. പാല്‍ തിളപ്പിച്ചിട്ടില്ലെങ്കില്‍ത്തന്നെ തിളച്ചവെള്ളത്തിലോ നല്ല ചൂടുള്ള തേയിലവെള്ളത്തിലോ ഒഴിച്ചാണ് ഉപയോഗിച്ചതെങ്കിലും വൈറസ് നശിക്കുമെന്നതിനാല്‍ പേടിക്കേണ്ടതില്ല.
വാക്സിന്‍ കുത്തിവയ്ക്കാന്‍ 120 പേര്‍ ആശുപത്രിയില്‍ എത്തിയതില്‍ 70 പേര്‍ ഈ വസ്തുതകള്‍ മനസ്സിലാക്കി മടങ്ങിപ്പോയതായി ഡോ. ലീല ഇട്ടിഅമ്മ പറഞ്ഞു.
കടപ്പാട്- കേരളകൗമുദി

പ്രതിവര്‍ഷ നഷ്ടം 3600 കോടി; കുട്ടികളില്‍ രോഗം പടരുന്നു
ആലപ്പുഴ: മന്തുരോഗം മൂലം രാജ്യത്തിനു പ്രതിവര്‍ഷം 3600 കോടിയുടെ നഷ്ടമുണ്ടാ കുന്ന തായി ലോകാരോഗ്യ സംഘടന.

മനുഷ്യര്‍ക്ക് ഈ രോഗം മൂലമു ണ്ടാകുന്ന പനി, മറ്റ് അസ്വസ് ഥതകള്‍ എന്നിവ മൂലം ജോലി ചെയ്യാന്‍ സാധിക്കാത്ത അവസ്ഥ, കമ്പനികള്‍ക്കും മറ്റു സ്ഥാപനങ്ങ ള്‍ക്കും ഉദ്യോഗസ്ഥര്‍ എത്താത്ത തുമൂലമുണ്ടാകുന്ന നഷ്ടം, ഇവരുടെ ചികിത്സാച്ചെ ലവുകള്‍, പ്രതിരോ ധമാര്‍ഗങ്ങള്‍, മരുന്നു കള്‍ എന്നിവ മൂലമുണ്ടാകു ന്ന ചെലവുകള്‍ എന്നിവയെല്ലാം സംയോജിപ്പിച്ചാണ് നഷ്ടം കണക്കാക്കിയിരിക്കുന്നത്.

മുതിര്‍ന്നവരിലുള്ളതിനേക്കാള്‍ മുപ്പതുശതമാനം കൂടുതല്‍ കുട്ടികളില്‍ രോഗബാധയു ള്ളതാ യി പഠനം തെളിയിക്കുന്നു. കേരള ത്തിലെ 8000 രക്തസാമ്പിളുക ളെടുത്തതില്‍ 811 കുട്ടികള്‍ക്ക് രോഗലക്ഷണങ്ങള്‍ കണ്ടു.

ആലപ്പുഴയില്‍ രോഗം പൊട്ടി പ്പുറപ്പെടാന്‍ സാധ്യതയേ റെയാ ണ്. രാജ്യത്ത് 17 സംസ്ഥാന ങ്ങ ളിലും ആറു കേന്ദ്രഭരണ പ്രദേശ ങ്ങളിലും മന്തുരോഗം കണ്ടുവ രുന്നു. ഇതില്‍ രക്തത്തില്‍ മന്തി ന്റെ കുഞ്ഞുവിരകള്‍ ഉള്ളവര്‍ 31.26 ദശലക്ഷവും കൈകാലു കളി ല്‍ വീക്കമുള്ളവര്‍ 7.44 ദശലക്ഷ വും രഹസ്യഭാ ഗങ്ങളില്‍ വീക്ക മുള്ളവര്‍ 12.88 ദശലക്ഷ വുമാണ്.

ഏകദേശം 40.65 ദശലക്ഷം ആളുകളില്‍ മന്തുപനി ഉണ്ടാകു ന്നുണ്ട്. 2015 ഓടെ രാജ്യത്തു മന്തു രോഗം പൂര്‍ണമായും നിര്‍മാര്‍ജനം ചെയ്യുകയാണ് ലക്ഷ്യം.

ഉഷ്ണ മേഖലാ രാജ്യങ്ങളില്‍ കണ്ടുവ രുന്ന മന്തുരോഗം ലോകത്തില്‍ 120 ദശലക്ഷ ത്തോളം ആളുകള്‍ ക്കുണ്ട്. ഇതില്‍ 40 ശതമാനം രോ ഗികള്‍ ഇന്ത്യയി ലാണ്.

സാമ്പത്തി കമായി പിന്നോ ക്കം നില്‍ക്കുന്ന രാജ്യങ്ങളില്‍ പൊ തുവെ കണ്ടുവ രുന്ന രോഗം രാജ്യത്തിന്റെ സാമ്പ ത്തിക സ്ഥി തിയെ തകിടംമറിക്കും.

80 രാജ്യങ്ങളില്‍ രോഗം കണ്ടുവരു ന്നുണ്െടന്നും പഠനം വ്യക്തമാക്കു ന്നു. കൊതുകുക ളിലൂ ടെ പകരുന്ന രോഗം രഹസ്യ ഭാഗങ്ങള്‍, കക്ഷം, മാറിടം എന്നിവിടങ്ങളിലെ ലിംഫ്കു ഴലുകളില്‍ നാലുമുതല്‍ ആറു വരെ വര്‍ഷം ജീവിക്കുന്നു. മന്തു രോഗ നിവാരണമാ ര്‍ഗങ്ങ ളായ കൊതുകുനശീ കരണവും രാത്രി കാല രക്തപരിശോധനയും വേ ണ്ടത്ര ഫലം ചെയ്യാതിരുന്ന സാഹചര്യത്തിലാണ് ഒമ്പതാം തീവ്രമന്തുരോഗ നിവാരണ പദ്ധതിയുടെ ഭാഗമായി സാമൂഹ്യമരുന്നുവിതരണം ഏറ്റെടുത്തി രിക്കുന്നത്.

15 ന് തുടങ്ങുന്ന യ ജ്ഞത്തില്‍ ജനസംഖ്യയുടെ 80 ശതമാനം പേര്‍ മരുന്നുകഴിച്ചെങ്കി ല്‍ മാത്രമെ പദ്ധതി വിജയിക്കു.
കടപ്പാട്-ദീപിക

നന്ദിഗ്രാമില്‍ ഭൂസമരമല്ല; അട്ടിമറിശ്രമം: സിപിഐ എം
ന്യൂഡല്‍ഹി: നന്ദിഗ്രാമില്‍ തൃണമൂല്‍ കോണ്‍ഗ്രസിന്റെ നേതൃത്വത്തില്‍ നിയമവാഴ്ചക്കെതിരെ തുടര്‍ച്ചയായി നടത്തിക്കൊണ്ടിരിക്കുന്ന ആക്രമണം ഒരു ഗവണ്‍മെന്റിനും വച്ചുപൊറുപ്പിക്കാന്‍ കഴിയില്ലെന്ന് സിപിഐ എം പോളിറ്റ് ബ്യൂറോ വിലയിരുത്തി. അവിടെ നടക്കുന്നത് ‘ഭൂമി സംരക്ഷണസമര’മാണെന്നു പറയുന്നവര്‍ അക്രമികള്‍ക്കു കൂട്ടുനില്‍ക്കുകയാണെന്ന് പിബി ചൂണ്ടിക്കാട്ടി. പിബി യോഗതീരുമാനങ്ങള്‍ വിശദീകരിച്ച വാര്‍ത്താസമ്മേളനത്തില്‍ ജനറല്‍ സെക്രട്ടറി പ്രകാശ് കാരാട്ട് അറിയിച്ചതാണിത്.

കെമിക്കല്‍ ഹബ്ബിനുവേണ്ടി ഭൂമി ഏറ്റെടുക്കുന്ന പ്രശ്നമില്ലെന്ന് സംസ്ഥാന സര്‍ക്കാര്‍ പ്രഖ്യാപിച്ച് ഒമ്പതു മാസം കഴിഞ്ഞിട്ടും, ആട്ടിയോടിക്കപ്പെട്ട ജനങ്ങള്‍ക്ക് നന്ദിഗ്രാമില്‍ തങ്ങളുടെ വീടുകളില്‍ തിരികെ പ്രവേശിക്കാന്‍ കഴിഞ്ഞില്ല. 2007 ഫെബ്രുവരിക്കുശേഷം ഭൂമി ഏറ്റെടുക്കല്‍ എന്നൊരു പ്രശ്നംതന്നെ നന്ദിഗ്രാമില്‍ നിലവിലില്ലാതിരുന്നിട്ടും ഭൂമി സംരക്ഷണം എന്ന പേരില്‍ വ്യാജപ്രചാരണം നടത്തി ആ മേഖലയാകെ കൈയടക്കിവച്ചിരിക്കയാണ് അക്രമിസംഘം.

ഭൂമി ഉഛേദ് പ്രതിരോധ് കമ്മിറ്റിയുടെ പേരില്‍ സിപിഐ എമ്മിനെതിരെ രൂപീകരിച്ച രാഷ്ട്രീയസഖ്യം സമാന്തരഭരണംതന്നെ നടപ്പാക്കിയിരിക്കയാണ്. പുറത്തുനിന്ന് വന്ന മാവോയിസ്റ്റ് സായുധസംഘങ്ങളുടെ സഹായം തൃണമൂല്‍ കോണ്‍ഗ്രസ് ഇതിനായി സ്വീകരിക്കുന്നുവെന്നതാണ് ഏറ്റവും അപകടകരമായ പ്രവണത. ദേശീയ സുരക്ഷാ ഉപദേഷ്ടാവുതന്നെ നന്ദിഗ്രാം സംഭവങ്ങളില്‍ മാവോയിസ്റ്റുകളുടെ പങ്ക് എടുത്തുപറഞ്ഞിട്ടുണ്ട്.

2007 ജനുവരി മുതല്‍ നന്ദിഗ്രാമില്‍ അസാധാരണമായ സ്ഥിതി നിലനില്‍ക്കുകയാണ്. തെരഞ്ഞെടുക്കപ്പെട്ട ജനപ്രതിനിധികളടക്കം ഇടതുമുന്നണി പ്രവര്‍ത്തകരെയും അനുഭാവികളെയും അവരുടെ കുടുംബാംഗങ്ങളെയും അവിടെനിന്ന് ആട്ടിയോടിക്കുകയാണ് തൃണമൂല്‍ കോണ്‍ഗ്രസിന്റെ നേതൃത്വത്തിലുള്ള അക്രമിസംഘം. സംസ്ഥാനസര്‍ക്കാരിനും പൊലീസിനും നന്ദിഗ്രാമില്‍ പ്രവേശിക്കാന്‍ കഴിയാത്ത സ്ഥിതിയാണ് ഒമ്പതു മാസമായി നിലനിന്നത്.

ബങ്കറുകള്‍ കുഴിച്ചും ലാന്‍ഡ്മൈനുകള്‍ സ്ഥാപിച്ചും യുദ്ധസമാനമായ പ്രവര്‍ത്തനങ്ങളാണ് ഇവര്‍ നടത്തുന്നത്. അക്രമം ആരംഭിച്ചശേഷം സിപിഐ എം പ്രവര്‍ത്തകരും അനുഭാവികളുമായി 27 പേര്‍ മരിച്ചു. ഇത്തരമൊരു സ്ഥിതി ഒരു ഗവണ്‍മെന്റിനും വച്ചുപൊറുപ്പിക്കാനാവില്ല. മാര്‍ച്ച് 14ന്റെ പൊലീസ് വെടിവയ്പിനുശേഷം സമാധാനം പുനഃസ്ഥാപിക്കാനും പുറത്താക്കപ്പെട്ട ജനങ്ങള്‍ക്ക് തിരികെയെത്താനും വേണ്ടി തുടര്‍ച്ചയായ ശ്രമങ്ങള്‍ ഇടതുമുന്നണി സര്‍ക്കാര്‍ നടത്തിയിട്ടുണ്ട്.

നീണ്ട സമരത്തിന്റെയും ദൃഢനിശ്ചയത്തോടെയുള്ള ശ്രമങ്ങളുടെയും ഫലമായി തിരികെ വീടുകളിലെത്താനും സമാധാനം തിരികെ കൊണ്ടുവരാനുമുള്ള ജനങ്ങളുടെ ശ്രമം വിജയിച്ചു. കൂടുതല്‍ സ്ഥലങ്ങളില്‍നിന്ന് സിപിഐ എം പ്രവര്‍ത്തകരെയും അനുഭാവികളെയും ഒഴിപ്പിക്കാനുള്ള ശ്രമങ്ങളാണ് മാവോയിസ്റ്റുകളുടെ സഹായത്തോടെ തൃണമൂല്‍ കോണ്‍ഗ്രസ് നടത്തുന്നത്. ഇതിനെ ജനങ്ങള്‍ ചെറുത്തുനില്‍ക്കുന്നു.

പശ്ചിമബംഗാളില്‍ തുടര്‍ച്ചയായി ഇടതുമുന്നണിതന്നെ തെരഞ്ഞെടുപ്പുകളില്‍ ജയിക്കുന്നതുകൊണ്ട് രാഷ്ട്രീയ എതിരാളികള്‍ ക്രുദ്ധരാണ്. ജനപിന്തുണയില്ലാത്ത അവര്‍ അക്രമം നടത്തി ലക്ഷ്യം നേടാമെന്ന് കരുതുന്നത് അസ്ഥാനത്താണ്.

പശ്ചിമബംഗാളിലെ ഇടതുമുന്നണിയില്‍ ഐക്യം കാത്തുസൂക്ഷിക്കുന്നതിലും അതിന്റെ ജനപിന്തുണ വര്‍ധിപ്പിക്കുന്നതിലും ഏറ്റവും വലിയ പാര്‍ടിയെന്ന നിലയില്‍ സിപിഐ എമ്മിന് വര്‍ധിച്ച ഉത്തരവാദിത്തമുണ്ട്; എന്നാല്‍ മറ്റ് ഘടകകക്ഷികളും അവരുടേതായ പങ്കിനെക്കുറിച്ച് ചിന്തിക്കണമെന്ന് പ്രകാശ് കാരാട്ട് മറുപടി പറഞ്ഞു.

നന്ദിഗ്രാമില്‍ അക്രമം നടത്താന്‍ സഹായിക്കുന്ന മാവോയിസ്റ്റുകള്‍ എന്താണ് ഇന്ത്യയില്‍ ചെയ്തുകൊണ്ടിരിക്കുന്നതെന്ന് സിപിഐ എമ്മിനെ വിമര്‍ശിക്കുന്നവര്‍ കാണണം. ജാര്‍ഖണ്ഡില്‍ സുനില്‍ മഹതോയെ കൊലപ്പെടുത്തുകയും നിരവധി പേരെ കൂട്ടക്കൊല ചെയ്യുകയും ചെയ്തതാണ് മാവോയിസ്റ്റുകളുടെ പ്രവര്‍ത്തനചരിത്രം.ഇക്കാര്യത്തില്‍ സമവായശ്രമമല്ല, പ്രശ്നം തീര്‍ക്കാനുള്ള ശ്രമങ്ങളാണ് നടത്തുന്നതെന്ന് പ്രകാശ് കാരാട്ട് പറഞ്ഞു.
കടപ്പാട്- ദേശാഭിമാനി

ബേബി ഡാമില്‍ വന്‍ ചോര്‍ച്ച; മുല്ലപ്പെരിയാര്‍ ഭീഷണിയില്‍
തിരുവനന്തപുരം: മുല്ലപ്പെരിയാര്‍ അണക്കെട്ടിന്റെ നിലനില്‍പ്പിനെ തന്നെ ബാധിക്കുന്ന തരത്തില്‍ ബേബിഡാമിന്റെ അടിത്തറയില്‍ വന്‍ ചോര്‍ച്ച കണ്ടെത്തി. മുല്ലപ്പെരിയാര്‍ ഡാമിലെ ചോര്‍ച്ചയുടെ അളവില്‍ ക്രമാതീതമായ വര്‍ധനയുണ്ടായിട്ടുണ്ടെന്നും ബേബി ഡാമിലെ ചോര്‍ച്ചയുടെ ഫലമായി അണക്കെട്ടിന്റെ സുരക്ഷ കടുത്ത ഭീഷണി നേരിടുകയാണെന്നും സര്‍ക്കാര്‍ നിയോഗിച്ച വിദഗ്ധ സമിതിക്ക് പരിശോധനയില്‍ വ്യക്തമായി.റിപ്പോര്‍ട്ട് ഈ ആഴ്ച ജലവിഭവമന്ത്രിക്ക് സമര്‍പ്പിക്കും.

ബേബിഡാമിന്റെ താഴ്ഭാഗത്താണ് അടിത്തറയിലൂടെ വന്‍ തോതില്‍ വെള്ളം പുറത്തേക്ക് ഒഴുകിവരുന്നത്. ബേബി ഡാം നിര്‍മിച്ചിരിക്കുന്നത് ഇളകിയതും വിള്ളലുകള്‍ വീണതുമായ പാറകളുള്ള പ്രദേശത്താണ്. ഡാം അടിത്തറയിലെ ബലക്ഷയം സംഭവിച്ച ഭാഗംവഴി പുറത്തുവന്ന് കെട്ടിക്കിടക്കുന്ന വെള്ളത്തിന്റെ അളവില്‍ ഇപ്പോള്‍ വന്‍ വര്‍ധനയാണുള്ളത്. പൊടിഞ്ഞ പാറകള്‍ക്കിടയിലൂടെ ഇങ്ങനെ നിരന്തരം വെള്ളം ഒഴുകി വരുന്നതുമൂലം പാറകളുടെ തരികള്‍ കാലക്രമത്തില്‍ ഒഴുകിപ്പോകുമെന്നും സമിതി ചൂണ്ടിക്കാട്ടുന്നു.

മുല്ലപ്പെരിയാര്‍ ജലനിരപ്പ് 136 അടിയില്‍ കൂടിയതും വെള്ളത്തിന്റെ ഒഴുക്ക് വര്‍ധിച്ചിരിക്കുന്നതും കാരണം കാലക്രമത്തില്‍ വിള്ളലുകള്‍ വലുതായി പ്രധാന അണക്കെട്ടിലെ വെള്ളം ശക്തിയോടെ പുറത്തേക്ക് ഒഴുകുന്നതോടെ ബേബി ഡാം തകരുമെന്നാണ് സമിതി വിലയിരുത്തല്‍. ഈ പരിതസ്ഥിതിയില്‍ തൊട്ടടുത്ത മണ്‍ഡാമും മുല്ലപ്പെരിയാര്‍ അണക്കെട്ട് തന്നെയും തകരാനുള്ള സാധ്യതയും തള്ളിക്കളയാനാവില്ല. ഡാമില്‍നിന്ന് ഒഴുകിവരുന്ന സീപ്പേജ് ജലത്തിന്റെ അളവിലും വര്‍ധന കണ്ടെത്തിയിട്ടുണ്ട്.
കടപ്പാട്- മാധ്യമം

കോപ്പിറൈറ്റ്‌സ്‌ അതാത്‌ പത്രങ്ങളില്‍ നിക്ഷിപ്തം

ഒരു അഭിപ്രായം ഇടൂ

Filed under പലവക

നവംബര്‍ 4 ഞായര്‍ ജാസൂട്ടിക്കും ഇക്കാസിനും ഇന്ന് നിക്കാഹ്

ജാസൂട്ടിക്കും ഇക്കാസിനും ഇന്ന് നിക്കാഹ് (പി.ഡി.എഫ് ഫയല്‍)
Ikkas-Jamin

ചിത്രത്തില്‍ ഞെക്കാന്‍ മറക്കരുതേ!!!

ഇടുക്കി: ബ്ളോഗ് എഴുത്തിലൂടെ സൈബര്‍ ലോകത്ത് കണ്ടുമുട്ടിയ നൌഫല്‍ മുബാറക്കിന്റെയും ജാസ്മിന്റെയും നിക്കാഹ് ഇന്നാണ്. രാവിലെ 11 ന് മൂന്നാര്‍ പവര്‍ഹൌസ് ജൂമാ മസ്ജിദിലാണ് സൈബര്‍ ലോകത്തിന്റെ പ്രിയപ്പെട്ട ജാസൂട്ടിയും എറണാകുളം കാക്കനാട് സ്വദേശി ഇക്കാസ് എന്ന് ബ്ളോഗില്‍ അറിയപ്പെടുന്ന നൌഫല്‍ മുബാറക്കും വിവാഹിതരാകുന്നത്.
ആദ്യത്തെ ബ്ളോഗ് വിവാഹമെന്ന കൌതുകം നാട്ടുകാര്‍ക്കില്ല. ബ്ളോഗെന്താണെന്നു തന്നെ പലര്‍ക്കും അറിയില്ല. പക്ഷേ ജാസ്മിന്റെ നിക്കാഹ് നാട്ടുകാര്‍ക്ക് ആഹ്ളാദം പകരുന്ന സംഭവമാണ്. ചിത്തിരപുരത്തെ കൊച്ചുവീട്ടില്‍ ബുദ്ധിമുട്ടുകള്‍ നിറഞ്ഞ ബാല്യം പിന്നിട്ട് സോഫ്റ്റ്വെയര്‍ എന്‍ജിനീയറായി വളര്‍ന്ന ജാസ്മിനോട് നാട്ടുകാര്‍ക്ക് വാത്സല്ല്യമേറെയാണ്. ഈ പ്രണയസംഭവം ആദ്യം പുറത്തുകൊണ്ടുവന്നത് കേരള കൌമുദി യാണ്.

കടപ്പാട്- കേരളകൗമുദി

കേരളം വരുമാനത്തിന്റെ കാല്‍ഭാഗവും പലിശയായി നല്‍കുന്നു _ലോകബാങ്ക്

ന്യൂഡല്‍ഹി: വരുമാനത്തിന്റെ 25.5 ശതമാനവും പലിശ നല്‍കുന്നതിനാണ് കേരളം വിനിയോഗിക്കുന്നതെന്ന് ലോകബാങ്ക് റിപ്പോര്‍ട്ട്. കഴിഞ്ഞ സമ്പദ്വര്‍ഷം 14,310 കോടിരൂപ സംസ്ഥാനത്തിന് വരുമാനമുണ്ടായപ്പോള്‍, 3649 കോടി രൂപയും പലിശയായി നല്‍കുകയായിരുന്നു.

ഗ്രാമീണമേഖലയില്‍ ശുദ്ധജലപദ്ധതികള്‍ നടപ്പാക്കുന്നതില്‍ മികവുകാണിച്ച മൂന്ന് ഇന്ത്യന്‍ സംസ്ഥാനങ്ങളില്‍ കേരളം ഉള്‍പ്പെടുന്നതായും റിപ്പോര്‍ട്ടിലുണ്ട്. കര്‍ണാടക, മഹാരാഷ്ട്ര എന്നിവയാണ് മറ്റു രണ്ടു സംസ്ഥാനങ്ങള്‍.

പദ്ധതികള്‍ നടപ്പാക്കുന്നതിലെ അഴിമതിയാണ് കെ.എസ്.ടി.പി. ഉള്‍പ്പടെയുള്ള കേരളത്തിലെ പല പദ്ധതികളും മുടങ്ങാന്‍ കാരണമെന്ന് ഇന്ത്യയില്‍ മൂന്ന് ദിവസത്തെ സന്ദര്‍ശനത്തിനെത്തിയ ലോകബാങ്ക് പ്രസിഡന്റ് റോബര്‍ട്ട് സോളിക് പറഞ്ഞു. സര്‍ക്കാര്‍ മാറിവരുന്നതനുസരിച്ച് പദ്ധതികള്‍ മാറ്റിവെക്കുന്നത് ആശാസ്യമല്ല.

ഇന്ത്യയ്ക്കും ചൈനയ്ക്കുമാണ് ലോകബാങ്ക് കൂടുതല്‍ പ്രാമുഖ്യം നല്‍കുന്നത്. ലോകത്തുള്ള ദരിദ്രരില്‍ 70 ശതമാനവും ഈരാജ്യങ്ങളിലായതിനാലാണ് ഈ പരിഗണന. ആഫ്രിക്കന്‍ രാജ്യങ്ങളിലുള്ളതിനേക്കാള്‍ കൂടുതല്‍ പട്ടിണിക്കാര്‍ ഇന്ത്യയിലുണ്ട്_അദ്ദേഹം ചൂണ്ടിക്കാട്ടി.

ഊര്‍ജം, കാലാവസ്ഥ വ്യതിയാനം എന്നീ കാര്യങ്ങളിലും കൂടുതല്‍ ശ്രദ്ധ അര്‍ഹിക്കുന്നത് ഇന്ത്യയും ചൈനയുമാണ്.

അടിസ്ഥാന സൌകര്യം, പരിസ്ഥിതി, കൃഷി, ദാരിദ്ര്യ നിര്‍മാര്‍ജനം എന്നീമേഖലകളില്‍ ഇന്ത്യയ്ക്ക് കൂടുതല്‍ സാമ്പത്തിക സഹായം നല്‍കാന്‍ ലോകബാങ്ക് തയ്യാറാണ്_അദ്ദേഹം പറഞ്ഞു.

ലോകബാങ്ക് പ്രസിഡന്റ് സ്ഥാനം ഏറ്റെടുത്തശേഷം ആദ്യമായിട്ടാണ് സോളിക് ഇന്ത്യയിലെത്തുന്നത്. 3760 കോടി രൂപ വായ്പ നല്‍കുന്നത് സംബന്ധിച്ച കരാറില്‍ കേന്ദ്രസര്‍ക്കാരുമായി അദ്ദേഹം ശനിയാഴ്ച ഒപ്പിട്ടു. രാജ്യത്തെ 400 സാങ്കേതിക പരിശീലന സ്ഥാപനങ്ങള്‍ക്കും 1120 കോടി രൂപയുടെ വായ്പയും ഇതില്‍ ഉള്‍പ്പെടുന്നു.

പ്രധാനമന്ത്രി ഡോ. മന്‍മോഹന്‍സിങ്, ധനമന്ത്രി പി. ചിദംബരം, വാണിജ്യമന്ത്രി കമല്‍നാഥ്, റിസര്‍വ് ബാങ്ക് ഗവര്‍ണര്‍ വൈ.വി. റെഡ്ഡി, ആസൂത്രണ കമ്മീഷന്‍ ഉപാധ്യക്ഷന്‍ മൊണ്ടേക് സിങ് അലുവാലിയ എന്നിവരുമായി സോളിക് ചര്‍ച്ച നടത്തി.
കടപ്പാട്- മാതൃഭൂമി

ആസിയാന്‍ സ്വതന്ത്ര വ്യാപാര കരാര്‍ വൈകും
ന്യൂഡല്‍ഹി: കേരളത്തിലെ നാണ്യ, സുഗന്ധവിള കര്‍ഷകര്‍ക്ക് ആശ്വാസം പകര്‍ന്നു തെക്കു കിഴക്കേഷ്യന്‍ രാജ്യങ്ങളു (ആസിയാന്‍) മായുള്ള സ്വതന്ത്ര വ്യാപാര കരാര്‍ അനിശ്ചിതമായി വൈകും.

തീരുവ രഹിത ഇറക്കുമതി വേണമെന്ന കാര്യത്തില്‍ ആസിയാ ന്‍ രാജ്യങ്ങള്‍ വിട്ടുവീഴ്ച ചെയ്യാത്ത സാഹചര്യത്തില്‍ കരാറിനു മുന്നോടിയായുള്ള ചര്‍ച്ച തല്‍ക്കാലം നിര്‍ത്തിവയ്ക്കാന്‍ കേന്ദ്ര വാണിജ്യ മന്ത്രാലയം തീരുമാനിച്ചതോടെയാണിത്. കടുംപിടിത്തം തുടരുകയാണെങ്കില്‍ കരാറില്‍ നിന്നു പിന്നാക്കം പോകുന്ന കാര്യവും മന്ത്രാലയത്തിന്റെ സജീവ പരിഗണനയിലുണ്ട്.

ആസിയാന്‍ രാജ്യങ്ങളുമായി സ്വതന്ത്ര വ്യാപാര കരാറിലേര്‍പ്പെടുന്നതു തങ്ങള്‍ക്കു ഹാനികരമാണെന്നു തോട്ടം, സുഗന്ധവ്യഞ്ജന കര്‍ഷകര്‍ പരാതി ഉയര്‍ത്തിയിരുന്നു. ഈ മാസം പകുതിയോടെ നടപ്പാവുമെന്നു കരുതിയിരുന്ന കരാര്‍ നീളുന്നതോടെ കേരളത്തിലെ കര്‍ഷകരുടെ ആശങ്കകള്‍ക്കു താല്‍ക്കാലിക വിരാമമായി.

കുരുമുളക്, തേയില, കാപ്പി, പാമോയില്‍ എന്നിവയുടെ ഇറക്കുമതി തീരുവ 20 ശതമാനമാക്കണമെന്നും 2018 വര്‍ഷത്തോടെ തീരുവ പൂര്‍ണമായി എടുത്തുകളയണമെന്നുമാണ് ആസിയാന്‍ രാജ്യങ്ങളുടെ പിടിവാശി. ഇതനുവദിക്കാനാവില്ലെന്നു നേരത്തെ ഇന്ത്യ അറിയിച്ചിരുന്നു. നിലപാടില്‍ നിന്നു വിട്ടുവീഴ്ച ചെയ്യാനാവില്ലെന്ന് ആസിയാന്‍ രാജ്യങ്ങള്‍ വ്യക്തമാക്കിയതോടെയാണ് ഈ മാസം നടത്താനിരുന്ന തുടര്‍ ചര്‍ച്ചകള്‍ നിര്‍ത്താന്‍ കേന്ദ്ര വാണിജ്യ മന്ത്രാലയം തീരുമാനിച്ചത്. തീരുവ 50% വരെ വെട്ടിക്കുറയ്ക്കാമെന്നും അതു 2022 വര്‍ഷത്തോടെ ഘട്ടംഘട്ടമായി നടപ്പാക്കാമെന്നുമാണ് ഇന്ത്യയുടെ നിലപാട്.

സിംഗപ്പൂരില്‍ 17 മുതല്‍ 20 വരെ നടക്കുന്ന പത്തംഗ ആസിയാന്‍ ഉച്ചകോടിക്കു മുന്‍പായി കരാര്‍ ഒപ്പിടാനാണു വാണിജ്യ മന്ത്രാലയം ഉദ്ദേശിച്ചിരുന്നത്. പ്രധാനമന്ത്രി ഡോ. മന്‍മോഹന്‍ സിങ്ങും ഉച്ചകോടിയില്‍ പങ്കെടുക്കുന്നതിനാല്‍ അതിനു മുന്‍പുതന്നെ കരാര്‍ യാഥാര്‍ഥ്യമാവണമെന്നതായിരുന്നു മന്ത്രാലയത്തിന്റെ താല്‍പ്പര്യം. ഇതിനായി ആസിയാന്‍ രാജ്യങ്ങളുടെ നിലപാടു മാറ്റാന്‍ നിശ്ചയിച്ചിരുന്ന തുടര്‍ചര്‍ച്ചകളാണ് നിര്‍ത്തിവച്ചിരിക്കുന്നത്.

അടുത്ത ചര്‍ച്ച അടുത്ത വര്‍ഷം മാര്‍ച്ചില്‍ മാത്രമേ നടക്കാനിടയുള്ളൂ എന്നാണ് ഇപ്പോഴത്തെ സൂചന. മാര്‍ച്ചില്‍ വീണ്ടും ചര്‍ച്ച തുടങ്ങിയാല്‍ തന്നെ കരാര്‍ ഒപ്പിടുന്നത് അടുത്ത വര്‍ഷാവസാനം വരെ നീണ്ടേക്കും. ആസിയാന്‍ രാജ്യങ്ങള്‍ കടുംപിടിത്തം തുടരുകയാണെങ്കില്‍ കരാര്‍ തന്നെ ഉണ്ടാവില്ല എന്ന നിലയിലാണ് ഇന്ത്യ സമ്മര്‍ദം തുടരുന്നത്.

കേരളത്തിനു സമാനമായ കാര്‍ഷിക കാലാവസ്ഥ തന്നെയാണ് ആസിയാന്‍ രാജ്യങ്ങളിലുള്ളത് എന്നതിനാല്‍ തീരുവ രഹിത കരാറിലൂടെ സമാന കാര്‍ഷിക ഉല്‍പന്നങ്ങള്‍ വന്‍തോതില്‍ ഇറക്കുമതി ചെയ്യപ്പെടുന്നത് സംസ്ഥാനത്തിന്റെ താല്‍പര്യങ്ങള്‍ക്കു ഹാനികരമാണെന്നാണു മന്ത്രാലയത്തിന്റെയും വിലയിരുത്തല്‍. അതുകൊണ്ടു തന്നെ ആസിയാന്‍ രാജ്യങ്ങളുടെ ആവശ്യം തീര്‍ത്തും അംഗീകരിക്കാനാവില്ലെന്നു മന്ത്രാലയ വൃത്തങ്ങള്‍ വ്യക്തമാക്കി.

സ്വതന്ത്ര വ്യാപാര കരാര്‍ വരുന്നതു കൊണ്ട് ഇന്ത്യയ്ക്കു ആസിയാന്‍ രാജ്യങ്ങളിലെ കൂടുതല്‍ വിപണി തുറന്നു കിട്ടില്ലെന്നും ആശങ്കയുണ്ട്. കരാര്‍ കൊണ്ടു നേട്ടം ആസിയാന്‍ രാജ്യങ്ങള്‍ക്കു തന്നെയാണ്. കരാറില്‍ സംരക്ഷണാവകാശമുള്ള ദുര്‍ബല ഉല്‍പന്ന പട്ടികയില്‍ ആസിയാന്‍ രാജ്യങ്ങള്‍ കൂടുതല്‍ ഉല്‍പന്നങ്ങള്‍ ഉള്‍പ്പെടുത്തിയതും ഇന്ത്യയില്‍ നിന്നുള്ള ഉല്‍പന്നങ്ങള്‍ക്കു പരിമിത വിപണി സ്വാതന്ത്യ്രം മാത്രം അനുവദിക്കുന്നതും ആശങ്കകള്‍ ഉയര്‍ത്തിയിട്ടുണ്ട്. കരാറില്ലെങ്കിലും ഇന്ത്യയുടെ കയറ്റുമതി സാധ്യതകള്‍ക്കു കോട്ടമില്ലെന്നും ചൂണ്ടിക്കാണിക്കപ്പെടുന്നു.

ഉപഭൂഖണ്ഡത്തിലെയും ഏഷ്യയിലെയും രാജ്യങ്ങളുമായി കൂടുതല്‍ പ്രാദേശിക സ്വതന്ത്ര വ്യാപാര കരാറുകളുണ്ടാക്കാനുള്ള നയത്തിന്റെ ഭാഗമായാണു പത്തംഗ ആസിയാന്‍ രാജ്യങ്ങളുമായി വ്യാപാര ചര്‍ച്ചകള്‍ക്കു തുടക്കമിട്ടത്. സ്വതന്ത്ര വ്യാപാര കരാറുകളെ ഭാവിയില്‍ സമഗ്ര സാമ്പത്തിക പങ്കാളിത്ത കരാറുകളാക്കാനും അതുവഴി ഉഭയകക്ഷി നിക്ഷേപ സഹകരണത്തിനുള്ള സാധ്യതകള്‍ കണ്ടെത്താനും വാണിജ്യ മന്ത്രാലയത്തിനു പദ്ധതികളുണ്ട്.

വിയറ്റ്നാം, തായ്ലന്‍ഡ് തുടങ്ങിയ രാജ്യങ്ങള്‍ക്കു കേരളവുമായുള്ള കാലാവസ്ഥാ സാദൃശ്യം കാരണം കുരുമുളകടക്കമുള്ള നാണ്യ, സുഗന്ധവിളകളുടെ കാര്യത്തില്‍ പരസ്പരം മല്‍സരിക്കേണ്ടി വരുന്നതിനാല്‍ ആസിയാന്‍ രാജ്യങ്ങളുമായുള്ള കരാര്‍ കേരളത്തിനു വിനയാകും.

അതിനാല്‍ കുരുമുളക്, തേയില, കാപ്പി, പാമോയില്‍ എന്നിവയെ ദുര്‍ബല ഉല്‍പന്ന പട്ടികയില്‍ ഉള്‍പ്പെടുത്തണമെന്നു വ്യാപകമായ ആവശ്യം ഉയര്‍ന്നിരുന്നു. എന്നാല്‍, തോട്ടം ഉല്‍പന്നങ്ങളുടെയും പാമോയിലിന്റെയും തീരുവ ഇല്ലാതാക്കണമെന്നാണ് ഇന്തൊനീഷ്യയും മലേഷ്യയും ആവശ്യപ്പെടുന്നത്. ഈ രാജ്യങ്ങളില്‍ നിന്നു പാമോയില്‍ വന്‍ തോതില്‍ ഇറക്കുമതി ചെയ്യപ്പെടാന്‍ സാധ്യതയുള്ളതു വെളിച്ചെണ്ണയെ പ്രതികൂലമായി ബാധിക്കും.

വിയറ്റ്നാമടക്കമുള്ള രാജ്യങ്ങളില്‍ നിന്നു കുരുമുളകും ധാരാളമായി ഇറക്കുമതി ചെയ്യപ്പെടുന്നത് ആഭ്യന്തര കുരുമുളകിനു ഭീഷണിയാകും. ശ്രീലങ്കയുമായുള്ള സ്വതന്ത്ര വ്യാപാര കരാര്‍ വഴിയെത്തുന്ന കുരുമുളകിന് അളവു നിയന്ത്രണം ഏര്‍പ്പെടുത്തിയിട്ടും ആഭ്യന്തര കുരുമുളകിനുള്ള ഭീഷണി ഒഴിഞ്ഞിട്ടില്ല.
ഈ ഭീഷണികള്‍ നിലനില്‍ക്കുമ്പോഴാണ് തീരുവ രഹിത ഇറക്കുമതി അനുവദിക്കണമെന്ന് ആസിയാന്‍ രാജ്യങ്ങള്‍ കടുംപിടിത്തം തുടരുന്നത്.
കടപ്പാട്- മനോരമ

കാര്‍ഷിക കടാശ്വാസം: വിഹിതം സ്വീകരിക്കാത്തത് കേരളം മാത്രം; ആന്റണി
പത്തനംതിട്ട: കേന്ദ്രം കാര്‍ഷിക പാക്കേജില്‍ ഉള്‍പ്പെടുത്തിയ കാര്‍ഷിക കടാശ്വാസ പദ്ധതിയുടെ വിഹിതം സ്വീകരിക്കാതിരിക്കുന്നത് കേരളം മാത്രമെന്ന് കേന്ദ്രമന്ത്രി എ.കെ. ആന്റണി.

ബംഗാള്‍ ഉള്‍പ്പെടെ സംസ്ഥാനങ്ങളെല്ലാം തുക വാങ്ങിക്കഴിഞ്ഞു. വ്യവസ്ഥയുടെ തര്‍ക്കമാണ് കേരളം ഉന്നയിക്കുന്നത്. വര്‍ഷങ്ങള്‍ക്ക് ശേഷം നടത്തേണ്ട തിരിച്ചടവിന്റെ പേരില്‍ കടക്കെണിയില്‍ അകപ്പെട്ട കര്‍ഷകര്‍ക്ക് ആശ്വാസം പകരുന്ന പദ്ധതിയില്‍നിന്ന് ഒഴിഞ്ഞുനില്‍ക്കുന്നത് ശരിയല്ല. ഗസ്റ്റ് ഹൌസില്‍ മാധ്യമപ്രവര്‍ത്തകരോട് സംസാരിക്കുകയായിരുന്നു ആന്റണി.

ചരിത്രത്തില്‍ മറ്റൊരു സര്‍ക്കാറും കേരളത്തോട് കാണിക്കാത്ത ഉദാരസമീപനമാണ് യു.പി.എ സര്‍ക്കാറിന്റേത്. കേന്ദ്രവിരുദ്ധ സമരത്തിന് ഇനി പ്രസക്തിയില്ല. ഒറ്റപ്പെട്ട ചില പ്രശ്നങ്ങളില്‍ വേണ്ടരീതിയില്‍ സഹായിക്കാന്‍ കേന്ദ്രത്തിന് കഴിഞ്ഞിട്ടില്ലെന്നത് ശരിയാണ്്. അതിന്റെ പേരില്‍ കേന്ദ്രത്തില്‍നിന്ന് ഒഴുകിയെത്തുന്ന സഹായം ആര്‍ക്കും കണ്ടില്ലെന്ന് നടിക്കാനാവില്ല.

പിന്തുണക്കുന്ന കക്ഷികളുമായി തര്‍ക്കങ്ങളുണ്ടെങ്കിലും പെട്ടെന്നൊരു തെരഞ്ഞെടുപ്പിന് സാധ്യതയില്ലെന്നും ആന്റണി പറഞ്ഞു.

രാജ്യം സാമ്പത്തികവളര്‍ച്ച കൈവരിക്കുമ്പോഴും അതിന്റെ ഗുണഫലങ്ങള്‍ വലിയൊരു വിഭാഗത്തിന് ലഭിക്കുന്നില്ല. അവര്‍ക്ക് ആശ്വാസമെത്തിക്കാനുള്ള നടപടികളാണ് സര്‍ക്കാര്‍ സ്വീകരിക്കുന്നത്.
ഭൂപരിഷ്കരണ പദ്ധതികള്‍ നിലച്ചതിന്റെ ബുദ്ധിമുട്ടുകള്‍ ഒഴിവാക്കാനുള്ള പദ്ധതിയും പ്രധാനമന്ത്രി മുന്‍കൈയെടുത്ത് നടപ്പാക്കുകയാണ്. ജില്ലാ കോണ്‍ഗ്രസ് കമ്മറ്റി സംഘടിപ്പിച്ച വാര്‍ഡ് പ്രസിഡന്റുമാര്‍ക്ക് തിരിച്ചറിയല്‍ കാര്‍ഡ് വിതരണം ചെയ്യുന്ന യോഗം ഉദ്ഘാടനം ചെയ്യാനെത്തിയതായിരുന്നു ആന്റണി.
കടപ്പാട്- മാധ്യമം

രവീന്ദ്രന്‍ പട്ടയം: കോണ്‍. നേതാക്കളുടെ ശിപാര്‍ശക്കത്തും പുറത്തായി

മൂന്നാര്‍: രവീന്ദ്രന്‍ പട്ടയങ്ങള്‍ക്കായി കോണ്‍ഗ്രസ് നേതാക്കള്‍ ശിപാര്‍ശ ചെയ്ത കത്തുകള്‍ പുറത്തായി. സി.പി.എം.-സി.പി.ഐ. നേതാക്കളുടെ ശിപാര്‍ശക്കത്തുകളും അടുത്തനാളില്‍ പുറത്തുവന്നിരുന്നു.

രവീന്ദ്രന്‍ പട്ടയങ്ങള്‍ക്കു പിന്നില്‍ രാഷ്ട്രീയ സ്വാധീനം നടന്നതായുള്ള ആരോപണങ്ങള്‍ ശരിവയ്ക്കും വിധമാണ് ശിപാര്‍ശക്കത്തുകള്‍ പുറത്തുവന്നിരിക്കുന്നത്. മുന്‍ എം.എല്‍.എ: എ.കെ. മണി 1999 മെയ് പത്തിന് വട്ടവട സ്വദേശി ബാലമുരുകന്റെ പട്ടയം ശരിയാക്കി നല്‍കാനാണ് ഡെപ്യൂട്ടി തഹസില്‍ദാര്‍ എം.ഐ. രവീന്ദ്രന് ശിപാര്‍ശക്കത്തു നല്‍കിയത്.
ഡി.സി.സി. ജനറല്‍ സെക്രട്ടറി സി.എന്‍. സോമരാജന്‍ സുഹൃത്ത് കാളിദാസന്‍ വശം 1999 ജനുവരി 25-നു കൊടുത്തുവിട്ട ശിപാര്‍ശക്കത്തില്‍ ഇയാള്‍ പറയുന്ന ഭൂമിയുടെ പട്ടയകാര്യങ്ങള്‍ ശരിയാക്കി കൊടുക്കാനാണ് ആവശ്യപ്പെട്ടിട്ടുള്ളത്.

ഭൂമി പതിവ് സമിതി അംഗീകരിച്ച പട്ടികപ്രകാരമാണ് പട്ടയങ്ങള്‍ നല്‍കിയതെന്ന് അവകാശപ്പെടുമ്പോള്‍ രാഷ്ട്രീയ നേതാക്കളുടെ ശിപാര്‍ശക്കത്തുകള്‍ പ്രകാരം നല്‍കിയ പട്ടയങ്ങളാണിവയില്‍ ഏറെയെന്നും വ്യക്തമായിട്ടുണ്ട്്.

ധനശ്രീ ഹോട്ടലിനടക്കം നിരവധി കൈയേറ്റ ഭൂമിക്കു പട്ടയം നല്‍കാന്‍ ജനകീയ ഭൂമി പതിവ് സമിതി ഡെപ്യൂട്ടി തഹസില്‍ദാര്‍ക്ക് നിര്‍ദേശം നല്‍കിയിരുന്നു.

സി.പി.എം.-സി.പി.ഐ. ഓഫീസുകളും രവീന്ദ്രന്‍ പട്ടയത്തിലുള്ളതാണ്.
കടപ്പാട്- മംഗളം

ചിദംബരം വക്കീലായിരുന്ന കമ്പനിയുടെ 2300 കോടി എഴുതിത്തള്ളി
ന്യൂഡല്‍ഹി: രാജ്യസഭാംഗവും ബിജു ജനതാദള്‍ നേതാവുമായ ബൈജയന്ത് പാണ്ഡയുടെ കമ്പനി വരുത്തിയ 2300 കോടി രൂപയുടെ കടം കേന്ദ്ര ധനമന്ത്രി പി ചിദംബരം ഇടപെട്ട് എഴുതിത്തള്ളി. പാണ്ഡയുടെ ഇന്ത്യന്‍ മെറ്റല്‍ ഫെറോ അലോയ്സ് ലിമിറ്റഡ് (ഐഎംഎഫ്എ), ഇന്ത്യന്‍ ചാര്‍ജ് ക്രോം ലിമിറ്റഡ് കമ്പനി (ഐസിസിഎല്‍) എന്നീ കമ്പനികള്‍ എടുത്ത വായ്പയാണ് ഏഴുതിത്തള്ളാന്‍ തീരുമാനിച്ചത്.

നേരത്തേ പാണ്ഡയുടെ കമ്പനിയായ ഐഎംഎഫ്എയുടെ അഭിഭാഷകനായിരുന്നു ചിദംബരം. പ്രശ്നത്തില്‍ ഒറീസ ഹൈക്കോടതി കേന്ദ്ര ബാങ്കിങ് സെക്രട്ടറിക്ക് നോട്ടീസ് നല്‍കി.

രോഗാതുരമായ ഐസിസിഎല്‍ 2004 ലാണ് പാണ്ഡയുടെ ഐഎംഎഫ്എ ഏറ്റെടുക്കുന്നത്. ഈ ഘട്ടത്തിലാണ് പത്ത് ബാങ്കുകളില്‍നിന്ന് 3000 കോടി രൂപ വായ്പയെടുത്തത്. ഇതില്‍ എട്ട് ബാങ്കുകളും പൊതുമേഖലയിലാണ്. 2004 ല്‍ കേന്ദ്ര ധനമന്ത്രാലയത്തിന്റെ കണ്‍സള്‍ട്ടേറ്റീവ് കമ്മിറ്റി അംഗമായ ശേഷമാണ് ഐഡിബിഐ, യൂണിയന്‍ ബാങ്ക്, യൂക്കോ ബാങ്ക് തുടങ്ങിയ ബാങ്കുകളില്‍നിന്ന് പാണ്ഡ വായ്പ വാങ്ങുന്നത്. ഈ ഘട്ടത്തിലും പാണ്ഡയെ ചിദംബരം സഹായിച്ചു. പാണ്ഡ എടുത്ത 3000 കോടിക്കടുത്ത വായ്പയില്‍ 619 കോടി രൂപമാത്രം 18 വര്‍ഷംകൊണ്ട് തിരിച്ചടച്ചാല്‍ മതിയെന്ന് തീരുമാനിച്ചു. ബാക്കി എഴുതിത്തള്ളും.

ചിദംബരം അധികാര ദുര്‍വിനിയോഗം നടത്തിയതായി നേരത്തേയും ആരോപണമുണ്ടായിരുന്നു. തമിഴ്നാട്ടിലെ രാജാപാളയത്തെ കര്‍പ്പകാംബാള്‍ മില്‍സ് വന്‍ തുകയുടെ നികുതിവെട്ടിപ്പ് നടത്തിയപ്പോള്‍ സര്‍ക്കാര്‍ അഭിഭാഷകയായി ഭാര്യ നളിനി ചിദംബരത്തെ അയച്ച് കേസില്‍ തോല്‍ക്കുകയായിരുന്നു. മില്‍ ഉടമ ചിദംബരത്തിന്റെ സഹോദരനായിരുന്നു. ബാല്‍കോയുടെ 49 ശതമാനം ഓഹരികള്‍ സ്റ്റൈര്‍ലെറ്റിന് വിറ്റതിനു പിന്നിലും ചിദംബരമാണെന്ന് ആരോപണമുണ്ട്. ധനമന്ത്രിയാകുന്നതുവരെ ചിദംബരം ഡയറക്ടറായിരുന്ന വേദാന്ത റിസോഴ്സ് കമ്പനി ഉടമ അനില്‍ അഗര്‍വാളിന്റെയാണ് സ്റ്റൈര്‍ലെറ്റും.
കടപ്പാട്- ദേശാഭിമാനി

ഒരു കോടി നഷ്ടപരഹാരം തേടി ഹര്‍ത്താല്‍ വിരുദ്ധമുന്നണി കോടതിയിലേക്ക്
ഒറ്റപ്പാലം: ഒരു കോടി രൂപയുടെ നഷ്ടം രാഷ്ട്രീയപാര്‍ട്ടികളില്‍ നിന്ന് ഈടാക്കണമെന്നാവശ്യപ്പെട്ട് ഹര്‍ത്താല്‍ വിരുദ്ധമുന്നണി ഹൈക്കോടതിയിലേക്ക്. പാലക്കാട് ജില്ലയില്‍ നടന്ന മൂന്നു ഹര്‍ത്താലുകള്‍ മൂലം സമൂഹത്തിന് ഒരു കോടി രൂപയുടെ നഷ്ടം നേരിട്ടിട്ടുണ്െടന്നാണ് ഹര്‍ത്താല്‍ വിരുദ്ധമുന്നണിയുടെ പരാതി.

സംഘടനയ്ക്കുവേണ്ടി ജില്ലാ ചെയര്‍മാന്‍ പി.വി.ഹംസയാണ് നഷ്ടപരിഹാരം ആവശ്യപ്പെട്ട് ഹൈക്കോടതിയെ സമീപിക്കുന്നത്. കരിപ്പൂര്‍ വിമാനത്താവളത്തിന്റെ വികസനത്തിനായി മലബാര്‍ ഹര്‍ത്താലിന് ആഹ്വാനം ചെയ്ത മുസ്ലിം ലീഗ്, മലമ്പുഴയില്‍ സി.പി.എം പ്രവര്‍ത്തകന്‍ കൊല്ലപ്പെട്ടതിനെ തുടര്‍ന്നു നടന്ന ഹര്‍ത്താല്‍, സേലം റെയില്‍വേ ഡിവിഷന്റെ പേരില്‍ ബി.ജെ.പി നടത്തിയ ഹര്‍ത്താല്‍ എന്നിവമൂലം ഒരുകോടിയുടെ നഷ്ടം വന്നുവെന്നാണ് ഹര്‍ത്താല്‍ വിരുദ്ധമുന്നണിയുടെ പരാതിയെന്ന് പ്രസിഡന്റ് ഹംസ പറഞ്ഞു.

നിര്‍ബന്ധിത ഹര്‍ത്താലുകള്‍ ഭരണഘടനാവിരുദ്ധവും നീതിരഹിതവുമാണെന്ന ഹൈക്കോടതി വിധിന്യായവും ഇതിനെ പിന്തുണയ്ക്കുന്നു. സുപ്രീംകോടതിവിധിയും ഹര്‍ത്താല്‍ ഉണ്ടാകുന്ന നഷ്ടം ഈടാക്കാന്‍ സര്‍ക്കാര്‍ ഉത്തരവാദികളാണെന്ന നിലപാടിലേക്കാണ് വിരല്‍ചൂണ്ടുന്നതെന്ന് പി.വി.ഹംസ പറയുന്നു. ഇത്തരത്തില്‍ മുംബൈയില്‍ ഹര്‍ത്താല്‍ നടത്തിയ സംഘടനയില്‍നിന്നും തുക നഷ്ടപരിഹാരം വാങ്ങിയ ഹൈക്കോടതിവിധി കേരളത്തിലും ബാധകമാണെന്നാണ് ഹര്‍ത്താല്‍ വിരുദ്ധമുന്നണി പറയുന്നത്.
കടപ്പാട്- ദീപിക

1 അഭിപ്രായം

Filed under കേരളം, മാധ്യമം, യൂണികോഡ്

ഒന്നാമനായ കേരള ബ്ലോഗര്‍ B.R.P.Bhaskar

കാമ്പസ് അക്രമത്തിന്റെ രാഷ്ട്രീയ പിതൃത്വം
ബി.ആര്‍.പി. ഭാസ്കര്‍
ചങ്ങനാശ്ശേരി എന്‍.എസ്.എസ് കോളേജില്‍ അരങ്ങേറിയ അക്രമസംഭവങ്ങളെക്കുറിച്ചു നടന്ന ചര്‍ച്ചകളിലെ പ്രധാന വിഷയം എ.എസ്.ഐ എം.സി.ഏലിയാസിനെ കൊന്നത് ആരാണെന്നതായിരുന്നു. അതു ചെയ്തത് എ.ബി.വി.പിക്കാരാണെന്ന കാര്യത്തില്‍ പിണറായി വിജയന്‍ മുതല്‍ താഴോട്ടുള്ള സി.പി.എംകാര്‍ക്ക് സംശയമുണ്ടായിരുന്നില്ല. എസ്.എഫ്.ഐക്കാരാണ് ചെയ്തതെന്ന കാര്യത്തില്‍ പി.കെ. കൃഷ്ണദാസ് മുതല്‍ താഴോട്ടുള്ള ബി.ജെ.പിക്കാര്‍ക്കും സംശയമുണ്ടായിരുന്നില്ല. ഇത്തരം സന്ദര്‍ഭങ്ങളില്‍ രാഷ്ട്രീയ നേതാക്കള്‍ പറയുന്നത് ശ്രദ്ധിച്ചാല്‍ വിശ്വാസം എങ്ങനെയാണ് ഓരോരുത്തരെയും രക്ഷിക്കുന്നതെന്ന് മനസ്സിലാക്കാന്‍ കഴിയും.

ചങ്ങനാശ്ശേരിയില്‍ നടക്കാന്‍ പാടില്ലാത്തത് നടന്നെന്നു പറയുന്നതില്‍ അര്‍ത്ഥമില്ല. പല കാമ്പസുകളിലും വളരെക്കാലമായി നടക്കുന്ന അക്രമങ്ങളുടെ വെളിച്ചത്തില്‍ നടക്കുമെന്ന് മുന്‍കൂട്ടി കാണാന്‍ കഴിയുമായിരുന്ന സംഭവമാണ് നടന്നത്. എവിടെ എപ്പോള്‍ എന്നതുമാത്രമായിരുന്നു അറിയേണ്ടിയിരുന്നത്. ആധുനിക മാദ്ധ്യമ പ്രവര്‍ത്തനത്തിന്റെ ഒരു ദൌര്‍ബല്യം അത് സംഭവങ്ങളില്‍ ശ്രദ്ധ കേന്ദ്രീകരിക്കുന്നെന്നതാണ്. സംഭവങ്ങളിലേക്ക് നയിക്കുന്ന പ്രക്രിയകളെ അത് ശ്രദ്ധിക്കുന്നില്ല. ശ്രദ്ധിച്ചാല്‍ ഒരുപക്ഷേ, അവയില്‍ പതിയിരിക്കുന്ന അപകടങ്ങള്‍ തിരിച്ചറിയാനും ഒഴിവാക്കാനും കഴിഞ്ഞേക്കും.

വിദ്യാര്‍ത്ഥി പ്രസ്ഥാനങ്ങളുടെ ചരിത്രം പരിശോധിക്കുമ്പോള്‍ ലോകമൊട്ടുക്ക് അവ കാലാകാലങ്ങളില്‍ ഭരണകൂടങ്ങളുമായി ഏറ്റുമുട്ടിയിട്ടുള്ളതായി കാണാം. ഇന്ത്യയുള്‍പ്പെടെ പല രാജ്യങ്ങളിലെയും സ്വാതന്ത്യ്രസമരങ്ങള്‍ക്ക് വിദ്യാര്‍ത്ഥികള്‍ വലിയ സംഭാവനകള്‍ നല്കി. ചില നാടുകളില്‍ സ്വേച്ഛാധിപതികളെ തുരത്തി ജനാധിപത്യം സ്ഥാപിക്കുന്നതില്‍ വിദ്യാര്‍ത്ഥിപ്രസ്ഥാനങ്ങള്‍ നിര്‍ണായകമായ പങ്കുവഹിച്ചു. വിദ്യാര്‍ത്ഥികളെല്ലാം പാഠപുസ്തകങ്ങളില്‍ തല പൂഴ്ത്തി കഴിഞ്ഞിരുന്നെങ്കില്‍ പല നാടുകളും ഒരുപക്ഷേ, സ്വാതന്ത്യ്രവും ജനാധിപത്യവും എന്താണെന്ന് അറിയാന്‍ കൂടുതല്‍ വൈകിയേനേ. എന്നാല്‍ നമ്മുടെ കാമ്പസുകളില്‍ ഇപ്പോള്‍ നടക്കുന്ന അക്രമങ്ങള്‍ക്ക് ഈ ചരിത്രവസ്തുതകള്‍ നീതീകരണമാകുന്നില്ല. അതിന് നേതൃത്വം നല്കുന്നവര്‍ അധികാരപ്പോരാട്ടത്തില്‍ ഏര്‍പ്പെട്ടിരിക്കുന്ന പാര്‍ട്ടികളുടെ നിയന്ത്രണത്തിലുള്ളവരാണ്. അവരുടെ അജണ്ട നിശ്ചയിക്കുന്നത് ആ പാര്‍ട്ടികളാണ്. ഓരോ കക്ഷിയുടെയും ഭരണസമിതിയില്‍ വിദ്യാര്‍ത്ഥി സംഘടനയുടെ ചുമതലയുള്ള നേതാവുണ്ടാകും. അദ്ദേഹത്തിന്റെ മുന്‍ഗണനാക്രമ പട്ടികയിലെ ആദ്യ ഇനം വിശാല രാജ്യതാത്പര്യങ്ങളല്ല, സങ്കുചിത കക്ഷിതാത്പര്യമാണ്.

പ്രസ്ഥാനം ഉയര്‍ത്തിപ്പിടിക്കുന്ന വിശ്വാസപ്രമാണങ്ങളാകാം വിദ്യാര്‍ത്ഥികളെ ആകര്‍ഷിക്കുന്നത്. എന്നാല്‍ പ്രമുഖ കക്ഷികളുടെ സമീപകാല ചരിത്രം കണക്കിലെടുക്കുമ്പോള്‍ ചിലര്‍ വിദ്യാര്‍ത്ഥി രാഷ്ട്രീയത്തെ ഉന്നതങ്ങളിലേക്കുള്ള കുറുക്കുവഴിയായി കാണാനുള്ള സാദ്ധ്യത തള്ളിക്കളയാനാവില്ല. ഒരാള്‍ ബാല്യത്തിലേ ഡോക്ടറോ എന്‍ജിനിയറോ ആകണമെന്ന് തീരുമാനിക്കുകയും അതിനായി പ്രയത്നിക്കുകയും ചെയ്യുന്നതില്‍ തെറ്റില്ലെങ്കില്‍ മറ്റൊരാള്‍ രാഷ്ട്രീയപദവി ലക്ഷ്യമിടുന്നതിലും അതിനായി പ്രയത്നിക്കുന്നതിലും തെറ്റ് കാണേണ്ട കാര്യമില്ല. ജനാധിപത്യ വ്യവസ്ഥയുടെ നിലനില്പിന് രാഷ്ട്രീയകക്ഷികള്‍ കൂടിയേ തീരൂ. വലിയ കമ്പനികള്‍ കാമ്പസുകളിലെത്തി അവര്‍ക്ക് ആവശ്യമുള്ളവരെ കണ്ടെത്തി പാസായി ഇറങ്ങുന്നതിനുമുന്‍പുതന്നെ ജോലി നല്കുന്ന രീതി നമുക്ക് ഇന്ന് സുപരിചിതമാണ്. പാര്‍ട്ടികള്‍ കാമ്പസുകളില്‍ നിന്ന് ഭാവി നേതാക്കളെ കണ്ടെത്തുന്നതിനെ അതുപോലെ കാണാവുന്നതാണ്.
രാഷ്ട്രീയകക്ഷികള്‍ വിദ്യാര്‍ത്ഥി സംഘടനകളെ സ്വന്തം താത്പര്യങ്ങള്‍ക്കുവേണ്ടി ഉപയോഗിക്കുന്നതാണ് യഥാര്‍ത്ഥ പ്രശ്നം. കാമ്പസുകളിലെ അക്രമങ്ങള്‍, കണ്ണൂരിലെ കൊലപാതകങ്ങള്‍ പോലെ, ആധിപത്യത്തിനുവേണ്ടി പാര്‍ട്ടികള്‍ നടത്തുന്ന ശ്രമത്തിന്റെ ഭാഗമാണ്. പരസ്പരം പോരടിക്കുന്ന വിദ്യാര്‍ത്ഥികള്‍ രാഷ്ട്രീയ നേര്‍ച്ചക്കോഴികളാണ്. ഈയിടെയുണ്ടായ ചില സംഭവങ്ങള്‍ വളരെക്കാലം കണ്ണൂരില്‍ ഒതുങ്ങിനിന്ന കൊലപാതക രാഷ്ട്രീയം വ്യാപിക്കുന്നുവെന്ന സൂചന നല്കുന്നു. ഇത് തടയാനുള്ള ചുമതല ഉത്തരവാദിത്വബോധമുള്ള എല്ലാ കക്ഷികള്‍ക്കുമുണ്ട്.

ഇക്കാര്യത്തില്‍ സി.പി.എമ്മിന് മറ്റേത് കക്ഷിയെക്കാളും കൂടുതല്‍ ഉത്തരവാദിത്വമുണ്ട്. ഒന്നാമതായി പാര്‍ട്ടിഗ്രാമങ്ങളും പാര്‍ട്ടി കാമ്പസുകളും സൃഷ്ടിച്ചുകൊണ്ട് അക്രമരാഷ്ട്രീയത്തിന് തുടക്കം കുറിച്ചത് ആ പാര്‍ട്ടിയാണെന്ന് കരുതാന്‍ ന്യായമുണ്ട്. രണ്ടാമതായി സംസ്ഥാനത്തെ ഏറ്റവും വലിയ കക്ഷിയെന്ന നിലയിലും അധികാരത്തിലിരിക്കുന്ന കക്ഷിയെന്ന നിലയിലും സമാധാനം പുനഃസ്ഥാപിക്കുന്നതിന് നേതൃത്വം നല്കാനുള്ള കടമ അതിനുണ്ട്. ശക്തരുടെ അക്രമങ്ങളെ ചെറുക്കാനുള്ള ദുര്‍ബലരുടെ ശ്രമങ്ങള്‍ ലോകമൊട്ടുക്ക് ഭീകരതയുടെ വളര്‍ച്ചയ്ക്ക് വഴിതെളിച്ചിട്ടുണ്ട്. കേരളത്തിലെ കാമ്പസുകളിലും ഈ പ്രവണതയുടെ ലക്ഷണങ്ങള്‍ കണ്ടുതുടങ്ങിയിട്ടുണ്ട്.

ഇതെഴുതുന്ന സമയത്ത് എ.എസ്.ഐ ഏലിയാസ് കൊല്ലപ്പെടുകയായിരുന്നോ ഹൃദയാഘാതംമൂലം മരിക്കുകയായിരുന്നോ എന്ന് കൃത്യമായി പറയാനാവാത്ത അവസ്ഥയാണുള്ളത്. സംഭവം നടന്ന സമയത്ത് അത് കൊലപാതകമാണെന്ന് പൊലീസുകാര്‍ കരുതിയെങ്കില്‍ അവരെ കുറ്റപ്പെടുത്താനാവില്ല. അതേസമയം, ഔദ്യോഗിക പാര്‍ട്ടി സംവിധാനങ്ങള്‍ കുറ്റവാളികളെ സംബന്ധിച്ചു നടത്തിയ പരസ്യപ്രഖ്യാപനങ്ങള്‍ പൊലീസ് അന്വേഷണം സത്യസന്ധമാകുമോയെന്ന സംശയം ഉയര്‍ത്തിയിട്ടുണ്ട്. കസ്റ്റഡിയിലെടുത്ത യുവാക്കളെ പൊലീസ് ക്രൂരമായി മര്‍ദ്ദിച്ചെന്നതിന് പ്രഥമദൃഷ്ട്യാ തെളിവുണ്ട്. സംസ്ഥാന പൊലീസില്‍ സി.പി.എം ഫ്രാക്ഷനുകള്‍ പ്രവര്‍ത്തിക്കുന്നുണ്ടെന്നതും ഇവിടെ ഓര്‍ക്കേണ്ടതാണ്.

കംപ്യൂട്ടര്‍ മലയാളം
മലയാള ഭാഷയെ കംപ്യൂട്ടറുമായി ബന്ധിപ്പിക്കുന്ന കാര്യത്തില്‍ നമ്മുടെ സ്ഥാപനങ്ങളും പണ്ഡിതന്മാരും കാട്ടുന്ന അനാസ്ഥ ദോഷം ചെയ്തിട്ടുണ്ടെന്ന് കഴിഞ്ഞയാഴ്ച ഈ പംക്തിയില്‍ ഞാന്‍ എഴുതുകയുണ്ടായി. ഉദാഹരണമായി മലയാളം യൂണിക്കോഡില്‍ ല്‍, ള്‍ എന്നിവ കിട്ടില്ലെന്ന് ചൂണ്ടിക്കാണിക്കുകയും ചെയ്തു. ഇത് ശരിയല്ലെന്ന് കാലിഫോര്‍ണിയയില്‍ ഗൂഗിള്‍ കമ്പനിയില്‍ സോഫ്ട്വെയര്‍ എന്‍ജിനിയറായ സിബു ജോണി അറിയിക്കുന്നു. ചില്ലുകള്‍ സൃഷ്ടിക്കാവുന്ന സംവിധാനങ്ങള്‍ ഇപ്പോള്‍ത്തന്നെയുണ്ട്. കൂടുതല്‍ സ്വീകാര്യതയുള്ള മലയാളം യൂണിക്കോഡിനുള്ള ശ്രമം തുടരുകയും ചെയ്യുന്നു. മെച്ചപ്പെട്ട ഒരു യൂണിക്കോഡ് സംവിധാനം ആറുമാസത്തില്‍ പ്രതീക്ഷിക്കാമെന്ന് സിബു പറയുന്നു.

കടപ്പാട് – കേരളകൗമുദി

ഒരു അഭിപ്രായം ഇടൂ

Filed under കേരളം, മാധ്യമം